थरप्या तका का काम 4
4
पतरस अन यहुन्नो यहूदी मोटी सबा में
1जद्याँ वीं दुई जणा लोगाऊँ बात-बच्यार कररिया हा, वीं दाण ईं याजक, मन्दर को मुक्यो अन सदुकी लोग वाँका नके आया 2वे वाँ दुई जणाऊँ ईं बात पे रिस्याँ बळरिया हा के, पतरस अन यहुन्नो ईसू के मरिया केड़े पाछो जीवतो वेबा को परच्यार करन मरिया तका को पाछो जीवतो वेबा ने साबत कररिया हा। 3ईं वाते वाँ वाँने पकड़न बन्दी बणा लिदा अन दूजे दन तईं वाँने जेळ में राक्या हा, काँके हाँज वेगी ही। 4पण, जणा वीं परच्यार ने हुण्यो, वामूँ नरई जणा विस्वास किदो। विस्वास करबावाळा की गणती लगे-भगे पाँचेक हजार पोंछगी ही।
5आगले दन नेता, बुड़ा-ठाड़ा अन यहूदी धरमसास्तरी यरूसलेम में भेळा व्या। 6वीं मोटा याजक हन्ना, केफा, यहुन्ना, सिकन्दर अन मोटा याजकाँ का परवार का दूजाँ जणाऊँ मल्या। 7वे वाँ दुई थरप्या तका ने लाया अन पूँछबा लागा, “थाँकाणी कस्यी सगती अन कस्या हकऊँ ओ काम किदो?”
8तो पतरस का डिले पुवितर आत्मा आन वाँने क्यो, “ओ नेता अन बुड़ा-ठाड़ा लोगाँ, 9जद्याँ आज थाँ माँकाऊँ एक लंगड़ा को भलो करबा के वाते पूँछरिया हो के, ‘वो हव कस्यान व्यो?’ 10तो थाँ सब जणा अन इजराएल का लोगाँ ने ओ पतो वेणो छावे के, ओ मनक थाँके हामे ईसू मसी नासरी का नामऊँ पुरी तरियाऊँ हव वेन थाँका हामे ऊबो हे, वो ईसू नासरी, जिंने थाँकाणी हूळी पे चड़ा दिदो हो अन परमेसर पाछो वींने मरिया तका मूँ जीवतो कर दिदो।” 11#भज 118:22सास्तर ईसू का बारा में अस्यान केवे हे के,
“‘ओ वोईस भाटो हे, जिंने थाँ कारिगराँ नकार दिदो,
आज वोईस भाटो खास नीम को बणग्यो हे।’”
12बेस वोईस ईसू आपाँने बंचा सके हे, काँके ईं हारी धरती अन लोगाँ में दूजो नाम कोयने हे, जो आपाँने बंचा सके।
13जद्याँ वणा पतरस अन यहुन्ना की हिम्मत देकी अन हमज्या के, वे दुई अणभण्या अन भला मनक हे। तो वाँने घणो अचम्बो व्यो। पछे वे जाणग्या के, ईं दुई ईसू की लारे रे चुक्या हाँ। 14अन वे वीं हव व्या तका लंगड़ा मनक ने वाँकी लारे ऊबो देक्यो, तो वाँके हामे बोल ने सक्या। 15वाँ वाँने यहूदी सबाऊँ बारणे जाबा वाते क्यो, अन पछे बात-बच्यार करबा लागा के, 16“ईं लोगाँ की लारे अबे कई कराँ? काँके यरूसलेम का हारई लोग-बाग ओ जाणे हे के, वाँ घणा अचम्बावाळो परच्यो दिदो हे। अबे आपाँ वाँने नकार भी तो ने सका। 17पण, आपाँ आने चेतावणी दे देवाँ के, वीं ईसू का नाम को परच्यार अबे किंका भी हामे ने करे, ताँके लोगाँ में आ बात ओर ने फेले।”
18तद्याँ वे वाँने मयने बलाया अन ओ क्यो के, थें कदी भी ईसू का नामऊँ ने तो किंने कई केवो अन नेई उपदेस देवो। 19पण, पतरस अन यहुन्ने जबाव दिदो, “थाँईस बतावो, परमेसर का हामे हव कई हे? माँ परमेसर की हुणा कन थाँकी हुणा। 20अन ओ तो वेई ने सके के, माँ जो कई भी देक्यो अन हुण्यो हे, वींने ने बतावा।” 21तो पछे मोटी सबा का लोगाँ वाँ दुई जणा ने तापड़न छोड़ दिदा। वाँने सजा देबा को कई भी मोको ने मल्यो हो, काँके जो भी व्यो, वींका वाते लोग-बाग परमेसर की मेमा गारिया हाँ। 22जीं मनक पे आ करपा व्यी ही, वींकी उमर चाळी वराऊँ हेली ही।
