Yahiya 20
20
Si Isa pinakallum
(Matiyu 28.1-8; Malkus 16.1-8; Lukas 24.1-12)
1Na paddus jaꞌ siꞌ Llaw Pahali, sayu alab lagi ni llaw Ahad, lay na baw ga si Mariyam man Magdala pilay pa kubu looy, lindom lagi lahat. Pag takka ndooy, takita na na batu mehe man bay nambo behe kubu looy lay na lligiran pa bihing. 2Dari siꞌ, lay ya sonse pa mman si Pitel ka mulit looy ma kaasean si Isa nuntutan sila, yuk na, “Luu la bay ngalakkahan mayat Papuꞌ tabi man jawom kubu na, boꞌ yaꞌ san katoonan kami bong nnoy man da bay ngannaꞌ!”
3Dari siꞌ, lay na si Pitel ka pagkahi na mulit looy siꞌ pilay pa kubu. 4Sila siꞌ pilay, sonse jaꞌ sikaduwa, sugaꞌ tangkas ilooy disu man si Pitel sampay iya du bay duhuꞌ takka. 5Sugaꞌ yaꞌ gi baw ya bay paasok. Pag kokoꞌ na ngandaꞌ pa jawom kubu looy, ilooy sa takita na kuku poteꞌ man bay nungkus mayat si Isa.
6Pag takka si Saymon Pitel, lay magti paasok pa jawom kubu looy. Ndooy siꞌ, takita na du kuku poteꞌ looy 7maka bay putus kōk si Isa. Sugaꞌ putus looy siꞌ ndang lay na llappot boꞌ lay inannaꞌ di-dī na. 8Yaꞌ hallom, lay na du mmeꞌ paasok mulit looy siꞌ disu ma bay duhuꞌ takka. Pag ndaꞌ na meꞌ looy, bohoꞌ tud manganna na ya lay na si Isa llum pabalik. 9Ni waktu looy yaꞌ gi tasayu da ndang luu na tunaꞌ bay sinuwatan njawom kitab pasal Almasi pinakallum pabalik.
Si Isa nammuhan si Mariyam man Magdala
(Matiyu 28.9-10; Malkus 16.9-11)
10Pag-anu siꞌ, lay na moleꞌ ga mulit looy sikaduwa. 11Sugaꞌ kuwan si Mariyam baw, lay na pin patamban ndooy ni poan kubu. Bbuwatan na, nangis jaꞌ. Pag-anu, sasang na siꞌ nangis, lay na ya pakokoꞌ ngandaꞌ pa jawom kubu looy. 12Pag ndaꞌ na, luu na ndooy duwa malaikat mangampuꞌ poteꞌ ningkōꞌ ni bay limpaꞌ mayat si Isa, disu ni kokan na, kuwan disu ni battisan na. 13Tilaw da siꞌ niiya, “Ongoy tu ko Nang nangis?”
Pag tampung si Mariyam, “Luu la bay ngalakkahan mayat Papuꞌ ku. Boꞌ yaꞌ san katoonan ku bong bay binoo paninggai meꞌ da.” 14Pus na halling meꞌ looy, lay ya pateleꞌ pa bukutan na sampay luu na si Isa takita na nangge ndooy, sugaꞌ yaꞌ gi tasayu na ga ilooy na si Isa.
15Yuk si Isa niiya, “Ongoy ko Nang nangis? Soy tu piha nu?”
Na kuwan si Mariyam baw siꞌ tu, kanna na si Isa ga tukang huma ni tanaꞌ looy. Dari yuk na, “Paꞌ, bong sabagay kau bay moo mayat si Isa pa tampat sarī, baan doꞌ ku la bong ninggai, boꞌ takaddoꞌ ku.”
16Yuk si Isa baw siꞌ tu niiya, “Mariyam.”
Dari ilooy ma lay ya paawop ni si Isa sambayan na halling ni pallun Hibrani, “Rabbuni!” Hatiyan na, “Guru”.
17Yuk si Isa niiya, “Daa ku kuwangkutan nu. Pawus gi situ ku pa jataꞌ pa mman Mmaꞌ ku. Sugaꞌ tugun ku ningkau, pilay na ko pa mman siga danganakan ta. Baan nu sila pilay na ku pa jataꞌ pa mman Mmaꞌ ku, yana Mmaꞌ bi, pa mman Tuhan ku, yana Tuhan bi.”
