लूका 1
1
संत लूका को लिक्यो तको हव हमच्यार
1-3हुकम थियोपलुस, ज्यो बाताँ आपणाँ बसमें वीं ही वणा बाताँ ने वसन का दास खुद सरुआतऊँ देकी अन आपाँने बतई। वणा बाताँ ने सई तरियाऊँ लिकबा का वाते नरई मनकाँ कोसीस किदी ही। में अणा हारी बाताँ की सरुआतऊँ सई तरियाऊँ परक कर लिदी ही, ईं वाते मने ओ हव लाग्यो के, मूँ भी अणा हारी बाताँ ने थाँका वाते सई तरियाऊँ एक का पसे एक लिकूँ, 4ताँके थाँ ओ पुरी तरियाऊँ जाण सको के, जीं भी बाताँ थाँने हिकई गी हे, वीं हाँची अन अटल हे।
यहुन्ना का जनम की घोसणा
5यहूदियाँ के राजा हेरोदेस की टेम में मन्दर में सेवा-चाकरी करबावाळा समाज को अबिया पीड़ी मेंऊँ एक जकरय्या नाम को एक सेवा करबावाळो याजक हो अन वींकी लुगई को नाम एलीसिबा हो, वाँ हारून का बंस की ही। 6वीं दुई परमेसर की देकणी में घणा धरमी हा। अन परमेसर की आग्या को अन वींका नेमाँ को वीं पुरी तरियाऊँ पालण करता हा। 7वाँके कई ओलाद ने ही। काँके एलीसिबा बाँज ही अन वीं डोकरा-डोकरी हा।
8जद्याँ जकरय्या का दल को ओसरो हो अन वो याजक का रूप में परमेसर की सेवा-चाकरी कररियो हो। 9तद्याँ परमेसर की सेवा करबावाळा की रिति-रिवाज के जस्यान मन्दर में धुप-ध्यान करबा का वाते परच्याँ नाकी अन परची जकरय्या का नाम की निकळी। अन वो परबू का मन्दर में ग्यो हो। 10धुप-ध्यान करती टेम लोग-बागाँ की हारी भीड़ बारणे परातना कररी ही।
11वीं टेम में जकरय्या का हामे परबू परमेसर को एक हरग-दुत परगट व्यो। वो धुप-ध्यान करबा की वेदी का जीमणा पाल्ड़े ऊबो तको वींने दिक्यो। 12अन जकरियो वींने देकन दरपन घबराग्यो। अन वींका में कल्ड़ी दरप भरईगी। 13पण, हरग-दुत वींने क्यो, “जकरय्या दरपे मती। काँके, थारी परातना परमेसर हूँण लिदी हे। ईं वाते थाँरी घरवाळी एलीसिबा एक बेटा ने जणी। वींको नाम यहुन्नो राकज्ये। 14जणीऊँ थूँ राजी अन खुस वेई अन नरई लोग-बाग वींका जनमऊँ आणन्द मनाई। 15काँके वो परबू परमेसर की देकणी में मोटो वेई। वो दाकरस अन दारू कदी ने पीई। वो आपणी माँ की कोख मेंईस पुवितर आत्माऊँ भर जाई। 16वो इजराएल का घणा लोगाँ ने परबू परमेसर का आड़ी फेरी। 17#मला 4:5,6वो एलिया के जस्यान की आत्मा अन तागत में वेन परबू का आगे-आगे चाली। मनकाँ को मन वाँके छोरा-छोरी का आड़ी फेर देई, अन परमेसर की आग्या ने ने मानबावाळा ने धारमिकता की अकल का आड़ी लेजाई। अन मनकाँ ने परबू का वाते त्यार करी।”
18तद्याँ जकरये परमेसर का हरग-दुतऊँ क्यो के, “मूँ ईंपे कस्यान विस्वास करूँ? काँके मूँ तो एक डोकरो हूँ अन मारी घरवाळी भी डोकरी हे।”
19हरग-दुत वींने क्यो के, “मूँ जिबराईल हूँ। अन हमेस्यान परमेसर का हामे हाजीर रूँ हूँ। अन वणा मने थाँराऊँ बात करबा का वाते अन ओ हव हमच्यार केबा के वाते खन्दायो हे। 20में ज्यो क्यो हो, वो तो आपणाँ टेम में पूरो वे जाई, पण थें तो ईंपे विस्वास ने किदो। ईं वाते जद्याँ तईं ओ पूरो ने वेई तद्याँ तईं थूँ बोबड़ो रेई।”
21अन बारणे लोग जकरय्या की वाट नाळन अचम्बो करबा लागा के, वींने मन्दर में अतरी टेम कस्यान लागी? 22जद्याँ वो बारणे आयो, तो वो बोल ने सक्यो तो वे हमजग्या के, वणी मन्दर में किंकाई दरसण किदा हे। वो हातऊँ हानी करतो रियो अन बोबड़ो वेग्यो।
