uLuuka 12

Insoshi kuzya shifumbo

(uMataayi 10:26-27)

1Ahavhaliilizyo iho, avhantu amashumi na mashumi vhahavhungaana kumutejeelezya uYeesu. Vháamile vhinji nkaani, vhahahanyanaga nu kuhanyana lwe vhakusejeelela ku kwakwe. Pe uYeesu ahavhavhuuzya suuti avhasundikwa vhaakwe ahati, “Muvhe minso ni shifumbo isha Vhafalisaayi, mwe pe shikukumuha inza umulembo uwa kuluzizya#12:1 Umulembo uwa kuluzizya shintu isha kwenjela amakaati. Mu hansi iha, izwi ilyo kwe kuuti, imbombo imbiivhi izya Vhafalisaayi zye vhakuvhambushizya avhanji. vwe wukusaata. 2Ahavhaliilizyo hakwinza he zyonti zye zizyihiime ziliivha apazelu, havhili zyonti zye zili kukwilu zilivumbuha. 3Vhwevhulo, zyonti zye mukuyanga ku shiisi, ziliyivwiha apazelu. Havhili, zyonti zye mukunongʼonelana kwi iziiho, vhalizikumusya apazelu.”

UMulungu weeka we akwanzilwa kumwogopa

(uMataayi 10:28-31)

4UYeesu ahajendeelela kuyanga kuuti, “Imwe vhamanyani vhaane, nkuvhavhuuzya kuuti, mutavhogopaje vhe vhakugoga we muvhili vhweleele, havhili inga vhaagoga shitaliipo ishinji naashimo she vhangavhomba. 5Ileelo imbavhuuzye we mukwanzilwa kumwogopa. Mumwogopaje uMulungu, mwe pe uweene inga amugoga umuntu, ali na maha havhili aga kumusumbila kwi ipalaazya ilya mwoto uwa shiima! Nalyoli nkuvhavhuuzya kuuti, uyo we mukwanzilwa mumwogopaje!

6“Vhuli, utudunduulu tusaano vhatakukazya ku mpiiya nyinsi vhweleele? Ileelo poosye vhwevhulo, uMulungu atakuhaluvwa inga hooka. 7Ileelo imwe uMulungu azivhaziizye poosye ni nsisi izya mu matwe giinyu. Pe ishi, mutogopaje, mwe pe imwe mwe vha nsavho kuluusya indunduulu inyinji.”

Kumwitiha uYeesu poosye pilongolela ilya vhantu

(uMataayi 10:32-33; 12:32; 10:19-20)

8“Nkuvhavhuuzya kuuti, umuntu wonti we akuvhavhuuzya avhantu, kuuti akundandata ine, niine ne Mwana wa Aadamu ndimuvhuuzya uMulungu na vhahavhizya vhaakwe, kuuti uyo mulandati waane. 9Ileelo umuntu wonti we akuhaana kuniitiha pilongolela ilya vhantu, niine ndimuhaana pilongolela ilya Mulungu na vhahavhizya vhaakwe. 10Umuntu wonti we akunjanjila amazwi amavhiivhi ine ne Mwana wa Aadamu, aliswilwa. Ileelo we akumusaamula uMupepo uMufinjile, te ahaswilwe.

11“Lwe vhavhatwala kuvhalonga mu masinagoogi, poosye pilongolela apa vhe vhakukonzya na vha maha avhanji, mutogopaje kuuti muliyaamula ishooni, poosye kuuti muliyanga ishooni. 12Ahavhaliilizyo iho uMupepo uMufinjile alivhamanyisya zye mukwanzilwa kuyanga.”

