Éxodo 12
12
Pe páscua (jehasa)
1Ñanderuete oñe’ẽ Moises ha Aarónpe Egípto retãme, ha he’i ichupe:
2Ko jasy kóva ha’éta peẽme g̃uarã pe jasy peteĩha, ko jasy kóvape oñepyrũta peáño.
3Peñe’ẽ mayma Israelgua atýpe pejévo: Ko jasy pegua ára 10-hápe oimeraẽ túva, ojapyhýta peteĩ ovecha ra’yrusu hógape g̃uarã.
4Ha hogaygua imbovyeterei ramo ha ndo’upamo’ãi ramo pe ovecha ra’yrusu, upéicharamo ha’e ha hóga ykeregua hi’ag̃uivéva ndive ojapyhýta peteĩ ovecha ha oñondive ho’úta opa peve; upévagui ojepapa raẽva’erã hogayguakuéra ojekuaa porã hag̃ua mboýpa ho’úta ichugui.
5Pe tymba oñekuave’ẽséva ndoguerekoiva’erã ijehe mba’eve ivaíva, máchova’erã ha oguerekova’erã peteĩáño ha pe’ukuaa ovecha térã kavara.
6Ko jasýpe peñongatúta pe ára 14-ha peve, ha mayma Israelgua ijatýva ojukava’erã pe ka’arupytũ mboyvemi.
7Ha pe óga pekaruhápe pemonáta pene rymba ruguykuépe mokõive okẽ horcon ha pe víga hi’arigua rehe.
8Ha pe pyharépe pe’uva’erã ho’okue tatápe hysypyréva ha pan levadura’ỹre, pohã ñana iróva reheve pe’uva’erã.
9Mba’evete ndape’uiva’erã ichugui ipýra térã imimoimbyre, tatápe mbichypyrémante, pe’uva’erã avei iñakãngue, ipykue ha hyekue reheve.
10Mba’eve napemoko’ẽiva’erã ichugui; ha pe hembýva ko’ẽ jave, pehapyva’erã tatápe.
11Péicha pe’uva’erã: Pejeku’ajokua, pende py rehegua reheve ha pende yvyra po’i pende pópe; ha pe’uva’erã pya’e pya’e; péva ha’égui pende Ruete páscua.
12Che ningo ahasáta upe pyharépe Egípto retãpy rupi ha ajukáta opaite ita’ýra ypykuépe, taha’e Egiptoygua térã hymba; ha ambojovakéta opaite Egípto jarakuérape. Che ha’égui Jahve (pende Ruete).
13Ha pe tuguy oikóta peẽme g̃uarã techaukaha ramo mamo pende rogaygua peikohápe; ha ahecha ramo pe tuguy ahasáta pendehegui, péicha napenderupitymo’ãi pe jehavira, Che ajukauka jave Egípto retãyguakuérape.
14Ko ára kóva oikóta peẽme mandu’arã ha pemboaretéta areteguasu ramo pene ñemoñarenguéra ndive pende Ruetépe g̃uarã, kóva ningo che rembiapoukapy opaite árape g̃uarã.
15 Siéte ára pe’uva’erã pan ojejapova’ekue levadura’ỹre, pe ára peteĩháme pehekáta ani hag̃ua ojejohuve levadúra pende rógape; oimeraẽ ho’úva pan ojejapóva levadúra reheve pe ára peteĩha guive ára 7-ha peve, upéva ojejukava’erã Israel apytégui.
16Pe ára peteĩháme peñemboykéta chéve g̃uarã peteĩ atyguasúpe; ha upéicha avei pe ára 7-hápe, pe ára pévape ndapejapomo’ãi mba’eveichagua tembiapo; peteĩteĩva tombosako’ínte hembi’urãmi.
17Pe ára péva pemboaretéta pan oñembovu’ỹva reheve, pe árape Che voi poguenohẽgui Egípto retãgui; upévare ko tembiapoukapy kóva pejapova’erã jepokuaaha ramo opaite árape pene ñemoñarenguéra ndive.
18Pe jasy peteĩha jave pe’uva’erã pan iñembovupyre’ỹva, pe ára 14-ha ka’aru guive ára 21-ha ka’arupytũ meve.
19Ndojejohuiva’erã pan mbovupyréva pende rogakuérape 7 ára javeve, oimeraẽva ho’úva pan mbovupyréva, taha’e tetã ambueygua térã Israelgua ojejukava’erã Israel apytégui.
20Mba’eveichagua oñembovupyréva ndape’uiva’erã; mamo peẽ peikoha rupi pe’uva’erã pan oñembovupyre’ỹva.
21Ha Moises ohenoiuka opaite Israel karai ancianokuéra ha he’i ichupekuéra: Peguenohẽ ha pejapyhy ovecha ra’yrusu pende rógape g̃uarã, peikuave’ẽ hag̃ua pe páscuape.
22Pejapyhy avei peteĩ mba’e rypyiha apesã, upéi pemyakỹ tuguýpe oĩtava peteĩ ña’ẽmbépe, pemona hag̃ua mokõive okẽ horcon rehe ha pe víga hi’ariguáva rehe; ha avave pendereheguáva anítei osẽ hógagui ko’ẽmba mboyve.
23Ñanderuete ohasáta ojuka hag̃ua Egiptoyguakuérape ha ohechávo tuguy pende rokẽ yvate rehe ha mokõive horcon rehe, Ha’e ohasáta pene rokẽ renonde rupi, ha ndohejamo’ãi pe oporojukáva oike pende rógape.
