Yahiya 21

Kamintallu si Isa patammu ni siga mulit na

1Paddus daka dangoy ngallaw, lay na baw si Isa patammu ni siga mulit na ndooy ni tapiyan Danaw Tiberias. Meꞌ tuu salsila na: 2Ndooy siꞌ, luu ga si Saymon Pitel ka ga si Tomas ma pinagdē si Kamba, ka si Natanyel, lalla man Kana ndooy ni Jalil. Maka luu gi siga anak si Sibidi ka luu gi duwa pagkahi da mulit. 3Dari yuk si Saymon Pitel ninsila, “Padilawut doꞌ ku la.”

Yuk siga soheꞌ na baw siꞌ tu, “Ē, mmeꞌ kami ba.” Dari lay na siꞌ sila dutai taꞌ kumpit mukut. Sugaꞌ pupus na dambahangi sila bay ndooy, yaꞌ san luu bay takoleꞌ da.

4Pag kallat llaw, luu na baw si Isa nangge ndooy ni tapiyan, sugaꞌ yaꞌ bay tabista da ga iya na ndooy. 5Pag-anu siꞌ, lay na ya nginganan sila, yuk na, “Ū siga anak, luu du takoleꞌ bi?”

Pag tampung da siꞌ, “Niyaꞌ la luu.”

6Yuk si Isa, “Labuun bi doꞌ ba pukut bi pa kawnan man kumpit bi. Koleꞌ na sina kam.” Lai jaꞌ siꞌ, oy doꞌ ba, yaꞌ san tauwan da pukut da pa jawom kumpit tandaꞌ landuꞌ na eka daying da.

7Pag-anu siꞌ, mulit looy ma nganggalla dī na ilooy ma kaasean si Isa bay halling ni si Pitel, “Papuꞌ bilay hati siꞌ ilooy!” Pag lay takale si Pitel, ilooy ma magti du ya mamakoy pabalik batan bay ya ngurus mari ya sumunsayaꞌ buwat. Pag-anu, boꞌ na kupa pa jawom boheꞌ pilay pa mman si Isa. 8Kuwan ga mulit looy siꞌ kasohean, lay na du patuhut taꞌ kumpit da song pa bihing sambayan da nganggunut-gunut pukut da lapat meꞌ daying. Lawak-lawak da man bihing, ga dahatus ila du. 9Lay jaꞌ siꞌ sila duwai, ngita na sila daying tinunu taꞌ bā api. Maka luu gi tinapay.

10Yuk si Isa ninsila, “Moo na kam pitu daying bay takoleꞌ bi.”

11Dari lay na pabeleng si Pitel pa kumpit da nganggunut-gunut pukut da ka daying na pa bihing. Eka daying looy siꞌ dahatus limampuꞌ-tallu, mehe-mehe jaꞌ sikamimon. Sugaꞌ san meꞌ looy na siꞌ kalap daying looy, yaꞌ du bay geseꞌ pukut da.

12Pag-anu, yuk si Isa ninsila, “Tu na kam mangan.”

Na kuwan siga mulit na baw siꞌ tu, minsan tasayu da na iya na Papuꞌ, doman na pin baw sila masā bong tud iya na, sugaꞌ yaꞌ du baw luu bay nawakka. 13Pag-anu siꞌ, lay na si Isa ngaddoꞌ tinapay looy ka daying na boꞌ sinongan ninsila. 14Dari siꞌ, ilooy na kamintallu si Isa bay patammu ni ga mulit na paddus na bay pinakallum pabalik.

15Lupus jaꞌ siꞌ sila bay mangan, yuk si Isa ni si Saymon Pitel, “Saymon, anak si Yahiya, lumabi du kina aseꞌ nu niyaku man ni siga soheꞌ nu?”

Yuk si Pitel baw siꞌ tu, “Ohoꞌ Papuꞌ, katoonan nu du kaasean ta ko.”

