مرقس 14
14
ئِجّن ن ثمْغَارْث ثْذهّن سِيذِيثْنغ عِيْسَى س وَامَان ن لْوَرْذ
1ئِقِّيم-اَس يُوْمَاين إِ ڒْعِيذ اَمقّْرَان ن أَيث-إِسْرَائِيل ذ ڒْعِيذ نِّي ؤُمِي قَّارن ڒْعِيذ ن ثفْضِيرْث. أَرُّوْيَاس ن ڒْفُقَهَا ذ يمْسڒْمَاذن ن شَّرِيعَا رزُّوْن مَامّش ذَاس غَا ݣّن حمَا اَذ طّْفن عِيْسَى س ثحْرَايْمِيث اَث نْغن. 2نَّان جَارَاسن: "ئِتْخصَّا وَار ث نْتطّف شَا ذِي ڒْعِيذ حمَا شَّعْب وَار يتݣّ شَا ڒْفَوْضَا."
3عِيْسَى اَقَاث ذݣ وبِيلَاج ن بَيْت عَنْيَا ذِي ثدَّارْث ن يِجّن قَّارن-اَس سِمْعَان بُو-جْذَام. وَامِي يقِّيم ذِنِّي يتتّ، ثقَارّب-د غَارس يجّن ن ثمْغَارْث غَارس يجّن ن ثْزيَّات ذَايس اَمَان ن لْوَرْذ يصْفَان، ئِغْڒَان س وَاطَّاس. ثرْزم-يت ثْفرّغ-اَس-ثن خ وزدْجِيف نّس. 4شَان إِذْسن زَّايْسن يقّس-اَسن ڒْحَاڒ نَّان جَارَاسن: "مَايمِّي قَاع اَضيّع-أَ ن وَامَان ن لْوَرْذ؟ 5أَتَاف اَمَان نِّي يڒِي منْزن س يِجّن ن تَّمَان ذ اَمقّْرَان كْتَار زِي ثڒْتمِيَّا ن ثْپيَّاسِين ن نُّقَارْث اَذ مُّوْشنْت إِ يمسْعَان!" قِّيمن نِثْنِي نهَّان-ت اَطَّاس.
6ينَّا-ٱسن عِيْسَى: "اجّم-ت! مَايمِّي ت ثسْخيَّاقم؟ أَقَا مِين ذَايِي ثݣَّا ذ اَصبْحَان اَطَّاس. 7ئِمسْعَان اَقَاثن اَكِذْوم ڒبْدَا. مڒْمِي مَا ثخْسم ثْزمَّرم اَذَايْسن ثݣّم ڒْخِير، نش وَار كِذْوم تْغِيمِيغ شَا إِ ڒبْدَا. 8ثݣَّا مِين خَاس. ثْفرّغ-اَيِي اَمَان-أَ ن لْوَرْذ خ دَّات ينُو حمَا اَذَايِي ثْسوْجذ إِ ثنْضڒْث ينُو. 9أَقَا تسْڒَام ڒْحَقّ: مَانِي مَا يُوْوض لْإِنْجِيل ذِي دُّنشْت-أَ اَمن-ثكْمَاڒ، أَتَاف اَذ عَاوْذن خ ثمْغَارْث-أَ ذ مِين ذَايِي ثݣَّا اَم يِجّن ن ذِكْرَا خَاس."
10أُوْشَا يكَّر يَهُوْذَا إِسْخَريُوْطِي ونِّي زِي ثنْعَاش ن اَرُّسُل يرُوْح نتَّا غَار أَرُّوْيَاس ن ڒْفُقَهَا حمَا اَذَاسن يزّنْز عِيْسَى. 11سْڒِين مَانَايَا فَرْحن وعْذن-ث اَذَاس ؤُشن تْمنْيَاث. سّنِّي يرزُّو يَهُوْذَا لْفُرْصَا مَامّش إِي غَا يݣّ اَذَاسن ث يزّنْز.
