Matthew 16

Sa Paḵwan Da Pharisee Ḵan Jesus

(Mrk. 8:11-13; Luk. 12:54-56)

1Dummatongda ḵad, inninggaw da udume Pharisee ya da Sadducee ye ummoy ḵan Jesus ta padasonda siḵapan. Pun ḵananda, “Angipailaḵa ud ḵan diḵani'tta nakaskasdaawe sinyal aḵ angigammuwanni ye aḵ Apudyus ad langit nangibuun ḵan siḵa.” 2Ḵanan Jesus ḵan dida, “Mipisong ḵad init ya allidaga'd langit, ḵananyu, ‘Ambaḻu aḻgaw, maligat appigat.’ 3Ḵad nu bigbigat si dumingit init ya allilidaga'd langit ḵan anggiḵbot da libuu, ḵananyu bose, ‘Umudan aḵ uni!’ Ngaipayu lamog imatunan da sinyal ni lubung ḵan langit ya adiyupun lamog imatunan da sinyal Apudyus we maḵwa si sanae aḻgaw? 4Lawwelawweng ḵayu we tagu sinsana te nan-awidanyu'ḵ Apudyus. Ipatutyu we ḵooḵ da nakaskasdaawe sinyal ta amanoḵnoḵe aḵ Apudyus nangibuun ḵan saḵon. Yaḵon ippun mipaila malaksid sinyale isun ni naḵwa ḵan Profeta Jonah si awe.” Imbagan ḵad Jesus ḵaḵna, ummoyon.#16:4 Matthew 12:39-40.

Sa Tuttudun Da Pharisee Ya Da Sadducee

(Mrk. 8:14-21)

5Nandoḻmang ḵad da disipulu we umoy si domang ni baybay, inḵagasmoḵdae naliwatandae nangaḻa'ḵ dinaanda. 6Ḵanan Jesus ḵan dida, “Ummanyu ta adi ḵayu maalisan atte yeast da Pharisee ya da Sadducee.”

7Imbagan ḵad Jesus sadi, nan-uugudda woḵ ḵananda, “Imbagan Jesus ḵaḵnat te naippun tinapay aḵ dinaan taḵu.”

8Inigammun Jesus da inugudda woḵ ḵanana ḵan dida, “Aḵit pammatiyu! Ngaipa ḵayu ambinsaw atte adiḵayupun nangawit aḵ ḵanonyu? 9Sissiya ḵammane adiḵayupun maḵaawat? Naliwatanyu we sa limae tinapay ummanay aḵ ḵinan da limallibu we tagu? Ḵad pigae aḵḵubaw nasawaḻ si dinagupyu? 10Ḵad ngai inon ni pitu we tinapaye ummanay os atta opatlibu we tagu, pigae danaḵḵoḻe aḵḵubaw dinagupyu? 11Ngaipayu adi maawatane daḵampun si mipanggob si tinapay pioḵ ugudon ḵan diḵayu? Sa imbagaḵ, ummanyu ta adi ḵayu maalisan atte yeast da Pharisee ya da Sadducee!” 12Pun naawatandae daḵampun aḵ mipanggob si de yeast we miḵamos si tinapay. Sa imbagana, sa tuttudun da Pharisee ya da Sadducee.

Sa Nangipaigammuwan Peter Ḵan Jesus

(Mrk. 8:27-30; Luk. 9:18-21)

13Dummatong ḵad da Jesus atte saḵub ni Caesarea Philippi, ḵanana'tta disipuluna, “Ngaiyaḵe Abeng Di Tagu atte ḵasomsomḵan da tagu?”

14Ḵananda, “Ḵanan da udum, siḵa'ḵ John we Ambobonyag. Da udum, ḵanandae siḵa'ḵ Profeta Elijah. Da udum os, ḵanandae siḵa'ḵ Profeta Jeremiah baḵon nu osa'tta profeta si awe.”

15Ḵanan Jesus, “Diḵayu ḵad, ngaiyaḵ atte ḵasomsomḵanyu?”

