Apostolkuéra 2
2
Pe Pytu Porãmbáva oñeñohẽ
1Ha og̃uahẽvo pe arete, hérava Pentecóstes, oĩmbaite oñembyatyhápe peteĩ tendápe,
2ha ho’a sapy’a yvágagui peteĩ tyapu yvytu hatãvaicha ha omyenyhẽmba pe óga oguapyhápe hikuái,
3ha ojehechauka tatarendy oñemyasãiva kũicha peteĩteĩ iñakã ári.
4Ha opyta henyhẽmba hikuái Pytu Porãmbávagui ha oñepyrũ oñe’ẽ tetã ambueygua ñe’ẽme, pe Pytu Porãmbáva ome’ẽ háicha peteĩteĩme oñe’ẽ hag̃ua.
5Upéramo oiko Jerusalénpe heta Judaygua ojeroviáva Ñanderuetére, onaceva’ekue ambue tetãme, ko’ã Judaygua ouva’ekue opaite tetã oĩva guive ko yvy apéregui, (areteguasúpe).
6Ha ojehu ramo guare ko tyapu kóva, hetaiterei oñembyaty upépe ha ipy’andýi opytávo peteĩteĩva ohendúvo iñe’ẽteépe oñe’ẽ ramo.
7Ha’ekuéra oñemondýi ha ohecharamoite ha he’i hikuái: Ma’ẽmi, opaite ko’ã oñe’ẽva, ndaha’éi piko Galiléaygua.
8Mba’éicha rupi piko ñahendu ichupekuéra oñe’ẽ ramo pe ñe’ẽ ñanace haguépe:
9Partiaygua ñe’ẽme, Mediaygua, Elamgua, Mesopotamiaygua, Judaygua, Capadociaygua, Pontoygua, Asiaygua,
10Frigiaygua, Panfiliaygua, Egiptoygua, Libiaygua, Cirene ypypegua ha umi Romaygua ko’ápe oikóva;
11ore Judaygua ha tetã ambueygua ojeroviáva avei Judayguakuéra Jára Jahve rehe, rohendupa joa umi mba’eguasu Ñanderuete ojapova’ekue.
12Ipy’andyipa hikuái ha ndoikuaái mba’épa upe oikóva, upévare oĩ umi he’íva: Mba’épa he’ise ko’ã mba’e;
13ambuekuéra katu oñembohoryhápe he’i: Oka’upa joa ningo hikuái víno he’ẽme.
14Upérõ Pédro, umi 11 apostolkuéra ndive hatã oñe’ẽ ha he’i ichupekuéra: Kuimba’e Judaygua ha opaite Jerusalengua peikuaáke ha pejapysaka porã che ñe’ẽ rehe.
15Ko’ã kuimba’e ko’ãva ningo ndoka’úi peẽ peimo’ã háicha, ndaijyvatéi gueteri pe kuarahy, 9 hóra ramovahína.
16Oikónte umi mba’e pe proféta Joel he’iva’ekue:
17Ñanderuete voi he’i: Umi ára pahápe Che añohẽta che Pytu Porãmbávagui opaite tetãyguakuéra ári, ha pende ra’ykuéra ha pende rajykuéra oprofetizáta ha pende karia’ykuérape ojehechaukáta ipayetépe (visiónpe) umi mba’e Ñanderuete ohechaukaséva ichupekuéra ha umi ikaraietémava ohecháta ike pegua.
18Ha che rembiguái kuimba’e ha kuña ári añohẽta umi árape che, Pytu Porãmbávagui, ha oprofetiza joáta umi árape.
19Ha ahechaukáta milagrokuéra yvate ára rehe ha yvy apére oikóta techaukahakuéra: Tuguy, tata ha tatatĩ,
20pe kuarahy oñemoambuéta iñypytũmba peve, ha jasýgui oikóta tuguy, ko’ã mba’e oikóta Hesu Crísto ára ojajaipáva og̃uahẽ mboyve.
21Ha ojehúta: Opaite umi ohenóiva Hesu Crísto réra ojesalváta, (Joel 3,1-5).
22Peẽ kuimba’e Israel peguáva, pehendu ko’ã ñe’ẽ: Ñanderuete ningo omboaje Hesu Nazaretguápe pende apytépe: Pu’aka, milagrokuéra ha umi techaukahakuéra Ha’e ojapoukava’ekue pende apytépe Hesu rupi, peẽ voi peikuaa porã ko’ã mba’e.
23Ko Hesu kóvape Ñanderuete voi omoĩva’ekue pende pópe, ha Romayguakuéra rupi, oikuaa’ỹva Moises rembiapoukapykuéra, peẽ peclavava’ekue ichupe kurusúre omano hag̃ua. Opaite ko’ã mba’e Ñanderuete oikuaa porã voi oiko mboyve, ojehu katu Ha’e oipotágui.
24Ñanderuete katu omoingove jevy ichupe, ku kuña imembymbotáva ohasa asy háicha imemby hag̃ua, péicha Hesu ohasa asyeterei avei, umi ñemano sã jára katu ndaikatúi ojoko ichupe.