أَمنْسِي ن ڒْعِيذ اَمقّْرَان ن أَيث-إِسْرَائِيل
12نْهَار اَمزْوَارُو ن ڒْعِيذ ن ثفْضِيرْث، نْهَار نِّي إِي ذِي غَرّْصن ڒْعِيذ، سّقْسَان يمحْضَارن عِيْسَى نَّان-اَس: "مَانِي ثخْسذ أَ نْرَاح اَذَاش نْسوْجذ اَمنْسِي ن ڒْعِيذ اَمقّْرَان؟"
13ئِكَّر عِيْسَى يخْضَر ثْنَاين زݣ يمحْضَارن نّس يسّكّ-يثن ينَّا-ٱسن: "رُوْحم غَار ثنْدِينْت، أَكِذْوم يمڒْقَا يجّن ن ورْيَاز ييْسِي-د اَقْنُوْش ن وَامَان، ذْفَارم-ث. 14مَانِي مَا يُوْذف إِنِيم-اَس إِ بَاب ن ثدَّارْث نِّي، قَا ينَّا-ٱش لْمُعَلِّم: مَانِي يدْجَا وخَّام ينُو إِي ذِي غَا عيّْذغ نش ذ يمحْضَارن ينُو؟ 15أَكنِّيو يَاوِي غَار يِجّن ن ثْغُوْرْفَات ذ ثَمقّْرَانْت ثسُّو، ثعْذڒ. ذِنِّي إِي ذَانغ غَا ثسْوجْذم." 16رُوْحن يمحْضَارن نّس ؤُذْفن غَار ثنْدِينْت، ؤُفِين نِيشَان مَامش ذَاسن ينَّا. صَافِي سْوجْذن اَمنْسِي ن ڒْعِيذ.
17ثُوْوض-د ثْمدِّيث، يُوْسَا-د عِيْسَى اَك ثنْعَاش ن اَرُّسُل نّس. 18قِّيمن تتّن ينَّا-ٱسن عِيْسَى: "أَقَا تسْڒَام ڒْحَقّ: ئِجّن زَّايْوم يتتّ اَكِذِي اَذَايِي يزّنْز."
19ئِقِّيم ذَايْسن ڒْحَاڒ يمحْضَارن نّس تْسقْسَان-ث ئِج-يج نَّان-اَس: "وَار يدْجِي بُو ذ نّش، يَاش؟"
20ئِنْدق-د عِيْسَى ينَّا-ٱسن: "ئِجّن زِي كنِّيو زِي ثنْعَاش إِذْوم، ونِّي إِي كِذِي يسِّيسْنن ذِي طّبْصِي." 21ينَّا-ٱسن: "مِّيس ن بْنَاذم اَذَاس يوْقع عْلَاحْسَاب مَامش خَاس يقَّار لْكِتَاب، وَلَكِن يَا ڒفْضِيحث ن بْنَاذم نِّي إِي ث غَا يزّنْزن! حْسن إِ نتَّا مْڒِي وَار د يخْڒِيق شَا."
22وَامِي عَاذ تتّن، ئِيْسِي-د اَغْرُوْم يشكَّر أَربِّـي يرْزَا اَغْرُوْم نِّي يُوْشَا-ٱسن-ث إِ يمحْضَارن نّس ينَّا-ٱسن: "يْسِيم-ث، ذ وَا إِݣ يدْجَان ذ دَّات ينُو." 23ئِيْسِي-د ڒْكَاس يشكَّر أَربِّـي يُوْشَا-اَسن-ث، سْوِين زَّايس مَارَّا إِذْسن. 24ينَّا-ٱسن: "ڒْكَاس-أَ ذَايس يذَامّن#14.24 ئِذَامّن نتَّا ذ دّم. ن ڒْعَهذ، يعْنِي ذ يذَامّن ينُو إِي غَا يَازّْڒن عْلَاحْسَاب اَطَّاس ن يِوْذَان. 25أَقَّا تسْڒَام ڒْحَقّ: زِي سَّا اَڒ ثْسَاونْت وَار سسّغ شَا زݣ وَامَان-أَ وضِيڒ حتَّا اَڒ نْهَار نِّي إِي ثن غَا سْوغ زِي جْذِيذ ذِي ڒْمُلْك ن أَربِّـي." 26غنّْجن يجّن ن يِزْڒِي ن ڒْعِيذ، سّنِّي فّْغن رُوْحن غَار وذْرَار ن زِّيتُوْن.
سِيذِيثْنغ عِيْسَى يسَّاوَاڒ خ ونْكَر ن بُطْرُس
27ينَّا-ٱسن عِيْسَى إِ يمحْضَارن نّس: "أَذَايِي ثْسمْحم مَارَّا إِذْوم مِينْزِي يقَّار لْكِتَاب:
<أَذ ؤُوْثغ ونِّي يرَاسّن يحُوْڒِيْين،
كُڒ يجّن زِي ثْحِيمرْث مَانِي غَا يَرْوڒ.>#14.27 خْزَار زَكَرِيَا 7:13.
