uLuuka 14
14
UYeesu akumuponia umuvhinu isiku ilya Sabaato
1Isiku limo ilya Sabaato, uYeesu ásogooye kulya ishaakulya mu nyumba iya mupiti wumo uwa Vhafalisaayi. Ahavhaliilizyo he áali muumwo, aVhafalisaayi na vhanji vhahamwuvhililaga kuuti vhalole vwe kwe avhombe pi isiku ilya Sabaato.
2Pilongolela pa Yeesu, páali umuntu wumo we áamile nu vhuvhinu uvhwa mvimba. 3Pe uYeesu ahavhavhuziilizya aVhafalisaayi na vhasambiilizi avha ndajizyo ahati, “Vhuli, indajizyo izya Moose zikwitishila kuponia avhantu pi isiku ilya Sabaato?” 4Avheene vhahapuuma mwaa. Pe uYeesu ahamupalamansya umuvhinu uyo, ahamuponia, ahamwitishila kuuti asogolaje.
5Pe uYeesu ahavhavhuziilizya ahati, “Wu naanu muli imwe, we inga umwana waakwe, poosye ingʼombe yaakwe yagwila mu shifula isiku ilya Sabaato, atangayifumwa?” 6Avhantu ivho, vhatahavha ni lya kumwamula.
Uvhutesi nu vhwahayiisye
7UYeesu ahenyaaga avhajeni vhe vhávhalanjiiye ku mulyo vwe vhahasevhaga amatengo aga vhapiti. Pe ahavhavhuuzya ku miivhi ahati, 8“Inga umuntu akulanjiiye ku winga, utafishilaje kutendama pa vitengo ivwa vhapiti. Nkuyanga vhwevhulo, mwe pe ungaaga umuhaaya lumo amulanjiiye umupiti uwunji kuluusya iwe. 9Inga ayinza we avhalanjiiye imwe mwenti, nu kukuvhuuzya iwe kuuti, ‘Musegushile uno pe utendiime,’ pe uliilola insoni nkaani, lwe ukusogola kutendama apa vhantu avha pansi.
10“Ileelo inga vhakulanjila, ufishilaje mu matengo aga vhantu avha pansi. Pe inga ayinza we akulanjiiye, akuvhuuzye kuuti, ‘We mumanyani waane, nzaaga utendame apinza ipa apa vhapiti.’ Ipo pe uvhupiti vhwaho vhuliloleha pilongolela pa vhonti vhe vhavhalanjiiye. 11Nkuvhavhuuzya vhwevhulo, mwe pe umuntu wonti we akuyizuvwa, uMulungu alimwisya. Ileelo umuntu we akuyiisya, uMulungu alimuzuvwa.”
12Pe uYeesu ahamuvhuuzya we ámulanjiiye ahati, “Lwe ukuvhalanjila avhantu ku mulyo uwa musanya, poosye uwa hamazuuvha, utavhalanjilaje avhamanyani vhaaho, poosye avhanine vhaaho, poosye avhantu avha mu luho lwaho, poosye avhapalamani vhaaho vhe vhe vhadumbwe. Utavhalanjilaje avhantu inza ivho, inga vhoope vhatahinze vhakulanjile kuzya kukugalusizya zye wávhavhombeeye. 13Lwe ukusengaanya umulyo, uvhalanjilaje avhapiina na vhantendya na vhantonko. 14Pe niiwe uliivha nu vhuloote, mwe pe ivho vhatali ni vintu ivwa kukugalusizya. UMulungu we alikugalusizya, ahavhaliilizyo he alivhazyusya avhagolosu.”
Ishiholanyo isha mulyo uwa winga
(uMataayi 22:1-10)
15Wumo mu vhaala vhe vhávhalanjiiye lwe ayiivwa amazwi aga Yeesu, ahamuvhuuzya ahati, “Alosiitwe, umuntu we aliilya umulyo mu vhumwene uvhwa Mulungu!” 16UYeesu ahamwamula ku shiholanyo ahati, “Páali umuntu wumo, we ásengiinye umulyo umupiti, ahavhalanjila avhantu avhinji. 17Ahavhaliilizyo aha mulyo lwe haafiha, ahamusonteelezya umuvhomvi waakwe ku vhe ávhalanjiiye, kuuti avhavhuuzye ati, ‘Nzagaaji, ivintu vwonti nsengiinye!’
