متى 7
7
وَار تْعيَّابث بُو يِوْذَان
1وَار تْعيَّابم حَدّ حمَا وَار كنِّيو يتْعيِّيب شَا أَربِّـي. 2مَامّش غَا ثْعيّْبم اَمنِّي إِ كنِّيو إِي غَا يعيّب أَربِّـي. ڒَعْبَر نِّي إِي ثْسخْذَامم ذ ونِّي إِي كِذْوم غَا يسخْذم أَربِّـي. 3مَايمِّي تْسحْقَرذ شْوَايْت ن ؤُڒُوْم إِݣ يدْجَان ذِي ثِيطّ ن وُوْمَاش، شك تتُّوْذ اَكشُّوْض إِݣ يدْجَان ذِي ثِيطّ نّش؟ 4مَامّش تݣّذ ثْزعّْمذ اَذ تِينِيذ إِ وُوْمَاش: اجَّا-ٱيِي اَذَاش د كّْسغ ڒُوْم-أَ إِݣ يدْجَان ذِي ثِيطّ نّش، شك عَاذ تجِّيذ اَكشُّوْض ذِي ثِيطّ نّش؟ 5آ لْمُنَافِق، كّس ذ اَمزْوَارُو اَكشُّوْض زِي ثِيطّ نّش. عَاذ إِي غَا ثتْوَاڒِيذ مْلِيح حمَا اَذ تكّْسذ ڒُوْم زِي ثِيطّ ن وُوْمَاش. 6وَار تِيشّث شَا مِين يقدّْسن ن أَربِّـي إِ يقْزِينن حمَا وَار غَارْوم د تعْقِيبن اَكنِّيو مزّْقن. وَار نطّرث شَا جُّوْهَر نْوم زَّاث إِ يڒْفَان حمَا وَار خَاسن عفّْسن شَا.
ثْࢲَادْجِيث إِي غَا يسْتَاجْبن
7تَّارم، أَتَاف اَذَاوم يمُّوْش. رزُّوْم، أَتَاف اَذ تَافم. سْقرْقُوْبم، أَتَاف اَذَاوم رزْمن. 8مِينْزِي مَارَّا ونِّي غَا يتَّارن اَذَاس يمُّوْش. ونِّي غَا يرْزُوْن اَذ يَاف. ونِّي غَا يسْقرقْبن اَذَاس ثْنُوْرْزم ثوَّارْث. 9مڒَا شَان يِجّن زَّايْوم يتَّار-اَس مِّيس اَغْرُوْم، مَا اَذَاس يُوْش اَزْرُو ذݣ ومْشَان ن وغْرُوْم نِّي؟ لَّا! 10مڒَا يتَّار-اَس اَسْڒم، مَا اَذَاس يُوْش فِيغر؟ لَّا! 11مڒَا كنِّيو ذ يعفَّانن ثسّْنم اَذ تُوْشم إِ ثَارْوَا نْوم مِين يدْجَان ذ اَصبْحَان، أَتَاف بَابَاثْوم إِݣ يدْجَان ذݣ وجنَّا يتݣّ كْتَار. ئِتِيشّ مِين يدْجَان ذ اَصبْحَان إِ يِنِّي ذَاس ث يتتَّارن.
12ݣّث إِ يِوْذَان مِين ثخْسم اَذَاوم ݣّن. مَانَايَا ذ ڒْمَعْنَا ن شَّرِيعَا ن مُوْسَى ذ تَّعَالِيم ن لْأَنْبِيَا.
ثَوَّارْث ن ثُوْذَارْث
13أَذْفث زِي ثوَّارْث يحْصَرن مِينْزِي ثَوَّارْث نِّي يتَاوِين غَار جَهنَّمَا ثِيرِيو اَطَّاس، أَبْرِيذ نّس يسْهڒ. أَطَّاس إِي زَّايس يعدُّوْن. 14وَلَكِن ثَوَّارْث يحْصَرن ذ وبْرِيذ يقسْحن نِثْنِي تَاوْين غَار ثُوْذَارْث. ذْرُوْس إِي غَا يعْذُوْن سّنِّي.