28وَلَكِن خْمِي د غَا كَّرغ زِي ڒْموْث، أَذَاوم يزْوَارغ غَار ثْمُوْرْث ن لْجَلِيل."
29ينَّا-ٱس بُطْرُس: "وَاخَّا اَذَايش غَا سمْحن مَارَّا، نش وَار ذَايش سمْحغ شَا."
30يَارَّا خَاس عِيْسَى ينَّا-ٱس: "أَقَا تسْڒِيذ ڒْحَقّ: ثَا، دْجِيڒث-أَ قْبڒ مَا ٱذ يدّن ويَازِيض مَرّْثَاين اَتَاف اَذَايِي ثنْكَرذ ثْڒَاثَا ن ثْوَاڒَاثِين."
31ينَّا-ٱس بُطْرُس نتَّا متْأَكَّاد: "نش وَار ش نكَّرغ شَا وَاخَّا اَكِذش إِي غَا مّْثغ." أَمنِّي إِي نَّان مَارَّا يمحْضَارن.
سِيذِيثْنغ عِيْسَى يتْࢲَادْجَا ذݣ وذْرَار ن زِّيتُوْن
32يُوْسَا-د عِيْسَى اَك يمحْضَارن نّس غَار يِجّن ن ومْشَان قَّارن-اَس <ݣَتْسِمَانِي.> ينَّا-ٱسن: "قِّيمم ذَا، نش اَذ رَاحغ ذِيهَا اَذ ࢲَّادْجغ." 33يُوْوِي اَكِذس بُطْرُس ذ يَعْقُوْب ذ يُوْحَنَّا، ئِبْذَا يتْنخْڒع يتْخيَّاق. 34ينَّا-ٱسن: "ڒَعْمَر ينُو عْڒَاين اَذ يدُّوْقّز س لْحُزن. قِّيمم ذَا ثْفَاقم." 35ئِبعّذ خَاسن شْوَايْت، ئِسجّذغَار ثْمُوْرْث يبْذَا يتتَّار إِ أَربِّـي يرزُّو اَخَاس تْوَاكّس ثْسَعَّات نِّي. 36ينَّا: "آ بَابَا، شك كُڒْشِي ثْزمَّرذ-اَس، سْبعّذ-يث خَافِي ڒْكَاس-أَ ن ڒَعْذَاب. مَاشِي مَامش خْسغ نش؛ لَّا، مَامّش يخس ڒْخَاضَر نّش شك."
37ئِذْوڒ غَار يمحْضَارن-أَ يُوْفِي-ثن طّْصن، ينَّا-ٱس إِ بُطْرُس: "مَا تطّْصذ آ سِمْعَان؟ مَا وَار ثْزمَّرذ شَا اَكِذِي ثْفَاقذ وَاخَّا ذ يجّن ن ثْسَعَّات وَاهَا؟ 38إِڒِيم عْلَابَال ࢲَّادْجم حمَا وَار تِيذْفم شَا ذِي ڒمْحَاين. ؤُڒ ن بْنَاذم يوْجذ وَلَكِن دَّات نّس ثضْعف." 39ئِبعّذ خَاسن عَاوذ يتَّار إِ أَربِّـي اَمشْنَاو اَمزْوَارُو. 40ئِذْوڒ-د عَاوذ غَارْسن يُوْفِي-ثن طّْصن ڒَاحقَّاش يغلّب خَاسن يِضص. نِثْنِي عَاوذ وَار ؤُفِين مِين ذَاس غَا ينِين. 41ئِذْوڒ-د غَارْسن وِيس ثڒْت-مَرَّاث ينَّا-ٱسن: "عَاذ ثطّْصم، عَاذ ثْريّْحم؟ صَافِي، بَرَكَا! أَقَا ثُوْوض-د ڒْوقْث نِّي إِي ذِي غَا يتْوَاسلّم مِّيس ن بْنَاذم غَار يفَاسّن ن يِنِّي يعصَّان. 42كَّرم أَ نُوْيُوْرم، قَا ونِّي إِي ذَايِي غَا يزّنْزن اَقَاث يُوْسَا-د."
