Salsila siga Rasul 7

Daawa si Esteben ni baanan Sanhidrin

1Pag-anu siꞌ, tilaw panghuluꞌ imam ni si Esteben, “Bana kilay siꞌ bitsala da pasal kau?”

2Pag tampung si Esteben, “Siga mbuwaꞌ danganakan ka ga induꞌ-mmaꞌ ku, daa busung, pakale doꞌ kam niyaku. Paintoman ta doꞌ kam salsila kabboꞌ-bboan tabi. Maruhuꞌ-ruhuꞌ bboꞌ tabi Nabi Ibrahim bay tinammuhan meꞌ Tuhan Sangat Kawasa ndooy ni Mesopotamiya. Jaman looy ilay siꞌ, yaꞌ gi bay maglayin Boꞌ Ibrahim pa Haran. 3Yuk Tuhan niiya, ‘Mbanan nu na lahat nu sampay kakampungan nu. Maglayin na ko pa lahat ma song pakitahan ku kau.’

4“Dari lay na mbanan ga Boꞌ Ibrahim lahat bangsa Kaldiya sampay lay na sila maglayin pa Haran. Na lay jaꞌ siꞌ matoy mmaꞌ Boꞌ Ibrahim ndooy, lay na Boꞌ Ibrahim pinapawus meꞌ Tuhan pitu pa lahat man tabi maglahat batnaa. 5Jaman looy ilay, yaꞌ gi bay buwanan Tuhan Boꞌ Ibrahim san dahakka tanaꞌ ni lahat tuu. Sugaꞌ ndang lay baw ya njanjian meꞌ Tuhan sampay na ga panubuꞌ na binuwanan mimon paglahat tuu san yaꞌ gi luu anak na.

6“Na kitabi itu, katoonan tabi na du, ndang lay gi Tuhan maan Boꞌ Ibrahim, kuwan siga panubuꞌ na, magsampihan doꞌ pahallom ni lahat bangsa sarī. Maka pinahata lagi sila ndooy sampay bininsanaꞌ njawom mpat hatus taun. 7Sugaꞌ bay du halling Tuhan, mulkaan na du bangsa ma bay mahata sila. Maka pus meꞌ looy, kapōꞌ du siga panubuꞌ Boꞌ Ibrahim man lahat looy, boꞌ da pabeleng na pitu. Maka bay gi halling Tuhan ituu na lahat man da numba iya pangkat mamangkat.”

8Maka yuk si Esteben lagi, “Lay gi Tuhan bay mōꞌ pagsulutan antaraꞌ iya ka bboꞌ tabi Nabi Ibrahim. Sukuꞌ Boꞌ Ibrahim ni pagsulutan da, subay ya inislam sampay na mimon kalallahan njawman na. Sangkon pag taabut wawuꞌ ngallaw halloman anak na si Isahak bay pinamaddihan, lay du bay inislam meꞌ Boꞌ Ibrahim. Damikiyan si Isahak pun, bay du ngislam anak na si Yaꞌkub. Pag-anu, si Yaꞌkub pun, lay du ngislam ga anak na sikasapu-duwa, yana poonan tabi bangsa Yahudi.

9“Pag-anu,” yuk si Esteben, “katoonan tabi du, pag ehe ga anak Boꞌ Yaꞌkub sikasapu-duwa, kuwan ariꞌ da si Yusup, bay kinadangkian meꞌ da. Sampay lay gi ya pinaballihan meꞌ da ni baanan ga padadagang, boꞌ na lay binoo pa Ejip. Takka ndooy, lay ya dari ata. Lipara, luu na pin Tuhan ngunungan iya. 10Dari song hallom, lay du ya bay pinaddusan meꞌ Tuhan man mimon katiksaan na. Maka lay gi ya binuwanan meꞌ Tuhan kapandoyan ka pangahati lawom. Sampay ilooy na man na bay kinahopan meꞌ sultan bangsa Ejip. Dari lay na ga ya binuwanan kapatut meꞌ sultan looy nohoꞌ marinta ni sikaliput Ejip sampay magmalim ni mimon jama ma buwat ni astanaꞌ sultan.