18Dari siꞌ, lay na du si Mariyam pilay pa mman siga mulit si Isa. Takka ndooy, yuk na, “Lay na la takita ku Papuꞌ tabi!” Pag-anu, lay na du sila baan na ma bay tinugun niiya.
Si Isa nammuhan ga mulit na
(Matiyu 28.16-20; Malkus 16.14-18; Lukas 24.36-49)
19Na pag tapit saddop llaw ni llaw looy du siꞌ, bbuwatan siga mulit si Isa, lay tapuk sabap tawu sila ni siga pa-mmean Yahudi. Sugaꞌ minsan lay kunsiꞌ da lawang lumaꞌ mman da, sakayi da kasayu, luu na si Isa nangge ni tangngaan da. Yuk na ninsila, “Kasannangan ningkaam.” 20Pag-anu siꞌ, lay na sila pakitahan na ga limpaꞌ lansang ni tangan na sampay limpaꞌ budjak ni saddi na. Kuwan siga mulit na siꞌ tu, tud bay gāk pag ndaꞌ da luu na Papuꞌ da llum pabalik.
21Pag-anu siꞌ, lay na baw si Isa halling pabalik, “Kasannangan ningkaam. Yana meꞌ Mmaꞌ ku bay mapitu aku nohoꞌ masaplag umanat mahap, damikiyan, sohoꞌ ta na du kam ngalataan lahat masaplag.” 22Pus na halling meꞌ looy, lay na ya mahuwa napas na ninsila, boꞌ na halling, “Timaun bi na Rū Sutsiꞌ. 23Meꞌ kaam siga wakil ku, bong ina kam bay ngampun jama ni bay dusa da, malaingkan inampun du sila meꞌ Tuhan. Bong ina yaꞌ ampun bi, malaingkan niyaꞌ du sila inampun meꞌ Tuhan.”
Si Isa nammuhan si Tomas
24Na ni waktu looy siꞌ man si Isa bay patammu, luu disu ni mulit na bay kalikutan, yana si Tomas ma pinagdē si Kamba. 25Dari lay na du ya binaan meꞌ siga pagkahi na mulit, yuk da, “Lay kami la sitammu ka Papuꞌ tabi.”
Tampung si Tomas baw, “Oy na kam na! Bong niyaꞌ doꞌ bay takita ku limpaꞌ lansang ni tangan na sampay tasallok ku ka timbōꞌ ku, yaꞌ ku kuhi pitsayaꞌ. Maka subay doꞌ bay tapurut ku ka tangan ku limpaꞌ budjak ni saddi na boꞌ ku pitsayaꞌ.”
26Paddus jaꞌ siꞌ wawuꞌ ngallaw, lay na baw kumpo ga mulit si Isa njawom lumaꞌ pabalik sampay luu na du ndooy si Tomas. Kuwan siga lawang da, meꞌ sibuwa du lay kinunsiꞌ. Sugaꞌ san meꞌ looy, sakayi da kasayu, luu na baw balik si Isa nangge ni tangngaan da sambayan na halling, “Kasannangan ningkaam.” 27Pag-anu siꞌ, yuk na ni si Tomas, “Tu ko Nges. Ndaun na tangan ku, boꞌ sallokun na ka timbōꞌ nu, maka purutun na ka tangan nu limpaꞌ budjak ni saddi ku. Pitsayaꞌ na ko ba. Daa na ko hawal-hawalan.”
28Yuk si Tomas niiya, “Papuꞌ ta ko! Tuhan ta ko!”
29Pag tampung si Isa niiya, “Kau ina pitsayaꞌ noy luu na ku takita nu. Sugaꞌ labi gi sina mehe supaat njataꞌ sagannap ma pitsayaꞌ niyaku minsan ku yaꞌ bay takita da.”
Maksud kitab tuu bay sinuwatan
30Na ni hāl pabuwatan kahaylan-haylan bay pōꞌ si Isa ni pag-awpan ga mulit na, meka silay yaꞌ na bay sinuwatan ni kitab tuu. 31Sugaꞌ kasohean lay patabeꞌ ku ntuu supaya kam pitsayaꞌ si Isa yana Almasi, maka iya Anak Tuhan. Batan bong ina kam pitsayaꞌ na niiya, malaingkan koleꞌ kam kasampulnaan nyawa saumu-umu.
