മത്തായി 9
9
തളേരുബാദ പുടിച്ച ഒരു മയിച്ചെനെ ഏച്ചു ചാരിമാണ്ടു
1ഏച്ചു തോണിക്കത്തിച്ചു കടേലുന്റ ഇക്കരെകീന്റ തന്റ ചൊന്ത അങ്ങടിക്കു എത്തിത്തു. 2എമ്മടെക്കു കുറെ മയിച്ചെര തളേരുബാദ പുടിച്ച ഒരു മയിച്ചെനെ അയിനു കിടാന്തിന്ത പായോണ്ടെയെ അദുവാത്തെക്കു എടുത്തൊണ്ടു ബന്തരു. അയിരണ്ട നമ്പെലു മെലേഞ്ചിച്ചു ഏച്ചു തളേരുബാദ പുടിച്ച മയിച്ചെന്റൊന്റ: “ബാലിയകാറാ, ദയിരിയമായിരു, ഇഞ്ച പാപ്പത്തിനെ നാനു പൊറുത്തുതന്തുകീന്റെയ്” എന്റു പറേഞ്ചു.
3എന്റെങ്കി നേമകാറെരളിലി കുറെ മയിച്ചെര: “ഈ മയിച്ചെയ് ഈച്ചിരനെ മച്ചരപറേന്റൊയ്” എന്റു തങ്കട മനാത്തി നിനേച്ചരു.
4അയിരണ്ട മനാത്തില നിനേപ്പു ഗൊത്തുമാടിച്ചു ഏച്ചു അയിരണ്ടൊന്റ കേട്ടു: “എന്നെഗു നീങ്ക മനാത്തി ആഗത്തകാരിയമൊക്ക നിനേക്കിന്റെരി? 5‘ഇഞ്ച പാപ്പമൊക്ക പൊറുത്തുതന്തുകീന്റെയ്’ എന്റു പറേന്റെനോ അല്ല ‘ഏന്തെച്ചു നട’ എന്റു പറേന്റെനോ, ഏവെയ് എളുപ്പ? 6എന്റെങ്കി ബൂമിലി പാപ്പത്തിനെ പൊറുപ്പകീന്റ അദിഗാര മയിച്ചമഗെനാച്ചു ബന്തെങ്കു കീന്റെന്റു നീങ്ക ഗൊത്തുമാടുവബേണ്ടി നിങ്കക്കു നാനു കാട്ടിതന്റെയ്.” ഇങ്ങാണെ പറേഞ്ചൊണ്ടു അദു തളേരുബാദ പുടിച്ചെന്റൊന്റ: “ഏന്തെച്ചിച്ചു പായി എടുത്തൊണ്ടു ഇഞ്ച കുള്ളുക്കു പോഗു” എന്റു പറേഞ്ചു.
7അയിനു ഏന്തെച്ചൊണ്ടു തന്റ കുള്ളുക്കു പോനയ്. 8ഏനെ മെലേഞ്ച മയിച്ചെര പേടിച്ചുപോനരു. മയിച്ചെരക്കു ഇങ്ങാണത്ത അദിഗാരമൊക്ക കൊടുത്ത ഈച്ചിര ബലിയദെന്റു അയിര പറേഞ്ചരു.
ഏച്ചു മത്തായിനെ ബൊവുകെട്ടിയാവ ബുളിക്കിന്റു
9ഏച്ചു അവുടിന്തു പോനപ്പൊ മത്തായി എന്റ ഒരുത്തെയ് നിഗുദിപിരിക്കിന്റ ജാഗത്തി ഉളേച്ചിന്തെനെ മെലേഞ്ചു. ഏച്ചു അയിന്റൊന്റ: “എന്റൊന്റ ബാ” എന്റു പറേഞ്ചു. അയിനു ഏന്തെച്ചൊണ്ടു ഏച്ചുന്റ ബൊവ്വെ പോനയ്.
