لوقا 23

تَاوِين سِيذِيثْنغ عِيْسَى غَار لْحَاكم بِيلَاطُوْس

1كَّرن مَارَّا إِذْسن ؤُوِين عِيْسَى اَث سلّْمن إِ لْحَاكم بِيلَاطُوْس. 2بْذَان تْتَاهْمن-ث نَّان: "نُوْفِي-ث يتݣّ لْبلْبَلَا ذِي شَّعْب. ئِقَّار-اَسن وَار تِيشّث بُو ضَّرِيبَا إِ وزدْجِيذ قَيْصَر. نتَّا يحسّب يخف نّس ذ لْمَسِيح يعْنِي ذ يجّن ن وزدْجِيذ."

3ئِسّقْسَا-ث بِيلَاطُوْس ينَّا-ٱس: "مَا ذ شك ذ اَزدْجِيذ ن أَيث-إِسْرَائِيل؟"

ينَّا-ٱس عِيْسَى: "أَقَا ثنِّيذ-ت شك."

4ينَّا-ٱسن بِيلَاطُوْس إِ اَرُّوْيَاس ن ڒْفُقَهَا ذ ڒْغَاشِي نِّي: "وَار خَاس تِيفغ بُو شَان تُّهْمث خ وثَرَّاس-أَ."

5وَلَكِن نِثْنِي زيَّارن خَاس اَطَّاس نَّان-اَس: "ئِتݣّ ڒْفِتْنَا ذِي مَارَّا ثَمُوْرْث ن يَهُوْذِيَا س وسڒْمذ نّس. ئِبْذَا ذِي ثْمُوْرْث ن لْجَلِيل، ڒخُّو اَقَاث ذَا."

6وَامِي يسْڒَا بِيلَاطُوْس بلِّي نَّان لْجَلِيل ينَّا-ٱسن: "مَا اَرْيَاز-أَ زِي ثْمُوْرْث ن لْجَلِيل؟" 7وَامِي يسّن بلِّي عِيْسَى زِي ثْمُوْرْث نِّي مَانِي يتحْكَام هِيرُوْدُس، ئِكَّر يسّكّ-يث غَار هِيرُوْدُس يدْجَان نتَّا س يِيخف نّس ذِي ثنْدِينْت ن لْقُدْس ذِي ڒْوقْث نِّي.

تَاوِين سِيذِيثْنغ عِيْسَى غَار وزدْجِيذ هِيرُوْدُس

8وَامِي يࢲْرَا هِيرُوْدُس عِيْسَى يفَرح اَطَّاس. تُوْغَا يخس اَث يࢲر اَطَّاس زݣ وَامِي. وَامِي خَاس يسْڒَا يتْمنَّا اَذ يݣّ عِيْسَى شَان لْمُعْجِيزَا زَّاثس. 9ئِسّقْسَا-ث اَطَّاس وَلَكِن عِيْسَى وَار خَاس د يَارِّي شَا قَاع.

10أَرُّوْيَاس ن ڒْفُقَهَا ذ يمْسڒْمَاذن ن شَّرِيعَا بدّن ذِنِّي تَهَامن-ث اَطَّاس.

11ئِحݣَّار-يث هِيرُوْدُس ذ ڒْعَسْكَار نّس ضحّْشن خَاس. يݣَّا خَاس اَسڒْهَام ذ اَصبْحَان، يَارِّي-ث غَار بِيلَاطُوْس. 12قْبڒ، بِيلَاطُوْس ذ هِيرُوْدُس تُوْغَا ذِين لْعَدَاوَا جَارَاسن وَلَكِن ڒخُّو ذوْڒن ذ يمدُّوْكَاڒ ذِي نْهَار نِّي.

