Salsila siga Rasul 4

Si Pitel ka si Yahiya sinumariya meꞌ siga pa-mmean agama Yahudi

1Pag-anu, sasang si Pitel ka si Yahiya masaplagan jama ndooy, takka na baw siga imam ka kapitan siga tukang jaga langga mehe. Maka luu na du siga guru langkaw man disu palhimpunan inawnan Saddusi. 2Tud bay dugahan sila sabap njawom tōꞌ ga si Pitel luu du tabeꞌ pasal si Isa lay na pinakallum. Boꞌ ilooy na silay sipat ga jama matoy pinakallum du pabalik. Boꞌ siga Saddusi yaꞌ pitsayaꞌ jama matoy pinakallum. 3Dari lay sungkuban da si Pitel ka si Yahiya. Sugaꞌ pagka song pa sangom na lahat, lay na doꞌ sila njīl dambahangi. Noy llaw na boꞌ da sinumariya. 4Sugaꞌ minsan sila lay tajīl, meka na jama ma bay kale umanat da ni poan pitsayaꞌ na ni si Isa. Dari eka kalallahan ma pitsayaꞌ na ni si Isa lay na ngabut ga lima libu, sarī gi karandahan ka ga anak-anak.

5Pag sayu, luu na kumpo siga pa-mmean Yahudi ka ga matatoa ni agama sampay ga guru saraꞌ agama ndooy ni Jerusalem. 6Sampay si Annas, yana bay panghuluꞌ imam, luu na du ndooy ka ga kakampungan na yana si Kayapas, si Yahiya ka si Aleksandel. Maka luu du kampung na sarī ndooy. 7Dari lay na sohoꞌ da si Pitel ka si Yahiya binoo pa awpan da sinumariya. Luu jaꞌ siꞌ, tilaw da, “Man kawasa soy doꞌ ina atawa man kapatut awon soy bay man bi ngulian lalla tuu ma yaꞌ bay kapalān?”

8Na si Pitel siꞌ tu, ssob na meꞌ Rū Sutsiꞌ. Dari yuk na ninsila, “Kaam, siga pa-mmean bangsa tabi ka ga matatoa ni agama, 9bong kam ngusiat kami pasal timbang kami ngulian lalla tuu ma yaꞌ bay kapalān, meꞌ tuu: 10Subay sina tahati bi sampay mimon pagkahi tabi bangsa Israil, lalla tuu ma kapatangge na ni awpan bi batnaa, poonan na bay kaulian, man kawasa-kapatut awon si Isa Almasi, lalla looy man Nasaret. Iya na silay Isa looy ma bay llansang meꞌ bi taꞌ tehang. Sugaꞌ pag patoy na, lay na du ya pinakallum meꞌ Tuhan. 11Boꞌ iya na silay bay ndalil pa batu looy njawom kitab, ilooy ma yuk na,

‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.’#(4.11) Kitab Jabul 118.22.

12Na iya ilay, isu-isu iya kasalamat ningkitabi. Batan yaꞌ luu taꞌ babaw junyaꞌ sarī man iya bay papitu Tuhan nalamat manusiyaꞌ.”

13Pag ndaꞌ baanan siga pa-mmean agama ndooy nawakka ga si Pitel ka si Yahiya mitsala, tud bay jayip sila. Batan katoonan da yaꞌ san sila iskulan maka jama biyasa sadjaꞌ sila. Sugaꞌ hangat sila ngaliling, takila da na sila sikaduwa ndang bay lungbid ka si Isa. 14Ga pa-mmean looy siꞌ tu, yaꞌ na luu dapat da nahawi sabap takita da na lalla looy ma yaꞌ bay kapalān kaulian na, sampay luu na ya nangge ni bihing si Pitel ka si Yahiya.

15Dari siꞌ, lay na doꞌ sinohoꞌ ga si Pitel pōꞌ man jawom lumaꞌ saraꞌ samantalaꞌ. Kuwan siga pa-mmean looy, lay na doꞌ isun, 16yuk da, “Pooy tu la meꞌ tabi buwat siga lalla looy? Tumatandaꞌ na bilay ni jama sikamimon ntuu ni Jerusalem lay sila bay kapōꞌ sipat kawasa Tuhan. Tud yaꞌ na luu dapat tabi makilubaꞌ. 17Sugaꞌ mari yaꞌ na song patanyag umanat da, bandaan tabi na sila yaꞌ nohoꞌ nabbut awon si Isa pabalik ni soysoy jaꞌ.”

18Pag lupus da isun, lay na llinganan si Pitel ka si Yahiya, boꞌ da binandaan yaꞌ na dari mitsala atawa nōꞌ pasal si Isa pabalik.

19Sugaꞌ iya tampung si Pitel ka si Yahiya, “Pamikihan bi teꞌ ba bong mamooy numan ni kahandak Tuhan: Subay kaam binean atawa iya? 20Boꞌ kami baw tu, tunmanūn meꞌ kami patagong maan jama ilooy ma bay takita kami pinabuwat meꞌ si Isa ka bay takale kami man na.”