Yuk si Isa, “Bong meꞌ naa, pakanun#(21.15) Hati na, sinohoꞌ tinoan sampay inayaran ni si Pitel siga pagkahi na ma mmeꞌ ni si Isa. sa siga bili-bili ku.” 16Pag-anu siꞌ, lay na baw ya nilaw balik, “Saymon, anak si Yahiya, kaasean nu du ku kina?”

Pag tampung si Pitel baw siꞌ tu, “Ohoꞌ Papuꞌ, katoonan nu du bina kaasean ta ko.”

Yuk si Isa, “Bong meꞌ naa, ipatun sa paayad siga bili-bili ku.”

17Pag-anu siꞌ, lay gi pinamintallu meꞌ si Isa nilaw, yuk na, “Saymon, anak si Yahiya, tud kaasean nu du ku kina?”

Si Pitel siꞌ tu, tud bay susa pagka min tallu na ya bay tinilaw. Dari yuk na, “Papuꞌ, katoonan nu du bina mimon-mimon. Maka katoonan nu du bina kaasean ta ko.”

Yuk si Isa, “Bong meꞌ naa, basta pakanun sa siga bili-bili ku. 18Baan ta ko banahan Saymon, bay jaman nu umu sumaddong, sumunsayaꞌ jaꞌ ko mamakoyan dī nu maka dari ko lumān paninggai-paninggai jaꞌ karomanan nu. Sugaꞌ pag ko ina mintu toa na, pinaggos sina ko ma-nnat siga langngon nu. Maka ni waktu looy ilay mintu, jama na mamakoyan kau maka binoo ko pa lugar ma yaꞌ karomanan nu.”#(21.18) Hantak bitsala si Isa, bbos-bbos pinaggos si Pitel ma-nnat langngon na nilansang taꞌ tehang. Hatiyan jama mamakoyan si Pitel, bbuwatan da musas iya. 19Ngkon si Isa bay mitsala meꞌ looy man na makitau bong pooy karuha kapatoy si Pitel ni sinōng, pamaehe bantug pa Tuhan. Paddus meꞌ looy siꞌ, yuk na ni si Pitel, “Mmeꞌ ko niyaku.”

20Dari lay du si Pitel mmeꞌ. Mulit looy pun ma kaasean si Isa lay na du mmeꞌ patuhut. Iya na silay mulit looy ma bay pasande-sande ni Papuꞌ Isa sasang da mangan bay sangom looy. Maka iya na du bay gi nilaw bong soy song nipu si Isa. Na pag teleꞌ si Pitel, takita na na ya patuhut. 21Dari yuk si Pitel ni si Isa, “Papuꞌ, pooy baw lay la ni lalla tee? Oy lay mintu katuwaꞌ niiya?”

22Pag tampung si Isa, “Bong ku doman llum na pin ya ngabut sampay ku pabeleng, ongoy subay na pin katoonan nu? Mmeꞌ jaꞌ ko ba niyaku.” 23Dari sabapan bay bitsala si Isa siꞌ, magpaꞌ-pāꞌ na aka ni siga sukuꞌ na pasal mulit looy yaꞌ na konoꞌ matoy. Mingkan siꞌ, saꞌ ga meꞌ looy bay halling si Isa. Arapun yuk na, “Bong ku doman llum na pin ya ngabut sampay ku pabeleng, ongoy subay na pin katoonan nu?”

24Na mulit looy siꞌ ma bay pinagbitsalahan, yana aku na situ ma nuntut mimon salsila tuu ma bay suwatan ku. Na kami itu sukuꞌ si Isa, katoonan kami bana sadjaꞌ mimon ituu ma bay tuntut ku siꞌ. 25Ni hāl pakaradjaan bay pabuwat si Isa, meka gi silay yaꞌ bay pinatabeꞌ ni kitab tuu. Bong siꞌ ilay bay sinuwatan labbasakayi, yaꞌ na taambat eka būk. Marean ta yaꞌ na tabuwat njawom junyaꞌ.

Currently Selected:

Yahiya 21: sjm

Highlight

Copy