25David ningo he’iva’ekue voi hese: Ahechámi Ñanderuetépe tapia che renondépe, Ha’e oĩgui che yke akatúape ani hag̃ua avave chemomýi.
26Upévare che py’apy ovy’aite, ha che juru opurahéi torypaitépe, che ro’o jepe opytu’úta oha’ãrõ aja ijeroviahápe.
27Nderehejamo’ãigui che ánga aña retãme, ha Nde nderehejamo’ãi avei pe Heko Porãva retekue oñembyai hag̃ua.
28Nde rehechauka chéve pe tekove rape, ha Nde chemyenyhẽta vy’águi aĩ aja ne renondépe, (Salmokuéra 16,8-11).
29Che ryvykuéra, pehejami chéve ta’e porã peẽme ñande ru David rehe, peẽ peikuaa porã voi ha’e omano rire oñeñotỹ hague ha ko’ág̃a peve ityvy oĩ ñande apytépe.
30Ha’e ningo peteĩ profetakue, ha Ñanderuete ome’ẽ ichupe iñe’ẽ, peteĩ iñemoñare oguapyva’erãha iguapyhaguasúpe.
31Davídpe ojehechaukáma voi Hesu Crísto oñemoingove jevytaha, ha’e he’imava’ekue avei ñandéve Hesu ndopytava’erãiha omanomava’ekue retãme ni hetekue noñembyaiva’erãiha.
32Ñanderuete voi omoingove jevy Hesu Crístope, ha ore roikóma opaite ko’ã mba’e techahare ramo.
33Ñanderuete ningo omboguapy ichupe ijakatúape ha Ha’e ome’ẽ avei Hesúpe promésa pe Pytu Porãmbáva outaha, ha ko’ág̃a Hesu oñohẽma avei pe Pytu Porãmbáva tetãyguakuéra ári.
34David ndojupíri yvagakuérape. Ha’e voi he’i: Ñanderuete he’i che Járape: Eguapy che akatúape,
35che ambopoguy ha amoĩ meve nde py guýpe opaite nderehe ija’e’ỹvape, (Salmokuéra 110,1).
36Israel retã, eikuaa porãke, pe Hesu peẽ pemosãingova’ekue kurusúre, Ñanderuete omoingove jevýma oiko hag̃ua Ñandejára ha ñande Salvador (Mesías) ramo.
37Ohendúvo ko’ã mba’e ojepy’ajopy joa hikuái, ha oporandu Pédro ha umi ambue apostolkuérape: Ore ryke’ykuéra, mba’e piko rojapóta.
38Pédro he’i ichupekuéra: Peñembyasy peiko vai haguére, pejevy Ñanderuete rendápe ha peteĩteĩva tojebautizauka Hesu Crísto rérape, Ha’erupínte ojepe’akuaa pene rembiapo vaikue (angaipa) ha oñeme’ẽva’erã peẽme pe Pytu Porãmbáva oporosãmbyhýtava.
39Peẽme g̃uarã, pene ñemoñarenguérape g̃uarã ha tetã ambueyguakuérape g̃uarã oñeme’ẽ avei ko promésa Pytu Porãmbáva rehegua, opaite umi ohenóiva guive Ñanderuetépe.
40Ha heta ambue ñe’ẽ rupi Pédro omyasãi Hesu Crísto evangélio, ha oikuaauka ichupekuéra he’ívo: Peheja Ñanderuete tapendesalva ko’ã tekove vai ko’ãvagui.
41Ha umi iñe’ẽrendu ha ogueroviáva iñe’ẽ ojebautizauka ha péicha oike Hesu Crísto Iglésiape 3.000 hermanokuéra rupi.
42Ha’ekuéra oiko umi apóstol ombo’e haguéicha ichupekuéra, ha oñembyatývo oiko peteĩ ñe’ẽme ha peteĩ py’apyetépe, oñembo’e, ocena oñondive ha ho’u avei pe céna Hesu Crísto reheguáva (céna del Señor).
Péicha oikova’ekue ñepyrũme umi ojeroviáva Hesu Crístore
43Opavavete ohecharamo joa heta milágro ha techaukaha oikóva apostolkuéra rupi.
44Opaite ojeroviáva guive oñembyaty peteĩ tendápe, ha opaite mba’e oguerekóva guive ojupe g̃uarã meme.
45Ha ovende ijyvy ha imba’ekuéra, ha oñemboja’o hikuái ojoapytépe peteĩteĩ oikotevẽ háichante.
46Ha meme árape oñembyaty hikuái peteĩ py’ápe Ñanderuete rogaguasúpe ha ocena ha ho’u pe céna Hesu Crísto reheguáva oñembyaty ramo avei hogakuérape vy’apópe ha py’a porãme oñondive.
47Ha’ekuéra omomba’eguasu Ñanderuetépe, hetãyguakuéra ohayhúgui ichupekuéra, ha Ñanderuete ombojoapy joapyve umi ojesalvava’erãva.
Currently Selected:
Apostolkuéra 2: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
