uYoohani 4

UYeesu akuyanga nu mwantanda uMusamaliya

1Pe aVhafalisaayi vhahiivwa kuuti uYeesu akwozya avhantu nu kuvha na vhasundikwa avhinji kuluusya uYoohani uMwozyi. 2Ileelo uvhwanalyoli uYeesu atahozyaga, nkandi avhasundikwa vhaakwe vhe vhahozyaga. 3Lwe uYeesu aamanya kuuti inongwa izyo zyakumuha, aheepa mu shigavho isha nsi isha Yudeeya pooka na vhasundikwa vhaakwe ahasogola mu shigavho isha nsi isha Galilaaya. 4Lwe vhakusogola mu Galilaaya, uYeesu na vhasundikwa vhaakwe vhahanzilwaga kutuushila mu nsi iya Samaliya. 5Pe vhahafiha mu nsi iya Samaliya, mu nkaaya ye vhahatinji iSikaali. Inkaaya iyo yáamile papiipi nu mugunda we uYaakobu ámupiiye umwana waakwe uYoosefu.#4:5 uVhwandilo 48:22 6Ipo páamile ishifula she vhahatinji ishifula isha Yaakobu. Lwe izuvha lyafiha pi itwe, uYeesu ahatendama pa luvhazu pa shifula isho, inga atuuzye uvhulisu vhwe ájenzite uvhulendo uvhutali.

7Pe ahinza umwantanda wumo uMusamaliya kutapa aminzi, uYeesu ahamuvhuuzya ahati, “We maayi, nkulaavha aminzi aga kumwela.” 8Ahavhaliilizyo iho avhasundikwa vhaakwe vhápezile vhasogooye mu nkaaya kukala ishaakulya. 9Pe umwantanda uyo ahamwamula uYeesu ahati, “Iwe we Muyuuda, niine ne Musamaliya! Shikusukumizya nkaani kulaavha aminzi ku kwane.” Áyanzile vhwevhulo, mwe pe aVhayuuda vhatahivwanaga na Vhasamaliya.#4:9 AVhayuuda vhatahivwanaga na Vhasamaliya: Amazwi ge gatantuliilwe ishi, lumo kwe kuuti, AVhayuuda vhatahaliilaga, poosye kumwelela iviliilo vwe aVhasamaliya vhaliliiye, poosye kumwelela. 10UYeesu ahamwamula ahati, “Inga waamanyile she uMulungu akwanza kuukupa, havhili kuuti wu naanu we akukulaavha aminzi aga kumwela, waamile undaavhaje, niine naamile inkupanje aminzi ge gakuuvhapa avhantu uvhulanzi.” 11Umwantanda uyo ahamwamula uYeesu ahati, “We mwene, iwe utali nu lukusa, poosye ishiliilo isha kutapila aminzi, havhili ishifula ishi shivhiiye nkaani, ishi kwe ugaaje kwoshi aminzi igo ge gakuuvhapa avhantu uvhulanzi? 12Utaata wiitu uYaakobu ahaatupa ishifula ishi she ahamwelaga na vhaana vhaakwe, pooka ni visugwa vwakwe. Vhuli, ukuyilola kuuti iwe we mupiti kuluusya uweene?”

13Pe uYeesu ahamwamula ahati, “Umuntu wonti we akumwela aminzi ge gakufuma mu shifula ishi, akwumilwa ni shinyooto havhili. 14Ileelo umuntu we akumwela aminzi ge ine nkuumupa, te ahuumilwe ishinyooto havhili. Aminzi ge ine nkuumupa, galiivha inza ishiduda isha minzi muhati yaakwe she shitakwuma naalumo nu kuumupa uvhulanzi uvhwa shiima.” 15Pe umwantanda uyo ahamulaavha uYeesu ahati, “We mwene, nkukulaavha umpe aminzi ge ukugayanga, inga ishinyooto shitandumaje. Havhili intahinze kutapa aminzi pa shifula ipa!”

16UYeesu ahamwamula ahati, “Sogoola umwite umulume waaho, uyinze nawo ipa.” 17Umwantanda uyo ahamwamula ahati, “Ine ntimaliilwe.” UYeesu ahamwamula ahati, “Wayanga mwe muumwo kuuti utimaliilwe! 18Nkuyanga vhwevhulo, mwe pe wímaliilwe na vhanaavuli vhasaano, woope umwanaavuli we ukutendama nawo ishi, te mulume waaho. Ipo wayanga zya nalyoli.” 19Umwantanda uyo ahamwamula uYeesu ahati, “We mwene, ishi naamanya kuuti iwe we mukuvhwi. 20Avhataata vhiitu vhahamupuutaga uMulungu mwi igamba ili ilya Geliziini,#4:20 Mwi igamba ili ilya Geliziini: AVhasamaliya vhahitihaga kuuti vhakwanzilwa kumupuuta uMulungu mwi igamba ili mu nsi yaavho. Kuli izyo, vházenzile inyumba yaavho imfinjile ukwo. Vhaazya iNkumbushizyo izya Ndajizyo 11:29. Ileelo aVhayuuda vhahahomelezyaga kuuti uMulungu ávhalajiziizye kuuti vhamupuutaje kwe ku Yelusaleemu vhweleele. Vhaazya 2 iMbombo izya Havhaliilizyo 6:6. ileelo imwe mwe Vhayuuda mukuti tusogolaje kumupuuta uMulungu ku Yelusaleemu. Vhuli, uvhwanalyoli vhuli kwoshi?”

