لوقا 13
13
سِيذِيثْنغ عِيْسَى يسَّاوَاڒ خ تُّوْبَا
1ذِي نْهَار نِّي حْضَارن-د شَان يِوْذَان خبَّرن عِيْسَى خ شَا ن يِوْذَان زِي أَيث-لْجَلِيل تُوْغَا غَرّْصن إِ دْبِيحَاث نْسن وَامِي د يُوْسَا لْحَاكم ذ اَرُوْمَانِي بِيلَاطُوْس ينْغِي-ثن، ئِذَامّن نْسن خلّْطن اَك يذَامّن ن دْبِيحَاث نْسن.
2يَارَّا خَاسن عِيْسَى ينَّا-ٱسن: "مَا ثْحسْبم ڒْمُعْصِيَاث ن يجَالِيلِيْين-أَ كْتَار زِي ڒْمُعْصِيَاث ن مَارَّا أَيث-لْجَلِيل وَامِي د تهْوَا خَاسن ڒْمُصِيبَا-يَا؟ 3قَّارغ-اَوم لَّا. مڒَا وَار ثتُوْبم شَا، أَتَاف مَارَّا إِذْوم اَذ تمّْثم اَمشْنَاو نِثْنِي. 4نِغ ثْمنْطَاش نِّي إِي خف د توْضَا صُّوْمْعث ذِي حَاي-سِيلْوَام ثنْغِي-ثن، مَا تْغِير-اَوم بلِّي ݣِّين دُنُوْب كْتَار زِي مَارَّا يوْذَان يزدّْغن ذِي ثنْدِينْت ثكْمَاڒ ن لْقُدْس؟ 5قَّارغ-اَوم لَّا. مڒَا وَار ثْتُوْبم شَا، أَتَاف مَارَّا إِذْوم اَذ تمّْثم اَمشْنَاو نِثْنِي."
ڒْمَعْنَا ن ثْشجَّارْث ن ثَازَارْث وَار يتَارْون شَا
6ئِسِّيوڒ اَكِذْسن س ڒْمَعْنَا-يَا ينَّا-ٱسن: "ئِجّن ن ورْيَاز غَارس ثَشجَّارْث ن ثَازَارْث ثࢲُّو ذِي ڒَعْرَاصِي نّس، يُوْسَا-د نتَّا اَزَّايس يڒْقذ ثَازَارْث يُوْفَا وَار ذَايس وَالُو قَاع. 7ينَّا-ٱس إِ ونِّي يخدّْمن ڒَعْرَاصِي نّس: ثَشجَّارث-أَ ثڒْت سْنِين نش تَاسغ-د غَارس حمَا اَزَّايس ڒقْذغ ثَازَارْث وَار ذَايس تِيفغ وَالُو. أَرَاح-د قسّ-يت! مَايمِّي ت غَا نجّ اَذ تْضيّع ثَمُوْرْث وَاهَا؟ 8يَارَّا خَاس وخدَّام نِّي ينَّا-ٱس: آ سِيذِي، اجّ-يت غِير ڒْعَام-أَ وَاهَا اَخَاس نقْشغ اَذَاس ݣّغ ڒغْبَار. 9مڒَا ثُوْرو-د ثَازَارْث ذݣ وسݣّْوَاس-أَ إِي د غَا يَاسن، أَتَاف مْلِيح. مڒَا عَاذ وَالُو، أَتَاف صَافِي قسّ-يت."
سِيذِيثْنغ عِيْسَى يسْݣنْفَا اَعْرُوْر إِ يِجّن ن ثمْغَارْث
10تُوْغَا عِيْسَى يسڒْمَاذ ذݣ يِجّن ن ثمْزِيذَا ن أَيث-إِسْرَائِيل ذِي نْهَار ن سّبْث ن لْعِبَادَا. 11يُوْفَا ذِنِّي يجّن ن ثمْغَارْث ثْمنْطَاش يسݣّوُسَا زݣ وَامِي ثهْڒش ذَايس جّنّ، ثقْوس وَار ثْزمَّر شَا اَذ تْبدّ نِيشَان.
