لوقا 11
11
سِيذِيثْنغ عِيْسَى يسڒْمَاذ يمحْضَارن نّس مَامْش غَا ࢲَّادْجن
1ئِجّن ن وَاسّ عِيْسَى يتْࢲَادْجَا ذݣ يِجّن ن ومْشَان. وَامِي يكمّڒ ثْࢲَادْجِيث نِّي ينَّا-ٱس يجّن زݣ يمحْضَارن نّس: "آ سِيذِي، سڒْمذ-اَنغ أَ نࢲَّادْج مَامّش يسڒْمَاذ يَحْيَى يمحْضَارن نّس."
2ينَّا-ٱسن عِيْسَى: "مڒْمِي غَا ثࢲَّادْجم إِنِيم اَمُّو:
آ بَابَاثْنغ، ذ اَمقّْرَان إِݣ يدْجَا يِيسم نّش.
أَذ د يَاس ڒْمُلْك نّش.
3ؤُش-اَنغ كُڒ نْهَار اَغْرُوْم إِي غَا نحْذَاج.
4غْفَر-اَنغ ڒْمُعْصِيَاث نّغ إِ نشِّين،
مَامّش نْسمّح إِ يِنِّي إِي كِذْنغ يخطَّان.
وَار ذَانغ تݣّ شَا ذِي ڒمْحَاين."
5-6ينَّا-ٱسن عِيْسَى: "مَثَالَان يجّن زَّايْوم غَارس اَمدُّوْكڒ. ذِي ڒْوسْط ن دْجِيڒث يرُوْح غَار ومدُّوْكڒ نّس ينَّا-ٱس: آي اَمدُّوْكڒ، ؤُش-اَيِي ثْڒَاثَا ن وغْرُوْم مِينْزِي يجّن ن ومدُّوْكڒ ينُو يسَفَر يكَّا-د خَافِي، نش وَار غَارِي مِين ذَاس غَا ؤُشغ. 7أَخَاس يَارّ ومدُّوْكڒ نِّي نّس زِي ذَاخڒ ن ثدَّارْث اَذَاس يِينِي: وَار ذَايِي تسدَّاع شَا! نش ڒخُّو ثَوَّارْث ثْبلّع ثَارْوَا ينُو طّْسن اَكِذِي، وَار زمَّرغ شَا اَذ كَّرغ اَذَاش ؤُشغ." 8ينَّا-ٱسن عِيْسَى: "أَذَاوم ينِيغ: ذ اَمزْوَارُو يُوْݣِي اَذ يكَّر اَذَاس يُوْش مِين يرزُّو وَاخَّا نتَّا ذ اَمدُّوْكڒ نّس، وَلَكِن اَذ يكَّر اَذَاس يُوْش مَارَّا مِين يحْذَاج ڒَاحقَّاش يُوْسَا-د غَارس ذِي ڒْوسْط ن دْجِيڒث يتْرزَّا-يَاس اَزدْجِيف."
9نش اَذَاوم ينِيغ: "تَّارم، أَتَاف اَذَاوم يمُّوْش. رزُّوْم، أَتَاف اَذ تَافم. سقرْقُوْبم، أَتَاف اَذَاوم رزْمن. 10مِينْزِي مَارَّا ونِّي غَا يتَّارن اَذَاس يمُّوْش. ونِّي غَا يرْزُوْن اَذ يَاف. ونِّي غَا يسْقرْقْبن اَذَاس ثْنُوْرْزم ثوَّارْث. 11مڒَا شَان يِجّن زَّايْوم يتَّار-اَس مِّيس اَسْڒم، مَا اَذَاس يُوْش فِيغر ذݣ ومْشَان ن وسْڒم نِّي؟ لَّا! 12مَا اَذَاس يُوْش بَابَاس ثْغِيرْذنْت إِ ممِّيس مڒَا يتَّار-اَس ثَمدْجَاڒْث؟ لَّا! 13مڒَا كنِّيو ذ يعفَّانن ثسّْنم اَذ تُوْشم إِ ثَارْوَا نْوم مِين يدْجَان ذ اَصبْحَان، أَتَاف بَابَاثْوم إِݣ يدْجَان ذݣ وجنَّا يتݣّ كْتَار، يعْنِي يتِيشّ أَرُّوْح يقدّْسن إِ يِنِّي ذَاس ث يتتَّارن."
سِيذِيثْنغ عِيْسَى يتْوَاجَاه يِنِّي يدْجَان ضد نّس
14ئِسُوْفغ عِيْسَى يجّن ن جّنّ ذ اَزينُوْن زݣ يِجّن ن ورْيَاز. وَامِي يفّغ جّنّ نِّي يسِّيوڒ ورْيَاز، قِّيمن تْعجّْبن ڒْغَاشِي.
