Yahiya 10
10
Si Isa tukang ipat mahap
1Pag-anu siꞌ, yuk si Isa, “Baan ta kam banahan, bong luu jama ngasok kura baanan bili-bili yaꞌ nūs lawang, boꞌ ngandāg jaꞌ ni paga, malaingkan panangkaw silay ya atawa mundu. 2Boꞌ jama ma paasok man lawang, iya silay tukang ipat baanan bili-bili looy. 3Maka tuktuk na paasok, binukisan jaꞌ ya meꞌ tukang jaga lawang. Lagiꞌ na, bila ya mitsala, takila suwara na meꞌ siga bili-bili na. Dari linganan na siga bili-bili na disu-disu ddas ka awon da saliꞌ-saliꞌ, boꞌ da boo na pa poan. 4Lay jaꞌ ilay taboo na ga bili-bili na mimon pa poan, lumān ya ni duhuan. Kuwan sila, patuhut jaꞌ niiya sabap takila da suwara na. 5Sugaꞌ bong ilay bay jama sarī, yaꞌ silay mmeꞌ ga bili-bili looy, gam pin pinasonsehan gi ya batan yaꞌ sila biyasa ni suwara na.”
6Na kuwan siga jama ndooy baw siꞌ tu, yaꞌ du bay takoleꞌ da kamaatunan bitsala si Isa. 7Sangkon lay na sila bakkasan na, yuk na, “Baan ta kam banahan, ilooy ilay siꞌ ma bay awnan ku lawang kura bili-bili, yana aku na. 8Mimon ma bay duhuꞌ man aku, ma bay mangaku sila na lawang looy, sibuꞌ du sila ka panangkaw atawa mundu. Sugaꞌ yaꞌ du sila bay pinaruli meꞌ siga bili-bili ku. 9Meꞌ halling sambat ku siꞌ, aku na situ lawang. Sagannap ma paasok man ku, malaingkan sinalamat. Sibuꞌ du karuha da ka bili-bili sannang jaꞌ magpōꞌ-paasok, maka nammu jaꞌ sila makanan ayad.
10“Na kuwan siga panangkaw ma bay awnan ku ilay siꞌ, yaꞌ luu niyat da sarī man nangkaw, mapatoy, sampay makaat. Boꞌ aku tu, maksud ku bay pitu supaya luu na dapat manusiyaꞌ koleꞌ kaallum bahau, yana kaallum ma yaꞌ luu kulang na samasakali.”
11Yuk si Isa lagi, “Aku itu meꞌ karuha jama ma tiggo ngipat bili-bili na paayad. Tiyap-tiyap ina tukang ipat mahap, atas na nongan umu na kalnaꞌ siga bili-bili na. 12Boꞌ jama ma ginadjihan nohoꞌ nganjagahan siga bili-bili ina, sarī akka na batan saꞌ iya dapu bili-bili. Dari bong ya ngita idoꞌ tawun pasōng nokob, magti sina ya sonse ngambanan ipatan na. Kuwan siga bili-bili, pabiya na jaꞌ tinokob sampay magpassahan na baanan da. 13Kon na ilay mabiya batan iya tukang ngipat ginadjihan jaꞌ. Yaꞌ dari oy na niiya oy-oy katuwaꞌ ni siga bili-bili looy.
14“Boꞌ aku tu, aku na tukang ipat mahap. Katoonan ku mimon bili-bili ma sukuꞌ ku maka sila pun katoonan da du ku. 15Yana meꞌ kami ka Mmaꞌ ku lungbid, damikiyan, meꞌ naa du meꞌ kami ka siga bili-bili ku lungbid. Maka songan ku jaꞌ sina mintu umu ku kalnaꞌ sila. 16Sarī man siga bili-bili ku ni baanan tuu, luu gi sina kasohean ma saꞌ ni baanan tuu. Sila pun ina subay du liyun ku pa jawom okoman ku.#(10.16) Hati na, meka du jama man kabangsa-bangsahan saꞌ Yahudi binoo du pitsayaꞌ ni si Isa ni sinōng. Sila ina mintu pakale du ni suwara ku. Pag ina mintu sila pinaasok na du meꞌ ku pa jawom okoman ku, mimon sukuꞌ ku dari disu baanan sa njawman disu tukang ipat.
17“Tud kinaasean ku meꞌ Mmaꞌ ku batan atas ku nongan umu ku kalnaꞌ siga bili-bili ku. Sugaꞌ llum du sina ku pabalik. 18Yaꞌ luu kalakkahan umu ku, sugaꞌ aku ya sina mintu maggasad bayaꞌ nongan umu ku. Luu kapatut ku nongan umu ku maka luu du situ kapatut ku mawiꞌ. Batan ndang ituu bay sinohoꞌ meꞌ Mmaꞌ ku niyaku.”
19Na sabapan bay bitsala si Isa siꞌ, magsulemaꞌ na baw pamiki ga jama ndooy pasal iya. 20Meka na sila halling, “Oy doꞌ itu pūs tabi pakale ni lalla naa? Sineytan bina ya, bilawan!”
21Sugaꞌ yuk kasohean baw, “Bong bina jama sineytan, yaꞌ kabitsala meꞌ naa. Takaya seytan kina ngulian jama bay buta?”