Ishiholanyo isha dumbwe umupukupuuku

13Umuntu wumo mwi ivhungaana liila ahamuvhuuzya uYeesu ahati, “We Musambiilizi, muvhuuzye umunine waane kuuti angavhile ivintu ivwa vhupwano, vwe utaata wiitu átulesheeye.” 14UYeesu ahamwamula ahati, “We muntu we, wu naanu we ambiisile ine, kuvha ne mwamuzi wiinyu, poosye kuvha ne mugavhe uwa vhupwano vhwinyu?” 15Pe ahavhavhuuzya avhantu vhonti ahati, “Muvhe minso! Muleshe kupapila ivintu, mwe pe uvhulanzi uvhwa muntu vhutakufumiilana nu vhwinji uvhwa vintu vwe ali navwo.”

16Pe ahavhavhuuzya ishiholanyo ishi ahati, “Páali udumbwe wumo, we umugunda waakwe iviyavho vweleeye nkaani. 17Ahasiivha mu mwoyo waakwe ahati, ‘Ntali na pa kusengula iviyavho vwane ivi! Ishi kuuti nkonzye vhuli?’ 18Pe ahati, ‘Kwe nti: Kwe imongole ivwanga vwane, nu kuzenga inkoma impiti nkaani. Umwo mwe kuuti nsengule iviyavho vwane vwonti ni vintu vwane ivinji. 19Ipo pe ndivhuvhuuzya umwoyo waane ndiiti, “Ishi uli ni vintu ivwinji ivwinza vwe kuuti vilimushe amaaha aminji. Pe ishi, tuzyaga nu kulya nu kumwela nu kuseshela.”’ 20Ileelo uMulungu ahamuvhuuzya ahati, ‘We mupukupuuku iwe! Uvhusiku uvhwa ileelo ili kuuti ufwe! Ivintu vwonti vwe uyivhishiiye, kuuti vivhe vwa naanu?’

21“Isho vwe yiliivha, kwa muntu wonti we akuvhungaaniha ivintu ivwinji, ishisita kuvhomba zye zikumuhondezya uMulungu.”

Kumusuuvhila uMulungu

(uMataayi 6:25-34)

22Pe uYeesu ahavhavhuuzya avhasundikwa vhaakwe ahati, “Ishi, nkuvhavhuuzya kuuti, mutayitamwaje ni zya vhulanzi vhwinyu kuuti kwe mulye ishooni, poosye ni zya mavhili giinyu kuuti kwe muzwale ishooni. 23Nkuvhavhuuzya vhwevhulo, mwe pe uvhulanzi vhuli ni nsavho kuluusya ishaakulya, woope umuvhili wuli ni nsavho kuluusya amenda. 24Yeenya amagwangwale, gatakuvhwala poosye kuvuna, havhili gatali ni nkoma poosye inga pooka pe gasenguuye iviyavho, ileelo poosye vhwevhulo uMulungu akugaliisya. Vhuli, imwe mutali ni nsavho nkaani pilongolela ilya Mulungu kuluusya inyunyi izyo? 25Wu naanu muli imwe we kuyitamwa kwakwe kungonjezya uvhulanzi vhwakwe poosye isaala inga lyoka? 26Ishi, inga mukupootwa kuvhomba ishintu shinsi inza isho, pe shooni she mukuyitamwa ni zinji?

27“Yeenya uvhwezya vwe vhukubaalula. Vhutakuvhomba imbombo poosye kusona amenda aga kuzwala. Ileelo nkuvhavhuuzya kuuti, poosye umwene uSolomooni nu vhushindamu vhwakwe vhwonti, atázwaye ahinza naalumo amenda nu kuhondela inza uvhwezya uvhwo! 28Ishi inga uMulungu akugazwalizya amatundu aga mwi ilaala inza isho, poosye she gakuhondela ku havhaliilizyo hansi vhweleele, indaavhi gakusumbwa mu mwoto, vhuli, atangavhazwalizya ahinza nkaani imwe? Mukusukumizya ku lwitiho lwinyu ulunsi.

