Éxodo 1
1
Israelguakuéra ohasa asy Egípto retãme
1Ko’ã Israel ra’ykuéra oikeva’ekue Jacóbo ndive Egípto retãme, peteĩteĩ oike hogayguakuéra ndive:
2Ruben, Simeon, Levi, Juda,
3Isacar, Zabulon, Benjamin,
4Dan, Neftali, Gad ha Aser.
5Jacóbo ñemoñaréva guive ohupity 70. Jose oĩma voi Egíptope.
6Ha Jose omano, ityke’yrakuéra ha ijaveguakuéra avei.
7Ha Israel ñemoñarenguéra katu oñemoña ha oñemboheta hetave, oñemombareteve ohóvo, ha omyenyhẽmba Egípto retãpy tuichakue.
8Ha umi árape opu’ã Egíptope peteĩ tetã ruvicha pyahu ndoikuaáiva Josépe; ha he’i hetãyguakuérape:
9Pema’ẽ porãke, umi Israel ñemoñare hetave, ha imbaretevéma ñandehegui ohóvo.
10Ko’ág̃akena, jaiporu hesekuéra arandu, ani hag̃ua oñembohetave ohóvo ha ani péicha hágui oikórõ ñorãirõ mba’e oñemoirũ hikuái umi ñanderehe ija’e’ỹva ndive ha ojeity ñandeári, ha oho jevy hikuái ñane retãgui.
11Upévagui omoĩ hi’arikuéra tahachi ruvichakuéra ojopy hag̃ua ichupekuéra ha omomba’apo hag̃ua umi táva faraon omopu’ãukasévape: Piton ha Rameses, oñeñongatu hag̃ua hy’upyrãita.
12Ha ojopyvéma ramo hendivekuéra, ko’ýte oñemoña ha oñembohetave ohóvo, ha umi Egiptoygua okyhyje Israel ñemoñarenguéragui.
13Upévare umi Egiptoygua ojopy mbareteve Israel ra’ykuérape omohembiapo pohýi hag̃ua tembiguái reko poguýpe.
14Ha tembiguái rembiapo pohýi iróva ojapouka ichupekuéra, ojapoukávo ladríllo ha opaichagua tembiapo kokue pegua; Egiptoyguakuéra ojapouka Israelguakuérape opaichagua tembiapo ipohýiva.
15Ha pe Egípto retã ruvichaguasu oñe’ẽ umi kuña Israelgua omomembývape, peteĩ héra Sífra, ha ambue Púa, ha he’i ichupekuéra:
16Umi kuña Israelgua imemby ramo mitãkuimba’e pejuka ha kuña ramo peheja toikove.
17Ha umi oporomomembýva katu okyhyje Ñanderuetégui, ha ndojapói Egípto retã ruvicha rembipota, oheja uvei hikuái oikove avei umi mitãkuimba’e.
18Upévagui Egípto retã ruvicha ohenoiuka Sífra ha Púape ha he’i ichupekuéra: Mba’érehe piko pejapo ko’ã mba’e, peheja oikove umi mitãkuimba’e.
19Ha Sífra ha Púa he’i faraónpe: Israel kuñakuéra ndaha’éi umi kuña Egiptoyguáicha; ha’ekuéra tuicha ha imbarete, ore rog̃uahẽ mboyve hendapekuéra imemby jepéma hikuái.
20Upévare Ñanderuete ojapo mba’e porã umi oporomomembývape; ha Israel retã oñembohetave ha oñemombareteve ohóvo.
21Sífra ha Púa okyhyjégui Ñanderuetégui, Ha’e omboheta avei imemby teévape.
22Upémaramo faraon he’i hetãyguakuérape: Peity Nílo ysyrýpe mayma Israel mitãkuimba’e onacéva guivépe, mitãkuña katu peheja toikove.
Currently Selected:
Éxodo 1: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
