Panagnaan 25

Panubuꞌ si Ibrahim ka nda na si Ketura

1Na kuwan si Ibrahim siꞌ tu, lay na baw handa pabalik. Awon nda na yana si Ketura. 2Sila siꞌ tu anakan nnom lalla, yana ga si Simran, si Joksan, si Medan, si Midiyan, si Isbak ka si Suwa. 3Kuwan si Joksan yana mmaꞌ ga si Siba ka si Deran. Kuwan si Deran, yana poonan bangsa Asyul ka bangsa Letusya ka bangsa Leyuma. 4Kuwan anak si Midiyan yana ga si Epa, si Epel, si Hanok, si Abira ka si Eldaa. Dari ilooy siꞌ labbasakayi yana ga anak-mpu si Ibrahim ka nda na si Ketura.

5Na yaꞌ gi siꞌ bay matoy si Ibrahim, ndang bay ya nugun, pag patoy na, mimon altaꞌ na subay labuꞌ pa si Isahak. 6Kuwan siga anak na ka siga nda na ilooy kasohean, yaꞌ du baw bay pinabiya meꞌ si Ibrahim. Batan ndang lay na du sila bay buwanan na altaꞌ. Pag-anu, boꞌ da bay sohoꞌ na maglayin palawak huwin pa mataallaw man lahat si Isahak.

Kapatoy si Ibrahim

7-8Na pag taabut dahatus pitumpūꞌ taun umu si Ibrahim, lay na ya patuhut ni kabboꞌ-bboan na ndooy ni ahirat. Sangkad na toa na, maka iya ilay bay matoy njawom kasannangan atay. 9Pag-anu siꞌ, lay na ya kinubu meꞌ siga anak na si Isahak ka si Ismail njawom lowang pampang ndooy ni Makpela tapit pa Mamre. Pampang looy ilay siꞌ sampay na tanaꞌ na, yana bay tanaꞌ si Epron, anak si Zohal, bangsa Hīt, 10sugaꞌ ndang lay na taballi si Ibrahim man na ngubu nda na si Sara. Dari siꞌ, lay na du kinubu si Ibrahim ni bihing nda na ndooy.

11Na pus si Ibrahim bay kinubu, lay na baw ga si Isahak pabeleng pa Beel-Lahay-Roy. Kuwan supaat Tuhan njataꞌ si Ibrahim, lay na labuꞌ pa jataꞌ si Isahak.

Siga panubuꞌ si Ismail

12Na ituu batnaa listahan siga panubuꞌ si Ismail, yana anak si Ibrahim ka si Hajal, danda Ejip looy, yana ata si Sara.

13Si Ismail ilay anakan sapu-duwa lalla. Bong tinalitib awon da labba man siyaka lūd pa siyali, yana ga si Nebayot, si Keral, si Adbeel, si Mibsam, 14si Misma, si Duma, si Massa, 15si Hadad, si Tema, si Jetul, si Napis maka si Kerema. 16Ga lalla looy ilay siꞌ labbasakayi, lay bay dari siga datuꞌ. Maka lay du dari poonan sapu-duwa bangsa. Awon siga paglahat da lay kinaddoꞌ lakka man awon da.

17Na pag taabut dahatus tallumpuꞌ-pitun taun umu si Ismail, lay na ya patuhut ni kabboꞌ-bboan na ndooy ni ahirat. 18Kuwan ga panubuꞌ na, lay na maglahat ni sallangan Habila ka Siyul, tapit ni panggaan Ejip lān song pa Asyul. Arat-tabiat da wā sasaꞌ-manasaꞌ pagkahi maglūng-kampung pangkat-mamangkat.#(25.18) Ndaun juran 16 ayat 12.

Si Esaw ka si Yaꞌkub pinamaddihan

19Na ituu batnaa yana salsila paglūng si Isahak, anak si Ibrahim. 20Taabut jaꞌ siꞌ mpatpūꞌ taun umu si Isahak, lay na ya handa man si Ribeka, yana danganakan si Laban. Sila ilay anak si Betuwel, bangsa Aram man Paddan-Aram.

21Na sabap yaꞌ hanak si Ribeka, lay ya pakuhan si Isahak duwaa pa Tuhan. Boꞌ lay du ya bay nduwan batan yaꞌ hallom, lay na battong si Ribeka boꞌ kamba lagi anak da. 22Ga anak da baw siꞌ tu, njawom battong lagi, ndang meꞌ lassa sibogod na. Dari honaꞌ-honaꞌ si Ribeka, “Oy na tu la katuwaꞌ aku meꞌ tuu?” Dari ilooy ma lay ya maku duwaa pa Tuhan nohoꞌ pinahatiyan.

23Pag-anu siꞌ, lay na magpalman Tuhan niiya, yuk na, “Anak bi ina kamba. Sila ina yana poonan duwa bangsa ma magsaggaꞌ. Kuwan disu, mas basag gi kawasa na man ilooy disu. Ilooy ilay mintu ma siyaka pinagbayaan meꞌ ilooy ma siyali.”

24Na pag taabut si Ribeka maddi, kamba du bana anak na boꞌ lalla du sikaduwa. 25Pag pōꞌ anak na ma siyaka, akket kuwit na maka būhan baran na. Dari lay inawnan si Esaw, hatiyan na “būhan.” 26Pag pōꞌ siyali na, nguwangkut na pin ni tikod si Esaw. Dari lay inawnan si Yaꞌkub, hatiyan na “pagantiꞌ”. Na sila siꞌ tu bay pinamaddihan, mag-umu na si Isahak nnompūꞌ taun.

Kapatut si Esaw bilang anak siyaka yaꞌ hagaan niiya

27Mehe jaꞌ siꞌ ga anak-anak looy sikaduwa, kuwan si Esaw alistu manaꞌ hayop. Iya ilay tigiꞌ njawom tawun. Boꞌ si Yaꞌkub hatu maka tanam ya ni lumaꞌ jaꞌ. 28Na si Isahak siꞌ tu, tud kaasean na si Esaw sabap tigiꞌ ya mangan sumbalian hayop bay pinanaꞌ meꞌ si Esaw. Boꞌ si Ribeka, ilooy ya kaasean na banahan, yana si Yaꞌkub.

29Na disu llaw sasang si Yaꞌkub ngalohoan bigi batung, takka na baw si Esaw man jawom tawun, boꞌ tud lingantu na ya. 30Dari yuk na ni si Yaꞌkub, “Siglaꞌ ko. Sandukan doꞌ ku batung akket naa. Tud lingantu ku la!” Dari ilooy na poonan man si Esaw bay ndē si Edom, hatiyan na “akket.”

31Iya tampung si Yaꞌkub, “Buwanan ta du ko bong dean nu na aku kapatut nu bilang anak siyaka mari aku na koleꞌ supaat pagkasiyaka nu.”

32Yuk si Esaw siꞌ tu, “Sigi ba. Bong baw man ku na matoy kabobowan, batōy ku gi kapatut pagkasiyaka ku?”

33Pag tampung si Yaꞌkub, “Sigi ba, sugaꞌ napa doꞌ ko duhuꞌ.” Dari ilooy ma lay na si Esaw napa ngandean kapatut na bilang anak siyaka ni si Yaꞌkub. 34Pag lupus, lay na ya binuwanan leꞌ si Yaꞌkub tinapay ka mbuwaꞌ pinggan batung looy. Pus na bay nginum-mangan, lay na ya palakka. Dari siꞌ, tumatandaꞌ na tud yaꞌ luu hagaꞌ na ni si Esaw kapatut pagkasiyaka na.

Currently Selected:

Panagnaan 25: sjm

Highlight

Copy