Luke 8

Da Nibuḻubuḻune Bubai Ḵan Jesus

1Unipun, nanggaḵay aḵ Jesus atta siyudad ḵan ili, iwwaḻagawagna Ambaḻu we Damag mipanggob si ampangatan Apudyus. Nibuḻun da nasawaḻan aḵ duwae disipuluna ḵan siya. 2Inninggaw os da nibuḻune udume bubai ye ḵinaan Jesus da saḵitda ya pinaḻyawna da aḻan ḵan dida. Nidoga'ḵ Mary ye maawagan aḵ Magdalene we napaḻyaw da pitu we aḻan ḵan siya. 3Joanna we asawan Chuza we angupisinaon Gobernor Herod, Susanna ya da adu we bubai ye innatodda da ḵuḵuwada ta mabadangan da Jesus.

Sa Pani Atte Nawwagawag Atta Bukoḻ

(Mat. 13:1-9; Mrk. 4:1-9)

4Pune sadi, ummoy da amoamode tagu ḵan Jesus we naḻpu'tta nansabasabali ye ili. Pun ḵanana ḵan didae nangipani, 5“Inninggaw tagu we ummoy nawwagawag si buḵoḻ. Iwwagawagna ḵad, naottag udum atte daḻan woḵ ginusgusdan da tagu dida ya tinuḵtuḵan da sissiwit. 6Da udume buḵoḻe niwagawag, naottagda'tte bibbisil. Taḵon ay nu tummubuda, naḻ-uyda woḵ naḻanguda te ammamaga luta. 7Da udum ḵad ose buḵoḻ, naottagda si laslasi woḵ taḵon ay nu tummubuda, nidisan tummubu da lasi woḵ pinsoḻda da muḻa ta adida dumaḵoḻ. 8Da udum ḵade buḵoḻ naottagda'tte alluta. Tummubuda woḵ namungada, da udum namungada'ḵ singgagasut.”

Ginangput ḵad Jesus inug-uggud annae pani, ḵanana'tta tagu, “Diḵayu we andodongngoḻ, sosomḵonyu da dingngoḻyu.”

Sa Panggob Da Pani

(Mat. 13:10-17; Mrk. 4:10-12)

9Da disipuluna ḵad ḵanandae nan-imus, “Ngai pion ni sadi ye pani ḵanan?”

10Ḵanan Jesus, “Diḵayu ḵad, nipaigammu da banage adipun nipaigammu si awe mipanggob atte ampangatan Apudyus. Yaḵon da udume tagu ipaniḵe antuttudu ḵan dida ta taḵon ay nu iillanda da banage ḵooḵ, adidapun maḵaimatun ya taḵon ay nu dodongngonda da banage ibagaḵ, adidapun maawatan.#8:10 Isaiah 6:9.

Sa Pion Ni Pani Atte Nawwagawag Si Bukoḻ Ḵanan

(Mat. 13:18-23; Mrk. 4:13-20)

11“Annaya pion ni pani ḵanan. Sa buḵoḻ, siya Ugud Apudyus. 12Da naottag atte daḻan, mipanida'tta tagu we dongngonda Ugud Apudyus. Pun umoy aḵ Satan ya ḵinaanna da Ugud Apudyus atta somsomoḵda ta adidapun amati ḵan matagu. 13Da naottag atte bibbisil, isuda da tagu we dingngoḻda ḵad Ugud Apudyus, allaylayaddae nangawat. Yaḵon adipun lummamut atta somsomoḵda. Amatida'ḵ sin-aḵitan, ḵad nu dumatong ampaḵaḻaman, iwaḻangda pammatida ḵan Apudyus. 14Da naottag atte laslasi, isuda da tagu we dongngonda Ugud Apudyus. Yaḵon gapu'tta binimbinsawda'tta ḵinabaḵnang ya laylayad si annae biyag, adidapun tungaguwon ugude dingngoḻda ḵad adipun maobos da ḵoḵoḵḵonda. 15Da naottag ḵad atte alluta, isuda da tagu we andongoḻ si Ugud Apudyus, pinagatupandae namati ḵan ampoḻḵapoḻḵas da somsomoḵda, anusanda inggana'ḵ angwada'tta adu we ambaḻu we banage mas-oman Apudyus we isun ni muḻae adu ambubungana.”

Sa Pani Mipanggob Si Silaw

(Mrk. 4:21-25)

16Ḵanan Jesus we nangipani, “Naippun tagu'ḵ tonggana silaw ya laḵḵobana'tte aḵḵubaw baḵon nu itaḻuna'tte dugun ni ḵama. Daḵampun aḵ ḵaḵnat, iggana si sasap-aḻan ni silaw ta mailan da lumnoḵ. 17Isuna sadi ye impaniḵ te da losane mitataḻu baḵon nu da daampun maigammu sinsadi, mipaigammu si umali ye aḻgaw.

