Yahiya 4

Si Isa ka danda man Samariya

1Na song hallom, lay na baw kaakahan siga Parisi meka na jama mmeꞌ ni si Isa sampay lay na du pinandi meꞌ na. Boꞌ labi gi konoꞌ eka da man ni si Yahiya. 2(Ni sabana na, saꞌ si Isa bay mandi ga jama looy, arapun siga mulit na.) 3Pag katoonan si Isa bay kaakahan siga Parisi meꞌ looy, lay na ya palakka ka ga mulit na man Yahudiya, boꞌ da pabeleng pa Jalil. 4Lān da pilay, talpaksaꞌ sila pingkaꞌ man Samariya.

5Ndooy siꞌ ni Samariya, lay na sila nakka pa bihing disu daira inawnan Saykal, tapit pa tanaꞌ ma bay ndean meꞌ Nabi Yaꞌkub ni anak na si Yusup maruhuꞌ-ruhuꞌ. 6Ndooy siꞌ, luu tagaꞌ ndang bay kinali meꞌ Nabi Yaꞌkub. Pag taabut tangngaꞌ llaw, lay doꞌ si Isa pahali-hali ndooy sabap lamma na ya bay lumān tā. 7-8Kuwan ga mulit na, lay doꞌ pilay pa jawom daira malli balanjaꞌ.

Yaꞌ hallom, luu pōꞌ disu danda bangsa Samariya nganduk boheꞌ. Dari yuk si Isa niiya, “Mmeꞌ ku la nginum.” 9Yuk danda looy baw siꞌ tu, “Hati, kau bangsa Yahudi, ongoy baw taggahaꞌ ko nohoꞌ pinainuman niyaku? Aku bitu bangsa Samariya.” Ngkon na bay halling meꞌ looy sabap bangsa Yahudi tanyag yaꞌ kuhi maglamud ka bangsa Samariya.

10Pag tampung si Isa baw siꞌ tu niiya, “Bong siꞌ ina bay tasayu nu ladjikiꞌ ma pamuwan Tuhan, maka bong siꞌ tasayu nu bong soy tu ituu ma nohoꞌ pinainuman ningkau, gam pin kau gi siꞌ bay duhuꞌ maku inuman mman ku, boꞌ nu buwanan ku boheꞌ ma llum.”#(4.10) Hatiyan boheꞌ ma llum, yana Rū Sutsiꞌ ma pamuwan si Isa ni soysoy pitsayaꞌ niiya (ndaun Yahiya 7.38-39).

11Yuk danda looy baw siꞌ tu, “Tuwan, ndaꞌ ku bina yaꞌ san luu gayung nu, boꞌ lawom lagi tagaꞌ tuu. Bong siꞌ pinaamu, ninggai na baw man nu koleꞌ boheꞌ looy ma llum? 12Tagaꞌ tuu bitu bay pinusaka meꞌ Nabi Yaꞌkub ningkami. Iya mismu mag-anak-mpu sampay siga baanan hayop da lagi lay bay pingkaꞌ nginum boheꞌ tagaꞌ tuu. Ongoy, patingkat lagi ko kina man iya taggahaꞌ tabuwanan nu kami boheꞌ mas ayad lagi man boheꞌ tuu?”

13Pag tampung si Isa, “Boheꞌ tagaꞌ tuu bitu, san jama bay nginum, tohoꞌ gi du balik kallong da. 14Boꞌ boheꞌ ma pamuwan ku, bong jama bay kainum, yaꞌ na tohoꞌ kallong na pabalik. Batan boheꞌ ma pamuwan ku padari meꞌ karuha poon boheꞌ njawom atay jama. Niyaꞌ sina kuhi kumattaꞌ, boꞌ muwanan manusiyaꞌ lagi kasampulnaan nyawa saumu-umu.”

15Yuk danda looy, “Tuwan, buwanan teꞌ baw ba ku boheꞌ looy supaya ku yaꞌ na katohoan kallong pabalik. Dari yaꞌ na ku husaꞌ magbalik-balik pitu nganduk boheꞌ.”

16Yuk si Isa, “Pilay na ko. Kaddoun na doꞌ duhuꞌ lla nu, boꞌ bi pabeleng pitu.”

17Pag halling danda looy, “Yaꞌ bitu la luu lla ku.”

Yuk si Isa, “Bana du baw bilay siꞌ bay halling nu yaꞌ ko llahan. 18Batan san min lima na ko bay pingkaꞌ llahan, kuwan lalla ma soheꞌ nu dambuwaꞌ batnaa, saꞌ du lla nu. Sangkon, tud bana du bay bitsala nu.”

