लूका 9
9
बाराई थरप्या तका चेला ने खन्दाणा
(मत्ती 10:5–15; मरकुस 6:7–13)
1पसे ईसू आपणाँ बाराई थरप्या तका चेला ने एक हाते बलान वाँने हारी हुगली आत्मा अन मांदकी ने छेटी करबा की तागत अन अदिकार दिदो। 2वाँने परमेसर का राज को परच्यार करबा का वाते अन माँदा मनकाँ ने हव करबा का वाते हक का हाते खन्दाया। 3अन ईसू वाँकाऊँ क्यो, “आपणी जातरा का वाते कई मती लेज्यो, ने तो लाकड़ी अन नेई जोळी, नेई रोटी, नेई रिप्या-कोड़ी अन नेई दो-दो जोड़ी गाबा। 4कस्या भी गाम में जाया केड़े थाँकी आवभगत जणी घर में पेली वेवे, वणी घर में जतरे पाच्छा वणी गामऊँ जावो वतरे वटेईस रेज्यो। 5#थर 13:51#लूका 10:4–11जणी नगर में थाँकी आवभगत ने वेवे, वटूँ निकळता तका आपणाँ पगाँ को धूळो वटेईस जाटक दिज्यो, ताँके ईं बात को वाँने पतो पड़ जावे के, वाँका नास को कारण वे खुदईस हे।” 6अस्यान वी वटूँ चाल पड़्या अन गामाँ-गामाँ में हव हमच्यार हुणाता तका अन हंगळी जगाँ लोग-बागाँ ने मांदकीऊँ हव करता रिया।
दरबार हेरोदेस को भेंम
(मत्ती 14:1–12; मरकुस 6:14–29)
7 #
मत्ती 16:14; मर 8:28; लूका 9:19 जद्याँ गलील का दरबार हेरोदेस, ज्यो कई व्यो हो, वींका बारा में हुण्यो, तो वो भेंम में पड़ग्यो, काँके थोड़ाक मनक केरियो हो के, “यहुन्ना मरिया तकाऊँ जीवतो वेग्यो हे।”
8दूजाँ मनक केरिया हा के, “एलियो परगट वेग्यो हे।” अन नरई अस्यान भी केरिया हा के, “पुराणा जमाना को कस्योई परमेसर का आड़ीऊँ बोलबावाळो पाछो जी उट्यो हे।”
9पण, दरबार हेरोदेस क्यो, “यहुन्नो, जिंको मातो में कटवायो हो। पसे यो कूण हे, जिंका बारा में मूँ अस्यी बाताँ हुणरियो हूँ?” अन हेरोदेस ईसू ने देकबा की कोसीस करबा लाग्यो।
पाँच हजार लोगाँ ने जीमाणा
(मत्ती 14:13–21; मरकुस 6:30–44; यहुन्ना 6:1–14)
10पसे थरप्या तका चेला पाच्छा आया। ज्यो कई व्यो, वो ईसू ने बता दिदो अन पसे ईसू वाँने अलग करन आपणाँ हाते लेन बेतसेदा नगर में पराग्या। 11ईं बात को पतो लोगाँ ने पड़ग्यो तो हाराई लोग वाँके पाच्छे चालबा लागग्या। ईसू वाँकी आवभगत किदी अन परमेसर का राज की बाताँ बताबा लागग्या। ज्यो मनक हव वेणा छारिया हा वाँने ईसू हव किदा।
12जद्याँ दन आँतबा में हो तो बाराई चेला ईसू का नके आन क्यो, “लोगाँ ने हिक दो परी, ताँके वीं अड़े-भड़े का गामाँ अन ढाण्याँ में जान रे सके अन खाणो खा सके, काँके आपीं तो अटे हुन्ना काकड़ में हा।” 13ईसू वाँकाऊँ क्यो, “थाँईस अणाने खाबा ने दो।”
वणा क्यो, “माँके नके पाँच रोट्याँ अन दो माछळ्याँ छोड़न ओर कई ने हे। पण, कटे थाँ यो तो ने छावो हो के, माँ जावा अन अणा हाराई का वाते खाणो मोल लेन आवा।” 14वटे लगे-भगे खाली मनक मनकईस पाँच हजार हा।
जद्याँ ईसू आपणाँ चेलाऊँ क्यो, “वाँने पचास-पचास की पंगताँ में बेवाड़ दो।”
15वणा अस्यानीस किदो अन वाँने बेवाड़ दिदा। 16पछे ईसू पाँच रोट्याँ अन दो माछळ्याँ लिदी अन हरग आड़ी देकन परमेसर ने धन्नेवाद दिदो अन वाँने तोड़न आपणाँ चेला दिदी के, वाँने लोगाँ ने परोस दे। 17अस्यान वीं हाराई खान धापग्या अन चेला बची तकी रोट्याँ की बारा ठोपळा भरिया।
ईसूइस मसी हे।
(मत्ती 16:13–19; मरकुस 8:27–29)
18एक दन ईसू ऐकला परातना करिया हा, तो वाँका चेला भी वाँके नके आया। तद्याँ ईसू वाँकाऊँ पूँछ्यो के, “लोग-बाग कई केवे हे के, मूँ कूण हूँ?”
