Yahiya 18

Si Isa sinungkuban

(Matiyu 26.47-56; Malkus 14.43-50; Lukas 22.47-53)

1Lupus jaꞌ siꞌ si Isa bay maku duwaa, lay na sila lakka mandooy ka ga mulit na, boꞌ da pilay pa kabbun jaytun ndooy ni dambilaꞌ Labbak Kidron. 2Na kuwan si Judas siꞌ tu, lalla ma bay nipu si Isa, ndang biyasa ni lahat looy sabap daran ga si Isa ka ga mulit na pilay. 3Dari lay du si Judas luꞌ pilay moo baanan sundalu ka ga tukang jaga langga ma bay sinohoꞌ meꞌ siga imam langkaw ka ga Parisi. Sila siꞌ bay pilay ddas ka paliyatut da ka siga pakakas da. 4Kuwan si Isa siꞌ tu, ndang tasayu na na du bong oy song katuwaꞌ niiya. Sugaꞌ takka jaꞌ siꞌ siga sundalu looy, lay gi ya pasōng nilaw, yuk na, “Soy tu piha bi?”

5Pag tampung da, “Si Isa, lalla looy man Nasaret.”

Yuk si Isa baw siꞌ tu, “Aku na bitu.”

Na kuwan si Judas siꞌ tu ma bay nipu iya, luu na du nangge ni bihing baanan sundalu ndooy. 6Pag bay jaꞌ takale da halling si Isa, ilooy ma yuk na, “Aku na bitu,” lay na ga sila pasuhut sampay lay gi humayaꞌ labbasakayi.

7Pag-anu siꞌ, lay gi nusi si Isa, yuk na, “Soy lay siꞌ piha bi?”

Pag halling da, “Si Isa ba, lalla looy man Nasaret.”

8Yuk si Isa baw siꞌ tu, “Bay na siꞌ kam bilay baan ku, aku na iya. Sugaꞌ bong tud aku du piha bi, daa jaꞌ lapisun bi ga soheꞌ ku.” 9Dari pagka lay sila kuhi, lay na binakbul bay bitsala si Isa pa Tuhan, ilooy ma yuk na, “Sagannap ma bay hinalap meꞌ nu niyaku, yaꞌ luu bay hilang.”

10Pag-anu siꞌ, bbuwatan si Saymon Pitel, lay ngurus bariꞌ na sampay lay tigad na tindog panghuluꞌ imam, boꞌ lay na ga latak tinga na huwin pa kawnan. Awon tindog looy siꞌ si Malkus.

11Pag-anu siꞌ, ilooy ma sinaggong na meꞌ si Isa si Pitel, yuk na, “Uy, asokun ba bariꞌ nu! Yaꞌ bitu sikatuwaꞌ bong yaꞌ inum ku inuman ma ndang lay na tinunggang meꞌ Mmaꞌ ku niyaku.”#(18.11) Inuman ma awnan si Isa yana kabinsanaan ka kapatoy ma ndang bay ginantaꞌ meꞌ Tuhan niiya kalnaꞌ mimon manusiyaꞌ.

Si Isa binoo pa mman Imam Annas

12Pag-anu siꞌ, lay na si Isa sinungkuban meꞌ baanan ga sundalu looy ka kapitan da sampay siga tukang jaga ma lakka man siga pa-mmean Yahudi. Pag-anu, boꞌ na iningkotan. 13Pag lupus, lay doꞌ ya duhuꞌ binoo pa lumaꞌ Imam Annas, yana bay panghuluꞌ imam sibuwa. Imam Annas ilay matoa Imam Kayapas. Kuwan Imam Kayapas, panghuluꞌ imam ni taun looy. 14Maka iya na silay ilooy ma bay halling ni siga pa-mmean Yahudi, gam na disu jama jaꞌ matoy gantiꞌ sikamimon.