ئِسْرَائِيلِيْين ذ يرُوْمَانِيْين تطّْفن سِيذِيثْنغ عِيْسَى
43يَالَّه عِيْسَى يسَّاوَاڒ يُوْوض-د يَهُوْذَا، يجّن زِي ثنْعَاش نِّي ن اَرُّسُل نّس. يُوْوِي-د اَكِذس ڒْغَاشِي اَطَّاس يْسِين ڒسْيُوْف ذ يْدبُّوْزن. سّكّن-ثن-د اَرُّوْيَاس ن ڒْفُقَهَا ذ يمْسڒْمَاذن ن شّرِيعَا ذ يمقّْرَانن ن أَيث-إِسْرَائِيل.
44ونِّي إِي ث غَا يزّنْزن يعْنِي يَهُوْذَا قْبڒ تُوْغَا يتَافق اَكِذْسن خ يِجّن ن لْعَلَامَا ينَّا-ٱسن: "ونِّي خف غَا سدْجْمغ ذ ونِّي إِي خف ثْرزُّوْم. طّْفم-ث، أَوِيم-ث يحْضَا." 45صَافِي يُوْسَا-د يَهُوْذَا يقَارّب غَار عِيْسَى ينَّا-ٱس: "آ سِيذِي." أُوْشَا يسدْجم خَاس. 46ڒخْدّنِّي سرْسن خَاس يفَاسّن نْسن طّْفن-ث. 47ئِجّن زݣ يِنِّي ذِنِّي يدْجَان يجْبذ-د سِّيف يُوْوْثَا زَّايس يسْمغ ن اَرَّايس ن ڒْفُقَهَا يقسّ-اَس اَمزُّوْغ.
48ينَّا-ٱسن عِيْسَى: "مَا تْغِير-اَوم قَا نش ذ لْمُجْرِم وَامِي د ثيْسِيم ڒسْيُوْف ذ يدبُّوْزن حمَا اَذَايِي ثطّْفم نِغ؟ 49تُوْغَا تْغِيمِيغ اَكِذْوم مْكُڒ نْهَار ذِي ثمْزِيذَا ثَمقّْرَانْت سڒْمَاذغ ذِنِّي، وَار ذَايِي ثطِّيفم شَا. وَلَكِن مَارَّا مَانَايَا يوْقع حمَا اَذ يكمّڒ مِين يُوْرِين ذِي لْكُتُب." 50أُوْشَا سمْحن ذَايس مَارَّا اَروْڒن.
51يذْفَار-يث يجّن ن وحنْجِير، خَاس تْشَامِّير وَاهَا. طّْفن-ث 52وَلَكِن نتَّا يَرْوڒ-اَسن ذ اَعرْيَان يجَّا ذِنِّي تْشَامِّير نّس.
سِيذِيثْنغ عِيْسَى زَّاث إِ لْحُكَّام ن أَيث-إِسْرَائِيل
53ؤُوِين عِيْسَى غَار اَرَّايَس ن ڒْفُقَهَا. مُوْنن اَكِذس مَارَّا اَرُّوْيَاس ن ڒْفُقَهَا، ذ يمقّْرَانن ن أَيث-إِسْرَائِيل، ذ يمْسڒْمَاذن ن شَّرِيعَا. 54ئِذْفَار-يث بُطْرُس زِي ڒݣّْوَاج، يُوْذف غَار ڒمْرَاح ن ثدَّارْث ن اَرَّايس نِّي. ئِقِّيم اَك يعسَّاسن يزْغَار غَار ثْمسِّي. 55أَرُّوْيَاس ن ڒْفُقَهَا ذ مَارَّا جْمَاعث ن لْحُكَّام ن أَيث-إِسْرَائِيل رزُّوْن شْهَاذث ضد إِ عِيْسَى حمَا اَث نْغن وَلَكِن وَار ؤُفِين وَالُو. 56أَطَّاس إِي خَاس يشهّْذن ࢲُّوْر، وَلَكِن غَارْسن تَنَاقُض ذِي شْهَادث نْسن كُڒ يجّن مِين يقَّار. 57كَّرن ڒبْعَاض شهْذن خَاس ࢲُّوْر نَّان: 58"نتْسْڒَا-يَاس يقَّار قَا نش اَذ هذْمغ ثَمْزِيذَا-يَا ثَمقّْرَانْت إِي بْنَان يِوْذَان س يفَاسّن، أَذ بْنِيغ يجّن ن ثمْزِيذَا ذِي ثڒْتِيَّام وَار ت بْنِين يِوْذَان س يفَاسّن." 59وَلَكِن عَاوذ غَارْسن تَنَاقُض ذِي شْهَادث نِّي نْسن كُڒ يجّن مِين يقَّار. 60أُوْشَا يبدّ اَرَّايس ن ڒْفُقَهَا ذِي ڒْوسْط ن جْمَاعث ينَّا-ٱس إِ عِيْسَى: "مَا وَار ثقَّارذ وَالُو شك؟ مِين خَاش شهّْذن يِوْذَان-أَ؟" 61ئِقِّيم عِيْسَى يسْقَار وَار خَاس يَارِّي شَا. ئِكَّر يسّقْسَا-ث عَاوذ اَرَّايس ن ڒْفُقَهَا ينَّا-ٱس: "مَا شك ذ لْمسِيح مِّيس ن أَربِّـي إِي يدْجَان مُبَارِك؟"
62ينَّا-ٱس عِيْسَى: "وَاه، ذ نّش. كنِّيو اَذ تࢲرم مِّيس ن بْنَاذم يقِّيم خ وفُوْسِي ن لْقَوِي. أَث ثࢲرم عَاوذ يهوَّا-د اَك وسيْنُو وجنَّا."