15وَلَكِن ڒبْعَاض زَّايْسن نَّان: "بْنَاذم-أَ يسُوْفُوْغ جْنُوْن مِينْزِي اَرَّايس ن جْنُوْن ؤُمِي قَّارن بْعَلْزَبُوْل يُوشَا-اَس جّْهذ-أَ."
16ئِنّغْنِي تتَّارن زَّايس يجّن ن لْعَلَامَا ذ ثَمقّْرَانْت زݣ وجنَّا بَاش اَث جَرّْبن.
17ئِسّن عِيْسَى مِين نْوَان ينَّا-ٱسن: "مْكُڒ لْممْلَكَا إِي ذِي تْمنْغَان اَيثْبَاب نّس يجّن اَك ونّغْنِي اَذ تْنهْذم. مْكُڒ ثَدَّارْث إِي ذِي تْمنْغَان اَيثْبَاب نّس يجّن اَك ونّغْنِي اَذ توْضَا. 18مڒَا شِّيطَان يكَّا اَذ يقْضَا خ شِّيطَان، مَامّش غَا ثݣّ اَذ تقِّيم لْممْلَكَا نّس؟ مِينْزِي ثقَّارم سُوْفُوْغغ جْنُوْن س جّْهذ ن بَعْلْزَبُوْل. 19نش مڒَا سُوْفُوْغغ جْنُوْن س جّْهذ ن بَعْلْزَبُول نِّي زَعْمَا، إِنِيم-اَيِي كنِّيو، مَامّش تݣّن يِوْذَان نْوم سُوْفُوْغن-ثن ؤُڒَا ذ نِثْنِي؟ نِيثْنِي س يِيخف نْسن تْبيَّانن بلِّي كنِّيو وَار غَارْوم بُو ڒحَقّ ذي مين ثقَّارم. 20نش مڒَا سُوْفُوْغغ جْنُوْن س جّْهذ ن وفُوْس ن أَربِّـي، أَقَا ڒْمُلْك ن أَربِّـي يُوْسَا-د غَارْوم.
21أَرْيَاز يجهْذن ونِّي غَار يدْجَا ڒسْنَاح يحطَّا ثَدَّارْث نّس، أَتَاف اَݣْڒَا نّس يتِيڒِي ذِي ڒَامَان. 22وَلَكِن مڒَا يهْجم خَاس ونِّي خَاس يجهْذن، أَتَاف اَث يغْڒب اَذَاس يكّس مَارَّا ڒسْنَاح إِي خف يعوّڒ اَذَاس يَاوِي اَݣْڒَا نّس مَارَّا."
23ونِّي وَار كِذِي يدْجِين شَا، أَتَاف اَقَاث ضد ينُو. ونِّي وَار كِذِي يسْمُوْنن شَا، أَتَاف نتَّا يتْزدْجَاع.
24خْمِي غَا يتْوَاسُوْفغ جّنّ اَعفَّان زِي شَان بْنَاذم، أَتَاف اَذ يݣُّوْر ذݣ يمُوْشَان يُوْزْغن يرزُّو اَمْشَان مَانِي غَا يريّح. مڒَا وَار يُوْفِي شَا، أَتَاف اَذ يِينِي اَقَا نش اَذ رَاحغ اَذ ذوْڒغ غَار ثدَّارْث ينُو مَانِيس إِي فّْغغ. 25سّنِّي اَغَارس يذْوڒ اَت يَاف ثعْذڒ، ثنْقَا. 26أُوْشَا اَذ يرَاح اَذ د يَاوِي سبْعَا ن جْنُوْن نّغْنِي ذ يعفَّانن كْتَار زَّايس حمَا اَذ ذوْڒن كُڒْشِي اَذَايس زذْغن. أَتَاف اَذ تِيڒِي لْحَالَا ثَنݣَّرُوْت ن بْنَاذم نِّي ذ ثَعفَّانْت كْتَار زِي لْحَالَا نّس ثَمزْوَارُوْت."
27وَامِي تُوْغَا يسَّاوَاڒ خ مَانَايَا، ئِجّن ن ثمْغَارْث ثْڒَاغَا ذِي ڒْوسْط ن ڒْغَاشِي ثنَّا: "سَّعْذ ن ثمْغَارْث نِّي إِي شك د يُوْرْون، ثنِّي إِي ش يسُّوْطْضن."
28وَلَكِن نتَّا ينَّا: "لَّا، سَّعْذ ن يِنِّي يتْسْڒَان إِ وَاوَاڒ ن أَربِّـي، تْطَاعَان-اَس."
