Panagnaan 20

Si Ibrahim ka Sultan Abimalik

1Na ga si Ibrahim siꞌ tu, lay na baw lakka man tanaꞌ si Mamre maglayin pilay pa Negeb ndooy ni sallangan Kades ka Siyul. Yaꞌ gi siꞌ sila bay hallom ndooy, lay na baw halin pa Geral. 2Na sibuwa da takka pa Geral, baꞌ-bāꞌ si Ibrahim si Sara yana danganakan na. Dari pag taaka Sultan Abimalik meꞌ looy, ilooy ma lay nohoꞌ binoo si Sara pa mman na. Maksud na pinabuwat nda. 3Na yaꞌ lagi siꞌ bay tabawus bay maksud sultan looy, pag disu sangom, lay ya pinaupihan meꞌ Tuhan. Njawom pandapat na yuk Tuhan, “Kau ina batnaa, tapit na katobtoban umu nu batan danda looy ma bay kaddoꞌ nu llahan na.”

4Na Sultan Abimalik siꞌ tu yaꞌ gi bay pingkaꞌ napitan si Sara. Dari yuk na, “Uy la Papuꞌ, masi gi kilay ku papatoy nu ka ga raayat ku san ya yaꞌ gi bay batōy-batōy ku? 5Ilooy baw bilay man ku yaꞌ bay hawal-hawalan ngaddoꞌ iya sabap si Ibrahim na mismu bay māꞌ ariꞌ na ya. Maka danda looy pun, meꞌ looy du bay bāꞌ na. Sangkon aku bay ngaddoꞌ iya ni kaawam ku jaꞌ. Yaꞌ bay tasayu ku ga llahan na ya. Sarī gi, yaꞌ du luu bay pabuwat ku oy maka oy na maat.”

6Tampung Tuhan, “Ohoꞌ, ndang katoonan ku du awam ko. Sangkon itu na ku mandaan kau supaya yaꞌ na tausik-usik nu danda looy, boꞌ nu yaꞌ dapat dusa. 7Batnaa, papoleun na danda looy pa mman lla na. Lla na ilay nabi. Pakuhan na sa ko duwaa supaya ko yaꞌ matoy. Sugaꞌ bong ina yaꞌ papoleꞌ nu danda looy, mastiꞌ papatoy ta jaꞌ sina ko sampay na mimon raayat nu.”

8Pag llaw, sayu alab lagi, lay na tinawag meꞌ Sultan Abimalik mimon kunsihal na, boꞌ da tinuntutan bay upihan na. Dari siꞌ tud bay tawu sila. 9Pag-anu siꞌ, lay na baw tawag na si Ibrahim. Luu jaꞌ siꞌ, tilaw na, “Ongoy kami bay buwat nu meꞌ looy? Oy bay dusa ku ningkau? Ilu na ga ko buwat sangdanan man ku dak na tuwaꞌ mulkaꞌ ka ga raayat ku? Yaꞌ bilay luu katuwaꞌ-tuwaan na meꞌ looy na meꞌ nu bay buwat kami. 10Ongoy doꞌ ilay bay tapiki nu buwat meꞌ looy?”

11Pag tampung si Ibrahim, “Kanna ku ba la ga yaꞌ luu jama ni lahat tuu tawu pa Tuhan. Taggahaꞌ lay na baw ku pinapatoy supaya takoleꞌ da nda ku. 12Sarī gi, san ya nda ku, bana du baw danganakan ku ya, batan anak mmaꞌ ku du ya, sugaꞌ yaꞌ kami dambuwaꞌ nneꞌ. 13Sangkon na ilay, pag bay taabut masa man ku sinohoꞌ meꞌ Tuhan ngambanan lahat induꞌ-mmaꞌ ku, yuk ku ni nda ku, ‘Bong ko bana-bana maaseꞌ niyaku, nnoy-nnoy jaꞌ lahat mman ta, yuk nu aku kakaꞌ nu mari ku yaꞌ binatōy-batōy.’ ”

14Dari siꞌ, lay na pinapoleꞌ si Sara pa mman si Ibrahim meꞌ Sultan Abimalik. Boꞌ lay gi binuwanan si Ibrahim baanan bili-bili, ga sapiꞌ sampay ga ata, danda-lalla. 15Pag lupus, yuk Sultan Abimalik man si Ibrahim, “Mamooy-mamooy katanaman nu man nu maglahat ni lahat tuu, meneꞌ jaꞌ ko, batan labbasakayi tanaꞌ lahat tuu, aku du dapu.” 16Maka yuk na ni si Sara, “Buwanan ku na kakaꞌ nu dalibu dublun pilak porol ni pag-awpan soheꞌ bi sikamimon. Maksud ku nambunan oy-oy bay kasaan ku ningkau sampay man ku makitahan jama yaꞌ luu kasaan nu samasakali.”

17-18Na sabap bay kadarihan Sultan Abimalik bay ngaddoꞌ si Sara, ndang lay na ga ya ka nda na tuwaꞌ saki meꞌ Tuhan yaꞌ hanak. Sampay mimon ata na ma danda ni astanaꞌ na lay na du kalaminan meꞌ saki looy. Kahapan lay na baw sila pakuhan si Ibrahim duwaa sampay lay na du sila kaulian.

Currently Selected:

Panagnaan 20: sjm

Highlight

Copy