لوقا 19
19
سِيذِيثْنغ عِيْسَى ذِي ثدَّارْث ن زَكِي
1يُوْذف عِيْسَى غَار ثنْدِينْت ن أَرِيحَا يعدُّو-د سّنِّي. 2ذِنِّي يجّن ن ورْيَاز ذ تَّاجَر زݣ يمقّْرَانن ن يعشَّارن قَّارن-اَس زَكِي. 3يرزُّو اَذ يسّن عِيْسَى مِين يعْنَا وَلَكِن وَار يزمَّر اَث يࢲر عْلَاحقَّاش ذِنِّي اَطَّاس ن ڒْغَاشِي أُو نتَّا ذ اَقُوْضَاض. 4يُوْزّڒ غَار زَّاث يݣَعّذ خ يِجّن ن ثْشجَّارْث ن ثَازَارْث ن يسمْغَان خ وبْرِيذ نِّي مَانِيس د غَا يكّ عِيْسَى حمَا اَث يࢲر. 5وَامِي يُوْوض عِيْسَى غَار ومْشَان نِّي، يرْفع ثِيطَّاوِين نّس يࢲْرِي-ث ينَّا-ٱس: "هْوَا-د ذغْيَا سّنِّي آ زَكِي، ئِتْخصَّا-ٱيِي نْهَارَا اَذ رَاحغ غَار ثدَّارْث نّش." 6ئِهْوَا-د ذغْيَا يرحّب زَّايس س ڒفْرَاحث.
7ئِوْذَان مَارَّا ࢲْرِين مَانَايَا بْذَان تْݣمْݣُوْمن نَّان قَا يُوْذف عِيْسَى اَذ يقِّيم ذِي ثدَّارْث ن يِجّن ن ورْيَاز ذ لْعَاصِي!
8ئِبدّ زَكِي ينَّا-ٱس إِ سِيذِيثْنغ: "آ سِيذِي، أَذ ؤُشغ اَزْين ن وَاݣْڒَا ينُو إِ ڒْمُسَاكِين. مڒَا شمْثغ شَان يِجّن اَذَاس اَرْنِيغ اَرْبعَا ن ثْسقَّار."
9ينَّا-ٱس عِيْسَى إِ زَاكِي: "نْهَارَا اَيْثْبَاب ن ثدَّارْث-أَ نجْمن مِينْزِي اَرْيَاز-أَ وَانِيتَا ؤُڒَا ذ نتَّا زِي دُّوْرِّيث ن بْرَاهِيم. 10مِّيس ن بْنَاذم يُوْسَا-د حمَا اَذ يرْزُو اَذ يسنْجم يِنِّي يودَّرن."
ڒْمَعْنَا ن ثْڒَاثَا ن يخدَّامن
11وَامِي تسْڒَان إِ مَانَايَا، ئِسِّيوڒ اَكِذْسن عِيْسَى س يِجّن ن ڒْمَعْنَا نّغْنِي ڒَاحقَّاش تُوْغَاث يُوْذس غَار ثنْذِينْت ن لْقُدْس. عَاوذ تْغِير-اَسن ڒْمُلْك ن أَربِّـي اَذ د يمظْهَار ڒخْدّنِّي. 12ئِنَّا-ٱسن: "ئِجّن ن سِّيّد لْأَصل نّس زݣ يمقّْرَانن يسَفَر زِي ثْمُوْرْث نّس غَار يِجّن ن ثْمُوْرْث ثِݣّْوج حمَا اَذ ييْسِي تسْرِيح اَذ يذْوڒ اَذ يحْكم خ ثْمُوْرْث نّس. 13ئِڒَاغَا-د خ عشْرَا زݣ يخدَّامن نّس، كُڒ يجّن زَّايْسن يُوْشَا-ٱس عشْرَا نْ ڒُوْزْنَاث ن نُّقَارْث. ينَّا-ٱسن: ݣّم زَّايْسنْت تِّجَارَا اَڒ د غَا ذوْڒغ. 14وَلَكِن شَّعْب نّس عِيفّن-ث سذْفَارن-اَس شَا ن نُّوْيَاب اَڒ مَانِي غَا يرَاح بَاش اَذ ينِين قَا نشِّين وَار نخْس شَا اَرْيَاز-أَ اَذ يِيڒِي ذ اَزدْجِيذ خَانغ.
15وَامِي يذْوڒ ذ اَزذْجِيذ يعْقب-د، يُوْمَر حمَا اَذَاس د اَوِين يخدَّامن نِّي ؤُمِي يُوْشَا تْمنْيَاث نِّي حمَا اَذ يخْزَر مشْحَاڒ يرْبح مْكُڒ يجّن زَّايْسن.
