लूका 5

ईसू का पेलाँ चेला ने बलाणो

(मत्ती 4:18–22; मरकुस 1:16–20)

1 # मत्ती 13:1,2; मर 3:9,10; 4:1 एक दाण ईसू गन्नेसरत का समन्द का कनारे ऊबा तका हा अन लोगाँ की भीड़ परमेसर का बचन हुणाबा का वाते वाँके च्यारूँमेर ऊबी तकी ही। 2तद्याँ समन्द का कनारे ईसू दो नावाँ ने देकी, वणा मूँ माछळी पकड़बावाळा उतरन आपणाँ-आपणाँ जाळ धोईरिया हा। 3अन ईसू वणा नावाँ मूँ समोन की नाव में चड़न वणीऊँ क्यो, “नाव ने कनाराऊँ थोड़ीक ऊण्डा पाणी में ले चालो।” तद्याँ वी नाव में बेटन लोगाँ ने उपदेस देबा लागा।

4जद्याँ वी उपदेस पूरो करन समोनऊँ क्यो, “नाव ने ओर भी उण्डी ले चालो अन माछळ्याँ पकड़बा का वाते आपणाँ जाळ नाको।”

5 # यहु 21:3 समोन ईसुऊँ क्यो, “हे मालिक, माँ पुरी रात-भर मेनत किदी पण कई हाते ने लागो। तो भी थाँका केवाऊँ जाळ नाकूँ।” 6#यहु 21:6जद्याँ वणा अस्यो किदो अन जाळ में अतरी माछळ्याँ अई के, वाँको जाळ फाटबा लागो। 7तो वणा आपणाँ हण्डाळ्याँ ने ज्यो दूजी नाव में हा, हानी किदी के, “वीं आन माँकी मदत करे।” वीं आया अन वणा दुई नावा ने माछळयाऊँ अतरी भरी के नावाँ डुबवा लागी। 8यो देकन समोन पतरस ईसू का पगा में पड़ग्यो अन वणाऊँ क्यो, “ओ परबू, माराऊँ छेटी परा जावो, काँके में थाँकी बात पे विस्वास ने किदो, मूँ पापी मनक हूँ।” 9काँके अतरी माछळ्याँ पकड़ईगी ही, ईं वाते यो देकन वींने अन वींका हाराई हण्डाळ्याँ ने अचम्बो व्यो। 10वणीस तरियाँ जब्दी का बेटा याकूब अन यहुन्ना ने भी, जी समोन का हण्डाळ्याँ हा, अचम्बो व्यो। जद्याँ ईसू समोनऊँ क्यो, “दरपे मती। अबे थूँ परमेसर का राज में मनकाँ ने लाबावाळो बणी।” 11पसे वीं नावा ने बारणे लाया अन हारोई छोड़न ईसू का लारे वेग्या।

एक कोड़ी ने हव करणो

(मत्ती 8:1–4; मरकुस 1:40–45)

12जद्याँ ईसू एक नगर में हा, तद्याँ वटे एक कोड़यो मनक हो वो ईसू ने देकन वाँका पगाँ में धोग दिदो अन वाँकाऊँ अरज करबा लागो, “ओ परबू, थाँ छावो, तो मने हव कर सको हो।”

13ईसू वींके हात अड़ायो अन क्यो, “मूँ छावूँ हूँ, थूँ हव वेजा।” अन वींको कोड़ तरत जातो रियो। 14अन ईसू वींने आग्या दिदी, “ईं बात ने कने केज्ये मती। पण, अबे जा अन आपणाँ खुद ने याजकाँ ने बता अन कोड़ऊँ हव वेबा का वाते ज्यो मूसे ज्याँ बोलमा ठेराई हे। वींने चढा, जणीऊँ वाँने सबूत मले के, थूँ हव वेग्यो।” 15पण, ईसू की चरचा घणी फेलबा लागी के, नरई मनक ईसू जी की बाताँ हुणबा का वाते अन मांदकीऊँ हव वेबा का वाते भेळा वेबा लागा। 16पण ईसू हुन्ना काकड़ में जान परातना करता हा।

एक लुला मनक ने हव करणो

(मत्ती 9:1–8; मरकुस 2:2–12)

17एक दन अस्यो व्यो के, ईसू उपदेस देरिया हा अन वटे फरीसी अन यहूदी धरम गरू बेटा तका हा। वीं गलील, यहूदा परदेस की हंगळी जगाँऊँ अन यरूसलेमऊँ आया तका हा। माँदा ने हव करबा का वाते परबू परमेसर की तागत ईसू का हाते ही। 18वीं दाण घणा लोग-बाग एक मनक ने, ज्यो लुलो हो वींने माचा पे हूँवाणन लाया। वणा वींने घर में ले जावा अन ईसू का हामे लाबा की कोसीस किदी। 19जद्याँ वीं भीड़भाड़ऊँ वींने में ने लेजा सक्या। तो वी घर माते चड़या अन केलू-डाडा आगा करन वींने माचा का हाते ईसू का हामे उतारियो। 20वींको विस्वास देकन ईसू वणी लुला मनकऊँ क्यो, “हे भई, थाँरा पाप माप वेग्या।”