19 #
मत्ती 14:1,2; मर 6:14,15; लूका 9:7,8 वणा वाँकाऊँ क्यो, “कुई तो थाँने यहुन्नो बतिस्मा देबावाळो केवे हे तो कुई थाँने एलिया अन कुई तो परमेसर का आड़ीऊँ बोलबावाळा मेंऊँ कुई पुराणा जी उट्यो हे।”
20 #
यहु 6:68,69 तद्याँ ईसू वाँकाऊँ पूँछ्यो, “पण थाँ मारा बारा में कई होचो हो?”
पतरस वाँने क्यो, “थाँ परमेसर का आड़ीऊँ खन्दाया तका मसी हो।”
21तद्याँ ईसू वाँने चेतान क्यो के, “यो थाँ किंने भी मती केज्यो।”
ईसू पे आबावाळा कळेस अन मोत
(मत्ती 16:20–28; मरकुस 8:30; 9:1)
22ईसू चेलाऊँ क्यो, “मूँ, मनक का पूत का वाते यो घणो जरूरी हे के, मूँ दुक जेलूँ अन भूण्डा यहूदी नेता, मोटा याजक अन धरम गरू मने नकारन मार देई अन मूँ तीजे दन पाछो जी उटायो जाऊँ।”
23 #
मत्ती 10:38; लूका 14:27 पछे ईसू वणा हाराऊँ क्यो, “यद्याँ कुई मारा पाच्छे आणो छावे हे, तो वो आपणाँ खुद ने नकारे अन हरेक दन आपणी हूळी उठातो तको मारा पाच्छे चाले। 24#मत्ती 10:39; लूका 17:33; यहु 12:25काँके ज्यो कुई धरती पे आपणाँ खुद को जीवन बंचाणो छावे हे वो आपणो हरग को जीवन खो देई। पण, ज्यो कुई धरती पे मारा वाते आपणो जीवन खोई, वो हरग को जीवन पाई। 25यद्याँ कुई मनक हारी दनियाँ ने जीत ले अन आपणो हरग को जीवन खो दे कन भटक जावे तो, ईंमें वींको कई नफो हे? 26ज्यो कुई माराऊँ अन मारी बाताँऊँ लाजा मरी तो जद्याँ मूँ, मनक को पूत आपणी अन बापू परमेसर की अन पुवितर हरग-दुताँ की मेमा में पाछो आऊँ तो मूँ भी वाँकाऊँ मुण्डो फेर लेऊँ। 27मूँ थाँकाऊँ हाँची केवूँ हूँ के, अटे ऊबा हे अणामूँ नरई अस्या हे जीं जद्याँ तईं परमेसर का राज ने देक ने लेई, तद्याँ तईं वीं ने मरी।”
ईसू को रूप बदलणो
(मत्ती 17:1–8; मरकुस 9:2–8)
28ईं बाताँ व्या पसे ईसू आट दन केड़े पतरस, यहुन्नो अन याकूब का हाते परातना करबा का वाते मंगरा पे ग्या। 29जद्याँ वी परातना कररिया हा, तो वाँको मुण्डा को रूप बदलग्यो अन वाँका गाबा धोळा-फट वेन चमकबा लागा। 30अन देको अणाचेत का वटे दो मनक परगट व्या, वीं ईसुऊँ बाताँ करबा लागा। वीं दो मनक मूसा अन एलिया हा। 31जीं आपणी मेमा का हाते परगट व्या हा, अन ईसू यरूसलेम में आपणी मोतऊँ परमेसर की मरजी ने पुरी करबा का बारा में वीं बात कररिया हा। 32पण, पतरस अन वाँका हण्डाळ्याँ गेरी नींद में हा अन जद्याँ वीं जाग्या तो वणा ईसू की मेमा ने देकी अन वणा दुई जणा ने भी देक्या ज्यो ईसू का हाते हा। 33जद्याँ वी ईसू का नकेऊँ जाबा लागा तो पतरस ईसुऊँ क्यो, “हो मालिक, माँको अटे रेणो भलो हे, माँ अटे तीन छतरिया बणावा एक थाँका वाते, एक मूसा का वाते अन एक एलिया वाते।” वो खुद ने जाणतो हो के, वो कई केरियो हे।
