مرقس 16
16
سِيذِيثْنغ عِيْسَى يكَّر-د زِي ڒْموْث
1وَامِي يعْذُو نْهَار ن سّبْث ن لْعِبَادَا، مَرْيَم ثَمَݣْدَالِيث، ذ سَالُوْمِي، ذ مَرْيَم يمَّاس ن يَعْقُوب رُوْحنْت سْغِينْت لْعِطَر ؤُوِينْت-ث-يد اَذَاس ذهْننْت. 2نْهَار اَمزْوَارُو ن سِّيمَانَا زِيش اَك ڒفْجَر رُوْحنْت غَار ونْضڒ نّس. 3سَّاوَاڒنْت جَارَاسنْت اَك وبْرِيذ قَّارنْت: "وِي ذَانغ غَا يكّْسن اَزْرُو خ وقمُّوْم ن ونْدڒ اَث يسقْنُوْنِّي؟" 4وَامِي خْزَرنْت، ؤُفِينْت اَزْرُو نِّي يتْوَاكّس أُو نتَّا ذ اَمقّْرَان اَطَّاس. 5ؤُذْفنْت غَار يِيفْرِي ن ونْضڒ نِّي ؤُفِينْت يج وحنْجِير يقِّيم خ جِّهث ثَفُوْسِيث، يݣَّا اَرُّوْض ذ اَشمْڒَار أُو قِّيمنْت ذهْشنْت اَطَّاس.
6ينَّا-ٱسنْت: "وَار ذهّْشنْت شَا! كنِّينْت ثْرزُّونْت خ عِيْسَى نَاصِرِي يتْوَاصلّْبن. نتَّا وَار ذَا يدْجِي شَا، ئِكَّر-د زِي ڒْموْث. هَاقَا اَمْشَان نّس مَاني تُوْغَا ث سرْسن. 7رُوْحنْت كنِّينْت ڒخُّو غَار يمحْضَارن نّس ذ بُطْرُس إِنِينْت-اَسن اَقَا عِيْسَى يرُوْح اَذَاوم يزْوَار غَار ثْمُوْرْث ن لْجَلِيل اَكنِّيو يرَجَا ذِنِّي. أَث تَافم اَمشْنَاو مَامّش غَارْوم د يوصَّا زِي قْبڒ." 8ثِمْغَارِين نِّي ترْجِيجِينْت ذهّْشنْت، كَّرنْت رُوْحنْت ذغْيَا زݣ ونْضڒ نِّي اَروْڒنْت. وَار عَاوْذنْت مَانَاينِّي إِ حَدّ مِينْزِي نِثنْتِي ݣّْوْذنْت.
سِيذِيثْنغ عِيْسَى يتْوَارْفع غَار وجنَّا
9{عِيْسَى وَامِي د يكَّر زِي ڒْموْث زِيش نْهَار اَمزْوَارُو ن سِّيمَانَا يمظْهَار-د ذ اَمزْوَارُو إِ مَرْيَم ثَمَݣْدَالِيث ثنِّي إِي زِي تُوْغَا يسُوْفغ سبْعَا ن جْنُوْن. 10ثْرُوْح نتَّاث اَذ تْسِيْوض ڒخْبَار-أَ إِ يِنِّي تُوْغَا يدْجَان اَك عِيْسَى، ثُوْفِي-ثن حزْنن تْرُوْن. 11وَامِي ذَاسن ثْعَاوذ ثنَّا-ٱسن قَا ࢲْرِيغْ-ث يدَّر، وَار ت ؤُمِينن شَا.
12منْبَعْد إِ مَانَايَا يمظْهَار-اَسن-د عِيْسَى س يِجّن ن صِّفْث نّغْنِي إِ ثْنَاين إِذْسن وَامِي تُوْغَا ݣُّوْرن غَار ڒْكَامْپُو. 13ذوْڒن-د اَذ عَاوْذن ڒخْبَار-أَ إِ أَيثْمَاثْسن، وَار ثن ؤُمِيْنن شَا.
14منْبَعْد وَامِي قِّيْمن تتّن حِطَاش ن اَرُّسُل نّس، ئِمظْهَار-اَسن-د ينْهَا-ثن مِينْزي لإِيمَان نْسن ذ وقْلِيل ؤُڒَاون نْسن قسْحن. تُوْغَا نِثْنِي عَاوذ وَار ؤُمِيْنن شَا يِنِّي إِي ث يࢲْرِين وَامِي د يكَّر زِي ڒْموْث.
15ينَّا-ٱسن: "رُوْحم غَار مَارَّا دُّنشْت، بشَّرم مَارَّا ڒݣْنُوْس س لْإِنْجِيل. 16ونِّي يُوْمْنن اَذ يتْوَاطهَّار س وَامَان اَتَاف اَذ ينْجم. ونِّي وَار يُوْمِيْنن شَا اَتَاف اَذ يتْوَاحْكم. 17ذ ثِيْنَا ذ لْعَلَامَاث إِي د غَا يمظْهَارن اَك يِنِّي يتَامْنن: أَقَّا نِثْنِي اَذ سُوْفْغن جْنُوْن عْلَاحْسَاب يسم ينُو، أَذ سِّيوْڒن س يِيڒسَاون ذ جْذِيذ. 18أَذ يْسِين يفِيْغرَان س يفَاسّن نْسن. مڒَا سْوِين مِين ينقّن، أَتَاف وَار ثن يضَرِّي شَا. أَذ سرْسن يفَاسّن نْسن خ يمهْڒَاش اَذ ݣنْفَان."
19ئِسِّيوڒ اَكِذْسن سِيذِيثْنغ عِيْسَى سّنِّي يتْوَارْفع غَار وجنَّا يقِّيم خ وفُوْسِي ن أَربِّـي. 20نِثْنِي فّْغن بشَّرن يوْذَان ذِي مْكُڒ اَمْشَان. سِيذِيثْنغ اَقَاث اَكِذْسن، ئِسْمظْهَار-د ڒْحَقّ ن يِنِّي يتْبشَّارن س وَاطَّاس ن لْعَلَامَاث إِي ثن يذفَّارن.}
Currently Selected:
مرقس 16: ريف
Highlight
Share
Copy
Want to have your highlights saved across all your devices? Sign up or sign in