لْحَاكم بِيلَاطُوْس يرزُّو اَذَاس د يضْڒق إِ سِيذِيثْنغ عِيْسَى

13ئِڒَاغَا-د بِيلَاطُوْس خ اَرُّوْيَاس ن ڒْفُقَهَا ذ لْحُكَّام ن أَيث-إِسْرَائِيل ذ مَارَّا شَّعْب. 14ينَّا-ٱسن: "كنِّيو ثُوْوِيم-اَيِي-د بْنَاذم-أَ ثنِّيم-اَيِي قَا يتݣّ ڒْفِتْنَا جَار يِوْذَان. نش خمّْمغ ذِي ثْمسْڒَايْث-أَ زَّاثْوم. وَار ذَايس ؤُفِيغ ذݣ وثَرَّاس-أَ بُو شَان تُّهْمث عْلَاحْسَاب مِين ثقَّارم كنِّيو. 15ؤُڒَا ذ هِيرُوْدُس وَار ذَايس يُوْفِي وَالُو مِينْزِي يَارَّا-اَنغ-ث-يد. خْزَرث، عِيْسَا-يَا وَار يݣِّي مِين خف يسْذَاهدْج ڒْموْث. 16‏-17أَذَاس ؤُشغ اَعْمُوْذ اَذَاس د ضڒْقغ."#23‏.16‏-17 تُوْغَا بِيلَاطُوْس يعَفُّو ذِي مْكُڒ ڒْعِيذ اَمقّْرَان خ يِجّن ن ومحْبُوْس اَذ يفّغ.

18ئِسْنكَّر ثْغُوْيّث مَارَّا شَّعْب نَّان-اَس: "إِيْسِي خَانغ وَانِيتَا، ضْڒق-اَنغ-د إِ بَارَابَاس." 19بَارَابَاس-أَ تُوْغَا ݣِّين-ث ذِي ڒحْبس عْلَاحْسَاب يِجّن ن ڒْفَوْضَا ثوْقع ذِي ثنْدِينْت، عَاوذ عْلَاحْسَاب يجّن ن لْجَرِيمَا ن ڒْموْث.

20بِيلَاطُوْس يخس اَذ د يضْڒق إِ عِيْسَى، ئِسِّيوڒ اَك شَّعْب ثْوَاڒَا نّغْنِي. 21نِثْنِي سْنكَّرن ثْغُوْيّث نَّان-اَس: "صلّب-يث! صلّب-يث!"

22ئِسِّيوڒ اَكِذْسن وِيس ثڒْت-مَرَّاث ينَّا-ٱسن: "مَايمِّي؟ مَان لْجَرِيمَا إِݣ يݣَّا وَانِيتَا؟ نش وَار ذَايس ؤُفِيغ بُو شَان تُّهْمث إِي خف غَا يسْذَاهدْج ڒْموْث. نش اَذَاس ؤُشغ اَعْمُوْذ اَذَاس د ضڒْقغ." 23نِثْنِي سْنكَّرن ثْغُوْيّث س جّْهذ حمَا اَث يصلّب، صَافِي ثْغُوْيّث نْسن ثقْڒب-اَس اَرَّاي. 24ئِكَّر بِيلَاطُوْس يحْكم س مِين خْسن نِثْنِي. 25ئِضْڒق-د إِ ونِّي يدْجَان ذِي ڒحْبس خ سَّبَاب ن ڒْفَوْضَا ذ لْجَرِيمَا ن ڒْموْث، ئِسلّم-اَسن عِيْسَى حمَا اَذَاس ݣّن مِين خْسن.

