John 1

Sa Ugud Nambalin Aḵ Tagu

1Sa daan ni lubung maḵwaan, gagangaye inninggaw Ugud.#1:1 Mipagapu si ugud, maḵwa ipaigammun da tagu ḵasomsomḵanda'tta udume tagu. Sadi isun ni piona ugudon atte Greek we sa ugud sa piona ḵanan, maḵwa ipaigammun Apudyus ḵasomsomḵana'tta tagu mipagapu si Ugud we siya'ḵ Jesu Kristu. Sa Ugud inninggaw ḵan Apudyus ya siya Apudyus. 2Inninggaw Ugud ḵan Apudyus atte daan ni lubung maḵwaan. 3Mipagapu ḵan siya ḵingwan Apudyus da losan. Naippun naḵwa nu adi gapu ḵan siya. 4Siya naḻpuwan ni biyag ya sa sanae biyag siya anilaw atta somsomoḵ da tagu. 5Sa sadi ye silaw, silawana pongot ḵad sa pongot adinapun paat oḻgon sadi ye silaw.

6Inninggaw tagu we imbuun Apudyus we nangngadan aḵ John.#1:6 Sa annae John, siya'ḵ John we Ambobonyag, daḵampun atte disipulun Jesu Kristu we nangigili si annae iblu. 7Ummali ta taḵdoḻana mipanggob si sadi ye silaw ta mipagapu ḵan siya amati oḵyan da losane tagu. 8Daḵampun aḵ siya mismu we silaw yaḵon ummali ta taḵdoḻana mipanggob atte silaw.

9Sa tuttuwae silaw, ummali si annae lubung ta silawana somsomoḵ da losane tagu. 10Inninggaw si lubung ya mipagapu ḵan siya, naḵwa lubung yaḵon adimpun da tagu immatunan nu ngai'ḵ siya. 11Ummoy si mismu we ilina yaḵon adimpun da ḵailiyana inawat. 12Yaḵon da losane nangawat ya namati ḵan siya, innatodna ḵan dida ḵaḻabbongane ambalin aḵ abeng Apudyus. 13Sa nambalinanda'ḵ abeng Apudyus, daḵampun aḵ isuna miyanaḵ atte tagu ḵan pion da an-asawa yaḵon naḻpu si ḵabooḻan Apudyus.

14Sa Ugud, nambalin aḵ tagu woḵ inninggaw ḵan ditaḵu. Amod de ḵinabaḻuna ya ḵatuttuwaan da losane imbagabagana. Innilani ḵan siya nakaskasdaawe ugalin Apudyus te siya abus aḵ Abeng we naḻpu ḵan Amana.

15Pinanoḵnoḵan John mipanggob ḵan siya woḵ ḵananae nangiyipḵaw, “Sana imbagabagaḵ ḵan diḵayu we awad de umun-unud ḵan saḵone nangatngatu te inggaw atte daanḵu mibuḵnagan.” 16Ḵad gapu'tte ummamdane ḵinabaḻuna, binbindisyunana ditaḵu losane namati. 17Innatod Apudyus lintog mipagapu ḵan Moses yaḵon mipagapu ḵan Jesu Kristu we pinilin Apudyus aḵ Anagu ya An-ari, impailana ḵinabaḻu ḵan ḵatuttuwaan mipanggob ḵan siya. 18Naippun tagu'ḵ nangila ḵan Apudyus yaḵon aḵ Jesu Kristu we os-ossaane Abengna we mibuḻubuḻun ḵan Amana, siyae mismu nangipaigammu ḵan siya.

Sa Panoḵnoḵ John We Ambobonyag

(Mat. 3:1-12; Mrk. 1:1-8; Luk. 3:1-18)