Currently Selected:
Yahiya 20: sjm
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
Yahiya 20
20
Si Isa pinakallum
(Matiyu 28.1-8; Malkus 16.1-8; Lukas 24.1-12)
1Na paddus jaꞌ siꞌ Llaw Pahali, sayu alab lagi ni llaw Ahad, lay na baw ga si Mariyam man Magdala pilay pa kubu looy, lindom lagi lahat. Pag takka ndooy, takita na na batu mehe man bay nambo behe kubu looy lay na lligiran pa bihing. 2Dari siꞌ, lay ya sonse pa mman si Pitel ka mulit looy ma kaasean si Isa nuntutan sila, yuk na, “Luu la bay ngalakkahan mayat Papuꞌ tabi man jawom kubu na, boꞌ yaꞌ san katoonan kami bong nnoy man da bay ngannaꞌ!”
3Dari siꞌ, lay na si Pitel ka pagkahi na mulit looy siꞌ pilay pa kubu. 4Sila siꞌ pilay, sonse jaꞌ sikaduwa, sugaꞌ tangkas ilooy disu man si Pitel sampay iya du bay duhuꞌ takka. 5Sugaꞌ yaꞌ gi baw ya bay paasok. Pag kokoꞌ na ngandaꞌ pa jawom kubu looy, ilooy sa takita na kuku poteꞌ man bay nungkus mayat si Isa.
6Pag takka si Saymon Pitel, lay magti paasok pa jawom kubu looy. Ndooy siꞌ, takita na du kuku poteꞌ looy 7maka bay putus kōk si Isa. Sugaꞌ putus looy siꞌ ndang lay na llappot boꞌ lay inannaꞌ di-dī na. 8Yaꞌ hallom, lay na du mmeꞌ paasok mulit looy siꞌ disu ma bay duhuꞌ takka. Pag ndaꞌ na meꞌ looy, bohoꞌ tud manganna na ya lay na si Isa llum pabalik. 9Ni waktu looy yaꞌ gi tasayu da ndang luu na tunaꞌ bay sinuwatan njawom kitab pasal Almasi pinakallum pabalik.
Si Isa nammuhan si Mariyam man Magdala
(Matiyu 28.9-10; Malkus 16.9-11)
10Pag-anu siꞌ, lay na moleꞌ ga mulit looy sikaduwa. 11Sugaꞌ kuwan si Mariyam baw, lay na pin patamban ndooy ni poan kubu. Bbuwatan na, nangis jaꞌ. Pag-anu, sasang na siꞌ nangis, lay na ya pakokoꞌ ngandaꞌ pa jawom kubu looy. 12Pag ndaꞌ na, luu na ndooy duwa malaikat mangampuꞌ poteꞌ ningkōꞌ ni bay limpaꞌ mayat si Isa, disu ni kokan na, kuwan disu ni battisan na. 13Tilaw da siꞌ niiya, “Ongoy tu ko Nang nangis?”
Pag tampung si Mariyam, “Luu la bay ngalakkahan mayat Papuꞌ ku. Boꞌ yaꞌ san katoonan ku bong bay binoo paninggai meꞌ da.” 14Pus na halling meꞌ looy, lay ya pateleꞌ pa bukutan na sampay luu na si Isa takita na nangge ndooy, sugaꞌ yaꞌ gi tasayu na ga ilooy na si Isa.
15Yuk si Isa niiya, “Ongoy ko Nang nangis? Soy tu piha nu?”
Na kuwan si Mariyam baw siꞌ tu, kanna na si Isa ga tukang huma ni tanaꞌ looy. Dari yuk na, “Paꞌ, bong sabagay kau bay moo mayat si Isa pa tampat sarī, baan doꞌ ku la bong ninggai, boꞌ takaddoꞌ ku.”
16Yuk si Isa baw siꞌ tu niiya, “Mariyam.”
Dari ilooy ma lay ya paawop ni si Isa sambayan na halling ni pallun Hibrani, “Rabbuni!” Hatiyan na, “Guru”.
17Yuk si Isa niiya, “Daa ku kuwangkutan nu. Pawus gi situ ku pa jataꞌ pa mman Mmaꞌ ku. Sugaꞌ tugun ku ningkau, pilay na ko pa mman siga danganakan ta. Baan nu sila pilay na ku pa jataꞌ pa mman Mmaꞌ ku, yana Mmaꞌ bi, pa mman Tuhan ku, yana Tuhan bi.”