18“Gapu'tte sadi, sisinnoogonyu da annae ibagaḵ. Te sa anuttuwa si dingngoḻna, amo madog-an an-aawatna. Yaḵon sa tagu we adinapun ḵoon dingngoḻna, taḵon ay aḵite ḵananae awad ḵan siya, maḵaan.”

Sa Inan Jesus Ya Da Sunudna

(Mat. 12:46-50; Mrk. 3:31-35)

19Pune sadi, dummatong inan Jesus ya da sunudna sidi yaḵon adidapun maḵaadani ḵan siya te amod da tagu we nampaliḵwos. 20Pun ḵanan ni osae nangibaga ḵan Jesus, “Andi'ḵ inam ya da susunudnu'tte lasine pionda maḵaugud ḵan siḵa.”

21Yaḵon ḵanan Jesus, “Da mibelang aḵ inaḵ ya sunudḵu, da andongoḻ ḵan anuttuwa si Ugud Apudyus.”

Sa Bibbid Ya Da Tupiyaḵ

(Mat. 8:23-27; Mrk. 4:35-41)

22Sin-aḻgawan ḵad, summaḵay da Jesus ya da disipuluna'tte bangka woḵ ḵanan Jesus ḵan dida, “Intaḵu dumoḻmang.” Pun nallibbatda. 23Naaḵatda ḵad, nasuyop aḵ Jesus. Panos ḵade sadi, annat ampigsae bibbid woḵ natupitupiyaḵan bangka inggana'ḵ annae milisobda. 24Pun binangonda'ḵ Jesus woḵ ḵananda, “Anaḵay! Apu, annae milisob taḵu!”

Tummaḵdog aḵ Jesus woḵ binilinna ampigsae bibbid ya da tupiyaḵ. Pun gumminoḵda woḵ ippun um-umsiyong. 25Ḵanana'tta disipulu, “Naippun ḵamman os ay pammatiyu?”

Naḵimtanda woḵ nataagda. Ḵananda, “Atopay! Ngai nin ay anna? Taḵon ay bibbid ya da tupiyaḵ bilinona dida ya tumuttuwada ḵan siya!”

Sa Naaḻanan

(Mat. 8:28-34; Mrk. 5:1-20)

26Pinagatupan da Jesus we dummoḻmang inggana'ḵ dummatongda'tte saḵubna'd Gerasa si domang ni probinsiya'd Galilee. 27Lummogsadda ḵad atte bangka, inabot ni laḻaḵi ye naaḻanane iGerasenes aḵ Jesus. Nabayage amboboddang ya iinggaw atte lilibbonan. 28-29Ampaḵapaḵaḻamon da aḻan ya taḵon ay nu naguwaḻdaan ḵan naḵawadan da imana ya da suḵina, gosatona. Pinaawid os da aḻan atte bumbummaaw. Pun innilana ḵad aḵ Jesus, napapḵaaw woḵ nanalluḵu ḵan siya. Ḵananae nangidangsoḻ, “Anii! Ngaipaḵa umali ḵan saḵon? Siḵa'ḵ Jesus we Abeng ni Ḵangatuwane Apudyus. Ḵadaguwanaḵ ḵappos ta adim saḵon dusaon!” Te innilan ḵad Jesus, binilinna da aḻan ta lumawada.

30Pun ḵanan Jesus we nan-imus ḵan siya, “Ngai ngadannu?”

Ḵanana, “Nilibu,” te amoamod da aḻan si annae tagu. 31Ḵingwan ḵad da aḻan, nandagdaguda ḵan Jesus ta adina dida ibuun si abute ippun patinggan ni ḵaadaḻomnae madusaanda.#8:31 Sa abute ippun patinggan ni ḵaadaḻomna osae ngadan ni infiernu we lugar we insaganan Apudyus ta dusaona'ḵ Satan ya da lawwenge ispiritu. 32Yaḵon iyyunudna ta lumnoḵda'tta amode boḻoḵ we nansubsubuḵ atte igid ni tagudtud. Ḵanan Jesus, “On, inḵayu!” 33Pun lummawada'tte tagu woḵ nillumnoḵda'tta boḻoḵ. Nangwa ḵad da boḻoḵ, sintotoddaḵdae nan-osog woḵ lummayugda'tte etpang pun naaminda naanud atte baybay.