16يُوْسَا-د وخدَّام اَمزْوَارُو ينَّا-ٱس: آ سِيذِي، عشْرَا ن ڒُوْزْنَاث ن نُّقَارْث نّش كُڒ يشْتن ثَرْنِي عشْرَا نّغْنِي.
17أَزدْجِيذ نِّي ينَّا-ٱس: ثݣِّيذ مْلِيح آي اَخدَّام اَصبْحَان! شك ذَايك ڒَامَان خ ذْرُوْس، ڒخُّو اَذَاش ؤُشغ اَذ تْحكْمذ خ عشْرَا ن ثْندَّام.
18يُوْسَا-د ونِّي وِيس ثْنَاين ينَّا-ٱس: آ سِيذِي، عشْرَا نِّي ن ڒُوْزْنَاث ن نُّقَارْث إِي ذَايِي ثُوْشِيذ كُڒ يشْتن ثَرْنِي خمْسَا نّغْنِي.
19ينَّا-ٱس وزدْجِيذ: أَذَاش ؤُشغ اَذ تْحكْمذ خ خمْسَا ن ثْندَّام.
20يُوْسَا-د ونِّي وِيس ثْڒَاثَا ينَّا-ٱس: آ سِيذِي، أَقَاش عشْرَا نِّي ن ڒُوْزْنَاث ن نُّقَارْث إِي ذَايِي ثُوْشِيذ. تُوْغَا نش خمّْڒغ-ثنْت ذݣ يِجّن ن زِّيف 21مِينْزِي ݣّْوْذغ زَّايك. شك ذ يجّن ن بْنَاذم ثقْسْحذ، ثْكسِّيذ مِين وَار ثسْرُوْسِيذ ثْمجَّارذ مِين وَار ثْزرّْعذ.
22ئِنْدق-د وزدْجِيذ نِّي ينَّا-ٱس: شك مِين ثنِّيذ اَخَاك حكْمغ زَّايس آي اَخدَّام اَمْشُوْم. إِيوَا ثسّْنذ بلِّي نش ذ يجّن ن ورْيَاز قسْحغ، كسِّيغ مِين وَار سْرُوْسِيغ، مجَّارغ مِين وَار زرّْعغ. 23مَايمِّي وَار ثجِّيذ تْمنْيَاث ينُو غَار يصَرَّافن اَتَاف نش اَذ د اَسغ اَذ يْسِيغ تْمنْيَاث ينُو ذ ڒفْضڒ اَكِذْسنْت؟
24أُوْشَا ينَّا-ٱسن إِ يِنِّي يدْجَان ذِنِّي: كّْسم-اَس عشْرَا ن ڒُوْزْنَاث ن نُّقَارْث إِ وَانِيتَا، اَرْنِيم-ثنْت إِ ونِّي غَار يدْجَا مِيَّا ن ڒُوْزْنَاث ن نُّقَارْث.
25نَّان-اَس: مَايمِّي زَعْمَا آ سِيذِي؟ أَقَا ونِّي صَافِي، غَارس مِيَّا ن ڒُوْزْنَاث ن نُّقَارْث!
26أَذَاوم ينِيغ: وَاه، ونِّي يدْجَان غَارس يتْمَارْنِي-يَاس. وَلَكِن ونِّي وَار غَار يدْجِي شَا، يتْوَاكْسِي-يَاس ؤُڒَا ذ مِين غَارس. 27أَمَّا ڒْعَذْيَان ينُو يِنِّي تُوْغَا وَار يخْسن شَا اَخَاسن يڒِيغ ذ اَزدْجِيذ، أَوِيم-ثن-د ذَانِيتَا نْغم-ثن زَّاثِي."
سِيذِيثْنغ عِيْسَى يتَاذَاف خ وسْنُوْس غَار ثنْدِينْت ن لْقُدْس
28عِيْسَى وَامِي ينَّا اَوَاڒ-أَ يكَّر نتَّا يݣُّوْر بَاش اَذ يݣَعّذ غَار ثنْدِينْت ن لْقُدْس. 29وَامِي عْڒَاين اَذ يَاوض غَار يبِيلَاجن ؤُمِي قَّارن بَيْت فَاجِي ذ بَيْت عَنْيَا غَار وذْرَار ؤُمِي قَّارن أَذْرَار ن زِّيتُوْن، ئِكَّر نتَّا يسّكّ ثْنَاين زݣ يمحْضَارن نّس 30ينَّا-ٱسن: "رُوْحم غَار وبِيلَاج-ين إِي يدْجَان زَّاثْوم. خْمِي غَا ثَاوْضم ذِنِّي، أَذ تَافم يجّن ن وسْنُوْس يقّن عمَّارْص وَار خَاس ينْيِي حَدّ، فْسِيم-اَس اَوِيم-اَيِي-ث-يد. 31مڒَا يسِّيوڒ غَارْوم شَان يِجّن ينَّا-ٱوم مَايمِّي ذَاس ث فْسِيم، إِنِيم-اَس قَا يحْذَاج-يث سِيذِيثْنغ."