21UYeesu ahamwamula ahati, “We maayi, yitiiha zye nkuyanga kuuti zya nalyoli, ahavhaliilizyo hakwinza he te muhamupuutaje uTaata mwi igamba ili, poosye ku Nyumba iMfinjile iya ku Yelusaleemu. 22Imwe mwe Vhasamaliya mukumupuuta uMulungu we mutamumanyile, ileelo iswe twe Vhayuuda tukumupuuta uMulungu we tumumanyile, mwe pe alivhapoha avhantu kutuushila ku Vhayuuda. 23Ahavhaliilizyo hakwinza, havhili hafisile he avhantu vhe vhakumupuuta uMulungu mu vhwanalyoli, vhalimupuutaga uTaata inza vwe uMupepo waakwe akuvhalongola kumupuuta uweene inza vwe wa nalyoli. UTaata uMulungu akuvhalondola avhantu vhe vhakumupuuta kwi idala ilyo. 24UMulungu Mupepo, avhantu vhe vhakumupuuta, vhakwanzilwa kumupuuta inza vwe uMupepo waakwe akuvhalongola kumupuuta uweene mu vhwanalyoli.” 25Umwantanda uyo ahamwamula uYeesu ahati, “Imanyile kuuti uMeesiya akwinza, we vhakuti uChilisiti. Havhili imanyile kuuti inga ayinza, alitumanyisya zyonti.” 26Pe uYeesu ahamwamula ahati, “Ine ne nkuyanga niiwe, we we wuyo we iwe ukumuyanga.”

27Ahavhaliilizyo iho, avhasundikwa vhaakwe vhahagaluha kufuma kwe vhásogooye, vhahasukumila nkaani lwe vhaalola uYeesu akuyanga nu mwantanda uyo.#4:27 Vhahasukumila nkaani lwe vhaalola uYeesu akuyanga nu mwantanda uyo: Avhasambiilizi avha Vhayuuda vhatahitishilwaga kuyanga na vhantanda lwe vhali vheeka, inkaani kuyanga nu mwantanda umujeni. Ileelo atáliipo umusundikwa inga wooka we ámuvhuziliziizye uYeesu kuuti, “Ukwanza ishooni ku kwakwe?” Poosye kuuti, “Shooni she ukuyanga nawo?”

28Umwantanda uyo ahayileha insonta yaakwe iya minzi pepaala, ahasogola mu nkaaya iya Sikaali. Lwe aafiha mu nkaaya iyo, ahavhavhuuzya avhantu ahati, 29“Tujende mumwenye umuntu we ambuuzya zyonti zye nkavhombaga. Vhuli, umuntu uyo angavha wu Chilisiti we tukumusuuvhila kuuti akwinza?” 30Lwe avhantu vhiivwa izyo, vhaheepa mu nkaaya iyo, vhahanda kusogola kwe uYeesu áamile.

31Lwe avhantu vhaala vhashiili kufiha, avhasundikwa vhaakwe vhahamulaavha vhahati, “We Musambiilizi, nzaaga ulye ishaakulya.” 32Ileelo uweene ahavhaamula ahati, “Ine indi ni shaakulya ishamwavho she imwe mutashimanyile.” 33Pe avhasundikwa vhaakwe vhahanda kuvhuzilizanya vheeka kuuti, “Vhuli, kuli umuntu we ayinzile kuumupa ishaakulya lwe tutaliipo?” 34UYeesu ahavhaamula ahati, “Ishaakulya shaane ine, kwe kuvhomba ulukasamo ulwa Taata we ansonteleziizye kumaliilizya imbombo yaakwe. 35Imwe mukuyanga mukuti, ‘Gasyala ameezi gane vhweleele kufishila ahavhaliilizyo aha mvuno.’ Ileelo ine nkuvhavhuuzya kuuti, te vwe zili. Yeenyi amagunda vwe gali, iviyavho vweleeye, yikwanzilwa vivunwe. 36We akuvuna akuposheela amalipilo gaakwe. Akuvhungaaniha mu shanga shaakwe vwe avunile, kwe kuuti uvhulanzi uvhwa shiima. Kuli izyo, we akuvhwala na we akuvuna vhonti vhaliseshela pooka.#4:36 We akuvhwala na we akuvuna vhonti vhaliseshela pooka: UYoohani uMwozyi ávhwaye imbeyu, ahavhaliilizyo iha uYeesu ali kuvuna. Ivivunwa, vhasundikwa avhinji vhe vhakumwitiha. 37Galiipo amazwi ge gakuti, ‘Umuntu wumo akuvhwala, uwamwavho akuvuna.’ Amazwi iga ga nalyoli. 38Ine návhasonteleziizye imwe kuvuna vwe mutávhwaye. Avhantu avhanji vhávhomvile imbombo yonti ingomu. Imwe mukulyaga ilonka kuzya mbombo yaavho.”