10അന്തിനേര ഏച്ചുമു അദുന്റ ബൊവുകെട്ടിയമു മത്തായിന്റ കുള്ളിലി തിന്റുകുടിച്ചിടുവ ഉളേച്ചിന്തരു. ആ ഗളിഗെലി നിഗുദിപിരിക്കിന്റെരളുമു പാപ്പകീന്റെരളുമാന ബലാബരി മയിച്ചെര ഏച്ചുന്റൊന്റ തിന്റുകുടിച്ചിടുവ ഉളേച്ചിന്തരു. 11അയിനെ മെലേഞ്ചിച്ചു പരീച്ചെമാരുവ ഏച്ചുന്റ ബൊവുകെട്ടിയണ്ടൊന്റ: “എന്നെഗു നിങ്കട ഗുരു നിഗുദിപിരിക്കിന്റെരണ്ടൊന്റമു പാപ്പകീന്റെരണ്ടൊന്റമു ഉളേച്ചൊണ്ടു തിന്റുകുടിച്ചിണ്ടു” എന്റു കേട്ടരു.
12അയിനെ കേട്ടിന്തിച്ചു ഏച്ചു അയിരണ്ടൊന്റ പറേഞ്ചു: “ബെടുപ്പായികീന്റെരക്കല്ല, ചുഗാകാണത്തെരക്കാന്റു ബയിദിയെനെകോണ്ടു ആവെച്ചകീന്റെയെയ്. 13‘നേരിച്ചെ കവുക്കിന്റെലിയല്ല, ബേറെകീന്റെരണ്ടൊന്റ ബാറുകത്തെലു കാട്ടിന്റെലിയാന്റു നാനു അയിച്ചിരിപണ്ടെയെയ്’ എന്റ ബാക്കുന്റ അറുത്ത എന്നെയെന്റു നീങ്ക പോച്ചു പടേമി. എന്നെഗെന്റെങ്കി നേരുകാറെളെയല്ല, പാപ്പകീന്റെരളെ ബുളിപ്പനാന്റു നാനു ബന്തുകീന്റെയെയ്.”
നോമ്പെടുക്കിന്റെനെപറ്റി ഏച്ചു പടേപ്പിക്കിന്റു
14ഓഗെന്നാനുന്റ ബൊവുകെട്ടിയ ഏച്ചുവാത്തെക്കു ബന്തിച്ചു അദുന്റൊന്റ ഇങ്ങാണെ കേട്ടരു: “പരീച്ചെമാരുവമു നാങ്കളുമു നോമ്പെടുക്കിന്റയില്ല. ഇഞ്ച ബൊവുകെട്ടിയ എന്നെഗു നോമ്പെടുഗരു?”
15ഏച്ചു അയിരണ്ടൊന്റ പറേഞ്ചു: “കനിയളചിക്കെയ് ഒന്റ ഇപ്പടെക്കു ആ ജൊദേയളല ചങ്കടപടുവൊരു? എന്റെങ്കി കനിയളചിക്കെയ് അയിരളെ ബുട്ടുക്കപോന്റ ചമേയ ബരുവൊയ്, എമ്മടെക്കു അയിര നോമ്പെടുപ്പൊരു.
16പാ കുപ്പെയത്തില കീറിന ജാഗ കുത്തുവബേണ്ടി ആരുമു പുദിയ ചിന്തെന്റ കണ്ട എടുഗരു. അങ്ങാണെ ചെയിദെങ്കി കുത്തിന്റ പുദിയ ചിന്തെ കണ്ട പാ ചിന്തെലിന്തു ബലിഞ്ചിച്ചു പാ ചിന്തെ മുല്ലെലിയെങ്കിന്തു അദിഗമായി കീറിപോവൊയ്.
17അങ്ങാണെതന്നെ പുദിയ മുന്തിരിങ്ങെനീരു ആരുമു പാ കലാത്തെക്കു ബാക്കിബെയ്യരു. അങ്ങാണെ ബാക്കിബെച്ചെങ്കി പുദിയ മുന്തിരിങ്ങെനീരു പാ കലാത്തിനെ ഉടേച്ചുകാന്റു ഓഗിപോവൊയ്. കല ആഗദാവനുമു ചെയിവൊയ്. അയിനെകോണ്ടു പുദിയ മുന്തിരിങ്ങെനീരു പുദിയ കലാത്തിയാന്റു ബാക്കിബെക്കൊണ്ടെയെയ്. അങ്ങാണെ ചെയിദെങ്കി രാണ്ടുമു ബെടുപ്പായിപ്പൊയ്.”