11“Na song hallom, luu na baw gotom mehe bay tuwaꞌ ni sikaliput Ejip sampay ni Kanan. Boꞌ meka na jama malasahi. Sampay siga kabboꞌ-bboan tabi, yana ga Boꞌ Yaꞌkub ka ga anak na, lay na du bay kabus balanjaꞌ. 12Dari pag taaka jaꞌ meꞌ Boꞌ Yaꞌkub luu balanjaꞌ bay inannaꞌ ni Ejip, lay na sohoꞌ na ga anak na, yana kabboꞌ-bboan tabi, pilay pa Ejip malli balanjaꞌ. Ilooy ilay yana sibuwa da bay pilay pa Ejip.

13“Pag ni kaminduwa da bay pilay pa Ejip, lay na si Yusup magpakila ninsila. Dari ilooy na masa man sultan bay kaaka pasal lūng-kampung si Yusup. 14Pag-anu siꞌ, lay na tinugun meꞌ si Yusup mmaꞌ na, yana Boꞌ Yaꞌkub, ka ga paglūng na sikamimon nohoꞌ na maglayin pilay pa Ejip. Eka da siꞌ, pitumpuꞌ-lima. 15Dari lay na maglayin kabboꞌ-bboan tabi, yana ga Boꞌ Yaꞌkub ka ga anak na pilay pa Ejip maka ndooy na sila bay maglahat sampay matoy. 16Sugaꞌ mayat da bay gi du baw binoo pabeleng pa bay paglahat da ndooy ni Sekem. Pag-anu, boꞌ da kinubu ni tanaꞌ bay binalli meꞌ Boꞌ Ibrahim man ga anak si Hamol maruhuꞌ-ruhuꞌ.

17“Na hallom maka hallom na, song patapit na pin masa man Tuhan numan bay janjiꞌ na ni Boꞌ Ibrahim mabeleng siga panubuꞌ na pa Kanan. Jaman looy ilay siꞌ, ndang lipat man lipat na eka bangsa tabi ndooy ni Ejip.

18“Na halloman yaꞌ gi siꞌ sila bay pabeleng pa Kanan, luu na baw sultan bahau ni Ejip ma yaꞌ san tasayu na salsila Boꞌ Yusup jaman na llum. 19Bbuwatan sultan looy siꞌ, mangan hulas-sangsāꞌ kabboꞌ-bboan tabi. Boꞌ bininsanaꞌ gi sila saꞌ alang-alang. Maka bay gi sila pinaggos meꞌ sultan looy nohoꞌ nimanan anak da ma bahau pinamaddihan pa poan supaya matoy.

20“Na jaman sultan looy siꞌ marinta, magsabtan du ka jaman Nabi Musa bay pinamaddihan. Iya ilay anak-anak kagak-gāk ni mata Tuhan. Dari supaya ya salamat, lay ya inipat meꞌ induꞌ-mmaꞌ na sipuk-sipuk njawom lumaꞌ tallum buwan. 21Sugaꞌ pagka yaꞌ na luu dapat da napuk iya, lay na jaꞌ pōꞌ da palawak-palawak man lumaꞌ. Lipara, lay du ya tatammu meꞌ dayang-dayang, yana anak sultan looy, boꞌ na inaku meꞌ na anak. 22Dari siꞌ sabap meꞌ looy, biddaꞌ na langkaw iskul Boꞌ Musa. Yaꞌ na taambat kapandoyan bay takoleꞌ na man siga mastal ma halul-akka ndooy ni Ejip. Dari labba man bitsala na sampay pabuwatan na, tumatandaꞌ lawom kapandoyan na.

23“Na disu llaw, jaman Boꞌ Musa mag-umu na mpatpūꞌ taun, lay talangga piki na ngandaꞌ-ngandaꞌ ga pagkahi na bangsa Israil. 24Na sasang na lumān, ngita ya disu sila bininsanaꞌ meꞌ disu bangsa Ejip. Dari lay bawsan na ilooy ma bininsanaꞌ sampay lay na ga papatoy na bangsa Ejip looy.

25“Na Boꞌ Musa siꞌ tu, kanna na tahati na meꞌ siga pagkahi na bangsa Israil iya na bay sinohoꞌ meꞌ Tuhan maddusan sila man jawom komkoman bangsa Ejip. Boꞌ ko, niyaꞌ san.