19Yuk danda looy, “Tuwan, bohoꞌ la tabista ku kau disu nabi. 20Pagka meꞌ naa, bong dari, luu tilaw ku ningkau. Ga kabboꞌ-bboan kami bangsa Samariya, bay man da numba Tuhan, taꞌ punu naa. Boꞌ kaam baw bangsa Yahudi, baꞌ-bāꞌ bi, subay ni Jerusalem man jama numba Tuhan. Bong kau, mamooy lay la tuwaꞌ?”

21Yuk si Isa, “Pitsayaꞌ ko Daꞌ ni bitsala ku. Yaꞌ na hallom, takka na sina mintu waktu bong jama numba Mmaꞌ tabi Tuhan, yaꞌ na puntukan bong taꞌ punu naa atawa ndooy ni Jerusalem. 22Kaam, bangsa Samariya, san ina kam numba, yaꞌ du katoonan bi Tuhan ma sumba bi. Boꞌ kami tu bangsa Yahudi, katoonan kami batan ni bangsa kami du man Tuhan bay malahil garaꞌ na nalamat manusiyaꞌ. 23Sibuwa bong jama numba, talpaksaꞌ subay sila pa tampat bay tinaat. Sugaꞌ batnaa tapit banahan na situ waktu saꞌ na meꞌ looy. Ilooy ya puntukan, basta hilas atay jama numba maka sumba da subay magbēꞌ ka kabanahan pasal Tuhan. Siga jama meꞌ looy ilay, sila na pinagpiha meꞌ Mmaꞌ tabi Tuhan numba iya. 24Tuhan ina yana rū. Luu jaꞌ sina ya nnoy-nnoy mman tabi. Sangkon meꞌ halling ku siꞌ, sagannap ma numba iya subay hilas atay da maka sumba da subay magbēꞌ ka kabanahan pasal iya.”

25Yuk danda looy baw siꞌ tu, “Katoonan ku luu du pōꞌ ni sinōng lalla ma bay inuwakilan meꞌ Tuhan magsultan saumu, yana Almasi. Pag luu jaꞌ ina ya mintu, iya sa mahatiyan kitabi mimon-mimon.”

26Sugaꞌ pag halling si Isa, “Ilooy bilay ma awnan nu Daꞌ, luu na mitsala ni awpan nu. Aku na situ.”

27Pag-anu siꞌ, ilooy ma takka na siga mulit na pabeleng. Pag ndaꞌ da luu danda soheꞌ na magbitsala, jayip sila. Sugaꞌ yaꞌ baw luu bay nawakka nilaw danda looy bong oy maksud na atawa nilaw si Isa bong oy sabap da magbitsala.

28Dari kuwan danda looy siꞌ tu, bbuwatan na lay jaꞌ mbanan na pangannaan boheꞌ na boꞌ na pabeleng pa daira. Pag takka na, yuk na ni siga jama ndooy, 29“Tu kam bi. Ndaꞌ tabi doꞌ pilay. Luu la ndooy lalla bay nunaꞌ mimon bay kadarihan ku. Batiꞌ ta iya na Almasi.” 30Dari jama man daira looy siꞌ lay na bahuklud pilay pa mman si Isa.

31Yaꞌ gi siꞌ sila takka, kuwan siga mulit si Isa, sigi-sigi ngalogos iya mangan.

32Sugaꞌ yuk na ninsila, “Luu du bitu makanan ku ma yaꞌ katoonan bi.”

33Yuk ga mulit na baw siꞌ tu padisu-padisu, “Uy la, luu kilay siꞌ bay moonan iya kinakan?”

34Sugaꞌ yuk si Isa ninsila, “Kinakan ku bitu yana mean kahandak ilooy ma bay nohoꞌ aku pitu maka mupus pabuwatan ma bay sinukuꞌ meꞌ na niyaku. 35Sarī sambung, saꞌ ba, bong kam bay na tanom, yuk bi, ‘Pag taabut mpat buwan, ngattom na kitabi?’ Sugaꞌ baan ta kam, batnaa na situ timpu man ngattom. Ndaun bi, alu na baanan ga jama naa luꞌ pitu. Ibaratan buwaꞌ pawoy, tahak na maka tahan sa kinattom.#(4.35) Hatiyan “tahan sa kinattom,” bukaꞌ na puad ga jama looy pitsayaꞌ ni si Isa. 36Dari batnaa tu, taabut na waktu siga tukang ngattom koleꞌ hasil da. Hasil da ina, yana sagannap ma taboo da koleꞌ kasampulnaan nyawa saumu-umu. Dari labba man ilooy ma bay tanom#(4.36a) Hatiyan “ilooy ma bay tanom,” yana soysoy ma duhuꞌ bay masaplagan jama pasal kasalamatan njataꞌ Almasi. sampay ilooy ma ngattom,#(4.36b) Hatiyan “ilooy ma ngattom,” yana soysoy kaboo jama mmeꞌ ni si Isa Almasi. Kuwan buwaꞌ ma bay kinattom, yana jama ma bay taboo mmeꞌ ni si Isa. gāk na sila saliꞌ-saliꞌ. 37-38Batnaa, sohoꞌ ta na kam ngattom san saꞌ kaam bay maghulas-sangsāꞌ tanom. Intong na, san saꞌ kaam bay duhuꞌ masaplagan jama, kaam na moo sila pa jawom okoman Tuhan. Dari tuwaꞌ pa kaam na sina sambatan ilooy ma yuk na, ‘Disu bay tanom, sarī baw ngattom.’ ”