Si Pitel maylu bahasa saꞌ iya soheꞌ si Isa

(Matiyu 26.69-75; Malkus 14.66-72; Lukas 22.54-57)

15Na si Saymon Pitel siꞌ tu ka disu pagkahi na mulit, luu na pin patuhut ni ga si Isa sa lawak-lawak da na. Pag taabut jaꞌ ni haman Imam Annas, kuwan soheꞌ si Pitel, lay mmeꞌ pawus paasok sabap sikabiyasa ya ka panghuluꞌ imam. 16Sugaꞌ si Pitel, lay jaꞌ ngagad ni poan lawang paga. Dari soheꞌ na, ilooy ma sikabiyasa ka panghuluꞌ imam, lay pōꞌ muhun man disu danda ndooy tukang jaga lawang bong dari si Pitel binoo paasok. Dari lay na ya pinaasok. 17Sugaꞌ halling danda looy siꞌ ni si Pitel, “Yaꞌ ko kina tabeꞌ ni baanan mulit lalla naa ma bay tasungkub?”

Pag tampung si Pitel, “Niyaꞌ ba.”

18Na kuwan siga tindog ndooy ka ga tukang jaga langga, lay bay makallum api boꞌ da nangge ndooy mapasuꞌ-pasuꞌ baran da sabap tanne lahat. Si Pitel pun lay du palamud ndooy mapasuꞌ-pasuꞌ baran na.

Si Isa sinumariya meꞌ Imam Annas

(Matiyu 26.59-66; Malkus 14.55-64; Lukas 22.66-71)

19Kuwan si Isa siꞌ tu, lay na sinumariya meꞌ bay panghuluꞌ imam, yana Imam Annas, pasal ga mulit na ka tōꞌ na.

20Pag tampung si Isa, “Aku ilay bay noan jama, wā ku mitsala njawom jama ni kalangga-langgahan sampay ni langga mehe, nnoy-nnoy man bangsa tabi kumpo-kumpo. Yaꞌ luu waktu ku bay noan jama sipuk-sipuk. 21Sapatut na, san saꞌ na aku tilaw nu. Arapun ilooy jaꞌ tilawun ga jama ma bay kale ni tōꞌ ku. Mastiꞌ katoonan da jaꞌ bong oy bay tinōꞌ meꞌ ku.”

22Lay jaꞌ siꞌ si Isa mitsala meꞌ looy, ilooy ma lay ya tinampa meꞌ disu tukang jaga ma lundooy ni bihing na. Maka yuk tukang jaga looy, “Pataꞌ kina meꞌ naa meꞌ nampungan panghuluꞌ imam?”

23Pag tampung si Isa, “Bong luu bay tampalasa ni bitsala ku siꞌ, pamaun teꞌ bong oy. Sugaꞌ bong niyaꞌ, ongoy baw taggahaꞌ lay gi ku tampa nu?”

24Pag-anu siꞌ, masi gi lay pinusas tangan si Isa, lay na baw sinohoꞌ meꞌ Imam Annas binoo pa mman panghuluꞌ imam, yana Imam Kayapas.

25Balik ta pa si Saymon Pitel, sasang na masi nangge mapasuꞌ-pasuꞌ baran na, luu na baw kasohean nilaw, yuk da, “Yaꞌ kina ko siꞌ bay tabeꞌ ni baanan mulit lalla looy?”

Bbuwatan si Pitel baw siꞌ tu, maylu balik, yuk na, “Niyaꞌ ba.”

26Pag-anu, luu na baw ndooy disu tindog panghuluꞌ imam, kampung ka lalla looy ma bay pingkaꞌ latak tinga na meꞌ si Pitel. Yuk na ni si Pitel, “Saꞌ gi kina kau bay takita ku nsiniꞌ ndooy ka ga si Isa ni kabbun jaytun?” 27Si Pitel siꞌ tu, lay du bay maylu pabalik. Paddus jaꞌ siꞌ halling na, ilooy ma tingkauk du manuk.

Si Isa binoo pa mman Gubnul Pilatu

(Matiyu 27.1-2; 27.11-14; Malkus 15.1-5; Lukas 23.1-5)

28Pag deꞌ subu, lay na baw si Isa binoo meꞌ siga pa-mmean Yahudi lakka man lumaꞌ Imam Kayapas pa astanaꞌ Gubnul Pilatu. Sugaꞌ yaꞌ sila kuhi paasok sabap njawom saraꞌ agama da, bong sila nabbaꞌ ni lumaꞌ jama saꞌ Yahudi, katamak ninsila, sampay yaꞌ na sila kapalamud mmeꞌ mangan ni paballangan Ngalingkaꞌ. 29Dari siꞌ, lay na pōꞌ Gubnul Pilatu pilay pa mman da. Tilaw na, “Oy na la palkalaꞌ lalla naa bay boo bi pitu?”