21जद्याँ मूसा का नेमा ने हिकाबावाळा अन फरीसी आपस में बात करबा लागा के, “ओ कूण हे? ज्यो परमेसर की नन्दयाँ करे हे। परमेसर ने छोड़न कूण पाप माप कर सके हे?” 22पण, ईसू वाँका बच्यार जाणग्या हा, वणा वाँकाऊँ क्यो, “थाँ आपणाँ मना में अस्यान काँ होचरया हो? 23हेल बात कई हे? कई यो केणो के, ‘थाँरा पाप माप व्या’ कन पसे यो के, ‘उठ, अन चाल-फर’? 24पण, अणी वाते थाँ जाण सको के, मने मनक का पूत ने अणी धरणा में पाप माप करबा को हक हे।” अन ईसू जी वणी लुला मनक ने क्यो, “मूँ थाँराऊँ केवूँ हूँ, उठ अन आपणो माचो ने लेन आपणाँ घरे परोजा।” 25वो तरत वींका हामे ऊबो व्यो, अन जीं माचा पे वो हूँतो हो वींने तोकन, परमेसर की बड़ई करतो तको आपणाँ घरे परोग्यो। 26तद्याँ वी हंगळा होच में पड़ग्या अन परमेसर की बड़ई करबा लागग्या। वीं दरपन केबा लागा, “आज माँ जोरदार अचम्बावाळी बात देकी हे।”

लेवी ने बलाणो

(मत्ती 9:9–13; मरकुस 2:13–17)

27वींका केड़े ईसू बारणे पराग्या। वणा लेवी नाम का एक लगान लेबावाळा अदिकारी ने चुंगी नाका ऊपरे बेटो तको देक्यो। ईसू वणीऊँ क्यो, “मारा पाच्छे आ।” 28तद्याँ वो लेवी हारोई छोड़न ऊबो व्यो अन ईसू का पाच्छे चालबा लागो। 29वणी लेवी आपणाँ घर में ईसू की आवभगत का वाते मोटो जीमण राक्यो। अन आया तका मेमान में नरई लगान लेबावाळा अन दूजाँ मनक भी हा। ईं हाराई ईसू का हाते जीमण में बेटा हा। 30#लूका 15:1,2यो देकन फरीसियाँ अन वाँका सास्तर हिकाबावाळा ईसू का चेलाऊँ यो केन सिकायत करबा लागा, “थाँ लगान लेबावाळा अन दूजाँ पाप्याँ का हाते काँ खावो-पीवो हो?”

31ईसू वणाऊँ क्यो, “इलाज हव मनकाँ का वाते कोयने पण, माँदा मनकाँ का वाते हे। 32मूँ धरमियाँ ने ने पण, पाप्याँ का मन बदलबा आयो हूँ।”

एकाणा का बारा में सवाल

(मत्ती 9:14–17; मरकुस 2:18–22)

33वणा मनकाँ ईसुऊँ क्यो, “यहुन्ना का चेला तो हरेक टेम में एकाणो राके हे अन परातना करे हे। फरीसियाँ का चेला भी अस्यानीस करे हे। पण, थाँका चेला तो हमेस्यान खावे-पीवे हे?”

34ईसू वणाऊँ क्यो, “जद्याँ तईं बींद जान्या का लारे हे तो कई वी एकाणो राकी? 35पण वीं दन आई जद्याँ बींद वणाऊँ छेटी करियो जाई, तद्याँ वीं एकाणो राकी।” 36ईसू वाँने एक ओरी केणी की, “कुई, मनक नवा गाबा को टूकड़ो फाड़न जूना गाबा के कारी ने लगावे। ने तो नवा गाबा फाट जाई अन वीं नुवा गाबा की कारी जूना गाबा जस्यी हव ने लागी। 37कुई भी मनक नुवा अंगूरा को रस ने जूनी मसक में ने भरे हे। ने तो नुवो अंगूरा को रस जूनी मसक ने फाड़न ढळ जाई। अन मसका भी फाटीन बेकार वे जाई। 38ईंके बजाये नुवो अंगूरा को रस हमेस्यान नुवी मसका मेंईस भरियो जावे हे। 39कुई भी मनक जूना दाकरस ने पीन नुवो दाकरस ने माँगे हे। वो केवे हे के, ‘जूनोईस हव हे।’”

Currently Selected:

लूका 5: एम टी आर

Highlight

Copy