26“Pag meꞌ sumawung, ngita na baw Boꞌ Musa ga pagkahi na bangsa Israil duwa sisuntuk. Pag-anu, lay na baw ya pasōng nalassay, yuk na, ‘Uy, ongoy doꞌ ina kam sisuntuk? Kaam bina sibuꞌ-sibuꞌ bangsa Israil. Saliꞌ du kam ka jama danganakan.’

27“Sugaꞌ ilooy ma bay nganduhuꞌ, gam pin lay gi sūgan na Boꞌ Musa sambayan na halling, ‘Soy doꞌ ina ko? Tatammu nu ga buwat dī nu panghuluꞌ subay ga ko huwis magpandoy-pandoyan kami. 28Ongoy, aku na baw pasunuꞌ nu ni bangsa Ejip looy bay papatoy nu dilaw?’

29“Pag takale jaꞌ meꞌ Boꞌ Musa bay halling na, takkahan tawu na ga ya batan tabista na na tasayu na meꞌ jama iya bay mapatoy lalla looy. Dari siꞌ lay du ya lahi man Ejip sampay lay na ya magsampihan ndooy ni Midiyan. Ndooy siꞌ, lay na ya kapahanda sampay anakan na sila duwa lalla.

30“Pag bay lumingkaꞌ mpatpūꞌ taun, sasang Boꞌ Musa ni lahat lau-lau ndooy ni bihing Punu Saynay, luu na malaikat nammuhan iya. Lay ya manyalupa meꞌ hantangan poon kayu-kayu noleyab na meꞌ api. 31Pag takita jaꞌ meꞌ Boꞌ Musa, tud bay inu-inu ya. Dari lay doꞌ ya pasōng ngandaꞌ, sugaꞌ lān na siꞌ patapit, takale na na suwara Tuhan, 32yuk na, ‘Aku na situ Tuhan kabboꞌ-bboan nu, yana Tuhan ga Nabi Ibrahim, Nabi Isahak ka Nabi Yaꞌkub.’ Dari ni katawu Boꞌ Musa, mipig na ga ya sampay yaꞌ na ga ya nawakka ngandaꞌ.

33“Maka yuk Tuhan, ‘Urusan nu tumpaꞌ nu batan luu ko nangge ni lugar sutsiꞌ.#(7.33) Kon lugar looy inawnan sutsiꞌ batan luu Tuhan ndooy. 34Kon ku itu duwai pitu supaya tapaddusan ku na siga sukuꞌ ku. Takita ku du kabinsanaan njataꞌ da ndooy ni Ejip. Maka takale ku du halling da nangis. Batnaa, sakap na ko. Sohoꞌ ta na ko pabeleng pa Ejip.’

35“Na Boꞌ Musa ilay,” yuk si Esteben lagi, “iya na silay ndang bay pingkaꞌ tinuwak meꞌ siga pagkahi na bangsa Israil, ilooy ma yuk da, ‘Soy doꞌ ina ko? Tatammu nu ga buwat dī nu panghuluꞌ subay ga ko huwis magpandoy-pandoyan kami!’ Maka Boꞌ Musa ilay, iya na du silay bay pinabeleng meꞌ Tuhan pa mman bangsa tabi Israil. Boꞌ bay gi ya dari panghuluꞌ da sampay tukang nalamat sila man tabang malaikat looy ni poon kayu-kayu looy siꞌ.”

36Yuk si Esteben lagi, “Katoonan tabi na du, Boꞌ Musa na du silay bay moo ga kabboꞌ-bboan tabi palakka man Ejip. Yaꞌ gi siꞌ sila bay palakka, lay doꞌ ya mōꞌ jinisan sipat kawasa Tuhan ndooy. Damikiyan, lay du ya mōꞌ siga sipat kahaylan-haylan ndooy ni Dilawut Akket sampay na ni lahat lau-lau yaꞌ maglumaꞌ jaman da ndooy mpatpūꞌ taun. 37Maka Boꞌ Musa na silay bay nunaꞌ ni bangsa tabi Israil, ilooy ma yuk na, ‘Ni sinōng, luu sina disu nabi meꞌ aku du pinatakka meꞌ Tuhan pa mman bi. Iya ilay mintu meꞌ aku du turunan bangsa tabi Israil.’ ”

