मत्ती 25
25
दस कूँवारी छोरियाँ की केणी
1 #
लूका 12:35
वीं टेम ईसू क्यो, हरग को राज वीं दस कूँवारी छोरियाँ का जस्यान वेई जी आपणाँ दिवा लेन बींदऊँ मलबा गी। 2वणा छोरियाँ में पाँच अण-हमज अन पाँच हमजदार ही। 3अण-हमज आपणाँ दिवा तो लिदा, पण आपणाँ हाते हेलो तेल ने लिदो। 4पण हमजदारा आपणाँ दिवा का हाते तेल भी हेलो लिदो। 5जद्याँ बींद का आबा में थोड़ीक देर वेगी, तो वीं हारई ऊँगवा लागी अन हूँई गी।
6“आदी रात में हो हाको व्यो, ‘देको, बींद, आरियो हे! वणीऊँ मलबा का वाते चालो।’ 7तद्याँ वीं हारई कुवारिया उटन आपणाँ दिवा ने त्यार करबा लागी। 8अन अण-हमजदार हमजदाराऊँ क्यो, ‘थाँ माने थोड़ोक तेल दिदो ने, काँके माकाँ दिवा बजवा में हे।’”
9“पण हमजदारा क्यो, ‘ने, काँके ओ माकाँ अन थाँका वाते पूरो ने वेई तो, ईं वाते हव ओ हे के, थाँ बेचबावाळा का नके जान आपणाँ वाते तेल मोल लिलो।’”
10“जद्याँ वीं लेबा ने जारी ही, तो बींद आ पूग्यो अन ज्यो त्यार ही, वीं तो वाँका हाते ब्याव में परीगी अन पछे कणी कमाड़ बन्द कर दिदा।”
11 #
लूका 13:25
“ईंका केड़े वीं दूजी कुवारिया छोरियाँ भी आन केबा लागी, ‘हो मालिक, हो मालिक, माकाँ वाते कमाड़ खोल दो।’ 12वणी क्यो, ‘मूँ थाँकाऊँ हाचेई केवूँ हूँ, मूँ थाँने ने ओलकूँ हूँ।’”
13तो पछे ईसू क्यो, “ईं वाते हेंचेत रेवो, काँके थाँ ने तो वीं दन ने जाणो हो, ने वीं टेम ने, जद्याँ मनक को पूत आई।”
तीस दासा की केणी
(लूका 19:11–27)
14 #
लूका 19:11–27
“हरग को राज वणा मनक का जस्यान वेई, जणी यातरा पे जाती दाण आपणाँ दासा ने बलान आपणी धन-दोलत वाँने हूँप दिदी। 15वणी एक ने होना का सिक्का भरी तकी पाँच नोळ्या अन दूजाँ ने दो, अन तीजा ने एक दिदी, वणी हर जणा ने वाँकी हेसियत का जस्यान दिदो, अन तद्याँ यातरा पे परोग्यो। 16तद्याँ, जिंने पाँच नोळ्या मली हा, वणी तरत जान वोपार में किदो अन पाँच नोळ्या ओरी कमई। 17ईं तरिया जिंने दो नोळ्या मली ही, वणी दो ओरी कमई। 18पण जिंने एक नोळी मली ही, वणी जान खाड़ो खोदयो, अन आपणाँ मालिक को धन हपा दिदो।
19“नरई दनाँ केड़े वणा दासा को मालिक आन वाँकाऊँ हस्याब पूँछबा लागो। 20जिंने पाँच नोळ्या मली ही, वणी पाँच नोळ्या ओरी लान क्यो, ‘हो मालिक, थाँ मने पाँच नोळ्या दिदी ही, देको, में पाँच नोळ्या ओरी कमई हे।’
21“वींके मालिक वणीऊँ क्यो, ‘धन हे हव अन विस्वास जोगा दास, थूँ थोड़ा में विस्वास जोगो रियो। मूँ थने नरई चिजाँ को हकदार बणाऊँ। आपणाँ मालिक का घर में जान खुसी मना।’ 22अन जिंने दो नोळ्या मली ही, वणी भी आन क्यो, ‘हो मालिक, थाँ मने दो थेल्या दिदी ही, देको, में दो ओरी कमई हे।’ 23वींके मालिक वणीऊँ क्यो, ‘धन हे हव अन विस्वास जोगा दास, थूँ थोड़ा में विस्वास जोगो रियो। मूँ थने नरई चिजाँ को हकदार बणाऊँ। आपणाँ मालिक का घर में जान खुसी मना।’
24“तद्याँ जिंने एक थेली मली ही, वणी आन क्यो, ‘हो मालिक, मूँ थाँने ओळकूँ हूँ के, थाँ कल्ड़ो मनक हो। थूँ जटे ने वावे वटूऊँ काटे हे, अन जटे ने छाँटे हे वटूऊँ भेळो करे हे। 25ईं वाते मूँ दरपग्यो अन जान थाँको धन खाड़ा में हपा दिदो, देको, ज्यो थाँको हे, वो ओ हे।’ 26वींके मालिक वींने क्यो, ‘हे कपटी अन बना काम का दास,’ जद्याँ थूँ ओ जाणतो हो के, जटे में ने वायो वटूऊँ काटू हूँ, अन जटे में ने छाँटयो वटूऊँ भेळो करूँ हूँ। 27तो थूँ मारो धन साहुकारा ने दे देतो। अन जद्याँ मूँ आतो तो आपणो मूँळ ब्याज का हाते ले लेतो।