24Peñongatuva’erã ko’ã mba’e teko mbo’epy ramo peẽme ha pene ñemoñarenguérape g̃uarã opaite árape.
25Ha peike vove pe tetãme Ñanderuete ome’ẽtava peẽme, pejapopava’erã Ha’e he’i hagueichaite peẽme.
26Ha pende ra’ykuéra oporandu ramo peẽme: Mba’e piko he’ise ko mba’e pejapóva.
27Upérõ pejéta ichupekuéra: Páscua aretépe jajuka ñane rymba ñane rendaguépe Ñanderuete ñandesalva haguére ohasa jave ñande róga renonde rupi Ha’e ojuka ramoguare Egiptoyguakuérape, upéramo Israelguakuéra oñesũ ha omomba’eguasu Ñanderuetépe.
28Ha Israel ñemoñarenguéra oho ha ojapopa, Ñanderuete he’i haguéicha Moises ha Aarónpe.
Ta’ýra ypykue ñemano
29Ha ojehu pe pyhare pytépe Ñanderuete ojukauka opaite ta’ýra ypykuépe Egípto retãme, faraon ra’y ypykue guive, oguapýva iguapyhápe, pe tembiguái ra’y ypykue peve, oĩva cárcelpe ha mayma hymba ra’y ypykue peve.
30Ha pe pyhare pévape faraon, mayma hembiguái ha opaite Egiptoyguakuéra opu’ã; ha oiko peteĩ jahe’o soroguasu Egípto retãme, opaite ogakuéra oĩgui peteĩ omanóva.
31Ha pe pyharépe faraon ohenoiuka Moises ha Aarónpe ha he’i ichupekuéra: Pesẽ che Egípto retãgui, peẽ ha Israel ñemoñarenguéra, ha tapeho pemomba’eguasu hag̃ua Jahvépe, pende Ruetépe peje hagueichaite.
32Pegueraha avei pende ovechakuéra ha pende vakakuéra, peje haguéicha ha tapeho; ha cherovasami avei chéve.
33Ha umi Egiptoygua ombopya’e pya’eve Israelguakuérape osẽ hag̃ua hetãgui; he’ígui hikuái: Ñamanombáta.
34Ha Israelguakuéra ogueraha ipan mása ovu’ỹva gueteri, iña’ẽmbeguasúpe, ha omboapakuapy ijahojápe ha ohupi ijati’y ári.
35Ha Israelguakuéra ojapopa Moises he’i haguéicha ha ojerure hikuái Egiptoyguakuérape jeguaka pláta ha oroguiguáva ha aokuéra.
36Ha Ñanderuete ojapo Israel ñemoñarenguéra ho’a porã hag̃ua Egiptoyguakuéra resa renondépe, ha ome’ẽ hikuái ichupekuéra opaite mba’e ojeruréva guive; upéicha Israelguakuéra ogueraha Egiptoyguakuéra mba’erepyeta.
Israelguakuéra osẽ Egíptogui
37Israelguakuéra osẽ Ramsésgui oho hag̃ua Sucótpe, oiméne 600.000 kuimba’e yvy rupigua, ojepapa’ỹ rehe kuñakuéra ha mitãkuéra.
38Osẽ avei hendivekuéra aty tuicháva opaichagua tapicha ha hetaiterei ovecha ha ambue hymba atyeta.
39Ha tapére ombojy hikuái ipan mása ovu’ỹva gueteri oñemosẽ pya’égui Egípto retãgui, ndikatúigui ombosako’i voive hembi’urã tapére g̃uarã.
40Israel ñemoñarenguéra oiko Egíptope 430áño.
41Ha ohasa rire umi 430áño, Ñanderuete oguenohẽ Israelguakuérape Egípto retãgui.
42Ko pyhare kóva pemboareteva’erã Ñanderuetépe g̃uarã, Ha’e peneguenohẽgui Egípto retãgui.
43Ha Ñanderuete he’i Moises ha Aarónpe: Kóa ningo páscua rembiapoukapy, mayma tetã ambueygua ndo’uiva’erã pe tembi’u pévagui.
44Ha opaichagua tembiguái kuimba’e pejoguava’ekue ho’ukuaa ichugui, oñekytĩ’o rire ipire’i.
45Tetã ambueygua mbohupa ha pirapire rehe omba’apóva peẽme g̃uarã ndo’uiva’erã ichugui.
46Pe ovecha oje’uva’erã ogapýpe, ha pe so’ógui ndojererahaiva’erã mba’eve okápe, ha noñemopẽiva’erã ikanguekue.
47Mayma Israelgua ijatýva guive omboareteva’erã pe páscua.
48Ha umi tetã ambueygua oikóva pende apytépe omboaretesérõ avei Ñanderuetépe g̃uarã pe páscua, toikytĩ’ouka ipire’i ha upéicha omboaretekuaa avei ha oikóta peteĩ pene retãyguaichaite; ha umi oikytĩ’ouka’ỹva’ekue ipire’i ndo’uiva’erã ichugui.
49Kóva peteĩ tembiapoukapy Israelgua ha tetã ambueyguápe g̃uarã oikóva guive pende apytépe.
50Péicha ojapova’erã mayma Israel ñemoñarenguéra; Ñanderuete he’i hagueichaite Moises ha Aarónpe, upeichaite ojapopa hikuái avei,
51upe ára upévape Ñanderuete oguenohẽgui Israel ñemoñare atykuérape Egípto retãgui.
Currently Selected:
Éxodo 12: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
