John 8

Sa Bubai Ye Naḵadagdagas

1Yaḵon ummoy aḵ Jesus atte Beleg ad Olives. 2Pummadda ḵad, nipauli'ḵ Jesus atte paway ni templo. Nandatdatong os da adu we tagu pun tummuḵdu woḵ insaḻadnae nantuttudu ḵan dida. 3Pune sadi, indatong da mimistulun ni lintog#8:3 Da mimistulun ni lintog, nibelangda bos atta amo mapatgane tagu'tta susunuddae iyIsrael te iniiggammuda lintog Moses. Naadaḻanda, ḵad dida angituttudu'tte Ugud Apudyus ya da aduadu we ugalin da danaḵḵoḻda mipanggob atta imbilin Apudyus we ḵoonda ḵan adida ḵoon. ya da Pharisee bubai ye naodasane naḵadagdagas. Ḵingwada ḵad, pinasiḵadda'tte sinagung da tagu, 4woḵ ḵananda ḵan Jesus, “Mistulu, sa annae bubai naodasane naḵadagdagas. 5Ḵad sa imbilin ni lintog Moses, ḵasapuḻane mabatubatu inggana'ḵ matoy. Pun ngai ḵuwame ḵasomsomḵan?” 6Ḵaḵna im-imusda te pionda padason aḵ Jesus ta ngai ḵad de isongbatna siya ambatayandae angidaḻum ḵan siya. Yaḵon nangwa ḵad aḵ Jesus, ummobaob woḵ nanggilina tammuduna si gabu.

7Anna ḵade isassauddae angimus, summiḵad woḵ ḵanana, “Nu ngai ḵan diḵayu ippun basuḻna, siya umunae amatu ḵan siya.” 8Pun ummobaob os ḵasin woḵ anggiligili si gabu.

9Dingngoḻda ḵad ay insongbat Jesus, nasin-ossadae ummoyon, ummuna da anḵamaḻong-ag. Pun ummabus aḵ Jesus ya sa bubai ye sisiḵad.

10Pun summiḵad aḵ Jesus woḵ ḵanana, “Bubai, dimman da sadi? Awad natenan atta amabasuḻ ḵan siḵa?”

11Ḵanan ni bubai, “Apu, naippun.”

Ḵanan Jesus, “Taḵon ay saḵon, adiḵpun os siḵa pabasuḻon. Inḵan ya adiḵa ogon bumasuḻ.”

Sa Nipaniyan Jesus Atte Silaw

12Ḵasin ḵad aḵ Jesus nan-ug-uggud atta adu we tagu ḵananae nangipani, “Saḵon silaw da tagu si annae lubung. Ḵad ngaimane angunud ḵan saḵon, adipun ogon inggaw atte giḵbot te nasilawan somsomoḵna ya maatod ḵan siya biyag aḵ inggana.”

13Ḵanan da Pharisee, “Siḵa pos pagay angugud atte mipanggob si long-agnu. Pun nu ippun udum aḵ anaḵdoḻ atta sanate imbagam, adinipun tuttuwaone tuttuwa da imbagam.”

14Ḵanan Jesus, “Taḵon ay nu saḵon anaḵdoḻ si long-agḵu, tuttuwa ibagaḵ te igammuḵ naḻpuwaḵ ḵan ayonaḵ. Yaḵon naippun paat igammuyu nu dinu naḻpuwaḵ baḵon nu ayonaḵ. 15Sa anḵuḵuwisyu, maḻpu we abus atte ḵasomsomḵanyu. Yaḵon ḵan saḵon, adiyaḵpun anḵuwis. 16Yaḵon taḵon ay nu anḵuwisaḵ, ustu anḵuḵuwisḵu te daḵampun aḵ saḵone abus anguwis yaḵon diḵani ḵan Amaḵ we nangibuun ḵan saḵon. 17Nigili si lintogyu we nu an-isu taḵdoḻ da duwae tagu, tuttuwa ibagada.#8:17 Deuteronomy 17:6; 19:15. 18Taḵdoḻaḵ long-agḵu ya aḵ Amaḵ we nangibuun ḵan saḵon taḵdoḻanaḵ os.”

19Pun ḵanandae nan-imus, “Dinu ḵad ain aḵ Amam?”

Ḵanan Jesus, “Naippun igammuyu ḵan saḵon baḵon nu aḵ Amaḵ. Nu igammuyu oḵyan saḵon, igammuyu bos aḵ Amaḵ.”