നമ്പെലുകീന്റെരളെ ഏച്ചു ചാരിമാണ്ടു
18ഏച്ചു അയിരണ്ടൊന്റ പറേഞ്ചുകിടാന്തൊണ്ടിപ്പടെക്കു ജൂദപള്ളില അദിഗാരിയാന ഒരുത്തെയ് അദുവാത്തെക്കു ബന്തു. അദു ഏച്ചുന്റ മുല്ലെലക്കെ മണ്ടികുത്തിക്കൊണ്ടു അദുന്റൊന്റ: “ഇമ്മത്തേ, എന്റ മഗ കുറെമുല്ലെ ചത്തുപോന. എന്റദെമു നീ ബന്തിച്ചു അവോണ്ട മുഗാളെക്കു കയി ബെച്ചെങ്കി അവോക്കു പിന്നെമു ഉഗിരു ബരുവൊയ്” എന്റു പറേഞ്ചു .
19ഏച്ചു ബിരേന്റു ഏന്തെച്ചൊണ്ടു തന്റ ബൊവുകെട്ടിയളെമു കൂട്ടികോണ്ടു ആ അദിഗാരിന്റൊന്റ പോയിത്തു.
20-21എമ്മടെക്കു പന്തിരാണ്ടു കാലമാച്ചു ചോരെപോന്റ ബരുത്തത്തി കട്ടപ്പണ്ട ഒരു പെണിയത്തി ഏച്ചുന്റ ബൊവ്വക്കെ പോന. ഏച്ചുന്റ കുപ്പെയമെങ്കില തൊട്ടെങ്കി തന്റ ബരുത്ത ചാരിയാവൊയ് എന്റു അവൊ മനാത്തി നിനേച്ചൊണ്ടു ഏച്ചുന്റ ബൊവ്വക്കെ പോച്ചു അദുന്റ കുപ്പെയത്തിന്റ കോടിനെ തൊട്ട.
22ഏച്ചു അവോളെ തിരിഗിമെലേഞ്ചൊണ്ടു അവോണ്ടൊന്റ: “ഇമ്മത്തമ, ദയിരിയമായിരു. നീ നമ്പിനെനെകോണ്ടു ചാരിയാനെ” എന്റു പറേഞ്ചു. അങ്ങാണെ ആ ചമേയതൊട്ടു അവോണ്ട ബരുത്ത ചാരിയാനയ്.
23പിന്നെ ഏച്ചു പള്ളിയദിഗാരിന്റ കുള്ളുക്കു എത്തിനപ്പൊ അവുടെ ചീനി ഊദിന്റെരളെമു ബലാമായി ഗാരിട്ടൊണ്ടു കിരേന്റെരളെമു മെലേഞ്ചു. 24അദു അയിരണ്ടൊന്റ: “ഒക്കായിമു പുറാത്തെക്കു പോമി, പെണ്ണു ചാവകാണി. അവൊ റാങ്കിന്റൊ” എന്റു പറേഞ്ചു. എന്റെങ്കി അയിര അദുനെ കളിയാക്കിനരു. 25ഏച്ചു മയിച്ചെരളെയൊക്ക പുറാത്തെക്കു ചൊല്ലിബുട്ടുകാന്റു പെണ്ണു കിടാന്തിന്ത അഗാത്തെക്കു പോയിത്തു. എന്റിച്ചു ആ പെണ്ണുന്റ കയിപുടിച്ചു. ബിരേന്റു ആ പെണ്ണുമറി ഉഗിരുകീന്റവൊളാച്ചു ഏന്തെച്ച. 26ഈ കാരിയ ആ നാടുപരാക്ക അറിഞ്ചരു.
കുറുടെരളെ ഏച്ചു ചാരിമാണ്ടു
27ഏച്ചു അവുടിന്തു പോനപ്പൊ കണ്ണുകണ്ടുബാരത്ത രാണ്ടു മയിച്ചെര: “ദാവീദുന്റ മഗെനേ, എങ്കടൊന്റ ബാറുകത്തെലു കാട്ടൊണു” എന്റൊണ്ടു ബലാമായി അയ്യബുളിച്ചൊണ്ടു അദുന്റ ബൊവ്വെയെ പോനരു.
28അദു കുള്ളുക്കു എത്തിനപ്പൊ ആ കുറുടെരമു അദുവാത്തെക്കു ബന്തരു. എമ്മടെക്കു ഏച്ചു അയിരണ്ടൊന്റ: “എനാക്കു നിങ്കളെ ചാരിമാടുവ പറ്റുവൊയ് എന്റു നീങ്ക നമ്പിന്റെരിയോ” എന്റു കേട്ടു. അയിങ്കു അയിര: “നാങ്ക നമ്പിന്റ കിണ്ണ കറുത്താവേ” എന്റു പറേഞ്ചരു.