19Annaya tinaḵdoḻan John. Sin-aḻgawan ḵad, imbuun da papangat da Judyu ad Jerusalem da udume papadi ya da udume ganaḵ Levi ta umoyda imuson ḵan John nu ngai'ḵ siya.#1:19 Da sanae ganaḵ Levi, dida da bumadang atta papadi ye anḵewaaḻ si tulda Numbers 3:17-37 woḵ naḻaḵpus ḵad de pigae tawon, naḵwa templo we boḻoy Apudyus ad Jerusalem. Aḵ Aaron osa'tta ganaḵ Levi ya da ganaḵ Aaron dida da papadi. Ḵad losan atta udume ganaḵ Levi bumadangda'tta papadi. Da sanae ganaḵ Levi, dida da angila ḵan angayyuwan atte tulda baḵon nu sa templo ḵad bumadangda'tte ḵewaaḻ da papadi amod ay ḵanḵanta'tte andayawanda ya antuttududa bos. Sa naḵwa'tte sanae John, nibuḻundae angguwaḻda'tta papadi. Aḵ John we Ambobonyag, abeng di padi. 20Adimpun John insilib yaḵon imbabaggana ḵatuttuwaan woḵ ḵanana, “Daḵampun aḵ saḵon Kristu.”#1:20 Aḵ Kristu siya pinilin Apudyus aḵ Anagu ya An-ari.

21Pun ḵanandae nangimus, “Ḵad ngaiḵa nu? Siḵa'ḵ Profeta Elijah?”

Ḵanana, “Naid! Daḵanaḵpun.”

Pun ḵananda bos, “Siḵa ḵad ain profeta we an-uuggudon Apudyus we uuwayonni?”

Ḵanan os John, “Naid! Daḵanaḵpun.”

22Pune sadi ḵananda, “Ngaiḵa nu? Ibagam ḵappos te ḵasapuḻane awad ibagani'tta nangibuun ḵan diḵani. Ngai ḵad ain ḵanam ḵan siḵa?”

23Ḵanan John,

“Saḵon inninggaw si bumbummaawe ḵanaḵe angiwaḻagawag,

‘Pagodongonyu daḻan si umaliyan Apu.’ ”#1:23 Isaiah 40:3.

Aḵ John nituttuwaan ni inggilin Profeta Isaiah si awe.

24Imbuun da Pharisee#1:24 Da Pharisee osadae grupun da Judyu atte timpun Jesus. Dida da pangat atte mipanggob si religion da Judyu. Uunnudonda lintog Moses ya da ugalin da danaḵḵoḻda. Patiyondae da tagu ḵad awad da ḵalidodwada baḵon nu ispirituda ya umuli da natoy atte umali ye aḻgaw. Patiyonda bose awad da anghel. da tagu we maḵaim-imus ḵan John. 25Ḵanandae nangimus ḵan siya, “Ḵad nu daḵanḵapun aḵ Kristu baḵon nu aḵ Profeta Elijah baḵon nu sa profeta we uuwayonni, ngaipaḵa dam-on ambonyag nu?”

26Ḵanan John we summongbat, “Ambonyagaḵ si danume abus yaḵon annat ḵan diḵayu tataḵdoge ippun igammuyu. 27Siya umun-unud ḵan saḵon ḵad gapu'tte ḵinangatuna, ippun labbongḵu we anguḵas atte sandalna.”

28Naḵwa da anna'd Bethany atte biiḵ ni tawwang Jordan we sa nambonyagan John atta tagu.

Sa Karneron Apudyus

29Mabigat ḵad, innilan John aḵ Jesus we annate umali woḵ ḵanana, “Ilanyu! Annaya Karneron Apudyus we innatodna'ḵ midatun ta angaan atta basuḻ da tagu'tte lubung. 30Siya imbagabagaḵ ḵanane, ‘Awad de umun-unud ḵan saḵone nangatngatu te inggaw atte daanḵu mibuḵnagan.’ 31Taḵon ay saḵon, naippun igammuḵ nu ngai sanae umun-unud. Yaḵon ummaliyaḵ ta bonyagaḵ da tagu si danum ta mipaigammu'tta ganaḵ Israel.”

32-33Annaya panoḵnoḵ John si mipanggob ḵan Jesus. Ḵanana, “Naippun tuwa igammuḵ si annae umun-unud ḵan saḵon. Yaḵon sa nangibuun ḵan saḵon aḵ umoy ambonyag si danum ḵanana, ‘Sa ilame ansimpaan ni Ispiritu Santu ya inninggaw ḵan siya, siya angibonyag si Ispiritu Santu atta tagu.’ Ḵad innilaḵ Ispiritu we dummoḻae naḻpu'd langite isun di kalapati woḵ iinggaw ḵan siya. 34Innilaḵe mismu, pun panoḵnoḵaḵe siya tuttuwae Abeng Apudyus.”