34वो यो केईस रियो हो, एक वादळा की छाया वाँका पे आगी अन ज्यूँई आको वादळो वाँका पे आग्यो तो वीं दरपग्या। 35#यसा 42:1; मत्ती 3:17; 12:18; मर 1:11; लूका 3:22#2 पत 1:17,18अन वणी वादळा मेंऊँ आ वाणी वी के, “यो मारो बेटो हे अन मारो चुण्यो तको हे, ईंकी हुणो।”
36आ वाणी वेतई वणा ईसू ने ऐकला देक्या अन वी छानारिया अन ज्यो कई देक्यो हो। वींका बारा में वणा वीं टेम में कणीऊँ कई ने क्यो।
हुगली आत्माऊँ छोरा ने छुड़ाणो
(मत्ती 17:14–18; मरकुस 9:14–27)
37दूजे दन ईसू अन वींका चेला मंगरा ऊपरेऊँ उतररिया हा, तो एक मोटी भीड़ वाँकाऊँ मलबा आई। 38अन देको वणी भीड़ऊँ एक जणे जोरऊँ क्यो, “ओ गरुजी, मूँ थाँकाऊँ अरज करूँ हूँ के, मारा बेटा ऊपरे दया करो, काँके वो मारे एकलो बेटो हे। 39अन अणाचेत की एक हुगली आत्मा वींमें आ जावे हे अन वो हाको करबा लाग जावे अन वाँ वींने अस्यो मरोड़े हे के, वींका मुण्डाऊँ जाग आ जावे हे। अन वाँ वींने कदीस ने छोड़े हे अन हमेस्यान वींका सरीर ने खारी ही। 40में थाँरा चेलाऊँ ईं हुगली आत्माने बारणे निकाळबा के वाते परातना करई। पण, वीं ईंने ने निकाळ सक्या।”
41ईसू मनकाँ की भीड़ऊँ क्यो, “ओ बना विस्वास का मनक अन भटक्या तका लोगाँ मूँ थाँका हाते कटा तईं रेवूँ?” अन वींका बाप ने क्यो, “आपणाँ बेटा ने अटे ल्या।”
42वो वीं छोरा ने लईरो हो तद्याँ हुगली आत्मा छोरा ने पटकन मरोड़्यो। पण, ईसू वणी हुगली आत्माने तापड़ी अन छोरो ने हव करन वींका बाप ने हूँपे दिदो। 43जद्याँ हाराई लोगाँ परमेसर की सामरत ने देकी, तो वाँकी आक्याँ खुली की खुली रेगी।
ईसू एक दाण ओरी आपणी मोत का बारा में बतायो
(मत्ती 17:22–23; मरकुस 9:30–32)
ईसू मसी ज्यो भी किदो हो वींने देकन लोग-बाग अचम्बो कररिया हा तो ईसू आपणाँ चेलाऊँ क्यो, 44“अबे मूँ ज्यो केरियो हूँ, वो कानो देन हुणो। मूँ मनक को पूत मनकाँ का हाताँ में धोकाऊँ पकड़वायो जाऊँ।” 45पण, चेला अणी बाताँ ने हमज ने सक्या अन या बात वाँकाऊँ छाने ही जणीऊँ वीं ईंने जाण ने सक्या अन वीं वणाऊँ या बात पूँछबाऊँ दरपता हा।
हाराईऊँ मोटो कूण?