12وَامِي ت يࢲْرَا عِيْسَى يڒَاغَا-د خَاس ينَّا-ٱس: "آ ثَمْغَارْث، شم ڒخُّو ثنْفكّذ زِي ڒهْڒَاش نّم." 13ئِسرْس خَاس يفَاسّن نّس ڒخْدّنِّي ثْبدّ نِيشَان ثبْذَا ثْحمّذ أَريِّي.
14أَرَّايس ن ثمْزِيذَا نِّي وَار ذَاس يعْجِيب بُو ڒْحَاڒ وَامِي عِيْسَى يسْݣنْفَا ثَمْغَارْث نِّي ذِي نْهَار ن سّبْث ن لْعِبَادَا. ئِكَّر نتَّا ينَّا-ٱسن إِ يِوْذَان: "أَربِّـي يُوْشَا ستِّيَّام ن ڒْخذْمث ذِي ستِّيَّام نِّي إِي د غَا تَاسم اَذ تْݣنْفِيم، وَار يدْجِي بُو ذِي نْهَار ن لْعِبَادَا."
15ينَّا-ٱس سِيذِيثْنغ: "آ لْمُنَافِقِين، مَا وَار ثْضدْجْقم شَا يفُوْنَاسن ذ يغْيَاڒ نْوم زِي ڒْكُوْرِي ذِي نْهَار ن لْعِبَادَا حمَا اَثن ثْسسّْوم؟ 16ثَمْغَارْث-أَ مسْكِينَا يدْجَان زِي دُّوْرِّيث ن بْرَاهِيم يحبّس-يت شِّيطَان ثْمنْطَاش يسݣّْوُسَا، مَا وَار ذَاس نْرزّم شَا زِي ڒحْبس-أَ ذِي نْهَار ن لْعِبَادَا مَا لَّا؟" 17وَامِي ينَّا اَوَاڒ-أَ، مَارَّا يِنِّي اَكِذس يتْمنْغَان سذْحَان. ئِوْذَان نّغْنِي مَارَّا فَرْحن زِي ڒخْذَايم ثِمقّْرَانِين إِݣ يتݣّ.
سِيذِيثْنغ عِيْسَى يسَّاوَاڒ خ ڒْمُلْك ن أَربِّـي
18ينَّا-ٱسن عِيْسَى: "مِينْذِي يتْشَابَّاه ڒْمُلْك ن أَربِّـي؟ نِغ س مِينْزِي غَا ث مثّْلغ؟ 19ڒْمُلْك ن أَربِّـي يݣَّا اَم يِجّن ن زَّرِّيعث ن يجّن ن نُّوْع ن اَرْبِيع قَّارن-اَس بُوْݣَرْذَاڒ. ئِيْسِي-ت يجّن ورْيَاز يُوْوِي-ت يࢲُّو-ت ذِي ڒْعَرْسث نّس. ثمْغَار ثْذوّڒ اَم ثْشجَّارْث، ئِجْضَاض تَاسن-د تݣّن ذَايس ڒَعْوَاش نْسن."
20ينَّا-ٱسن عَاوذ: "س مِينْزِي غَا مثّْلغ ڒْمُلْك ن أَربِّـي؟ 21نتَّا اَم ونْتُوْن ثيْسِي-ث يجّن ن ثمْغَارْث ثُوْݣّْوَا زَّايس ڒْمُوْدّ ن وَارن، اَنْتُوْن نِّي يسْݣَعّذ-يث-يد مَارَّا."
ثَوَّارْث ن ثُوْذَارْث
22ئِكَّا عِيْسَى خ يبِيلَاجن ذ ڒدْشُوْرَاث، ئِسڒْمَاذ يݣُّوْر غَار ثنْدِينْت ن لْقُدْس.
