थरप्या तका का काम 10
10
पतरस अन कुरनेल्युस
1केसरिया में कुरनेल्युस नाम को एक मनक हो। वो रोम की इटालनी नाम की फोज का हो सपायाँ पे सरदार हो। 2वो एक धरमी अन परमेसरऊँ दरपबावाळो मनक हो अन वींको परवार भी वस्योईस हो। वो लोगाँ ने खुला मनऊँ घणो दान-पन करतो हो अन हमेस्यान परमेसरऊँ परातना करतो हो। 3वे दन का तीजा पेर में एक दरसावो में देक्यो के, परमेसर को एक हरग-दुत वाँका नके आयो हे अन वींने केरियो हे, “ओ कुरनेल्युस।”
4तो कुरनेल्युस दरपतो तको ध्यानऊँ हरग-दुत ने देकतो तको बोल्यो, “ओ परबू, कई हे?”
हरग-दुत वींने क्यो, “परमेसर थारी परातना हूणी हे अन थाँरा किदा तका दान-पनऊँ परमेसर राजी वेग्या हे। 5ईं वाते अबे किंने यापा देस में खन्दा अन समोन नाम का जो पतरस केवावे हे वींने अटे बला ले। 6वो समोन नाम का एक चामड़ा का काम करबावाळा की लारे रेरियो हे, जिंको घर समन्द का कनारे हे।” 7वो हरग-दुत जो वींऊँ बाताँ करियो हो, परोग्यो, तो कुरनेल्युस आपणाँ दो नोकराँ अन एक सपई जो धरमी मनक हो वींने बलायो जो वींकी हार-हमाळ करता हा। 8अन जो भी व्यो हे, वाँने हारी बात बतान यापा देस खन्दा दिदा।
9आगले दन जद्याँ वे चालता-चालता नगर के भडे़ पूगबाने हाँ, तद्याँई पतरस दपराँ की परातना करबा के वाते मेड़ी पे चड्यो। 10वींने भूक लागी, तो वो कई खाणो छारियो हो। जद्याँ खाणो बणरियो हो, वीं टेम वो एकाएक होस भुलग्यो। 11अन वे देक्यो के, आकास खुलग्यो अन एक मोटा चादरा जस्यान कई चीज हे जिंका च्याराई खुणा पकड़न रेटे उतररी हे। 12वींमें हारई तरे का जीव-जनावर हा, ज्यामें धरती का किड़ा-मकोड़ा अन आकास का उड़बावाळा जनावर हा। 13पछे एक अवाज अई के, “पतरस उठ अन आने मारन खा।”
14पतरस क्यो, “परबू मूँ अस्यो ने कर सकूँ हूँ, काँके में कदी भी हुगली अन असुद चिजाँ ने खादी।”
15तो पाच्छी वींने दूजी दाण अवाज हुणई, “जो भी चिजाँ ने परमेसर सुद क्यो हे, वींने असुद ने केणी।” 16तीन दाण अस्यानीस व्यो अन वाँ चीज पाच्छी आकास में उठा लिदी गी।
17पतरस जो दरसावो में देक्यो हो, वींका वाते वो होचरियो हो, जद्याँई कुरनेल्युस का खन्दाया तका मनक पतो पूँछता तका बारणा पे आग्या। 18वाँकाणी बारणे बलान पूँछ्यो, “कई पतरस केवावे, जो समोन अटेई रूक्यो तको हे?”
19पतरस अबाणू भी वीं दरसावो के वातेई होचरियो हो, तद्याँ आत्मा वींने क्यो, “हुण, तीन मनक थने होदरिया हे। 20ईं वाते ऊबो वे अन रेटे उतर आगो-पाछो मत वे अन वाँकी लारे परोजा, काँके वाँने में खन्दाया हे।” 21पछे पतरस रेटे उतरियो अन वाँ लोगाँ ने क्यो, “मूँ तो वोईस मनक हूँ, जिंने थाँ होदरिया हो। थें काँ आया हो?”
22वे बोल्या, “माँ ने फोज का सरदार कुरनेल्युस खन्दाया हे, जो एक धरमी अन परमेसरऊँ दरपबावाळो मनक हे। हाराई यहूदी मनकाँ में वींको घणो मान-समान हे। वींने परबू के हरग-दुत क्यो के, वो थाँने आपणाँ घरे बलावे अन जो थें केवो, वो हुणे।” 23ईं वाते पतरस वाँने मयने बलान मनवार किदी, पछे आगले दन वो त्यार वेन वाँकी लारे परोग्यो अन यापा देस का रेवासी थोड़ाक विस्वासी वींकी लारे ग्या। 24पछे आगलेई दन वो केसरिया परोग्यो। वटे आपणाँ हगा-होई अन भई-बन्दा ने बलान कुरनेल्युस वाँकी बाट नाळरियो हो। 25पतरस जद्याँ मयने जाबाई वाळो हो, तद्याँ कुरनेल्युस वींने मल्यो। कुरनेल्युस वींका पगाँ में पड़न धोक दिदो। 26पण, पतरस वींने बेटो करतो तको क्यो, “ऊबो वे, मारे धोक मत दे, मूँ भी तो एक मनक हूँ।” 27पछे वींका लारे बाताँ करतो तको वो मयने परोग्यो अन वटे वीं नरई लोगाँ ने अगेटा व्या तका देक्या। 28पतरस वाँने क्यो, “थाँ जाणो हो के, एक यहूदी के वाते ज्यो यहूदी ने हे वणीऊँ वेवार राकणो कन वाँका नके जाणो नेम को उल्टो हे। पण परमेसर मने बतायो के, मूँ किंने भी हुगलो अन असुद ने केवूँ। 29ईं वाते जद्याँ मने बलायो अन मूँ बनाई आगो-पाछो व्याई अटे आग्यो हूँ। ईं वाते अबे मूँ पूँछू हूँ के, थें मने अटे काँ बलायो हे?”