تَاوِين سِيذِيثْنغ عِيْسَى اَث صلّْبن

26وَامِي ؤُوِين عِيْسَى اَث صلّْبن، طّْفن يجّن ن ورْيَاز زِي ثنْدِينْت ن لْقُرِينَا قَّارن-اَس سِمْعَان، أَرْيَاز-أَ يكَّا-د زِي ڒْكَامْپُـو يعْذُو-د سّنِّي. سَرْبُوْن-اَس ڒْعَسْكَار صَّلِيب حمَا اَث يَرْبُو اَذ يذْفَار عِيْسَى. 27ذْفَارن-ث اَطَّاس ن ڒْغَاشِي، ثِمْغَارِين حزْننْت تْرُوْنْت خَاس. 28ئِنقْڒب-د غَارْسنْت عِيْسَى ينَّا-ٱسنْت: "آي يسِّيس ن لْقُدْس وَار خَافِي تْرُونْت شَا، رُوْنْت خ يِيخف نْكنْت ذ ثَارْوَا نْكنْت. 29أَذ د تَاس يجّن ن ڒْوقْث اَذَايس ينِين: سَّعْذ نْسنْت ن ثِنِّي وَار يزمَّرن شَا اَذ اَرْونْت ذ ثِنِّي عمَّارْص وَار ؤُرِيونْت شَا ذ ثِنِّي عَمَّارْص وَار سُّوْطْضنْت شَا. 30أَذ بْذَان اَذ ينِين إِ يذُوْرَار وْضَام-د خَانغ، أَذ ينِين إِ ثعْرُوْرِين قْبَارنْت-يد خَانغ. 31مڒَا يوْذَان-أَ يِيْنَا ݣِّين مَانَايَا إِ ثْشجَّارْث ذ ثَزيْزَاوْث، مِين ذَاس غَا يوقْعن خْمِي غَا ثَازغ؟"

32عَاوذ ؤُوِين-د ثْنَاين نّغْنِي ذ لْمُجْرِمِين حمَا اَكِذس تْوَانْغن.

ئِرُوْمَانِيْين تْصلَّابن سِيذِيثْنغ عِيْسَى خ صَّلِيب

33وَامِي ؤُوْضن غَار ومْشَان نِّي ؤُمِي قَّارن جُمْجُمَا، صلّْبن-ث ذِنِّي اَك ثْنَاين نِّي ن لْمُجْرِمِين، ئِجّن خ وفُوْسِي يجّن خ وࢲڒْمَاذ. 34ينَّا عِيْسَى: "آ بَابَا، غْفَر يوْذَان-أَ قَا وَار سِّينن شَا مِين تݣّن." ڒْعَسْكَار نِّي ݣِّين لْقُرْعَا خ وَارُّوْض نّس حمَا كُڒ يجّن مِين غَا ييْسِي.

35ئِوْذَان بدّن ذِنِّي خزَّارن ذَايس، أَرُّوْيَاس تْبُوْصَارن خَاس قَّارن: "مڒَا ذ صَّح نتَّا ذ لْمَسِيح إِي يخْضَر أَربِّـي اَتَاف اَذ يسنْجم يخف نّس مِينْزِي يسنْجم ينّغْنِي." 36عَاوذ ؤُڒَا ذ ڒْعَسْكَار ضحّْشن خَاس، قَارّْبن غَارس ؤُشِين-اَس اَمَان وضِيڒ ذ يسمَّامن. 37نَّان-اَس: "مڒَا شك ذ اَزدْجِيذ ن أَيث-إِسْرَائِيل سنْجم يخف نّش." 38غَار وزدْجِيف نّس ݣِّين-اَس يجّن ن ثڒْوِيحت ثُوْرَا ذَايس: وَانِيتَا ذ اَزدْجِيذ ن أَيث-إِسْرَائِيل.

39ئِجّن زِي لْمُجْرِمِين نِّي إِي كِذس صلّْبن يبْذَا يتْزَوَر-يث يقَّار-اَس: "شك مَا ذ لْمَسِيح مَا لَّا؟ يَالَّاه، نجَّا يخف نّش نجَّا-يَانغ."

40ئِنْهَا-ث ونِّي نّغْنِي ينَّا-ٱس: "شك مَا وَار تݣّْوِيذذ شَا أَربِّـي؟ قَا حكّْمن خَاك اَمشْنَاو نتَّا. 41نشِّين حكّْمن خَانغ نِيشَان، نسْذَاهدْج لْحُكم-أَ عْلَاحْسَاب مِين نݣَّا. وَلَكِن اَرْيَاز-أَ وَار يݣِّي شَا مِينْخف." 42ڒخْدّنِّي ينَّا-ٱس: "عْقڒ خَافِي آ عِيْسَى خْمِي د غَا ثَاسذ غَار ڒْمُلْك نّش."

43ئِنْدق-د عِيْسَى ينَّا-ٱس: "أَقَا تسْڒِيذ ڒْحَقّ: نْهَارَا اَذ تِيڒِيذ اَكِذِي ذِي جّنّث."