AVhasamaliya avhinji vhakumwitiha uYeesu

39AVhasamaliya avhinji avha mu nkaaya yiila iya Sikaali vhahamwitiha uYeesu, mwe pe vhívuuye zye umwantanda ula áhomesheziizye kuuti, “Umuntu uyo ambuuzya zyonti zye nkavhombaga.” 40Lwe aVhasamaliya vhaala vhaafiha pe uYeesu áali, vhahamulaavha nkaani kuuti atendame pooka navho, woope ahiitiha, pe ahatendama mu nkaaya iyo insiku zivhili. 41Ahavhaliilizyo honti iho, avhantu avhinji nkaani vhahamwitiha uYeesu ku ziila zye ahayangaga. 42Vhahamuvhuuzya umwantanda uyo vhahati, “Ishi twamwitiha umuntu uno, te ku ziila zyeka zye utuvhuziizye, nkandi twamwitiha, mwe pe twivwa sweneeswe zye akuyanga. Havhili twamanya kuuti, nalyoli umuntu uno we Muposhi uwa nsi.”

UYeesu akumuponia umwana uwa mulongozi

(uMataayi 8:5-13; uLuuka 7:1-10)

43Lwe insiku zivhili zyatuuha, uYeesu aheepa mu nkaaya iya Sikaali nu kusogola mu shigavho isha nsi isha Galilaaya. 44UYeesu ápezile avhavhuziizye avhasundikwa vhaakwe atili, “Umukuvhwi atakushindikwa na vhantu avha ku mwavho.” 45Avhantu avha mu shigavho isha nsi isha Galilaaya vhahamuposheela ahinza, mwe pe vhoope vhásogooye ku Yelusaleemu ku shikulukuulu isha Pasaaka, ukwo vhávhwenyi zyonti zye uYeesu ávhomvile.

46Pe uYeesu ahasogola havhili mu nkaaya iya Kaana ye yáali mu shigavho isha nsi isha Galilaaya. Mu nkaaya iyo mwe ágaluliinye aminzi kuvha divaayi. Kwáli umulongozi wumo uwa silikaali mu nkaaya iya Kapelanawuumu we umwana waakwe umwanaavuli áali muvhinu. 47Umulongozi uyo ahiivwa kuuti uYeesu ayinzile havhili mu shigavho isha nsi isha Galilaaya, kufuma mu shigavho isha nsi isha Yudeeya. Ahasogola kwa Yeesu nu kumulaavha nkaani kuuti asogole ku nkaaya iya Kapelanawuumu kumuponia umwana waakwe, mwe pe ávhinile nkaani, asyaye hansi kufwa. 48UYeesu ahamwamula umulongozi uyo ahati, “Mwe vhantu imwe, vhuli, mutanganiitiha ishisita kulola ivilolesyo ni zya kusukumizya?” 49Pe ahamwamula uYeesu ahati, “We mwene, nkukulaavha, tujende umuponie umwana waane she ashiili kufwa.” 50Ileelo uYeesu ahamuvhuuzya ahati, “Sogoola kuhaaya umwana waaho aponile.” Umulongozi uyo ahiitiha izwi lye uYeesu ámuvhuziizye, pe ahanda kusogola ku kwakwe.

51Lwe umulongozi uyo ali mwi idala akujenda, ahahomaana na vhavhomvi vhaakwe. Vhahamuvhuuzya vhahati, “Umwana waaho aponile, mwinza vhweleele.” 52Pe ahavhavhuziilizya avhavhomvi vhaakwe ahati, “Aaponile kufuma lii?” Avheene vhahamwamula vhahati, “Aaponile kufuma mawiila umusanya lwe izuvha lyateguha.” 53Pe uyise uwa mujaaha uyo ahamanya kuuti umwana waakwe aaponile kufuma ahavhaliilizyo hehaala he uYeesu aamuvhuziizye kuuti, “Umwana waaho aponile.” Pe umulongozi uyo pooka na vha mu nyumba yaakwe, vhahamwitiha uYeesu. 54Ishi sháamile shilolesyo isha vhuvhili she uYeesu ávhomvile mu shigavho isha nsi isha Galilaaya, lwe aafuma mu shigavho isha nsi isha Yudeeya.

Currently Selected:

uYoohani 4: nih

Highlight

Copy