63أَرَّايس نِّي ن ڒْفُقَهَا يغَرص اَرُّوض خ يِيخف نّس ينَّا-ٱسن: "وَار نحْذِيج بُو ڒشْهُوْذ! 64ما ثسْڒِيم-اَس يقَّار لْمُنْكَر خ سِيذِي أَربِّـي؟ مِين ذَاوم يمظْهَارن؟" مَارَّا حكْمن خَاس بلِّي ئِسْذَاهدْج ڒْموْث.
65سّنِّي بْذَان ڒبْعَاض زَّايْسن سُّوْسُوْفن خَاس. ڒحّْفن-اَس خ وغمْبُوْب نّس شَّاثن-ث س ڒْپُوْنْيَاث قَّارن-اَس: إِيوَا آ نَّبِي سِيوڒ! ؤُوِين-ث-يد يعسَّاسن شَّاثن-ث س يسقِّيڒن.
بُطْرُس ينكَّر سِيذِيثْنغ عِيْسَى
66بُطْرُس يقِّيم غَار بَارَّا اَودَّاي ذِي ڒمْرَاح. ثْقَارّب غَارس يجّن ن ثْخدَّانْت ن اَرَّايس ن ڒْفُقَهَا. 67ثࢲْرِي-ث يزْغَار غَار ثْمسِّي، ثخْزَار ذَايس مْلِيح ثنَّا-ٱس: "ؤُڒَا ذ شك ثدْجِيذ اَك عِيْسَى زِي نَاصِرَا."
68ينْكَر بُطْرُس ينَّا-ٱس: "وَار فْهِيمغ شَا وَار سِّينغ شَا مِينْخف ثْسَّاوَارذ!" ئِفّغ بُطْرُس يرُوْح طَّارْف ن ثوَّارْث ن ڒمْرَاح. {ڒخْدّنِّي يدّن ؤُيَازِيض.}
69ثࢲْرِي-ث ثْخدَّانْت نِّي ذِنِّي ثنَّا-ٱسن عَاوذ إِ يِنِّي يبدّن ذݣ ومْشَان نِّي: "قَا اَرْيَاز-أَ وَانِيتَا زَّايْسن."
70ئِنْكَر بُطْرُس عَاوذ. منْبَعْد شْوَايْت نَّان-اَس يِنِّي يبدّن ذݣ ومْشَان نِّي: "إِيوَا نِيشَان، شك ذ يجّن زَّايْسن مِينْزِي شك زِي لْجَلِيل."
71ئِكَّر بُطْرُس يبْذَا يتْحَرّم يخف نّس يتْجَادْجَا يقَّار-اَسن: "أَرْيَاز-أَ إِي خف ثْسَّاوَاڒم نش وَار ث سِّينغ شَا!" 72ڒخْدّنِّي يدّن ويَازِيض ثْوَاڒَا وِيس ثْنَاين، ئِفكَّر-د بُطْرُس اَوَاڒ نِّي ن عِيْسَى وَامِي ذَاس ينَّا: قْبڒ مَا ٱذ يدّن ويَازِيض مَرّْثَاين اَذَايِي ثنْكَرذ تْڒَاثَا ن ثْوَاڒَاثِين. وَامِي يفكَّر ذِي مَانَاينِّي يرُو يمطَّاون ذ يمدْجَاحن اَطَّاس.
Currently Selected:
مرقس 14: ريف
Highlight
Share
Copy
Want to have your highlights saved across all your devices? Sign up or sign in