विस्वासी लोगाँ की परातना
23जद्याँ पतरस अन यहुन्ना ने छोड़ दिदा, तो वे आपणाँ लोग-बागाँ नके आया अन वाँने जो भी यहूदी मोटा याजक अन बुड़ा-ठाड़ा क्यो हो, वो सब वाँने के हुणायो। 24#निर 20:11; नेम्या 9:6; भज 146:6जद्याँ वाँ लोगाँ ओ हुण्यो, तो वे एक मन वेन परमेसरऊँ कल्ड़ी अवाज में परातना करबा लागा के, “मालिक, थाँईस हो जो आकास, धरती, समन्द अन वीं मयने जो भी हे, वींने बणायो। 25#भज 2:1,2थाँईस पुवितर आत्माऊँ आपणाँ दास अन माकाँ पुरवज दाऊद का मुण्डाऊँ क्यो हो,
“‘अणा ज्यो यहूदी ने हे वा लोगाँ काँ हाका-हूक किदी?
अन बेकार में लोगाँ काँ जाळ बचायो?
26परबू अन वाँका मसी का विरोद में
धरती का राजा त्यार वेग्या
अन राज करबावाळा दरबार में अगेटा व्या।’”
27 #
लूका 23:7–11;
मत्ती 27:1,2; मर 15:1; लूका 23:1; यहु 18:28,29 काँके हाँचई में, थाँका पुवितर दास ईसू, जिंको थाँ राजतलक किदो। वींका विरोद में हेरोदेस अन पिलातुस, ज्यो यहूदी ने हा अन इजराएल्याँ की लारे वेन ईं नगर में भेळा व्या। 28वीं हारोई करबा ने भेळा व्या, ताँके जो पेल्याऊँ थाँकी तागत अन मरजीऊँ पूरो व्यो हो, वो पूरो वेवे। 29अन अबे ओ परबू, थाँ वाँकी दरपावणी ने देको अन थाँका चेला ने बना दरप्या थाँरा बचन हुणाबा की सगती दो। 30थूँ थाँरा पुवितर दास ईसू का नामऊँ लोग-बागाँ ने हव करबा के वाते, अचम्बा अन हेन्याणी का काम करबा के वाते आपणो हात बड़ा।
31जद्याँ वणा परातना कर लिदी, तो वाँ जगाँ जटे वे अगेटा व्या हाँ, हालगी। अन वे हारई पुवितर आत्माऊँ भरग्या अन परमेसर का वसना ने बना दरप्याई हुणाबा लागग्या।
विस्वासी लोगाँ खुद का धन-दोलत ने आमी-हामी बाटी
32 #
थर 2:44,45 हारई विस्वास करबावाळा एक मन अन हरदा का हाँ। अटा तईं के, वे आपणी धन-दोलत ने आपणी ने केता हा, पण हारी चिजाँ वाँका भेळा में ही। 33अन वे थरप्या तका परबू ईसू के पाछो जीवतो वेबा की गवई देता अन परमेसर वाँ हाराई ने घणो आसीस दिदो। 34वाँकी बंच में किंने भी कणी की कमी ने ही, काँके जिंका नके जगाँ अन घर-बार हा, वे वाँने बेंच देता अन वींऊँ जो भी रिप्या-कोड़ी मलता, 35वाँने लान थरप्या तका का पगाँ में मेल देता। अन जिंने जतरीक जरूत वेती, वीं हस्याबूऊँ एक-दूँजा ने बाँट देता हा। 36जस्यान के, युसुप नाम को एक लेवी हो, जो साइपरस नाम का देस को हो। थरप्या तका वींको नाम बरनबास राक्यो हो, जिंको मतलब धिजो बंदाबावाळो पूत। 37वींके खेत हो, जिंने बेंच दिदो अन वींका रिप्या-कोड़ी लान थरप्या तका का पगाँ में मेल दिदा।
Currently Selected:
थरप्या तका का काम 4: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