21Kuwan siga pa-mmean looy baw siꞌ tu, amu-amu lagi nanggupan si Pitel ka si Yahiya. Sugaꞌ song hallom, lay du sila llabbahan. San sila doman midjalaꞌ ga si Pitel, hanggaw du sila, taggahaꞌ hiluhalaꞌ na baw baanan ga jama ndooy. Batan mimon jama ndooy muwan na pudji pa Tuhan sabapan pabuwatan kahaylan-haylan looy siꞌ bay tasakup da. 22Bistahun doꞌ, labi na mpatpūꞌ taun halloman lalla looy yaꞌ bay kapalān, taggahaꞌ lay gi ya kaulian.

Siga sukuꞌ si Isa maku duwaa pa Tuhan

23Na lay jaꞌ siꞌ kapōꞌ ga si Pitel ka si Yahiya, lay na sila pabeleng pa mman siga pagkahi da sukuꞌ si Isa. Takka ndooy, lay na sila nuntut bong oy bay halling siga imam langkaw ka ga matatoa ni agama. 24Lay jaꞌ siꞌ sila katuntutan, ilooy ma lay sila kumpo maku duwaa pa Tuhan, yuk da, “Papuꞌ, Sangat Kawasa, ma bay mapayak gumi ka langit sampay na dilawut ka mimon-mimon njawom da, 25tud mawjud du hati tunaꞌ Nabi Daud pasal Almasi tinuwak pag pōꞌ na. Tabista kami na, man kapandoyan Rū Sutsiꞌ njataꞌ Nabi Daud, yuk na njawom kitab,

‘Tuhan, oy takoleꞌ-koleꞌ siga kabangsa-bangsahan gigitan ningkau yaꞌ luu poon sabap na? Ongoy taggahaꞌ manusiyaꞌ isun buwat kajinisan ma yaꞌ luu kamumpaatan na?

26Siga sultan ka ga pa-mmean ntuu ni junyaꞌ magtaayun nulang kau ka Almasi nu.’#(4.26) Kitab Jabul 2.1-2.

27“Dari batnaa Tuhan, tumatandaꞌ na ningkami, lay na du bana binakbul tunaꞌ looy siꞌ. Batan pag lahil tukang nalamat ma bay peneꞌ nu pa junyaꞌ, yana si Isa, sosohoan nu ma sutsiꞌ, lay du ya bana sinulang meꞌ Sultan Herod ka Gubnul Puntus Pilatu. Maka meka gi Yahudi sampay siga saꞌ Yahudi ni daira tuu lay du magtaayun nulang iya. 28Sugaꞌ sabap kau Tuhan Sangat Kawasa, ilooy du bay tapabuwat da siga pakaradjaan ma bay ginantaꞌ meꞌ nu man awwal jaman lagi.

29“Batnaa Tuhan, takita nu na du bong pooy basag sanggup da njataꞌ kami, siga sosohoan nu. Kamura-murahan buwanan nu na pin kami tawakka masaplag umanat nu. 30Maka nnaun na njataꞌ kami kawasa nu supaya taulian kami jama saki sampay man kami mōꞌ siga sipat kawasa nu ni awon ilooy ma sutsiꞌ, yana sosohoan nu si Isa.”

31Na paddus da siꞌ maku duwaa, sarunduun du jogjog lumaꞌ man da kumpo sampay ssob na ga sila sikamimon meꞌ Rū Sutsiꞌ. Dari hallot na tawakka da masaplag umanat Tuhan.

Arat-tabiat siga sukuꞌ si Isa

32Na mimon ilay siꞌ ma pitsayaꞌ ni si Isa ndooy ni Jerusalem dambuwaꞌ atay ka dambuwaꞌ maksud. Yaꞌ luu ninsila mista altaꞌ da para ni dī da sadjaꞌ. Saliꞌ-saliꞌ sila mahampitan soysoy sila kabus.

33Kuwan siga rasul sikasapu-duwa, sabap luu na pin kawasa Tuhan njataꞌ da, tud hantap meꞌ da masaplag pasal Papuꞌ Isa bay pinakallum. Maka mehe du aseꞌ-tabang Tuhan njataꞌ siga sukuꞌ si Isa labbasakayi. 34Yaꞌ luu ninsila sigpit batan kasohean ma luu ga tanaꞌ da atawa ga lumaꞌ da lay na ga maballi. Pag luu ballihan altaꞌ da, lay na pa-ntan da 35pa mman siga rasul man da nohoꞌ mahampitan siga sukuꞌ si Isa ma sigpit.

36-37Na disu jama ma bay maballihan tanaꞌ na yana si Yusup, lalla man nusa Kiprus, disu panubuꞌ si Libay. Meꞌ siga rasul ngawnan iya si Balnabas, hatiyan na, “tukang magamgam.” Dari luu jaꞌ siꞌ ballihan tanaꞌ na, lay na du pa-ntan na pa mman siga rasul.

Currently Selected:

Salsila siga Rasul 4: sjm

Highlight

Copy