38Maka yuk si Esteben lagi, “Ni bay jaman kabboꞌ-bboan tabi ndooy ni bihing Punu Saynay ni lahat lau-lau, Boꞌ Musa na silay man malaikat bay masampay palman Tuhan ma kasampulnaꞌ ni nyawa manusiyaꞌ. Pag-anu, iya na baw bay masampay palman looy pa mman siga kabboꞌ-bboan tabi. Pag-anu, boꞌ sila na baw bay masampay pa mman tabi.

39“Sugaꞌ kabboꞌ-bboan tabi baw ilay, yaꞌ du bay kuhi ngasip ni Boꞌ Musa. Gam pin lay gi ya tuwak da bilang anakkuraꞌ da batan kainagon da pabeleng na pin pa Ejip. 40Dari likutan Boꞌ Musa bay hallom taꞌ Punu Saynay, halling ga kabboꞌ-bboan tabi ni Boꞌ Harun,#(7.40) Boꞌ Harun ilay yana siyaka Nabi Musa. ‘Babahan doꞌ tabi siga tuhan supaya luu na baw magmundaan kitabi. Batan si Musa ilay, pus na bay moo kitabi pōꞌ man Ejip, pag batnaa, yaꞌ na tasayu tabi bong oy na bay katuwaꞌ niiya.’ 41Dari siꞌ, lay na sila buwat tuhan-tuhan meꞌ bantuk anak sapiꞌ. Boꞌ lay gi sila numbaliꞌ hayop sampay lay na ga songan da pa tuhan-tuhan looy. Maka lay gi sila ballang mehe ni kagāk da ni tuhan-tuhan ma bay pabuwat da.

42“Na sabapan bay kadarihan da, tinikutan na sila meꞌ Tuhan sampay lay na sila pinabiya magtuhan sampay ni ga potean taꞌ langit. Maka sabap yaꞌ sila kanaalla pa Tuhan, ilooy silay kon luu na palman bay sinuwatan meꞌ kanabi-nabihan njawom kitab, ilooy ma yuk Tuhan,

‘Kaam, bangsa Israil, jaman bi bay ni lahat lau-lau yaꞌ maglumaꞌ njawom mpatpūꞌ taun, bana na lay kam nongan siga kulban, sugaꞌ saꞌ para niyaku.

43Boꞌ na, paninggai-paninggai jaꞌ kam, luu na pin abit bi langga-langga man bi ngisi limbagan tuhan-tuhan bi si Molek. Maka luu na pin abit bi poteꞌ-potean limbagan tuhan-tuhan bi si Repan. Ilooy ilay bay pabuwat bi sikaduwa pin luu jaꞌ sumba bi sarī man aku. Sangkon pagka yaꞌ kam magkanaalla niyaku, sohoꞌ ta na kam sina mintu sinungkuban sampay binoo patā ni disu lahat pa dambilaꞌ man Babilon.’ ”#(7.42-43) Kitab Nabi Amos 5.25-27.

44Maka yuk si Esteben, “Na kaam pun ina, katoonan bi na du, jaman kabboꞌ-bboan tabi ni lahat lau-lau, luu langga da talappot bay pinabuwat ka kuwit hayop. Ndooy njawom na, luu du siga batu pepan looy man bay nuwatan siga panohoan Tuhan. Meꞌ da bay buwat langga looy, lay jaꞌ sila ngakig hātan ma bay pakitahan Tuhan ni Boꞌ Musa.

45“Na hallom maka hallom na, siga anak kabboꞌ-bboan tabi na baw pasīng ngantanan langga looy. Dari sila na bay moo langga looy siꞌ pa lahat tuu jaman Boꞌ Jasuwa mag-anakkuraꞌ ninsila. Maka ilooy na silay jaman Tuhan bay nabangan sila malahi kabangsa-bangsahan ma ndang bay maglahat ntuu. Dari kuwan langga looy, masi na pin luu ntuu ngabut sampay bay jaman Sultan Daud marinta.