23जद्याँ वींकी सेवा-चाकरी का दन पूरा व्या, तो वो आपणाँ घरे परोग्यो। 24थोड़ाक दनाँ केड़े एलीसिबा गरबवती वीं अन पाँच मिना तईं वणी ईं बात ने हपई राकी। 25वणी क्यो, “अबे आकरी में परबू मारा पे दया किदी अन लोगाँ का हामेंऊँ मारी बेजती छेटी किदी हे।”
ईसू का जनम की घोसणा
26जकरय्या की लुगई एलीसिबा के जद्याँ छटो मीनो चालरियो हो, तद्याँ परमेसर का आड़ीऊँ जिबराईल नाम को हरग-दुत गलील का नासरत नगर में एक कूँवारी के नके खन्दायो ग्यो। 27#मत्ती 1:18जिंकी हगई युसुप नाम का एक मनकऊँ वीं ही, ज्यो दाऊद का बंस को हो। वीं कूँवारी को नाम मरियम हो। 28अन हरग-दुत वींका नके परगट वेन क्यो, “राजी वे, परबू की दया थाँरा पे वीं हे अन वीं थाँरा लारे हे।”
29ओ हामळन वा घबरागी अन होचबा लागी के, “ईंको मतलब कई हे?” 30तद्याँ हरग-दुत वींने क्यो, “मरियम दरपे मती, परबू परमेसर की दया थाँरा पे हे। 31#मत्ती 1:21अन देक, थूँ गरबवती वेई अन थारे एक छोरो वेई। थूँ वींको नाम ईसू राकज्ये। 32#यसा 9:7वो मोटो मान्यो जाई अन परम परदान परमेसर को पूत केवाई अन परबू परमेसर वींका बड़ाबा दाऊद की गाद्दी वींने हूँपी। 33वो याकूब का बंसा पे अमर राज केरी अन वींको राज कदी ने मटी।”
34मरियम हरग-दुतऊँ क्यो, “ओ कस्यान वेई? मूँ तो आलतरे कूँवारी हूँ।”
35हरग-दुत वींने क्यो के, “पुवितर आत्मा थाँरा डिले आई अन परम परदान की तागत थाँरा ऊपरे वेई। ईं वाते जनम लेबावाळो पुवितर बाळक परमपिता परमेसर को पूत वाजी। 36अन देक, थाँरा परवार की एलीसिबा के भी भुढापा में बेटो जनम लेबावाळो हे। ज्या बाँजड़ी वाजती ही, अबाणू वींके छटो मीनो हे। 37#उत्प 18:14काँके परमेसर के वाते कस्यो भी काम अबको कोयने हे।”
38पछे मरियम हरग-दुतऊँ क्यो, “देको, मूँ परबू की दासी हूँ। जस्यान थाँ क्यो, वस्योईस मारा वाते वेवे।” अन वो हरग-दुत वींका नकूँ परोग्यो।
मरियम को एलीसिबा ने देकबा जाणो
39थोड़ाक दन केड़े तरत त्यार वेन मरियम मंगरा में बस्या तका यहूदा परदेस का एक नगर में गी। 40अन वाँ जकरय्या का घरे जान एलीसिबाऊँ नमस्कार किदो। 41जस्यानी एलीसिबा मरियम का नमस्कार ने हामळयो, तो वींका पेट में बाळक फदकबा लागो अन एलीसिबा पुवितर आत्माऊँ भरगी। 42अन वणी हाको करन क्यो, “थूँ हंगळी लुगायाँ में धन्न हे अन थाँरा पेट को फळ धन्न हे। 43अन आ दया मारा ऊपरे कटू वीं काँके मारा परबू की बई मारा नके अई। 44अन देक, जस्यानीस थारो नमस्कार मारा कान्दड़ा में पड़्यो, तो वस्यानीस बाळक मारा पेट में आणन्दऊँ फदक्यो। 45ज्यो बाताँ परबू थने की हे, वींने थें मानी के, वीं पुरी वेई। ईं वाते थूँ धन्न हे।”
मरियम को गीत
46तद्याँ मरियम क्यो,
“मारो जीव परबू की बड़ई करे।
47अन मारी आत्मा मने बंचाबावाळा परमेसरऊँ राजी हे।
48काँके, वीं आपणी दासी की नरमई पे ध्यान दिदो हे।
ईं वाते देकज्यो, आजऊँ हंगळा जुग-जुग का लोग मने धन्न केई।
49काँके, वीं सामरतवान परमेसर मारा वाते मोटा-मोटा काम किदा हे
अन वाँको नाम पुवितर हे।
50वाँको मान करबावाळा पे वाँकी दया पिड़ीऊँ पीड़ी रेवे हे।
51वणा आपणाँ ज्योरावर हाताऊँ मोटा-मोटा काम किदा,
अन ज्यो मन में घमण्ड करता हा, वाँने बखेर दिदा।