23ئِسّقْسَا-ث يجّن ن ورْيَاز ينَّا-ٱس: "آ سِيذِي، مَا ذْرُوْس إِي غَا يرَاحن غَار ثُوْذَارْث ن ڒبْدَا؟"
ينَّا-ٱس عِيْسَى: 24"ݣّث مَامْش غَا ثَاذْفم زِي ثوَّارْث يحْصَارن. أَذَاوم ينِيغ: أَطَّاس ن يِوْذَان اَتَاف اَذ رْزُوْن اَذ اَذْفن وَلَكِن وَار زمَّرن. 25بَاب ن ثدَّارْث اَذ يكَّر اَذ يبلّع ثَوَّارْث صَافِي. كنِّيو مڒَا ثقِّيمم غَار بَارَّا ثسْقرْقُوْبم ذِي ثوَّارْث ثقَّارم: آ سِيذِي، اَرْزم-اَنغ! أَذَاوم يِينِي: نش وَار سِّينغ شَا زِي مَانِيس د تُوْسِيم! 26سّنِّي اَذ تبْذَام اَذ تِينِيم: نشِّين نشَّا نسْوَا اَكِذش، تُوْغَا ثْسڒْمَاذذ-اَنغ ذݣ يبْرِيذن نّغ! 27أَذَاوم يِينِي: نش وَار سِّينغ شَا زِي مَانِيس د تُوْسِيم. بعّْذم خَافِي آ يِنِّي يتݣّن شَّرّْ! 28ذِنِّي إِي غَا يِيڒِين يمطَّاون ذ وغࢲَّاࢲ ن ثغْمَاس خْمِي غَا ثࢲرم بْرَاهِيم ذ إِسْحَاق ذ يَعْقُوْب ذ مَارَّا لأَنْبِيَا غَار ذَاخڒ ذِي ڒْمُلْك ن أَربِّـي، كنِّيو تْمنْضَارم غَار بَارَّا! 29أَذ د اَسن يِوْذَان زِي شَّرْق ذ ڒْغَرْب ذ شَّمَال ذ لْجَنُوْب، أَذ قِّيمن غَار مِيسَّا ذِي ڒْمُلْك ن أَريِّي. 30يِنِّي يدْجَان ذ ينݣُّوْرَا اَذ ذوْڒن ذ يمزْوُوْرَا؛ يِنِّي إِي يدْجَان ذ يمزْوُوْرَا اَذ ذوْڒن ذ ينݣُّوْرَا."
سِيذِيثْنغ عِيْسَى يخيّق خ ثنْدِينْت ن لْقُدْس
31نْهَار نِّي قَارّْبن ڒبْعَاض زِي ڒْحِزب ن يفَرِّيسِيْين غَار عِيْسَى نَّان-اَس: "فّغ سَّانِيتَا اَقَا اَزدْجِيذ هِيرُوْدُس يرزُّو اَش ينغ!"
32ينَّا-ٱسن عِيْسَى: "رُوْحث إِنِيم-اَس إِ وُوْشّن نِّي: قَا نش سُوْفُوْغغ جْنُوْن، سْݣنْفَايغ يوْذَان نْهَارَا ذ ثِيوشَّا. ذِي نْهَار وِيس ثڒْتِيَّام اَذ كمّْڒغ. 33وَلَكِن لَابُد اَذ ؤُيُوْرغ نْهَارَا ذ ثِيوشَّا ذ نْهَار إِي ثِيذ غَا يذْفَارن مِينْزِي وَار يزمَّر اَذ يمّث شَان نَّبِي إِلَّا ذِي ثنْدِينْت ن لْقُدْس.
34يَا لْقُدْس، يَا لْقُدْس! ذ شم إِݣ ينقّن لْأَنْبِيَا، ذ شم إِݣ يرجّْمن يِنِّي غَارم د يسّكّ أَربِّـي! نش مشْحَاڒ ن ثْوَاڒَاثِين خْسغ اَذ سْمُوْنغ ثَارْوَا نّمْ اَم شَان ثْيَازِيط يتحْبُوْبُوْضن خ يفِيدْجُوْسن نّس وَلَكِن كنِّيو ثُوْݣِيم. 35أَقَا ثَدَّارْث نْوم اَذ تخْڒَا! أَذَاوم ينِيغ بلِّي وَار ذَايِي ثْࢲرّم شَا عَاوذ حتَّا ٱر نْهَار نِّي إِي غَا ثِينِيم: سَّعْذ يَا ونِّي إِي د يُوسِين عْلَاحْسَاب يسم ن سِيذِي أَربِّـي."
Currently Selected:
لوقا 13: ريف
Highlight
Share
Copy
Want to have your highlights saved across all your devices? Sign up or sign in