يِنِّي يرزُّوْن لْعَلَامَا ثَمقّْرَانْت زِي سِيذِيثْنغ عِيْسَى
29وَامِي تمْزَاحَامن ڒْغَاشِي، ئِبْذَا عِيْسَى يقَّار: "ئِوْذَان ن ڒْوقْث-أَ ذ يعفَّانن. نِثْنِي تتَّارن لْعَلَامَا ثَمقّْرَانْت وَلَكِن وَار ذَاسن تِيشّ إِلَّا ثنِّي ن نَّبِي يُوْنس. 30مَامّش تُوْغَا يدْجَا نَّبِي يُوْنس ذ يجّن ن لْعَلَامَا إِ اَيْثْبَاب ن ثنْدِينْت ن نِينْوَا، أَمنِّي عَاوذ اَذ يِيڒِي مِّيس ن بْنَاذم ذ يجّن ن لْعَلَمَا إِ يِوْذَان ن ڒْوقْث-أَ. 31يُوْم لْحِسَاب ذ لْعِقَاب اَذ تكَّر لْمَلِكَا ن لْجَنُوْب اَك يِوْذَان ن ڒْوقْث-أَ اَخَاسن ثْشثْشَا، ڒَاحقَّاش ثُوْسَا-د نتَّاث زِي ثْمُوْرْث يُوْݣْجن حمَا اَذ تْصنّط إِ ڒفْهَامث ن سُلِيمَان. أُو ذَانِيتَا يجّن ذ اَمقّْرَان زِي سُلِيمَان. 32يُوْم لْحِسَاب ذ لْعِقَاب اَذ د كَّرن يمزْذَاغ ن ثنْدِينْت ن نِينْوَا اَك يِوْذَان ن ڒْوقْث-أَ اَخَاسن شثْشَان، ڒَاحقَّاش اَيْثْبَاب ن ثنْدِينْت ن نِينْوَا تُوْبن وَامِي ثن ينْهَا نَّبِي يُونس. أُو ذَانِيتَا يجّن ذ اَمقّْرَان زِي يُوْنس!
ثْفَاوْث ن دَّات نتَّاث ذ ثِيطَّاوِين
33ؤُڒَا ذ يجّن وَار يتْشَعِّيڒ ڒْقنْدِيڒ حمَا اَث يسرْس ذݣ يِج ومْشَان ينُوْفَّر نِغ اَخَاس يقْڒب اَقْنُوْش. لَّا، ئِتݣّ-يث خ ڒْمَرْفَاع حمَا اَذَاسن يُوْش ثْفَاوْث إِ يِنِّي إِي د غَا يَاذْفن. 34ثِيطّ نّش نتَّاث ذ ثْفَاوْث إِ ثُوْذَارْث نّش. مڒَا غَارك ثِيطَّاوِين صحَّانْت، أَتَاف اَغَارك ثِيڒِي ثْفَاوْث مَارَّا ذِي ثُوْذَارْث نّش. مڒَا ثِيطَّاوِين نّش وَار دْجِينْت شَا مْلِيح، أَتَاف اَذ تِيڒِي مَارَّا ثُوْذَارْث نّش ذ ثَادْجسْت. 35حْضَا يخف نّش مْلِيح حمَا نُّوْر إِي ذَايك وَار يتْذوِّيڒ شَا ذ ثَادْجسْث. 36مڒَا مَارَّا دَّات نّش ذَايس ثْفَاوْث وَار ذَايس بُو ثَادْجسْث، أَتَاف اَذ تْشعْشع اَطَّاس اَذ تݣّ ثْفَاوْث اَمشْنَاو مَامّش ذَاوم يتِيشّ ڒْقنْدِيڒ ثْفَاوْث."
ڒفْضِيحَاث ن ڒْحِزب ن يفَرِّيسِيْين ذ يمْسڒْمَاذن ن شَّرِيعَا
37وَامِي يسِّيوڒ عِيْسَى، يُوْسَا-د يجّن زِي ڒْحِزب ن يفَرِّيسِيْين يعَرض-يث حمَا اَكِذس يشّ. يُوْذف عِيْسَى يقِّيم غَار مِيسَّا، 38أَفَرِّيسِي نِّي يتْعجّب وَامِي يُوْفَا عِيْسَى وَار يسِيرذ شَا يفَاسّن نّس قْبڒ مَا ٱذ يشّ.
39ينَّا-ٱس سِيذِيثْنغ: "كنِّيو يفَرِّيسِيْين ثْسِيرِيذم ڒْكَاس نْوم ذ طّبْسِي نْوم غَار بَارَّا مْلِيح، وَلَكِن غَار ذَاخڒ نْوم ثشُّوْرم س طّْمَع ذ شَّرّْ. 40آ يِنِّي وَار يفهّْمن! أَربِّـي ذ نتَّا إِݣ يݣِّين دَّات، ذ نتَّا عَاوذ إِݣ يݣِّين مِين ذَايس غَار ذَاخڒ. 41صدّْقم مِين ذَايْوم غَار ذَاخڒ، أَتَاف مَارَّا اَذ يذْوڒ يسِيرذ إِ كنِّيو.