18“Ileelo vhonti vhe ávhalanjiiye, vhahati te vhasogole. Wumo ahati, ‘Nkazile umugunda, nkwanzilwa insogole kuvhwenya. Umfwile uvhwila te ninze.’ 19Uwamwavho ahati, ‘Nkazile inkambaku 10 izya kulimila, nkwanzilwa insogole kuzilinga. Umfwile uvhwila te ninze.’ 20Woope uwamwavho ahati, ‘Nimaaye shiniishi vhweleele, kuli izyo ntanginza.’
21“Umuvhomvi uyo ahagaluha, ahamuvhuuzya zyonti umwene waakwe. Pe umwene uyo ahaviitwa, ahamuvhuuzya umuvhomvi waakwe ahati, ‘Luvhiilo sogoola mu mbalaabala na mu madala aga mu nkaaya ino, uvhaleete ipa avhapiina na vhe vhalemaaye na vhantonko na vhantendya.’
22“Pisinda, umuvhomvi uyo ahagaluha, ahamuvhuuzya ahati, ‘We mwene, zye undajiziizye nazivhomba, ileelo uvhuzilo vhuli she vhusyaye.’
23“Umwene ahamuvhuuzya ahati, ‘Ishi! Sogoola kunzi ku nkaaya, mu mbalaabala na mu madala ge gakusogola mu nkaaya, na mu ntala, uvhalambiilizye avhantu vhinze, inyumba yaane yiizule. 24Nalyoli nkuvhavhuuzya imwe kuuti, muli ivho vhe naavhalanjiiye ku vhwandilo, ataliipo we kuuti alye umulyo we ine nsengiinye!’”
Uvhugomu uvhwa kuvha we mulandati uwa Yeesu
(uMataayi 10:37-38)
25UYeesu ahajendaga pooka ni ivhungaana ipiti ilya vhantu. Pe ahavhashevhela, ahavhavhuuzya ahati, 26“Umuntu wonti we akwanza kundandata ine, akwanzilwa kunkunda ine kuluusya kumukunda uyise nu nyina nu mushi waakwe na vhaana vhaakwe na vhanine vhaakwe avhanaavuli na vhantanda. Havhili akwanzilwa kunkunda ine kuluusya vwe akuyikunda wuuyo. 27Umuntu wonti we akwanza kundandata ine, ayikungule, ayiitishe amayimba, poosye nu kufwa.#14:27 Ayikungule, ayiitishe amayimba, poosye nu kufwa: IShiyunaani shikuti, Anyatule ishihovhenkanyo shaakwe. Inga atakuvhomba vhwevhulo, atangavha mulandati waane.
28“Tuti, kuli umuntu wumo kuli imwe we akwanza kuzenga inyumba. Angataliha kuhonzya vhuli suuti? Akwanzilwa kutaliha suuti kusivhiilila ivintu vwonti vwe vikwanzilwa kuzenjela nu kwenya impiiya zye ali nazyo, inga zingaamala imbombo iyo. 29Inga atavhomba vhwevhulo, anginza azenje lwe lwalo vhweleele, apootwe kumaliilizya. Pe vhe vhakutuuha mwi idala nu kwenya, vhande kumuseha 30kuuti, ‘Umuntu uno aatalisile kuzenga, ileelo aposiitwe kumaliilizya!’
31“Poosye tuti kuli avhamwene vhavhili vhe vhakwanza kulwa. Wumo ali na vhasikaali 10,000 vhweleele, uwamwavho ali navho 20,000. Vhuli, uwa vhasikaali 10,000 atakutendama suuti kusivhiilila vwe kuuti alwe nu kumupoota we ali na vhasikaali 20,000? 32Inga aalola kuuti kwe apootwe, akusonteelezya avhatuuli vhaakwe, vhasogole kutonta kwa mwene uwamwavho she ali ukutali, kuuti vhivwane.
33“Vwe zili na kuli imwe. Ataliipo nuumo kuli imwe we akwanzilwa kuvha mulandati waane, inga atavilesile vwonti vwe ali navwo.”
Ishiholanyo isha ivheeya
(uMataayi 5:13; uMaaliko 9:50)
34“Ivheeya shintu shinza, ileelo inga lyasuupa, shiliipo she shingalinonia? 35Ivheeya inza ilyo, litangavha ni mbombo ku ntope iya kuvhwalila, poosye kuvha shintu isha kuvunzya umugunda. Nalyoli likuvha lya kwita vhweleele. We ali na makutwi, atejeelezye!”
Currently Selected:
uLuuka 14: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