28“‘ईं वाते या होना का सिक्का की नोळी अणीऊँ लेलो, अन जिंका नके दस हे, वींने दिदो। 29#मत्ती 13:12; मर 4:25; लूका 8:18काँके जिंका नके हे, वींने ओरी दिदो जाई अन वींका नके नरोई वे जाई, पण ज्याँका नके ने हे, वाँकाऊँ ज्यो कई भी वाँका नके हे, ले लिदो जाई। 30#मत्ती 8:12; 22:13; लूका 13:28ईं वाते ईं बना काम का दास ने बारणे अंदारा में नाक दो, जटे हाका-भार अन रोवणो वेवे।’
जग को न्याव
31 #
मत्ती 16:27;
मत्ती 19:28
“जद्याँ मनक को पूत आपणी मेमा में आई अन हाराई हरग-दुत वींका हाते आई, तो वो आपणी मेमा की राजगाद्दी पे बिराजी। 32अन दनियाँ का हाराई मनक वाँका हामे भेळा वेई अन जस्यान गवाळ गारा ने बकरियाँऊँ अलग कर देवे हे, वस्यानीस वीं वाँने एक-दूजाऊँ अलग करी। 33अन वो आपणाँ गारा ने आपणी जीमणी पाल्ड़े अन बकरियाँ ने डावी पाल्ड़े ऊबा केरी।
34“तद्याँ राजो आपणी जीमणी पाल्ड़े वाळाऊँ केई, ‘हो मारा बापू का धन्न मनकाँ, आवो, वीं राज का हकदार वे जावो, ज्यो जग का बणावाऊँ पेल्या थाँका वाते त्यार किदो ग्यो हे। 35काँके मूँ भुको हो, अन थाँ मने खाबा को दिदो, मूँ तरियो हो अन थाँ मने पाणी पायो। मूँ बारवासी हो, अन थाँ मने घर में राक्यो। 36मूँ नांगो हो, अन थाँ मने गाबा पेराया। मूँ मांदो हो अन थाँ मारी हार-हमाळ किदी, मूँ जेळ में हो अन थाँ माराऊँ मलबा आया।’
37“तद्याँ धरमी वाँने केई, ‘हो परबू, माँकाणी थाँने कदी भूका देक्या अन खावा को दिदो अन कदी तरियो देक्यो अन पाणी पायो? 38माँ कदी थाँने बारवासी देक्या अन आपणाँ घर में राक्या। अन कदी नांगा देक्या अन गाबा पेराया? 39माँ कदी थाँने माँदा कन जेळ में बन्द देक्यो अन थाँकाऊँ मलबा आया?’
40“तद्याँ राजा वाँने केई, ‘मूँ थाँकाऊँ हाँची केवूँ हूँ के, थाँ ज्यो मारा ईं फोराऊँ फोरा भायाँ मेंऊँ किंका एक का लारे भी किदो, तो वो माराईस हाते किदो हे।’
41“तद्याँ वो डावा पाल्ड़े वाळाऊँ केई, ‘हो हरापवाळा मनकाँ, मारा हामेंऊँ वीं कदी ने बजबा वाळी वादी में पड़ जावो, ज्या सेतान अन वींका दुताँ का वाते त्यार किदी गी हे। 42काँके मूँ भुको हो, अन थाँ मने खाबा को ने दिदो, मूँ तरियो हो, अन थाँ मने पाणी ने पायो। 43मूँ बारवासी हो, अन थाँ मने आपणाँ घर में ने राक्यो, मूँ नांगो हो, अन थाँ मने गाबा ने पेराया। मूँ मांदो अन जेळ में हो, अन थाँ माराऊँ मलबा का वाते ने आया।’
44“तद्याँ वीं केई, ‘हो परबू, माँ थाँने कदी भूका, तरियो, परदेसी, नांगो, माँदा अन जेळ में देक्यो अन थाँकी सेवा-चाकरी ने करी?’
45“तद्याँ वो वाँने केई, ‘मूँ थाँकाऊँ हाचेई केवूँ हूँ के, थाँ ज्यो अणा फोराऊँ फोरामूँ कणी एक का हाते ने किदो हे तो वो मारा हाते भी ने किदो।’ 46अन ईं बुरा मनक अनंत दण्ड की सजा भुगती, पण धरमी अनंत जीवन पाई।”
Currently Selected:
मत्ती 25: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
