لوقا 17
17
لإِيمَان ذ ڒْمُعْصِيّث
1ينَّا-ٱسن عِيْسَى إِ يمحْضَارن نّس: "ڒبْدَا توْقِيعنْت ثْمسْڒَايِين إِي غَا يغضْڒن يوْذَان ذِي ڒْمُعْصِيَاث، وَلَكِن يَا تَمَارَا ن بْنَاذم نِّي إِݣ يدْجَان ذ سَّبَاب ن ڒْمُعْصِيَاث نِّي. 2نتَّا، مڒَا شدّن يجّن ن وزْرُو ن ثْسِيرْث س وسْغُوْن غَار يِيرِي نّس اَث نْضَرن ذِي ڒبْحَر، أَتَاف حْسن إِ نتَّا زِي مڒَا يُوْوِي يجّن زݣ يمزْيَانن-أَ غار ڒْمُعْصِيّث. 3حْضَام يخف نْوم.
مڒَا يخْضَا اَكِذش ومَاش نْهَا-ث. مڒَا ينْدم سَامح-اَس. 4مڒَا يخْضَا اَكِذش سبْعَا ن ثْوَاڒَاثِين ذِي نْهَار، ئِذْوڒ-د غَارك سبْعَا ن ثْوَاڒَاثِين ينَّا-ٱش نْدمّغ خ مِين خذْمغ، أَتَاف اَذَاس ثْسَامْحذ."
5نَّان-اَس اَرُّسُل إِ سِيذِيثْنغ: "اَرْنِي ذَايْنغ لإِيمَان."
6يَارَّا خَاسن سِيذِيثْنغ ينَّا-ٱسن: "مْڒِي ذَايْوم لإِيمَان غِير اَنشْت يجّن ن ثْحبُّوْشْت ن بُوْݣَرْذَاڒ، أَتَاف اَذَاس ثِينِيم إِ ثْشجَّارْث-أَ ن تُّوْث: نقْڒع-د شم س يࢲوْرَان رُوْح اَذ تࢲُّوْذ يخْف نّمْ ذِي ڒبْحَر، أَتَاف اَذَاوم ثݣّ اَرَّاي."
سمْزَايم يخف نْوم
7"شُوْف، شَان يِجّن زَّايْوم مَثَالَان غَارس اَخدَّام يتْفدْجَاح نِغ يتْرَاسّ يحُوْڒِيْين. خْمِي غَا د يعْقب زݣ ومَرْجع، مَا ٱذَاس ثِينِيذ قِّيم ذغْيَا اَذ تشّذ؟ 8لَّا، أَذَاس ثِينِيذ سوْجذ-اَيِي-د مِين غَا شّغ. ݣفّض، سخَّار خَافِي اَڒ غَا شّغ اَذ سْوغ. عَاذ ڒخْدّنِّي إِي غَا ثشّذ شك اَذ تسْوذ. 9أَخدَّام نِّي، مَا ث ثْشكَّرذ مڒَا يݣَّا-ٱش اَرَّاي؟ لَّا. 10أَمُّو ؤُڒَا ذ كنِّيو. مڒَا ثݣِّيم مَارَّا مِينْخف كنِّيو وصَّان، أَتَاف اَذ تِينِيم نشِّين ذ يخدَّامن وَاهَا، نْتݣّ غِير لْوَاجِب نّغ يتْخصَّا اَث نݣّ."
سِيذِيثْنغ عِيْسَى يسْݣنْفَا عشْرَا ن يمهْڒَاش ذَايْسن جْذَام
11عِيْسَى ذݣ وبْرِيذ غَار ثنْدِينْت ن لْقُدْس، ئِكَّا خ وبْرِيذ مَانِي تْحدَّا ثْمُوْرْث ن سَامَارْيَا ذ ثْمُوْرْث ن لْجَلِيل. 12يُوْذف غَار يِجّن ن دْشَار يُوْفَا ذِنِّي عشْرَا ن يرْيَازن ذَايْسن جْذَام. بدّن غَار ڒݣّْوَاج 13تْڒَاغَان-اَس س جّْهذ قَّارن: "آ عِيْسَى آ لْمُعَلِّم، رْحم-اَنغ!"
14ئِخْزَر ذَايْسن ينَّا-ٱسن: "رُوْحم غَار ڒْفُقَهَا سظْهَارم-اَسن يخف نْوم!" نِثْنِي وَامِي يُوْيُوْرن ذݣ وبْرِيذ نْسن صَافِي ݣنْفَان.
15يجّن زَّايْسن وَامِي يُوْفَا يخف نّس يݣنْفَا، ئِذْوڒ-د يحمّذ أَربِّـي س جّْهذ. 16ئِسجّذ-اَس إِ عِيْسَى غَار يضَارن نّس يبْذَا يتْشكَّر-يث. نتَّا أَرْيَاز نِّي زِي سَامَارْيَا.
17ينَّا عِيْسَى: "عشْرَا نِّي، ݣنْفَان مَارَّا مَا لَّا؟ مَانِي دْجَان تسْعَا نِّي نّغْنِي؟ 18مَا اَبَرَّانِي-يَا وَاهَا إِي د يذوْڒن يحمّذ أَربِّـي؟" 19ينَّا-ٱس: "كَّر اَذ تْروّْحذ، لْإِيمَان نّش يسنْجم-يش."