30तो कुरनेल्युस क्यो, “चार दन पेल्याँ अणीस टेम का तीजे पेर में, मूँ घरे परातना करियो हो। तद्याँ अणाचेत को चमकता तका गाबा पेरिया एक मनक मारा हामे आन ऊबो वेग्यो, 31अन क्यो, कुरनेल्युस! परमेसर थारी परातना हूणी हे अन थाँरा लोगाँ ने दिदा तका दान-पन हाराईऊँ परमेसर राजी वेग्या हे। 32ईं वाते अबे किंने यापा देस में खन्दा अन समोन नाम का जो पतरस केवावे हे वींने अटे बला ले। वो समोन नाम का एक चामड़ा का काम करबावाळा की लारे रेरियो हे, जिंको घर समन्द का कनारे हे।” 33ईं वाते में तरत थने बलाबा खन्दाया अन थें अटे आन हव काम किदो। तो अबे परमेसर की मोजुदगी में माँ वो हारई हुणबा के वाते त्यार हा, जो परबू थने आदेस दिदो हे।
पतरस को परच्यार
34 #
वे.वि 10:17
पछे पतरस बोलबा लागो के, “अबे हाँचई में मूँ हमजग्यो हूँ के, परमेसर कई दूज-भराँत ने करे। 35कस्यी भी जात कन कणी भी देस को जो भी मनक परबूऊँ दरपतो रेवे अन हुदा काम करे तो, परबू वींने आपणो मान लेवे। 36थाँ ईं सन्देस ने जाणो हो, जो इजराएली लोगाँ का वाते खन्दायो ग्यो हे, जो हाराई को परबू ईसू मसीऊँ सान्ती मले हे, वीं हव हमच्यार की घोसणा हे। 37थें वा बात जाणो हो के, यहुन्ना बतिस्मा का संदेसो देबा केड़े, गलीलऊँ सरू वेन आकई यहूदियाँ में कई व्यो हो। 38ईसू नासरी का बारा में थाँ तो जाणो हो, परमेसर पुवितर आत्मा अन सगतिऊँ वींको तलक कस्यान किदो हो। वणी हव काम किदा अन सेतानऊँ दकी हारई जणा ने हव करतो तको च्यारूँमेर कस्यान गुमतो हो, काँके परमेसर वाँकी लारे हो। 39अन आपाँ हारई जणा आ बाताँ का गवा हाँ, जो बाताँ वणी यहूदियाँ देस अन यरूसलेम में किदी ही, जिंने वाँकाणी हूळी पे लटकान मार नाक्यो। 40पण, परमेसर वींने पाछो तीजे दन जीवतो कर दिदो अन परगट कर दिदो। 41वाँ हारई मनकाँ के हामे कोयने, पण बेस वाँ गवा के हामे, जो पेल्याँई परमेसर का हातऊँ थरप्या ग्या हा, ज्याँकाणी मरिया तकाऊँ जीवता व्या केड़े वाँकी लारे खादो-पीदो हो। 42वणीस माँने आदेस दिदो के, आपीं लोगाँ में घोसित कराँ अन गवई देवा के, ओ वोईस हे, जो परमेसर का हातऊँ जीवता अन मरिया तका को न्याव करबावाळो बणायो हे। 43हारई परमेसर का आड़ीऊँ बोलबावाळा वींका बारा में गवई दिदी के, वींपे भरोसो करबावाळो हरेक मनक वींका नामऊँ पापाँ की मापी पाई।”
ज्यो यहूदी ने हे वाँका में पुवितर आत्मा आणी
44जद्याँ पतरस ईं बाताँ कररियो हो, तद्याँई हारई जणामें पुवितर आत्मा आगी, ज्याँकाणी हव हमच्यार हुण्या हा। 45तो पतरस की लारे यापाऊँ आया यहूदी मनक अचम्बा में पड़ग्या, काँके पुवितर आत्मा को दान ज्यो यहूदी ने हा वाँ लोगाँ पे भी उन्दायो ग्यो हो। 46वे वाँने तरे-तरे की भासा बोलता तका अन परमेसर की मेमा करता तका हुणरियो हा। तद्याँ पतरस बोल्यो, 47“कई, अणा लोग-बागाँ ने पाणी को बतिस्मो देबा वाते माने कुई रोक सके हे? आने भी वस्यानीस पुवितर आत्मा मली हे, जस्यान आपाँने।” 48अस्यान वे ईसू मसी का नामऊँ बतिस्मो लेबा को आदेस दिदो। पछे वाँकाणी पतरसऊँ अरज किदी के, वो थोड़ाक दन वाँकी लारे रूके।
Currently Selected:
थरप्या तका का काम 10: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