29എമ്മടെക്കു ഏച്ചു അയിരണ്ട കണ്ണുനെ തൊട്ടൊണ്ടു: “നീങ്ക നമ്പിനപല്ലെതന്നെ ഈ കാരിയ നടാക്കൊട്ടു” എന്റു പറേഞ്ചു. 30ബിരേന്റു അയിരക്കു കണ്ണുകണ്ടുബന്തയ്. “ഈ കാരിയമൊക്ക ആരുന്റൊന്റമു പറേവനാഗയ്” എന്റു ഏച്ചു അയിരണ്ടൊന്റ പറേഞ്ചു. 31എന്റെങ്കി അയിര ആ നാടില ഒക്കാ ജാഗത്തെക്കുമു പോച്ചു ഏച്ചു ചെയിദെനെപറ്റി പറേഞ്ചരു.
ബായികൂറത്ത ഒരു മയിച്ചെനെ ഏച്ചു ചാരിമാണ്ടു
32ഏച്ചുമു അദുന്റ ബൊവുകെട്ടിയമു അവുടിന്തു പോവടെക്കു കുറെ മയിച്ചെര പേയിപുടിച്ചെനുമു ബായികൂറത്തെനുമാന ഒരു മയിച്ചെനെ ഏച്ചുവാത്തെക്കു കോന്തരു. 33ഏച്ചു അയിന്റ മേലിലിന്തു പേയിനെ ഉദുക്കിത്തു. എമ്മടെക്കു ആ ബായികൂറത്തെയെയ് പറേഞ്ചുകിടാന്തയ്. ഏനെ മെലേഞ്ചിച്ചു മയിച്ചെര അന്തബുട്ടൊണ്ടു: “ഇങ്ങാണത്ത ഒരു കാരിയ ഇച്ചുറായേലു നാടിലി ഒരുന്നമു മെലേവകാണി” എന്റു പറേഞ്ചരു.
34എന്റെങ്കി പരീച്ചെമാരുവ: “പേയണ്ട നേദാവാന ബേച്ചബൂലു#9.34 ബേച്ചബൂലു എന്റെയെയ് ചൂടേലെപേയിന്റ ബേറൊരു പേരാന്റു. പേയിനെകോണ്ടാന്റു ഏനു പേയളെ ഉദുക്കിന്റെയെയ്” എന്റു ഏച്ചുനെ കളിയാക്കി പറേഞ്ചരു.
നല്ലബാക്കു പറേന്റെര അദിഗമായി ബേണു
35ഏച്ചു ഒക്കാ അങ്ങടികായെമു കുന്റുകായെമൊക്ക പോവനുമു ഒക്കാ ജൂദപള്ളിലിമു നെരേയളെ പടേപ്പിപ്പനുമു ചെയിദു. ഈച്ചിരന്റ നാടുനെപറ്റികീന്റ നല്ലബാക്കുനെ അദു മയിച്ചെരക്കു പറേഞ്ചുകാട്ടികൊടുത്തു. നെരേയണ്ട ഒക്കാ കട്ടമു ബരുത്തമു അദു ചാരിമാടുവനുമു ചെയിദു. 36കട്ടപ്പണ്ടെരളെമു ചഗായിപ്പ ആരുമു കാണത്തെരളുമു മെലേഞ്ചിച്ചു ഏച്ചുക്കു ബാറുകത്തിനയ്. ആ നെരേയ ആടുകാറെയ് കാണത്ത ആടുവളെപല്ലെ ആയിന്തരു. 37അയിരളെ മെലേഞ്ചൊണ്ടു ഏച്ചു തന്റ ബൊവുകെട്ടിയണ്ടൊന്റ പറേഞ്ചു: “ഇമ്മലെമി, കൊയിവ ബലാബരികീന്റൊയ്. എന്റെങ്കി പണിക്കാറെര കുറേവാന്റു. 38അയിനെകോണ്ടു ബയേലുന്റ ഉടേയക്കാറെന്റൊന്റ കൊയിവകീന്റ പണിക്കാറെരളെ ചൊല്ലിബുടുവബേണ്ടി പുറാത്തിമി.”
Currently Selected:
മത്തായി 9: റാവുള
Highlight
Share
Copy
Want to have your highlights saved across all your devices? Sign up or sign in
New Life Computer Institute