15حْضَام يخف نْوم زݣ يِنِّي يتَارَّان يخف نْسن ذ لْأَنْبِيَا. تَاسن-د غَارْوم اَم شَان ن يحُوْڒِيْين وَلَكِن ذݣ وُوْڒَاون نْسن ذ وشَّانن يوْعَرن. 16أَثن ثسّْنم س ڒفْعَايڒ نْسن. مَا زمَّرن يِوْذَان اَذ ڒقْذن ثَازَارْث زݣ يسنَّانن، نِغ اَذ كّْسن اَضِيڒ زِي ثْزݣّْوَارْث؟ 17ثَشجَّارْث ثَصبْحَانْت تَارو مِين يدْجَان ذ اَصبْحَان. ثَشجَّارْث ثَعفَّانْت تَارو مِين يدْجَان ذ اَعفَّان. 18ثَشجَّارْث ثَصبْحَانْت وَار تِيْرو شَا مِين يدْجَان ذ اَعفَّان. ثنِّي ثَعفَّانْت وَار تِيْرو شَا مِين يدْجَان ذ اَصبْحَان. 19مَارَّا ثَشجَّارْث إِي وَار يتِيْرْون شَا مِين يدْجَان ذ اَصبْحَان اَذ تْوَاقسّ اَذ تْمنْضَار ذِي ثْمسِّي. 20أَمُّو س ڒفْعَايڒ نْسن إِي غَا ثسّْنم يِنِّي يتَارَّان يخف نْسن ذ لْأَنْبِيَا.
21مَاشِي مَارَّا يِنِّي إِي ذَايِي يقَّارن آ سِيذِي آ سِيذِي اَذ اَذْفن غَار ڒْمُلْك وجنَّا؛ لَّا، وَار ث تِيذْفن شَا إِلَّا يِنِّي يتݣّن مِين يخس بَابَا إِݣ يدْجَان ذݣ وجنَّا. 22ذِي يُوْم لْحِسَاب ذ لْعِقَاب اَطَّاس إِي ذَايِي غَا ينِين: آ سِيذِي آ سِيذِي، يَاك س لْحِكْمَا ن يِيسم نّش إِي زِي تُوْغَا نْسڒْمَاذ إِ يِوْذَان؟ يَاك س لْحِكْمَا ن يِيسم نّش إِي زِي تُوْغَا نْسُوْفُوْغ جْنُوْن؟ يَاك س لْحِكْمَا ن يِيسم نّش إِي زِي تُوْغَا نْتݣّ ڒَعْجَايب؟ 23ڒخْدّنِّي اَذَاسن ينِيغ: تُوْغَايِي نش عمَّارْص وَار كنِّيو سِّينغ شَا. بعّْذث خَافِي آ يِنِّي يتݣّن شَّرّْ!
ڒبْنِي ن صَّح
24مَارَّا ونِّي يتْسْڒَان إِ وَاوَاڒ ينُو يخدّم زَّايس، نتَّا اَم يِجّن ن بْنَاذم ذ اَمِيغِيس يبْنَا ثَدَّارْث نّس خ وزْرُو. 25يُوْوْثَا ونْࢲَار، حمْڒن-د يغْزْرَان، ئِصُوْض-د اَرِّيح يجْهذ يعْذُو خ ثدَّارْث نِّي. وَاخَّا اَمنِّي وَار ثوْضِي شَا ڒَاحقَّاش ثبْنَا خ دْسَاس ن وزْرُو. 26مَارَّا ونِّي يتْسْڒَان إِ وَاوَاڒ ينُو وَار زَّايس يخدّم شَا، نتَّا اَم يِجّن ن وفْغُوْڒ يبْنَا ثَدَّارْث نّس خ يِجْذِي. 27يُوْوْثَا ونْࢲَار، حمْڒن-د يغزْرَان، ئِصُوْض-د اَرِّيح يجْهذ يعْذُو خ ثدَّارْث نِّي. ڒخْدّنِّي ثوْضَا، ثقِّيم ذ ڒْخِرْبث."
28وَامِي يكمّڒ عِيْسَى اَوَاڒ نّس، تْعجّْبن ڒْغَاشِي زݣ وسڒْمذ نّس 29مِينْزِي غَارس سُّلْطَا إِي زِي يسڒْمَاذ، وَار يدْجِي بُو اَمشْنَاو يمْسڒْمَاذن نْسن ن شَّرِيعَا.
Currently Selected:
متى 7: ريف
Highlight
Share
Copy
Want to have your highlights saved across all your devices? Sign up or sign in