34Innilan ḵad da nanangḵon atta boḻoḵ da naḵwa, ummawidda woḵ ummoyda imbaga'tta tagu si siyudad ya da ili. 35Pun ummoy da tagu innila naḵwa. Dummatongda ḵad ḵan Jesus, indasanda sadi ye tagu we napaḻyawan da aḻan. Tutuḵdu si sinagung Jesus ya nansilup ḵan nanggodong somsomoḵna. Pun naḵimtanda. 36Ḵad imbagan os da nangila mipanggob si namaḻyawan Jesus atta aḻan. 37Ḵad da losane naḻpu si saḵubna'd Gerasa, nandagdaguda ḵan Jesus ta tenana ilida te naḵimtanda. Pun nambangka da Jesus ya da disipulunae naḵasaganae umoyon.

38Pun summaḵay ḵad aḵ Jesus atte bangka, ummoy nandagdagu sadi ye tagu we napaḻyawan da aḻan ta mibuḻun ḵan dida. Yaḵon pinaoyon Jesus we ḵanana, 39“Mipauliḵa'tte boḻoynu ya ibagam ḵadagu we ḵingwan Apudyus ḵan siḵa.” Pun ḵesan woḵ ummoyna iwwaḻagawag atte ilida ḵingwan Jesus ḵan siya.

Sa Bubai Ya Sa Abeng Jairus

(Mat. 9:18-26; Mrk. 5:21-43)

40Nipauli ḵad da Jesus atte domang, allaylayad da tagu sidi ye namadatong ḵan siya te inuuwwayda. 41Unipun, annat aḵ Jairus we osa'tta pangat si sinagoga. Ummoy nanalluḵu ḵan Jesus woḵ nandagdagu ta umoy oḵyan si boḻoyda, 42te sa abus aḵ abengdae bubai ye nasawaḻan aḵ duwa tawonna, mamattoy.

Anna ḵade umoyda, naaligummu da tagu ḵan siya. 43Sa amoamodan os da tagu, inninggaw bubai ye dumaḻadaḻa'tte nasawaḻan aḵ duwae tawon. Taḵon ay nu naaminan atta nampaagasana, naippun naḵaagas ḵan siya. 44Nangwa ḵad, ummadani si odogan Jesus woḵ tokkona gayadan ni silupna. Pune sadi, naḵaginoḵ daḻana.

45Ḵanan Jesus, “Ngai nandoḵ ḵan saḵon?”

Losanda ḵanane namuḵlit, “Daḵanaḵpun.” Ḵanan Peter, “Apu, atomagay da tagu we ansusulig ḵan siḵa!”

46Ḵanan Jesus, “Naid! Inninggaw pagay nandoḵ ḵan saḵon te giniḵnaḵ ḵabooḻaḵe lummawa.”

47Inigammun ḵad ni bubai ye adipun mitaḻu ḵingwana, ummadani ye amilpilpil woḵ nanalluḵu'tte sinagung Jesus. Pun imbagana gapun ni nandoḵana ya sa naḵaanan ni saḵitna. 48Ḵanan Jesus ḵan siya, “Abengḵu, gapu'tte pammatim ḵan saḵon, bummaḻuḵa. Inḵan lumin-awa somsomoḵnu.”

49Sa nangibag-ana'tte bubai, anna osae nadanatong we naḻpu si boḻoy da Jairus. Pun ḵanana ḵan siya, “Adim ogon taḵtaḵon aḵ Mistulu te natoy abengnu.”

50Nangwa ḵad aḵ Jesus si dingngoḻna imbagana, ḵanana ḵan Jairus, “Adiḵa maḵimut. Abus amatiḵa woḵ matagu abengnu.”

51Dummatongda ḵad si boḻoy da Jairus, adimpun Jesus iyyunude awad lumnoḵ, abus da Peter, John ya aḵ James ya da ama ḵan inan ni babaḻasang. 52Nandomdom ḵan ummibil da losane tagu sidi yaḵon ḵanan Jesus ḵan dida, “Guminoḵ ḵayu te sa annae babaḻasang, daḵampun aḵ natoy. Masusuyop.”

53Pun inem-emesda'ḵ Jesus te iniiggammudae natoy. 54Yaḵon innonnan Jesus iman ni babaḻasang woḵ ḵanana, “Abeng, bumangonḵa!” 55Pun nipauli ḵalidodwan ni babaḻasang, natanaḵdog woḵ ḵanan Jesus, “Ittanyu'ḵ ḵanona.” 56Pun nataag da ama ḵan inana yaḵon ḵanan Jesus we namilin ḵan dida, “Naippun pay angibag-anyu'tta naḵwa.”

Currently Selected:

Luke 8: kml

Highlight

Copy