16Ḵanan Simon Peter, “Siḵa Kristu#16:16 Sa ugud atte Greek, sa pion ni Kristu ḵanan siya pinilin Apudyus aḵ Anagu ya An-ari. we Abeng ni matattagu we Apudyus.”

17Pun ḵanan Jesus, “Pianḵa ḵammos, Simon we abeng Jonah te daḵampun aḵ tagu nangipaigammu ḵan siḵa nu adi aḵ Amaḵ we awad ad langit. 18Pun ibagaḵ ḵan siḵa, siḵa'ḵ Peter, batu piona ḵanan.#16:18 Sa pion ni Peter ḵanan atte Greek, batu. Ḵad sa annae labaw ni batu antaḵadaḵ si simbaanḵu we da losane amati ḵan saḵon. Ḵad naippun angngog ḵan dida taḵon ay ḵabooḻan ni ḵatoy,#16:18 Ḵabooḻan ni ḵatoy - Sa ibagana'tte Greek sa lewangane lumnoḵan ad Hades we igaw da natoy. Sa pion ni lewangan ugudon ḵabooḻan. adinapun lamog oḻgon dida. 19Ittoḵ ḵan siḵa tuḻbiḵe sa piona ḵanan sa ḵaḻabbongan atta tagu we midoga si ampangatana. Ḵad ngaimane iyadim si annae luta, iyadin os Apudyus ad langit. Ngaiman ose iyunudnu si annae luta, iyunud os Apudyus ad langit.” 20Pun binilibilin Jesus da disipuluna ta adida paat ug-uggudon atta ngaimane tagu we siya'ḵ Kristu.

Sa Matoyan Ya Sa Umuliyan Jesus

(Mrk. 8:31-33; Luk. 9:22)

21Inggan ni sadi ye timpu, insaḻad Jesus we angibagabaga'tta disipuluna mipanggob si maḵwa ḵan siya'tte umali ye aḻgaw woḵ ḵanana, “Ḵasapuḻane iyyaḵ ad Jerusalem ya ampaḵaḻamonaḵ atta pallakayon da Judyu ya da papangat da papadi ya da mimistulun ni lintog. Ḵade sadi impagongatda saḵon yaḵon sa miḵaḵlu we aḻgaw, taguwon Apudyus saḵon.”

22Ḵingwan ḵad Peter, imbattawana'ḵ Jesus woḵ insaḻadnae anuppaḵ ḵan siya. Ḵanana, “Apu, adin oḵyan Apudyus iyunud sadi ye imbagam! Adipun oḵyan maḵwa da anna ḵan siḵa.”

23Yaḵon nansagung aḵ Jesus woḵ ḵanana, “Ḵumunudḵa Satan! Tumupodḵa ḵan saḵon. Te sa somsomoḵnu, daḵampun si pinion Apudyus yaḵon sa pion da tagu.”

Da Ambalin Aḵ Disipulun Jesus

(Mrk. 8:34—9:1; Luk. 9:23-27)

24Pun ḵanan Jesus atta disipuluna, “Ngaimane pionae mitun-ud ḵan saḵon, ḵasapuḻane an-awidana long-agna, buḵudona de krosna ya mitun-ud ḵan saḵon. 25Te ngaimane angipatog atte long-agna, matoy pos pagay. Yaḵon sa angiḵatoy gapu si pammatina ḵan saḵon, itton Apudyus ḵan siya biyag aḵ inggana. 26Te ngai ḵad ain maganab ni tagu nu anḵuwana da losane binaḵnang atte lubung yaḵon taḻaḵona ḵalidodwana ya madusa'ḵ inggana? Naippun! Te naippun maḵwa'ḵ ipasanin ni tagu'tte biyagna. 27Te sa Abeng Di Tagu, umali ye buḻunna da anghelna ḵad ipailana bos dayaw Amana. Ḵad gungunaana sin-ossae tagu sigun atta ḵingwada. 28Ibagaḵ ḵan diḵayu ḵatuttuwaan, awad da udum ḵan diḵayu sinsadi ye adidapun yan matoy inggana'ḵ ilanda saḵone Abeng Di Tagu we umali ampangat.”

Currently Selected:

Matthew 16: kml

Highlight

Copy