سِيذِيثْنغ عِيْسَى يمُّوْث خ صَّلِيب

44غَار ثنْعَاش ن وزِيڒ، ثهْوَا-د ثَادْجسْت خ ثْمُوْرْث اَمن-ثكْمَاڒ اَڒ وَامِي ذ ثْڒَاثَا وعشِّي. 45ثْفُوْشْت ثْرُوْح-اَس ثْفَاوْث نّس، ئِقَّارص اَرّْوَاق ن ثمْزِيذَا ثَمقّْرَانْت خ ثْنَاين. 46ئِڒَاغَا عِيْسَى س يِجّن ن ثْمِيجَّا ثجْهذ ينَّا: "آ بَابَا، نش بُوْحْبڒ ينُو سلّْمغ-اَش-ث ذݣ يفَاسّن نّش." وَامِي ينَّا مَانَايَا يَارَّا نّفْس صَافِي يمُّوْث. 47أَعَسْكَارِي نِّي اَمقّْرَان ن اَرُّوْمَانُوْس إِي يدْجَان ذِنِّي وَامِي يࢲْرَا مِين يوقْعن يبْذَا يسمْغَار أَربِّـي ينَّا: "أَثَرَّاس-أَ ذ صَّح بَرِيء إِي يدْجَا." 48مَارَّا يوْذَان إِي ذِنِّي يمُوْنن وَامِي ࢲْرِين مِين يوقْعن، تْروَّاحن-د شَّاثن ذݣ وُوْڒَاون نْسن. 49مَارَّا يمْعَشَارن نّس ذ ثمْغَارِين إِي ث يذْفَارن زِي لْجَلِيل بدّن غَار ڒݣّْوَاج ࢲْرِين مَانَاينِّي.

نطّْڒن سِيذِيثْنغ عِيْسَى

50ذِنِّي يجّن ن ورْيَاز قَّارن-اَس يُوْسف زِي جْمَاعث ن لْحُكَّام ن أَيث-إِسْرَائِيل، نتَّا ذ يجّن ن ورْيَاز يصْبَاح يدْجَان نِيشَان. 51وَار يقبِيڒ شَا مِينْخف ثْتَافق جْمَاعث نِّي ذ مِين ثْخدّم. نتَّا زݣ وبِيلَاج ن أَرِيمَاتْيَا إِي يدْجَان ذِي ثْمُوْرْث ن يَهُوْذِيَا. ئِتْرحَّاب عَاوذ زِي ڒْمُلْك ن أَربِّـي. 52ئِرُوْح غَار بِيلَاطُوْس يتَّار-اَس دَّات ن عِيْسَى. 53ئِرُوْح يُوْسف يسهْوَا-ت-يد.#23‏.53 ئِعْنِي، ئِسهْوَا-د دَّات ن سِيذِيثْنغ عِيْسَى زِي صَّلِيب. ئِكفّن-يت س ڒشْفن. ئِسرْس-يت ذݣ يِجّن ن ونْضڒ يغْزِين ذݣ وزْرُو يݣَّا اَم يِيفْرِي، عمَّارْص وَار ذَايس ينْضِيڒ حَدّ. 54نْهَار نِّي تُوْغَا ذ جّمْعَا، ئِسْرَائِيلِيْين سوْجَاذن إِ نْهَار ن سّبْث ن لْعِبَادَا إِي تُوْغَا عْڒَاين اَذ يبْذَا. 55ثِمْغَارِين نِّي إِي د يُوْسِين اَك عِيْسَى زِي لْجَلِيل ذْفَارنْت يُوْسف غَار ونْضڒ ࢲْرِينْت-ث ذ مَامْش ذَايس ينْضڒ دَّات نّس. 56ذوْڒنْت غَار ثدَّارْث سوْجَاذنْت لْعِيطَر ذ وَامَان ن لْوَرْذ. ذِي نْهَار ن لْعِبَادَا قِّيمنْت ريّْحنْت عْلَاحْسَاب ڒُوْصِيّث نِّي ن مُوْسَى.

Currently Selected:

لوقا 23: ريف

Highlight

Copy