ڒْمُلْك ن أَربِّـي
20ئِوْذَان زِي ڒْحِزب ن يفَرِّيسِيْين سّقْسَان عِيْسَى نَّان-اَس: مڒْمِي د غَا يَاس ڒْمُلْك ن أَربِّـي؟
ينَّا-ٱسن عِيْسَى: "ڒْمُلْك ن أَربِّـي وَار د يتِيس شَا س لْعَلَامَاث نِّي إِي زِي غَا ثتْوَاڒَام. 21لَّا، أَتَاف يوْذَان وَار قَّارن شَا قَا خْزَرث اَقَاث ذِيهَا نِغ اَقَاث ذَا! مَايمِّي؟ أَتَاف ڒْمُلْك ن أَربِّـي اَقَاث ذَايْوم."
22ينَّا-ٱسن إِ يمحْضَارن نّس: "أَذ د اَسنْت ڒِيَّام اَذَايْسنْت ثْرزُّوْم اَذ تࢲرم يجّن ن نْهَار زي نْهُوْرَاث ن مِّيس ن بْنَاذم وَلَكِن وَار ث تْࢲرّم شَا. 23أَذَاوم ينِين يِوْذَان اَقَاث ذَا نِغ اَقَاث ذِيْهَا! وَلَكِن وَار ذِنِّي تْرِيحم شَا، وَار ثن تْذفَّارم شَا. 24مِينْزِي اَم وَاسَّام يتبْسِيسِّيقن ذِي طَّارْف ن وجنَّا اَذ يݣّ ثْفَاوْث ذِي طَّارْف نّغْنِي، أَمنِّي إِي غَا يِيڒِي مِّيس ن بْنَاذم ذِي نْهَار نّس. 25وَلَكِن يتْخصَّا-ٱس ذ اَمزْوَارُو اَذ يتْوَاعدّب اَطَّاس، أَث عِيفّن يِوْذَان ن ڒْوقْث-أَ.
26أَمشْنَاو مَامش يوْقع ذِي ڒِيَّام نِّي ن نُوْح، أَمنِّي إِي غَا يوْقع ذِي ڒِيَّام ن مِّيس ن بْنَاذم: 27يوْذَان تُوْغَا تتّن سسّن، مدْجْشن تْوَاسْمدْجَاشن، حتَّا ٱڒ نْهَار نِّي وَامِي يُوْذف نُوْح ذݣ وغَرَّابُو. يُوْسَا-د طُّوْفَان ينْغِي-ثن مَارَّا إِذْسن.
28عَاوذ مَامّش يوْقع ذِي ڒِيَّام ن لُوْط: ئِوْذَان تُوْغَا تتّن سسّن، سَّاغن زْنُوْزَان، تࢲُّوْن بنَّان. 29وَلَكِن ذِي نْهَار نِّي إِي ذِي يفّغ لُوْط زِي ثنْدِينْت ن سَدُوْم صَافِي يسهْوَا-د خَاسن أَربِّـي ثِمسِّي ذ يزْرَا يسّشْمَاضن زݣ وجنَّا، ئِنْغِي-ثن مَارَّا.
30أَمنِّي إِي غَا يوقْعن ذِي نْهَار نِّي إِي ذِي د غَا يمظْهَار مِّيس ن بْنَاذم. 31ذِي نْهَار نِّي، ونِّي غَا يِيڒِين خ ثْزقَّا ڒحْوَايج نّس اَقَاثن سْودَّاي ذِي ثدَّارْث يتْخصَّا-ٱس وَار يهوِّي شَا غَار ثدَّارْث حمَا اَذ ييْسِي ڒحْوَايج نّس. عَاوذ ونِّي غَا يِيڒِين ذݣ ومَرْجع يتْخصَّا-ٱس وَار يتعْقِيب شَا غَار ثدَّارْث. 32فكَّرث ذِي مِين ذَاس يوقْعن إِ ثمْغَارْث ن لُوْط! #17.32 وَامِي أَربِّـي يسُوْفغ لُوْط ذ ثمْغَارْث نّس زِي ثنْدِينْت ثَعفَّانْت ن سَدُوْم، يعْڒم-اَسن ينَّا-ٱسن وَار خزَّارث شَا غَار ذفَّار. وَلَكِن ثَمْغَارث ن لُوْط ثعْصَا أَربِّـي، ثخْزَر غَار ذفَّار ڒخدّْنِّي يسمْسخ-يت ثذْوڒ ذ اَزْرُو ن ڒمْڒح. خْزَر ذِي لْكِتَاب ن يمزْوُوْرَا 19.15-26.
33ونِّي يخْسن اَذ يسنْجم ثُوْذَارْث نّس اَتَاف اَت يخْسَر. ونِّي إِي غَا يخْسَرن ثُوْذَارْث نّس اَتَاف اَت يسنْجم. 34أَذَاوم ينِيغ: ذِي دْجِيڒث نِّي اَذ يڒِين ثْنَاين طّْصن ذݣ يِجّن ن ثَاسُّوْث، ئِجّن اَذ يميْسِي يجّن اَذ يقِّيم. 35أَذ يڒِينْت ثْنَاين ن ثمْغَارِين ذِي ثْسِيرْث حرِّينْت ثِحبَّا، ئِشْتن اَذ تْميْسِي يشْتن اَذ تقِّيم. 36{أَذ يڒِين ثْنَاين ن يرْيَازن ذݣ يِج ومَرْجع، ئِجّن اَذ يميْسِي يجّن اَذ يقِّيم."}
37سّقْسَان-ث يمحْضَارن نّس نَّان-اَس: "آ سِيذِي، مَانِي غَا يوْقع مَانَايَا؟"
ئِنْدق-د نتَّا ينَّا-ٱسن: "مَانِي دْجَان يمُوْرْضَاس، ذِنِّي إِݣ يتْمُوْنن يبَاغرِيون."
Currently Selected:
لوقا 17: ريف
Highlight
Share
Copy
Want to have your highlights saved across all your devices? Sign up or sign in