29“Pe ishi, mutayitamwaje kuuti kwe mulye ishooni, poosye kuuti kwe mumwele ishooni, havhili muleshe kuvha na maganigani. 30Nkuvhavhuuzya isho, mwe pe avhantu vhe vhatamumanyile uMulungu vhakulondola nkaani ivintu vwonti ivwo, ileelo imwe uTaata wiitu amanyile kuuti mukuvwanza! 31Imwe muvhulondole uvhumwene uvhwa Mulungu,#12:31 Muvhulondole uvhumwene uvhwa Mulungu: Amazwi iga te kwe kuuti uvhumwene uvhwa Mulungu vhuteezile, poosye kuuti vhuzyihiime, inga tuvhulondole, kwe kuuti tukwanzilwa kuyifumwa nu kumushindiha uMulungu ahavhaliilizyo honti mu vhulanzi vhwitu. Havhili lumo kwe kuuti, uYeesu akutusambiilizya vwe yikwanzilwa kulandila fwe swe vhantu vha Mulungu, atakutusambiilizya vwe tukwanzilwa kuvha swe vhantu vha Mulungu. pe ivwo vwonti mulipeelwa.

32“Mutogopaje, imwe mwe muli impuga inyinsi, mwe pe uTaata wiitu uwa ku mwanya asungwilwe kuuvhapa uvhumwene vhwakwe. 33Mukazye ivintu vwinyu, muuvhape avhapiina impiiya. Kuvhomba isho kwe kusengula vwenevwo mu nkoma iya ku mwanya ye yitakupunguha, ukwene inkoma zitakulala. Havhili ataliipo umwivha we akupalamila kwivha poosye uluswa, lwe lukunanganya. 34Kwe mukusengula ivwuma vwinyu, kwe amooyo giinyu galisivhililaga ahavhaliilizyo honti.”#12:34 uMataayi 6:19-21

Muvhanje minso

35“Insiku zyonti muvhanje muyisengiinye kuvhomba imbombo, zyope inyaale zyinyu zyahaje. 36Muvhanje inza avhazya vhe vhakumuguliilila umwene waavho we akuvhwela kufuma ku winga, kuuti inga aafiha nu kwiguzya pa mulyango, vhamwigulile ahavhaliilizyo hanaaho. 37Vhalosiitwe avhazya vhe umwene waavho inga ayinza, alivhaaga vhadamuuye. Nalyoli nkuvhavhuuzya kuuti, aliyisengaanya kuvhavhombela, alivhiita vhatendame nu kuuvhapa ishaakulya. 38Vhalosiitwe avhazya ivho vhe umwene waavho inga ayinza pa vhusiku pahati poosye lwe kukuvhambunkana, alivhaaga vhadamuuye. 39Ileelo mumanye ahinza kuuti uwa nyumba inga amanyile ahavhaliilizyo he umwivha akwinza, nkandi akuguulila, inga amudinde atahapankule inyumba yaakwe. 40Pe ishi, niimwe muyisenganyaaje ahavhaliilizyo honti, mwe pe ne Mwana wa Aadamu ndiyinza ahavhaliilizyo he mutasuvhiiye.”

Ishiholanyo isha mwimiilizi umutungamu

(uMataayi 24:45-51)

41Pe uPeeteli ahamuvhuziilizya ahati, “Mwene, ishiholanyo ishi, ukutuvhuuzya iswe sweka, pamo ukuvhavhuuzya avhantu vhonti?” 42UMwene ahamwamula ahati, “Pe ishi, wu naanu umwimiilizi umutungamu, havhili uwa njeele? Uyo we umwene waakwe alimuvhiiha kuvha mwimiilizi uwa vhamwavho, alivhapanga ishaakulya ahavhaliilizyo he hakwanzilwa. 43Alosiitwe umuvhomvi uyo we lwe umwene waakwe akuvhwela kufuma kwe aashuuye, akumwaga akuvhomba zye ámulajiziizye. 44Nalyoli nkuvhavhuuzya kuuti, umwene uyo alimuvhiiha umuvhomvi uyo kuvha mwimiilizi uwa vintu vwakwe vwonti. 45Ileelo inga umuvhomvi uyo asiivha mu mwoyo waakwe kuuti, ‘Umwene waane ahaavha kuvhwela,’ nu kutaliha kuvhahoma avhavhomvi avhamwavho, nu kulya nu kumwela, nu kuholwa, 46umwene waakwe alivhwela isiku na havhaliilizyo he umuvhomvi waakwe atasuvhiiye. Pe aliimupa isunde ipiti nu kumuvhiiha pooka na vhe te vhatungamu.