30Pag tampung da siꞌ, “Lalla tuu bitu, bong siꞌ saꞌ bay dusa mehe pabuwat na, yaꞌ situ ya bay boo kami pa mman nu.”

31Yuk Gubnul Pilatu, “Boonun bi na ba bbeleng. Kaam sa ngahukum iya ni lanan saraꞌ bi.”

Sugaꞌ tampung siga pa-mmean Yahudi baw siꞌ tu, “Yaꞌ baw bilay kami pinadari meꞌ parinta bi mapatoy jama.” 32Dari sabap meꞌ looy siꞌ, song binakbul na bay tunaꞌ si Isa pasal jalan man na matoy.#(18.32) Ni kitab tuu, ni juran tallu ayat sapu-mpat ka ni juran sapu-duwa ayat tallumpuꞌ-duwa, si Isa bay nunaꞌ jalan man na pinapatoy, yana inangkat taꞌ tehang. Sangkon ndang bay ginantaꞌ bangsa Rom mapatoy iya, saꞌ bangsa Yahudi. Batan jalan man bangsa Rom mapatoy, ngalansang jama taꞌ tehang boꞌ inangkat pa jataꞌ. Boꞌ bangsa Yahudi, bong mapatoy jama, pinaglupung-lupungan hiniyak ka batu.

33Pag-anu, lay na siꞌ pabeleng Gubnul Pilatu pa jawom astanaꞌ, boꞌ na nohoꞌ si Isa binoo pa mman na. Luu jaꞌ siꞌ, yuk Gubnul niiya, “Bana kina kau sultan bangsa Yahudi?”

34Pag tampung si Isa, “Da doꞌ ko la Tuwan. Ni hāl tilaw nu siꞌ, tud dī nu jaꞌ kina doman toon atawa kon nu nilaw sabap luu bay maan kau pasal aku?”

35Yuk Gubnul Pilatu baw siꞌ tu, “Ongoy kanna nu, bangsa Yahudi ku kitu? Pooy meꞌ ku katilaw meꞌ looy bong saꞌ man tuntut siga pagkahi nu Yahudi ka ga imam langkaw bi ma bay ma-ntan kau pa mman ku? Sugaꞌ oy baw tu bay pabuwat nu taggahaꞌ landuꞌ na duga da ningkau?”

36Pag tampung si Isa, “Pagkasultan ku bitu yaꞌ sibuꞌ ka pagkasultan ni junyaꞌ tuu. Bong siꞌ ilay bay sibuꞌ, mastiꞌ ngatu na siga raayat ku supaya ku yaꞌ na tasungkub meꞌ siga pa-mmean Yahudi. Sugaꞌ niyaꞌ sibuꞌ, batan pagkasultan ku tu saꞌ lakka man junyaꞌ tuu.”

37Yuk Gubnul Pilatu baw siꞌ tu, “Bong meꞌ naa, tud sultan du bina hati ko!”

Pag halling si Isa, “Kau na du baw bina bay māꞌ aku sultan. Kon ku itu bay pitu pa junyaꞌ ka pinamaddihan supaya ku kapasaplag kabanahan ni manusiyaꞌ. Soysoy doman toon kabanahan, mastiꞌ pakale sina niyaku.”

38Yuk Gubnul Pilatu, “Oy doꞌ itu kabanahan?” Pus na halling meꞌ looy, lay na baw ya pōꞌ balik pa mman siga Yahudi ndooy, yuk na, “Yaꞌ bilay la luu tatammu ku kasaan na. 39Sugaꞌ pagka biyasa na du kam pinoan meꞌ ku disu pilisu taun-taun taabut paballangan Ngalingkaꞌ, pooy bong sultan bangsa Yahudi tuu na pōꞌ ku ningkaam?”

40Pag-anu siꞌ, ilooy ma maghowapan na sila, yuk da, “Si Barabas na ba poun ningkami. Bong iya, daa na.” Mingkan ilay siꞌ, kuwan si Barabas, tanyag naggaꞌ parinta bangsa Rom.

Currently Selected:

Yahiya 18: sjm

Highlight

Copy