18Dari siꞌ, lay na du si Mariyam pilay pa mman siga mulit si Isa. Takka ndooy, yuk na, “Lay na la takita ku Papuꞌ tabi!” Pag-anu, lay na du sila baan na ma bay tinugun niiya.
Si Isa nammuhan ga mulit na
(Matiyu 28.16-20; Malkus 16.14-18; Lukas 24.36-49)
19Na pag tapit saddop llaw ni llaw looy du siꞌ, bbuwatan siga mulit si Isa, lay tapuk sabap tawu sila ni siga pa-mmean Yahudi. Sugaꞌ minsan lay kunsiꞌ da lawang lumaꞌ mman da, sakayi da kasayu, luu na si Isa nangge ni tangngaan da. Yuk na ninsila, “Kasannangan ningkaam.” 20Pag-anu siꞌ, lay na sila pakitahan na ga limpaꞌ lansang ni tangan na sampay limpaꞌ budjak ni saddi na. Kuwan siga mulit na siꞌ tu, tud bay gāk pag ndaꞌ da luu na Papuꞌ da llum pabalik.
21Pag-anu siꞌ, lay na baw si Isa halling pabalik, “Kasannangan ningkaam. Yana meꞌ Mmaꞌ ku bay mapitu aku nohoꞌ masaplag umanat mahap, damikiyan, sohoꞌ ta na du kam ngalataan lahat masaplag.” 22Pus na halling meꞌ looy, lay na ya mahuwa napas na ninsila, boꞌ na halling, “Timaun bi na Rū Sutsiꞌ. 23Meꞌ kaam siga wakil ku, bong ina kam bay ngampun jama ni bay dusa da, malaingkan inampun du sila meꞌ Tuhan. Bong ina yaꞌ ampun bi, malaingkan niyaꞌ du sila inampun meꞌ Tuhan.”
Si Isa nammuhan si Tomas
24Na ni waktu looy siꞌ man si Isa bay patammu, luu disu ni mulit na bay kalikutan, yana si Tomas ma pinagdē si Kamba. 25Dari lay na du ya binaan meꞌ siga pagkahi na mulit, yuk da, “Lay kami la sitammu ka Papuꞌ tabi.”
Tampung si Tomas baw, “Oy na kam na! Bong niyaꞌ doꞌ bay takita ku limpaꞌ lansang ni tangan na sampay tasallok ku ka timbōꞌ ku, yaꞌ ku kuhi pitsayaꞌ. Maka subay doꞌ bay tapurut ku ka tangan ku limpaꞌ budjak ni saddi na boꞌ ku pitsayaꞌ.”
26Paddus jaꞌ siꞌ wawuꞌ ngallaw, lay na baw kumpo ga mulit si Isa njawom lumaꞌ pabalik sampay luu na du ndooy si Tomas. Kuwan siga lawang da, meꞌ sibuwa du lay kinunsiꞌ. Sugaꞌ san meꞌ looy, sakayi da kasayu, luu na baw balik si Isa nangge ni tangngaan da sambayan na halling, “Kasannangan ningkaam.” 27Pag-anu siꞌ, yuk na ni si Tomas, “Tu ko Nges. Ndaun na tangan ku, boꞌ sallokun na ka timbōꞌ nu, maka purutun na ka tangan nu limpaꞌ budjak ni saddi ku. Pitsayaꞌ na ko ba. Daa na ko hawal-hawalan.”
28Yuk si Tomas niiya, “Papuꞌ ta ko! Tuhan ta ko!”
29Pag tampung si Isa niiya, “Kau ina pitsayaꞌ noy luu na ku takita nu. Sugaꞌ labi gi sina mehe supaat njataꞌ sagannap ma pitsayaꞌ niyaku minsan ku yaꞌ bay takita da.”
Maksud kitab tuu bay sinuwatan
30Na ni hāl pabuwatan kahaylan-haylan bay pōꞌ si Isa ni pag-awpan ga mulit na, meka silay yaꞌ na bay sinuwatan ni kitab tuu. 31Sugaꞌ kasohean lay patabeꞌ ku ntuu supaya kam pitsayaꞌ si Isa yana Almasi, maka iya Anak Tuhan. Batan bong ina kam pitsayaꞌ na niiya, malaingkan koleꞌ kam kasampulnaan nyawa saumu-umu.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.