42يَا ڒفْضِيحث نْوم آ ڒْحِزب ن يفَرِّيسِيْين! تِيشّم ڒَعْشُوْر ؤُڒَا خ نَعْنَاع ذ ؤُوْرَام#11.42 أَوْرَام نتَّا ذ يجّن ن نُّوع ن ڒَاعْشُوْب. ذ مَارَّا ڒَاعْشُوْب، وَلَكِن وَار تهْتِيمِيم شَا زِي ڒْحَقّ ذ ڒمْحِبّث ن أَربِّـي. لَّا، ئِخصَّا-ٱوم اَذ تهْتَامم س مَانَايَا بْڒَا مَا تتُّوْم ڒَعْشُوْر.
43يَا ڒفْضِيحث نْوم آ ڒْحِزب ن يفَرِّيسِيْين! مِينْزِي تخْسم يمُوْشَان يمزْوُوْرَا ذِي ثمْزِيذَاوِين، ئِتعْجِيب-اَوم اَخَاوم سدْجْمن يِوْذَان ذِي ڒسْوَاق. 44يَا ڒفْضِيحث نْوم، كنِّيو اَمشْنَاو يمضْڒَان يودَّارن ݣُّوْرن خَاسن يِوْذَان وَار د اَرِّين شَا ڒخْبَار."
45ئِنْدق-د يجّن زݣ يِنِّي يتْشرَّاحن شَّرِيعَا ينَّا-ٱس: "آ لْمُعَلِّم، وَامِي ثقَّارذ مَانَايَا اَقَا ؤُڒَا ذ نشِّين تْحݣَّارذ-اَنغ!"
46يَارَّا خَاس عِيْسَى ينَّا: "يَا ڒفْضِيحث نْوم ؤُڒَا ذ كنِّيو آ يِنِّي يتْشرَّاحن شَّرِيعَا مِينْزِي تْشدَّام ڒحْمڒ يذقْڒن يقسْحن خ يِوْذَان حمَا اَث اَرْبُوْن، وَلَكِن كنِّيو وَار تْحِيذِيم بُو ڒحْمڒ نِّي ؤُڒَا س يِجّن ن وضَاض نْوم. 47يَا ڒفْضِيحث نْوم مِينْزِي كنِّيو ثْبنَّام يمضْڒَان ن لْأَنْبِيَا تَارِّيم-ثن ذ يمْرَابْذن أُو كنِّيو ڒجْذُوْذ نْوم ذ نِثْنِي إِي ثن ينْغِين. 48تَافَاقم اَك ڒجْذُوْذ نْوم، كنِّيو ذ ڒشْهُوْذ خ مِين خذْمن مِينْزِي ذ نِثْنِي إِݣ ينْغِين لْأَنْبِيَا أُو كنِّيو ثْبنَّام يمْرَابذن نْسن. 49خ مَانَايَا عَاوذ ثقَّار لْحِكْمَا ن أَربِّـي اَذَاسن سّكّغ لْأَنْبِيَا ذ اَرُّسُل، ئِجّن اَث نْغن يجّن اَخَاس اَزّْڒن. 50حمَا يوْذَان ن ڒْوقْث-أَ اَذ تْوَاعَاقْبن خ مَارَّا يذَامّن إِي يُوْزّْڒن زِي لْأَنْبِيَا زݣ وَامِي ثدْجَا دُّنشْت-أَ. 51زݣ يذَامّن ن هَابِيل اَڒ يذَامّن ن زَكَرِيَا ونِّي ينْغِين جَار ڒْمذْبَح ذ ثمْزِيذَا ثَمقّْرَانْت. وَاه، أَذَاوم ينِيغ: مَارَّا لْعِقَاب خ مَانَاينِّي ذ يوْذَان ن ڒْوقْث-أَ إِي خَاس غَا يتْوَاحَاسْبن! 52يَا ڒفْضِيحث نْوم آ يِنِّي يتْشرَّاحن شَّرِيعَا! ثطّْفم ڒْمفْتَاح ن ڒفْهَامث، كنِّيو وَار تِذْفم شَا ذَايس وَار تجِّيم وِي غَا يَاذْفن."
53وَامِي سّنِّي يفّغ، بْذَان يمْسڒْمَاذن ن شَّرِيعَا ذ ڒْحِزب ن يفَرِّيسِيْين تْاعَرَّاضن-ث كْتَار، تْسدَّاعن-ث خ وَاطَّاس ن ثْمسْڒَايِين. 54حطَّان-ث حمَا اَذ يِينِي شَان وَاوَاڒ اَث طّْفن زَّايس.
Currently Selected:
لوقا 11: ريف
Highlight
Share
Copy
Want to have your highlights saved across all your devices? Sign up or sign in