20Inugudna anna si nantuttuduwana'tte paway ni templo atte adani si iiggaan da atod ḵan Apudyus. Imbagan ḵad Jesus sadi, pinadas da papangat doḵmaan yaḵon adimpun Apudyus iyyunud te daampun yan dumatong mituttuwaan ni planuna ḵan Jesus.

Da Adipun Maḵaoy Atte Ayan Jesus

21Ḵanan os Jesus ḵasin, “Iyyaḵon ya asiyu sington saḵon. Yaḵon adiḵayupun maḵaali si ayaḵ te matoy ḵayu we adipun napakawan da basuḻyu.”

22Ḵanan da papangat da Judyu, “Ngai ḵad ain piona ḵanane, ‘Adiḵayupun maḵaali si ayaḵ’? Gongatona ḵamman long-agna?”

23Ḵanan os Jesus, “Diḵayu we adipun namati, sa somsomoḵyu nainlubungan. Yaḵon ḵan saḵone naḻpu'd langit, sa somsomoḵḵu nainlangitan. 24Ḵanaḵe nangibaga ḵan diḵayu, ‘Matoy ḵayu we adipun napakawan da basuḻyu nu adi ḵayu amati ye saḵone mismu sadi ye imbagaḵ.’ ”

25Ḵananda, “Ngaiḵa ḵad ain?”

Ḵanan Jesus ḵan dida, “Imbagabagaḵ si inggan ni lapun ni ḵewaaḻḵu inggana sinsadi. 26Adu ibagaḵ ḵan ipabasuḻḵu mipanggob ḵan diḵayu yaḵon sa nangibuun ḵan saḵon tuttuwa ya da dingngoḻḵu ḵan siya, dida da ibagabagaḵ atta tagu si annae lubung.”

27Adidapun maawatane siya ugudona mipanggob ḵan Apudyus we Amana. 28Pun ḵanan Jesus, “Magangput ḵade itaḻayagyu saḵone Abeng Di Tagu atte kros, sadi angigammuwanyu we saḵone mismu sadi. Ḵad sadi bos angigammuwanyu we daḵampun aḵ buttungaḵ da losane ḵooḵ yaḵon da intuttudun Amaḵ da losane ibagaḵ. 29Sa nangibuun ḵan saḵon, anna ḵan saḵon. Adinapun saḵon iwwaḻang te pasige ḵooḵ da mas-omana.” 30Adu da namati ḵan siya si nangibag-ana'tta sana.

Da Ganaḵ Abraham

31Pun ḵanan Jesus atta Judyu we namati ḵan siya, “Nu pagatupanyu patiyon da losane intuttuduḵ, diḵayu da tuttuwae disipuluḵ. 32Ḵad igammuwonyu ḵatuttuwaan mipanggob ḵan Apudyus ḵad sa ḵatuttuwaan puḵayana diḵayu.”

33Ḵananda, “Diḵani da ganaḵ Abraham ḵad daḵanḵanipun paat aḵ musassu'tta ngaiman. Ḵad ngai piom ugudon si ḵaname mapuḵayan ḵani?”

34Ḵanan os Jesus, “Ibagaḵ ḵan diḵayu ḵatuttuwaan, da losane dam-on maḵabasuḻ musassuda si basuḻ. 35Sa musassu, adipun iinggaw atte boḻoy aḵ inggana te daḵampun aḵ dogan ni baḻyan. Yaḵon sa abeng, iinggaw te dogan ni baḻyan. 36Pun nu puḵayan ni Abeng Apudyus diḵayu, tuttuwae mapuḵayan ḵayu.

37“Igammuḵe diḵayu da ganaḵ Abraham yaḵon pionyu gongaton saḵon te ippun inggawan ni tuttuduḵ atta pusuyu. 38Ibagaḵ da innilaḵ atte inggawaḵ ḵan Amaḵ. Diḵayu ḵad, siya ḵoonyu da dingngoḻyu ḵan amayu.”

39Ḵanandae summongbat, “Aḵ Abraham amani.”

Ḵanan os Jesus, “Nu tuttuwae diḵayu da ganaḵ Abraham, ḵoonyu oḵyan da ambaḻu we isun ni ḵingwana. 40Yaḵon sinsadi, singsingtonyu angongatanyu ḵan saḵone nangibaga'tte ḵatuttuwaane dingngoḻḵu ḵan Apudyus. Daḵampun aḵ ḵaḵna ḵingwan Abraham. 41Siya ḵoonyu ḵingwan amayu.”