Si Isa tinuwak meꞌ siga pa-mmean Yahudi
22Na taabut jaꞌ siꞌ timpu tanne, luu na baw disu paballangan bangsa Yahudi yana pangintoman ni llaw langga mehe bay sinutsiꞌ meꞌ kabboꞌ-bboan da.#(10.22) Ni taun 168 B.C., hati na, dahatus nnompuꞌ-wawun taun halloman yaꞌ lagi si Isa bay lahil pa junyaꞌ, luu disu sultan inawnan si Antiyakas Epipanis ka ga sundalu na bay ngagaw Jerusalem. Bbuwatan sultan looy, lay bay matamakan langga mehe ndooy, batan lay ya numbaliꞌ siga bawi ndooy. Paddus tallun taun, lay na ngatu bangsa Yahudi sampay lay na tabawiꞌ da Jerusalem. Pag-anu, boꞌ da nutsiꞌ langga mehe. Dari labba mandooy, taun-taun luu paballangan da inawnan Paballangan Langga Mehe Sinutsiꞌ bilang pangintoman ni waktu kabboꞌ-bboan da bay nutsiꞌ langga mehe. 23Ni waktu looy siꞌ, luu du ndooy si Isa maglan-lān ni poan langga mehe, ndooy ni sawrung pinag-awnan Sawrung Sultan Sulayman. 24Yaꞌ hallom, liput na baw ya meꞌ siga Yahudi, yuk da niiya, “Meꞌ noy na pin doꞌ itu halloman kami pabiya nu papiha-piha bong soy ko? Bong kau na Almasi, māꞌ na ko ba banahan.”
25Pag tampung si Isa siꞌ, “Bay na kam bilay baan ku, sugaꞌ yaꞌ du kam bay pitsayaꞌ. Sarī gi, siga pabuwatan kahaylan-haylan bay pabuwat ku ni awon Mmaꞌ ku, lay na du mōꞌ buktiꞌ bong soy ku. 26Sugaꞌ yaꞌ du kam kuhi pitsayaꞌ niyaku sabap saꞌ kam sukuꞌ ku. 27Batan bong ina siga sukuꞌ ku, mastiꞌ pakale jaꞌ ni suwara ku. Lungbid kami ka sila maka mmeꞌ na jaꞌ sila niyaku. 28Buwanan ku sila kasampulnaan nyawa ma yaꞌ luu katapusan na. Yaꞌ na sila sakkat ka Tuhan saumu maka yaꞌ luu kaagaw sila man jawom komkoman ku. 29Sila ina lay na hinalap niyaku meꞌ Mmaꞌ ku ma patingkat man sikamimon. Yaꞌ du luu kaagaw sila man jawom komkoman na. 30Kami tu ka Mmaꞌ ku tibuuk.”
31Pag takale siga Yahudi meꞌ looy, ilooy ma lay na baw sila balik mūt batu man mapatoy iya.
32Sugaꞌ yuk si Isa ninsila, “Meka na bilay pabuwatan mahap bay pinōꞌ meꞌ ku ningkaam. Boꞌ labbasakayi man panohoan Mmaꞌ ku niyaku. Dari mamooy baw lay siꞌ siga pabuwatan mahap looy poonan man bi doman ngahiyak aku?”
33Pag tampung siga jama looy siꞌ, “Saꞌ bina ga pabuwatan mahap man kami doman ngahiyak kau, arapun sabapan bitsala nu siꞌ ma bay pangka pa Tuhan. Batan kau bina manusiyaꞌ jaꞌ ko, sugaꞌ tatammu nu na baw ga buwat dī nu Tuhan!”
34Pag tampung si Isa, “Minsan njawom kitab bi, Tuhan mismu bay magpalman ni siga pa-mmean kabboꞌ-bboan tabi, yuk na, ‘Kaam ina siga tuhan.’#(10.34) Kitab Jabul 82.6. 35Boꞌ kitab ina, ndang katoonan tabi na du yaꞌ tabaluba saumu. Na bong sila man Tuhan bay magpalman bay awnan na siga tuhan, 36ongoy taggahaꞌ bāꞌ bi pangka pa Tuhan sukat ku bay mangaku Anak na? Padahal, aku na situ ilooy ma bay inuwakilan sampay pinapitu leꞌ Mmaꞌ ku Tuhan pa junyaꞌ majatu garaꞌ na. 37Bong siꞌ ku yaꞌ bay mōꞌ siga pabuwatan kahaylan-haylan ma bay sohoꞌ Mmaꞌ ku niyaku, san kam yaꞌ na pitsayaꞌ niyaku. 38Sugaꞌ pagka lai, minsan kam yaꞌ doman pitsayaꞌ ni bitsala ku, subay siꞌ pitsayaꞌ na kam niyaku sabapan siga pabuwatan meꞌ looy. Bong siꞌ ilay kam bay mindoga ni siga pabuwatan looy, tahati bi jaꞌ sampay tatantu bi na tibuuk kami ka Mmaꞌ ku.”
39Pag takale da meꞌ looy, balik na baw sila dak nungkuban iya, sugaꞌ lay jaꞌ ya pōꞌ mandooy, boꞌ yaꞌ san ya bay kongoy-kongoy meꞌ da.
40Pag-anu siꞌ, lay na baw ya pabeleng pa dambilaꞌ Sōng Juldan, ndooy man si Yahiya bay nagnaꞌ mandi jama. Sampay lay na doꞌ ya pahantiꞌ ndooy. 41Sasang na ndooy, meka na baw jama bay bahuklud pa mman na. Yuk da padisu-padisu, “Jaman si Yahiya la, yaꞌ bay pingkaꞌ mōꞌ siga sipat kawasa Tuhan. Sugaꞌ bong baw bay tunaꞌ na pasal lalla tuu, basta mawjud jaꞌ sikamimon.” 42Dari siꞌ, meka na pitsayaꞌ ni si Isa ndooy.
Currently Selected:
Yahiya 10: sjm
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