(मत्ती 18:1–5; मरकुस 9:33–37)
46 #
लूका 22:24
एक दाण ईसू का चेला का बंच में अणी बात में होड़ा-होड़ वेबा लागी के, “आपाँ मूँ मोटो कूण हे?” 47ईसू यो जाणग्या के, वाँका मना में कई चालरियो हे। ईं वाते वणा एक बाळक ने आपणाँ नके ऊबो करन 48#मत्ती 10:40; लूका 10:16; यहु 13:20चेलाऊँ क्यो, “ज्यो कुई अणी बाळक ने मारा नामऊँ गरेण करे हे, वी मने भी गरेण करे हे अन जणी मने खन्दायो हे वींने भी करी। काँके ज्यो थाँ हारामूँ फोरो हे, वोईस हाराऊँ मोटो हे।”
ज्यो थाँका विरोदी ने हे, वीं थाँका आड़ी हे।
(मरकुस 9:38–40)
49तद्याँ यहुन्ने क्यो, “ओ मालिक, माँ एक मनक ने थाँका नामऊँ हुगली आत्मा काड़तो तको देक्यो हे अन माँ वींने नटग्या, काँके वो आपणाँ समू को ने हे।”
50ईसू वणीऊँ क्यो, “वींने रोको मती, काँके ज्यो आपणो दसमण ने हे, वीं आपणी आड़ी हे।”
सामरी नगर में ईसू ने नटणा
51अन अस्यान व्यो जद्याँ वाँने हरग में उटाया जावा का दन पूरा वेबा में हा, तो ईसू यरूसलेम में जाबा का वाते ते किदो अन चाल पड़्यो। 52अन वणा आपणाँ पेल्याँ आपणाँ दुताँ ने आगे खन्दाया। वी चाल पड़्या अन एक सामरिया मनकाँ का गाम में ग्या के, वाँका वाते त्यारी करे। 53पण, वटा का लोगाँ वींकी आवभगत ने किदी, काँके वो यरूसलेम में जईरो हो। 54ओ देकन वाँका चेला याकूब अन यहुन्ने क्यो, “ओ परबुजी, थाँ छावो तो, माँने हुकम दो, माँ आको नास आकासऊँ वादी वरान कर दा?” 55पण, ईसू वाँका आड़ी फरन वाँने तापड़्या।#9:55 कुई हाताऊँ लिक्या तका सास्तरा में यो भाग जोड़्यो ग्यो हे, “अन ईसू क्यो, ‘कई थाँ ने जाणो हो के, थाँ कणी तरियाँ की आत्मा का हो? मूँ मनक को पूत मनकाँ की आत्मा को नास करबा ने, ने पण वाँने बंचाबा का वाते आयो हूँ।’” 56तद्याँ ईसू आपणाँ चेला का हाते दूजाँ गाम पराग्या।
ईसू जी ने मानो
(मत्ती 9:19–22)
57जद्याँ वी गेले-गेले जारिया हा। तो कणी वाँकाऊँ क्यो, “थाँ जटे-जटे जावो, मूँ थाँका पाच्छे आऊँ।”
58ईसू वणीऊँ क्यो, “हिवाळ्या का नके तो खोकल वेवे हे अन आकास का जीव-जनावराँ का वाते तो गवाळा वेवे हे। पण, मूँ मनक का पूत का नके मातो ढाकबा जतरीक भी जगाँ ने हे।”
59ईसू दूजाऊँ क्यो, “मारे पाच्छे चाल।”
पण वणी क्यो, “हो परबू, मने पेल्या जाबा दो के, मूँ आपणाँ बाप ने गाड़ दूँ।”
60ईसू वणीऊँ क्यो, “मरिया तका ने आपणाँ मरिया तका ने गाड़बा दो। पण, थूँ जा अन परमेसर का राज का बारा में परच्यार कर।”
61एक दूजे ओरी क्यो, “ओ परबू, मूँ थाँका पाच्छे चालूँ। पण, पेल्या मने जाबा दो के, मूँ आपणाँ घर का लोग-बागाऊँ हिक ल्यऊँ।”
62ईसू वणीऊँ क्यो, “ज्यो आपणो हात हळ पे राकन पाच्छे देकतो रेवे हे वो परमेसर का राज में कई काम को ने हे।”
Currently Selected:
लूका 9: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