46“Na Sultan Daud ilay, yana lalla man Tuhan kasulutan. Luu disu masa, lay ya muhun pa Tuhan matangge langga kakka. Angan-angan na mari luu na gantiꞌ langga kuwit hayop looy man siga bangsa na numba, yana siga panubuꞌ Boꞌ Yaꞌkub. 47Sugaꞌ ilooy ya bay tabawus matangge langga looy, yana anak na Sultan Sulayman. 48Mingkan ilay, bong inawnan Tuhan Mahatinggi, mastiꞌ yaꞌ du patannaꞌ ni siga langga pinatangge meꞌ manusiyaꞌ. Batan saꞌ ba, luu palman bay sinuwatan meꞌ disu nabi, ilooy ma yuk Tuhan,

49-50‘Sulgaꞌ ina yana paningkoan ku man ku marinta. Kuwan junyaꞌ, yana panukoran battis ku. Mimon-mimon aku bay mapayak. Sangkon oy-oy lumaꞌ tapabuwat bi, yaꞌ saddong niyaku man ku pahali.’ ”#(7.49-50) Kitab Nabi Isaya 66.1-2.

51Pus meꞌ looy, nagnaꞌ na baw si Esteben nusunan baanan kapakihan ndooy, yuk na, “Kaam ina, tud tohas kōk bi. Subay ga kam kapil yaꞌ doman mmeꞌ ni kahandak Tuhan maka yaꞌ doman pakale ni umanat na. Sibuꞌ du kam ka jaman kabboꞌ-bboan tabi wā nulang Rū Sutsiꞌ. 52Ni bay jaman da, yaꞌ luu kanabi-nabihan saꞌ bay llaugan meꞌ da. Boꞌ na, sagannap nabi ma bay nunaꞌ pasal katakka Ilooy ma Intong, yana Almasi, lay gi ga papatoy da. Na kaam pun ina, yaꞌ du luu pagtingkahan bi ka sila. Batan pag luu jaꞌ Almasi bay lahil pitu pa junyaꞌ, kaam na baw bay nipu sampay mapatoy iya. 53Padahal ilay siꞌ, kaam gi bay buwanan Tuhan saraꞌ na ma bay pinalahil meꞌ siga malaikat ni kabboꞌ-bboan tabi. Sugaꞌ yaꞌ san binean meꞌ bi.”

Si Esteben bay hiniyak maka batu

54Pag lay jaꞌ takale meꞌ baanan kapakihan ndooy bitsala si Esteben, ilooy ma tud sinalaputan na tabbuk da.

55Kuwan si Esteben baw siꞌ tu, ssob na meꞌ Rū Sutsiꞌ. Dari pag hangad na pa taꞌ langit, takita na na sahayaꞌ Tuhan maka si Isa nangge ni bihing Tuhan huwin pa kawnan. 56Dari yuk si Esteben, “Ndaun bi doꞌ ba! Takita ku na lawang sulgaꞌ bukaꞌ! Alay na Anak Manusiyaꞌ nangge ni bihing Tuhan huwin pa kawnan!”

57Yaꞌ gi siꞌ ya lupus mitsala, bbuwatan baanan kapakihan ndooy nompong tinga da sambayan da howap man da ngalimbo bitsala na. Pag-anu, biniglaꞌ na ya sinungkuban meꞌ da, 58boꞌ na ginuyud-guyud pa poan daira mari ya tapaglupung-lupungan da hiniyak ka batu. Kuwan ga lalla looy siꞌ ma bay mitnahan si Esteben, lay na ngurusan badjuꞌ da mari sila tumanam ngahiyak. Badjuꞌ da siꞌ, lay nnaꞌ da ni bihing disu lalla ndooy inawnan si Sol. 59Sasang da ngahiyak si Esteben, ilooy ma lay ya ngingan, yuk na, “Ū Papuꞌ Isa, sambutun na nyawa ku.” 60Hangat ya sigi-sigi hiniyak, tuut na sa man na nangge sampay lay na baw ya ngingan pabalik, yuk na, “Papuꞌ, ampunun sa sila ni bay dusa da niyaku.” Pus na bay halling meꞌ looy, ilooy ma lay na ya makkat.

Currently Selected:

Salsila siga Rasul 7: sjm

Highlight

Copy