Panagnaan 23

Kapatoy Sitti Sara

1Na pag taabut dahatus duwampuꞌ-pitun taun umu si Sara, 2lay na ya matoy. Iya siꞌ bay makkat, ndooy ni Kiriyat-Alba yana daira ma pinag-awnan batnaa Hebron ndooy ni Kanan. Si Ibrahim baw siꞌ tu, nangis na jaꞌ maglinduhan iya.

3Pag-anu siꞌ, lay doꞌ mbanan na mayat nda na samantalaꞌ batan lay doꞌ ya pilay pa mman baanan siga pa-mmean bangsa Hīt ndooy. 4Takka jaꞌ siꞌ ya, yuk na ninsila, “Meꞌ aku jama sampi ni lahat bi, maku doꞌ ku paltimbangan. Bong siꞌ kadarihan ningkaam, ballihan bi doꞌ ku tanaꞌ bi man ku jaꞌ ngubu nda ku.”

5Pag tampung da, 6“Meꞌ tee ba Tuwan, kau ina ni bandingan kami jama pataꞌ pinagmaltabatan. Meneꞌ na jaꞌ ko mamooy-mamooy katanaman nu man nu ngubu nda nu. Yaꞌ luu ntuu saꞌ kabuwan ningkau bong ya du sat tanaꞌ man ngubu.”

7Pag-anu, ilooy ma lay doꞌ pakokoꞌ si Ibrahim magpadiyoꞌ ni awpan ga bangsa Hīt looy 8sambayan na halling, “Pagka kam kuhi aku ngubu nda ku ntuu, junjung ku na ningkaam, bitsalahan bi doꞌ niyaku si Epron, anak si Zohal. 9Balangkali bballihan na niyaku lowang pampang looy ni tong-tōng tanaꞌ na ndooy ni Makpela pin luu jaꞌ man ku ngubu nda ku. Baan bi ya dangoy-dangoy meꞌ na ngahagaꞌ, basta bayaran ku du pin luu jaꞌ man ku buwat pangubuhan ntuu ni lahat bi.”

10Na si Epron siꞌ tu, ndang luu na du ndooy ningkōꞌ ni baanan ga pa-mmean bangsa Hīt looy ni bihing behe lawang kutaꞌ daira looy. Dari iya na mismu bay nampung sampay lay na takale meꞌ mimon ndooy, yuk na ni si Ibrahim, 11“Bong niyaku, meꞌ tee ba Tuwan. Dean ku na jaꞌ lowang pampang looy sampay tanaꞌ na labbasakayi ma tabeꞌ pilay. Itu na du sila sikamimon ntuu kasaksiꞌ ni hāl tanaꞌ looy, dean ku na kau. Sigi na, kubuhun na pilay nda nu.”

12Sugaꞌ kuwan si Ibrahim baw siꞌ tu, lay doꞌ pakokoꞌ pabalik magpadiyoꞌ ni awpan ga jama ndooy. 13Maka yuk na ni si Epron ni pag-awpan mimon jama ma ndang pakale ndooy, “Meꞌ tee ba Tuwan, bong siꞌ kadarihan ningkau, basta bayaran ku na jaꞌ tanaꞌ looy ddas ka lowang pampang na. Bong-anu, hagaan nu na, boꞌ nu bayaran ku mari takubu ku na pilay nda ku.”

14Pag tampung si Epron ni si Ibrahim, 15“Tuwan, tanaꞌ looy ilay bong siꞌ pinaamu, maghagaꞌ mpat hatus dublun pilak porol. Sugaꞌ bong bina kita, san daa na ko mayad. Sigi na, kubuhun na pilay nda nu.”

16Sugaꞌ yaꞌ na san bay paruli si Ibrahim, gam pin lay na jaꞌ bayaran na si Epron mpat hatus dublun pilak porol ni pag-awpan sikamimon bangsa Hīt ndooy. 17Dari labba mandooy, si Ibrahim na dapu bay tanaꞌ si Epron ndooy ni Makpela pa mataallaw man Mamre. Boꞌ ndang luu na ndooy tabeꞌ tinanom na ka lowang pampang na sampay ga kakayu-kayuhan ma ngaliput panggaan na. 18Boꞌ lay na tasaksiꞌ meꞌ baanan ga bangsa Hīt ndooy si Ibrahim na dapu tanaꞌ looy.

19Magsulut jaꞌ siꞌ sila, lay na si Ibrahim pilay ngubu si Sara njawom lowang pampang ni Makpela ndooy ni Kanan. (Makpela ilay tapit pa Mamre ndooy ni daira Hebron.) 20Dari siꞌ meꞌ looy na silay jalan meꞌ si Ibrahim bay koleꞌ tanaꞌ looy man bangsa Hīt sampay na lowang pampang na man na buwat pangubuhan.

Currently Selected:

Panagnaan 23: sjm

Highlight

Copy