52वणी दरबाराँ ने गादीऊँ उतार दिदा।
पण, ज्यो उदास हा, वाँने ऊपरे उटाया।
53वणी भूका ने हव चिजाँऊँ भर दिदा
अन रिप्यावाळा ने खाली हाताई काड़ दिदा।
54-55 #
उत्प 17:7
वणी आपणाँ दास इजराएल को हमाळ किदो। वाँने वो वादो आद रियो जिंने वणा आपणाँ बड़ाबाऊँ किदो हो के, ‘मूँ अबराम अन वींकी पीड़ी पे हमेस्यान दया करतो रेऊँ।’ वणा ईं वादाऊँ इजराएल ने आद राकन वींकी मदत किदी।”
56मरियम लगे-भगे तीन मिना तईं एलीसिबा की लारे री अन पसे वाँ आपणाँ घरे अईगी।
बतिस्मा देबावाळा यहुन्ना को जनम
57एलीसिबा का मिना पूरा व्या अन वणी एक बेटो जण्यो। 58वींके आस-पड़ोस वाळा अन हगा-होई ओ हामळन के, वींका पे परबू परमेसर दया किदी हे। वाँका हाते आणन्द मनायो।
59ईंका केड़े जद्याँ बाळक आट दन को व्यो तो मनक बाळक को खतनो करबा ने आया अन वीं वींको नाम वींका बाप का नाम का जस्यानीस जकरयो राकणो छारिया हा। 60पण, वींकी माँ ऊपड़ताई बोली, “ने ने, वींको नाम यहुन्नो राक्यो जावे।”
61तद्याँ मनकाँ वींकाऊँ क्यो, “थाँरा परवार में ओ नाम तो किंको भी ने हे।” 62तद्याँ वणा वींका बाप का आड़ी हानी करन क्यो के, “वीं ईंको नाम कई देणो छावे हे?” 63पसे जकरये एक पाटी मगई अन वींपे लिक्यो के, “ईंको नाम यहुन्नो हे।” ओ देकन हाराई लोग-बाग अचम्बा में पड़ग्या। 64अस्यान वेताई जकरय्या की बोली खलगी अन वो परबू परमेसर की बड़ई करबा लागो। 65वींका अड़े-भड़े रेबावाळा हाराई दरपग्या अन ईं हंगळी बाताँ मंगरा में बस्या तका यहूदा परदेस में च्यारूँमेर फेलगी। 66हंगळा हूँणबा वाळा आपणाँ मना मेंईस बच्यार करन क्यो, “ओ बाळक कस्यो वेई?” काँके परबू को हात ईंका पे हे।
जकरय्या की आगेवाणी
67वींको बाप जकरियो पुवितर आत्माऊँ भरग्यो अन परमेसर का आड़ीऊँ ओ बताबा लागो,
68“इजराएल का परमेसर की जे हो।
काँके, वणा आपणाँ लोगाँ पे करपा किदी हे अन वाँने छुड़ाया हे।
69वणा आपणाँ दास दाऊद का पिड़ीऊँ माकाँ वाते जोरावर मुगतीदाता ने पेदा किदो हे।
70नरी पेल्याँ परमेसर आपणाँ आड़ीऊँ बोलबावाळा पुवितर मनकाऊँ वादो किदो हो।
71वो माँने माकाँ दसमणाऊँ
अन माकाँ हंगळा विरोदी का हाताऊँ छुड़ाई।
72वणा क्यो, वीं आपणो पुवितर करार आद करन
आपणाँ बड़ाबा पे दया करी।
73वणा आ होगन आपणाँ बड़ाबा अबरामऊँ खादा हा
74के, वाँ आपाँने आपणाँ दसमणा का हाताऊँ छुड़ाई।
अन आपाँ बना दरप्याँ परबू की सेवा करा।
75अन आपीं आपणी हारी जीवन में वाँका हामे पुवितर अन धरमी बण्या तका रेवा।
76 #
मला 3:1
हे मारा बेटा, थूँ, परम परदान परमेसर का आड़ीऊँ बोलबावाळो केवाई।
थूँ परबू को गेलो त्यार करबा के वाते वाँके आगे-आगे चाली।
77अन मनकाँ ने हिकाई के, थाँका पापाँ की मापी वेबाऊँ थाँ बंचाया जावो।
78आपणाँ परमेसर की दयाऊँ आपणाँ पे मुगतीदातो एक उगता तका सुरज का उजितो का जस्यान हरगऊँ आपणाँ ऊपरे वेई,
79 #
यसा 9:2
अंदारा अन मोत की छाया में जीवबावाळा पे पुवितर उजितो चमकी,
अन आपाँने खरई अन सान्ती का गेला पे लेजाई।”
80अन वो बाळक डिल-डोलऊँ अन आत्माऊँ बड़तो तको ज्योरावर वेतो ग्यो। वो इजराएल के हामे परच्यार करबा का दनाँ तईं हुन्ना काँकड़ में रेई।
Currently Selected:
लूका 1: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