Da Ummunae Disipulun Jesus

35Mabigat ḵad, inninggaw da John ya da duwae disipuluna'tte biiḵ ni tawwang Jordan. 36Innilana ḵad aḵ Jesus we lumaus ḵanana, “Ilanyu, annayat Karneron Apudyus we innatodna'ḵ midatun.”

37Dingngoḻ ḵad ay da duwae disipulu imbagan John, nitun-udda ḵan Jesus. 38Nantawili ḵad aḵ Jesus, innilana didae mituntun-ud woḵ ḵanana, “Ngai singtonyu?”

Ḵananda, “Rabbi” sa piona ḵanan mistulu, “dinu inggawam?”

39Ḵanan Jesus, “Umali ḵayu ta ilanyu.” Pun ummoyda innila igawna woḵ naḵaigawda ḵan siya. Annae madam-an mipisong init inggana'ḵ labi.

40Sa osae nangngoḻ si imbagan John we nitun-ud ḵan Jesus, aḵ Andrew we sunud Simon Peter. 41Ḵingwan ḵad Andrew, daguse ummoyna singngit sunudnae aḵ Simon woḵ ḵanana ḵan siya, “Indasanni Messiah.” Sa pion ni Messiah ugudon Kristu.#1:41 Sa pion ni Kristu ḵanan siya pinilin Apudyus aḵ Anagu ya An-ari. 42Pun inniyoyna'ḵ Simon woḵ ummoyda si igaw Jesus.

Intollong ḵad Jesus ḵanana, “Siḵa'ḵ Simon we abeng John. Sinsadi ngadanaḵ siḵa'ḵ Cephas.” Sa ngadane Cephas atte Hinebrew, Peter atte Greek. Ḵad sa piona ḵanan batu.

Da Philip Ḵan Nathanael

43Mabigat ḵad, simsimmoḵ Jesus we umoy atte probinsiya'd Galilee. Indasana'ḵ Philip woḵ ḵanana ḵan siya, “Tun-udonaḵ ta ambalinoḵ siḵa'ḵ disipuluḵ.”

44Aḵ Philip ḵad iBethsaida we sa ilin da Andrew ḵan Peter. 45Pune sadi, indasan Philip aḵ Nathanael woḵ ḵanana ḵan siya, “Indasanni tagu we inggilin Moses si lintog ya da profetan Apudyus atte awe. Siya'ḵ Jesus we abeng Joseph we iNazareth.”

46Pun ḵanan Nathanael, “Awad ḵamman ambaḻu'ḵ naḻpu'd Nazareth?” Ḵanan Philip, “Awwaynu ta inta ilan.”

47Innilan ḵad ay Jesus aḵ Nathanael we umadani, imbagana mipanggob ḵan siya woḵ ḵanana, “Annaya tuttuwae ganaḵ Israel we adipun nasiḵap.”

48Ḵanan Nathanael we nan-imus, “Ngai inome nangigammu ḵan saḵon?”

Ḵanan Jesus, “Taḵon ay daan Philip ḵan siḵa angayagan, innilaḵ siḵa si puun ni ḵayu we fig.”

49Pun ḵanan Nathanael, “Mistulu, siḵa Abeng Apudyus! Siḵa Ari'd Israel!”

50Ḵanan os Jesus, “Gapu'tte imbagaḵe innilaḵ siḵa si puun ni de fig, amatiḵa ḵamman? Asim ilan da sindumallu we nakaskasdaaw nu sa anna.” 51Pun ḵanana bos ḵan dida, “Ibagaḵ ḵan diḵayu ḵatuttuwaan, sa umali ye aḻgaw asiyu ilane mabuḵatan ad langit ḵad ilanyu da anghel Apudyus we ngumatu ḵan dumoḻa ḵan saḵone Abeng Di Tagu we naḻpu'd langite niyanaḵ sina'd luta.”#1:51 Abeng Di Tagu - Sa ngadane inusar Jesus atte long-agna. Siya ngadane inusarna'tte Baru we Tuḻag nu antuttudu mipanggob ḵan siya. Matthew 8:20, 9:6, 10:23, 11:19, 12:8.

Currently Selected:

John 1: kml

Highlight

Copy