39Na balik ta pa bangsa Samariya ni daira looy, meka na bay pitsayaꞌ ni si Isa sabapan tuntut danda looy ni kapasal si Isa bay nunaꞌ mimon bay kadarihan na maruhuꞌ. 40Dari pag takka da pilay pa mman si Isa, lay doꞌ ya saggaan da nohoꞌ pahantiꞌ mman da. Dari lay na doꞌ ya ndooy mman da duwa ngallaw. 41Pag lay jaꞌ takale da umanat na, meka gi bay pasampun pitsayaꞌ niiya. 42Dari halling da siꞌ man danda looy, “Saꞌ na situ sat ni bay tuntut nu man kami pitsayaꞌ niiya, batan kami na mismu lay na du kale bitsala na. Maka tabista kami na basta tud iya na tukang nalamat manusiyaꞌ.”

Si Isa ngulian anak disu pa-mmean ndiyoan sultan

43Na paddus jaꞌ siꞌ duwa ngallaw looy, lay na ga si Isa palakka lān da pawus pa Jalil, lahat man si Isa bay sulig. 44Njawom da siꞌ lumān, yuk si Isa ni siga mulit na, “Tabiat manusiyaꞌ ina bong inawnan nabi, yaꞌ hinasi ni lahat man na bay sulig.” 45Sugaꞌ pag takka da ndooy ni Jalil, lay gi du baw ya hinasi meꞌ siga jama lahat looy. Batan luu du sila bay ngita pabuwatan kahaylan-haylan bay pabuwat na ni paballangan ndooy ni Jerusalem.

46Pag-anu siꞌ, sasang si Isa masi ndooy ni Jalil, lay na baw ya pilay pa Kana, yana kawum man na bay pingkaꞌ madari boheꞌ pa tubaꞌ anggul. Na ndooy siꞌ, luu du disu kawum yaꞌ du lawak man Kana inawnan Kapelniyum. Boꞌ luu ndooy disu pa-mmean ndiyoan sultan. Luu anak na lalla tud basag saki na. 47Pag taaka pa-mmean looy siꞌ luu na si Isa bay moleꞌ pa Jalil lakka man Yahudiya, lay du ya pa mman si Isa nganjunjung nohoꞌ mmeꞌ niiya pa Kapelniyum ngulian anak na magkamatoy-matoy na.

48Yuk si Isa niiya, “Yaꞌ bitu kam kuhi pitsayaꞌ niyaku ngkod-ngkoran bi yaꞌ bay ngita aku mōꞌ siga sipat kawasa Tuhan.”

49Sugaꞌ amu-amu lalla looy nganjunjung, yuk na, “Ndūꞌ Tuwan, mmeꞌ na ko ba palūd pilay padpad yaꞌ gi matoy anak ku.”

50Tampung si Isa, “San ko ba moleꞌ na. Yaꞌ du silay matoy anak nu.”

Dari pagka pitsayaꞌ na lalla looy ni bitsala si Isa, ilooy ma lay na ya moleꞌ. 51Lān na siꞌ moleꞌ, lay na ya sinampang meꞌ siga tindog na. Yuk da niiya, “Kasay na la Tuwan anak nu.” 52Pag tilaw na bong sumilan bay koleꞌ anak na, yuk ga tindog na, “Lammun na bay lakka dilaw ga lisag disu tangngaꞌ llaw.” 53Pag-anu, ilooy ma taintom na na ilooy na bana waktu man si Isa bay māꞌ yaꞌ du matoy anak na. Dari labba man iya sampay na mimon jama lumaꞌ da, pitsayaꞌ na si Isa yana Almasi.

54Dari ilooy siꞌ yana pabuwatan kahaylan-haylan ni kaduwa na bay pōꞌ si Isa ndooy ni Jalil pag takka na man Yahudiya.

Currently Selected:

Yahiya 4: sjm

Highlight

Copy