Pun ḵananda ḵan siya, “Diḵani ḵad, daḵanḵanipun aḵ banagi. Sa igammuni, abus aḵ Apudyus aḵ Amani.”

42Ḵanan Jesus, “Nu Amayu oḵyan aḵ Apudyus, ayatonyu saḵon te naḻpuwaḵ ḵan siya ya annaaḵ sinsadi. Daḵampun aḵ ḵasomsomḵaḵ ummaliyaḵ yaḵon imbuun Apudyus saḵon. 43Ngaipayu adi maawatan da ibagaḵ? Siya gay te ippun anusyu we andongoḻ. 44Iissuyuḵ amayu we Satan. Ḵad siya pionyu ḵoon da pion ni amayu. Pumappatoy si inggan ni lapuna ḵad ippun ḵoona'ḵ ḵatuttuwaan te naippun ḵatuttuwaan ḵan siya. Nu antultulli, siya ugalina te tuliyan ya maḻpuwan da tuli. 45Yaḵon gapu ta ibabaggaḵ ḵatuttuwaan, adiḵayupun amati ḵan saḵon. 46Ngai ḵan diḵayu anaḵdoḻe naḵabasuḻaḵ? Ippun! Nu ibagaḵ ḵatuttuwaan, ngaipayu adi patiyon nu? 47Da abeng Apudyus, ummanda dongngon da ugudona ya amatida'tta ibagana. Yaḵon daḵanḵayupun aḵ abeng Apudyus, siya adiyu angngoḻan ḵan amatiyan atta ugudona.”

Sa Nangatngatu Nu Aḵ Abraham

48Pun ḵanan da Judyu, “Daḵampun ḵamman aḵ tuttuwa imbagani ye iSamariaḵa we#8:48 Da Judyu ḵad, laylayusonda da iSamaria ya adidapun pione midogada ḵan dida. Pun sa ḵanandae isun Jesus nin iSamaria, ang-angyagda sadi ḵan Jesus. naaḻanan?”

49Ḵanan Jesus, “Adiyaḵpun naaḻanan. Sa ḵatuttuwaan, dayawoḵ aḵ Amaḵ yaḵon adiyupun saḵon pinatgan. 50Adiḵpun sington midayawaḵ. Yaḵon awad de angngit atte midayawaḵ ḵad siya asi anguwis. 51Ibagaḵ ḵan diḵayu ḵatuttuwaan, ngaimane anuttuwa'tta ugudḵu, adipun matoy.”

52Ḵanan da Judyu, “Sinsadi inigammuni ye naaḻananḵa! Aḵ Abraham ya da profetan Apudyus natoyda! Ḵad ibagame ngaimane anuttuwa'tta ugudnu, adipun matoy. 53Nangatngatuḵa ḵamman nu aḵ Abraham we daḵdaḵoḻ taḵu baḵon nu da profetan Apudyus? Natoyda losan. Ngai anomsomḵam si long-agnu?”

54Ḵanan Jesus, “Nu saḵone mismu angidayaw si long-agḵu, naippun anun ni dayawḵu. Yaḵon siya angidayaw ḵan saḵon aḵ Amaḵ we ngannonyu Apudyusyu. 55Ippun igammuyu ḵan siya. Yaḵon igammuḵ. Nu ḵanaḵe naippun igammuḵ ḵan siya, tuliyanaḵe isuyu. Yaḵon tuttuwae igammuḵ ya tuttuwaoḵ da ugudona. 56Amod de layad Abraham we daḵdaḵoḻyu te ilana aḻgawe umaliyaḵ sina. Pun tuttuwae nipaila ḵan siya woḵ allaylayad.”

57Ḵanan da Judyu, “Daampun malimampuḻu tawonnu ḵad ngai inonae innilam aḵ Abraham?”

58Ḵanan Jesus, “Ibagaḵ ḵan diḵayu ḵatuttuwaan, sa daan Abraham miyanaḵan, inninggawaḵ.” 59Dingngoḻ ḵad ay da Judyu, nangaḻada'ḵ batu ta batuwonda yaḵon nantaḻu'ḵ Jesus woḵ lummawa si paway ni templo.

Currently Selected:

John 8: kml

Highlight

Copy