32رُوْحن يِنِّي يتْوَاسكّن غَار زَّاث ؤُفِين مَامّش ذَاسن ينَّا عِيْسَى. 33وَامِي فسِّين إِ وسْنُوْس نِّي نَّان-اَسن اَيْثْبَاب نّس: "مِين تݣّم؟ مَايمِّي ثْفسِّيم إِ وسْنُوْس-أَ؟"
34أَرِّين خَاسن نَّان-اَسن: "ئِحْذَاج-يث سِيذِيثْنغ." 35ڒخْدّنِّي ؤُوِين-ث-يذ غَار عِيْسَى، ݣِّين خَاس يزدْجُوْبَا نْسن سنْين خَاس عِيْسَى.
36نتَّا وَامِي تُوْغَا يݣُّوْر، ئِوْذَان تْسُوْن-اَس اَبْرِيذ س يزدْجُوْبَا نْسن. 37ئِقَارّب غَار ثكْسَارْث ن وبْرِيذ زَّاث إِ ؤُذْرَار ن زِّيتُون، بْذَان اَطَّاس ن يمحْضَارن نّس فَرّْحن حمّْذن أَربِّـي س جّْهذ خ مَارَّا لْمُعْجِيزَاث نِّي إِي ࢲْرِين. 38قَّارن: "سَّعْذ ن وزدْجِيذ إِي د يُوْسِين عْلَاحْسَاب يسم ن سِيذِي أَربِّـي. ڒهْنَا ذݣ وجنَّا، لْحَمْدُو إِ أَربِّـي يُوْعْڒَان!"
39ڒبْعَاض زِي ڒْحِزب ن يفَرِّيسِيْين يدْجَان ذِي ڒْغَاشِي نِّي نَّان-اَس: "آ لْمُعَلِّم، نْهَا يمحْضَارن نّش."
40ينَّا-ٱسن: "أَذَاوم ينِيغ: مڒَا سْقَارن نِثْنِي، أَتَاف يزْرَا اَذ سْنكَّرن ثْغُوْيّث."
41وَامِي عْڒَاين اَذ يَاوض غَار ثنْدِينْت ن لْقُدْس، ئِࢲْرِي-ت يبْذَا يتْرُو خَاس. 42ينَّا: "آ ثَنْدِينْت ن لْقُدْس، شم مَعْلِيك تُوْغَا ثسّْنذ نْهَارَا ثِمسْڒَايِين إِي د يتِيشّن ڒهْنَا! وَلَكِن لَّا، ڒخُّو نُوْفَّرنْت خ ثِيطَّاوِين نّم. 43أَقَا اَخَام د اَسن نْهُوْرَاث خْمِي خَام د غَا سنّْضن ڒْعَذْيَان نّمْ يجّن ن صُّوْر، أَذَام د نّْضن، أَشم سحْسَڒن زِي مْكُڒ جِّهث. 44أَشم سْهذْمن شم ذ ثَارْوَا نّمْ إِي يدْجَان غَار ذَاخڒ نّم. وَار ذَايم تجِّين بُو وزْرُو خ ونّغْنِي مِينْزِي يفْقذ-يشم أَربِّـي، شم وَار خَاس ثعْقِيڒذ."
سِيذِيثْنغ عِيْسَى ذِي ثمْزِيذَا ثَمقّْرَانْت
45سّنِّي يُوْذف غَار ثمْزِيذَا ثَمقّْرَانْت ن أَيث-إِسْرَائِيل يبْذَا يتَازّڒ خ يِنِّي يزْنُوْزَان ذِنِّي. 46ينَّا-ٱسن: "لْكِتَاب يقَّار: <ثَدَّارْث ينُو اَذ تِيڒِي ذ ثَدَّارْث ن ثْࢲَادْجِيث.> وَلَكِن كنِّيو ثَارِّيم-تث ذ يفْرِي ن يخوَّانن."
47تُوْغَا يسڒْمَاذ مْكُڒ نْهَار ذِي ثمْزِيذَا ثَمقّْرَانْت. أَرُّوْيَاس ن ڒْفُقَهَا ذ يمْسڒْمَاذن ن شَّرِيعَا ذ يمقّْرَانن ن شَّعْب رزُّوْن اَث نْغن. 48وَار ؤُفِين مَامّش غَا ݣّن مِينْزِي مَارَّا شَّعْب تُوْغَا يتسْڒَا-يَاس يقِّيم ذݣ وَاوَاڒ نّس.
Currently Selected:
لوقا 19: ريف
Highlight
Share
Copy
Want to have your highlights saved across all your devices? Sign up or sign in