47“Umuzya we amanyile zye umwene waakwe akwanza, ileelo akuleha kuyisengaanya kumuposheela, havhili atakuvhomba zye umwene waakwe akwanza, aliihomwa nkaani. 48Ileelo umuzya we atamanyile zye umwene waakwe akwanza, inga avhomba havhiivhi, uyo ataliihomwa nkaani. Umuntu wonti we vhamupiiye ivwinji, uyo aliyanzilwa kugalusya ivwinji, woope we vhamupiiye ivwinji nkaani, aliyanzilwa kugalusya ivwinji nkaani.”

Uvhulugu kufumiilana nu lwitiho

(uMataayi 10:34-36)

49“Ninzile mu nsi umu kwasya umwoto, havhili nanzaga kuuti vhuvhanje vhutalisile kwaha! 50Niine ndi na mayimba ge nkwanzilwa kutuushila, kwe njendeelele kuyimba nkaani mu mwoyo waane, kufishila kuuti galunjishe. 51Mukusiivha kuuti ninzile kuleeta uvhutehamu mu nsi? Ndaali! Nkuvhavhuuzya kuuti, ninzile kuleeta uvhulugu. 52Kwandila ishi, mu nyumba mwe muli avhantu vhasaano, kuuti vhalehaanaje, vhatatu kuuti vhivwanaje pooka nu kuvhaleha vhavhili, vhoope vhavhili kuuti vhivwanaje pooka nu kuvhaleha vhatatu. 53Utaata alizilanaga nu mwana waakwe umwanaavuli, woope umwana umwanaavuli alizilanaga nu taata waakwe. Umaayi alizilanaga nu mwana waakwe umwantanda, woope umwana umwantanda alizilanaga nu maayi waakwe. Woope unyinavwala alizilanaga nu muha mwana waakwe, woope umuha mwana alizilanaga nu nyinavwala waakwe.”

Kumanya ahavhaliilizyo na zye zikwanzilwa kuvhombeha

(uMataayi 16:2-3)

54UYeesu ahavhavhuuzya havhili avhantu avha mwi ivhungaana liila, ahati, “Inga mwalola amavhingo gakuvhungaana mukuti, ‘Imvula yikwanza kutoonya,’ nalyoli yikutoonya. 55Havhili inga mwalola inkungu yikufuma ku luvhazu ulwa kuntende mukuti, ‘Kukwanza kuvha ilunguula,’ nalyoli likuvha.#12:55 Mu nsi iya Vhaisilayeeli, inkungu kufuma ku luvhazu ulwa kuntende na ku luvhazu ulwa kulutala yihaleetaga ilunguula. 56Imwe mwe vhashifumbo, mumanyile kumanyinsanya ivilolesyo ivwa kumwanya, ishi, shooni she mukupootwa kumanyinsanya kuuti zye zikuvhombeha insiku izi zikulolesya ishooni?”

Kwivwana nu mulonjeelezi

(uMataayi 5:25-26)

57“Shooni she mutakusaavhula kuvhomba ingolosu? 58Lwe uli mwi idala, we akulonjeleeye akukutwala kwi ilonjelwi, kwashi kumulaavha kuuti mwivwane nawo. Ishisita kuvhomba isho, kwe akutwale kwi ilonjelwi, ukwo ulilongwa nu kukungwa ku maha mu jeela. 59Nkukuvhuuzya kuuti, muhati mu jeela umwo te uhaafume naalumo ishisita kumala kulipa vwonti vwe ukwanzilwa kugalusya!”

Currently Selected:

uLuuka 12: nih

Highlight

Copy