Éxodo 17
17
Y osẽva itágui
1Mayma Israel ñemoñarenguéra oipykúi Sin desiértogui, Ñanderuete he’iuka haguéicha, opyta hag̃ua Refidímpe, ha ndaipóri y tetãyguakuéra hoy’u hag̃ua.
2Ha tetãyguakuéra oñoñe’ẽ api Moises ndive, ha he’i hikuái: Eme’ẽ oréve y roy’u hag̃ua. Ha Moises he’i ichupekuéra: Mba’upépa peneñe’ẽ api chéve. Mba’upépa peipy’ara’ã Ñanderuetépe.
3Ha hetãyguakuéra ijy’uhéigui upépe okaguái Moises rehe ha he’i: Mba’upéiko oreguenohẽ Egíptogui orejuka hag̃ua y’uhéigui, oréve, ore ra’ykuéra ha ore rymbakuérape avei.
4Upémaramo Moises omba’ejerure asy Ñanderuetépe, he’ívo: Mba’éiko ajapóta ko’ã che retãyguakuéragui. Ko’águi michĩ amo gotyove cheapíta hikuái itápe chejuka hag̃ua.
5Ha Ñanderuete he’i Moiséspe: Eguata tetãyguakuéra renondépe ha ehenói karai ancianokuérape nemoirũ hag̃ua ha eraha avei nde pópe nde yvyra’i, reinupã haguépe pe ysyry Nílo ha tereho,
6Che aĩta ne renondépe pe itaguasu Horeb ári ha reinupã rire pe itaguasu osẽta ichugui y remboy’u hag̃ua ne retãyguakuérape. Ha Moises péicha ojapo Israel aty ruvichakuéra renondépe.
7Ha ombohéra pe yvy Masah ha Meriba, Israel ñemoñarenguéra ombopochýgui Ñanderuetépe, he’ívo: Oĩpa Ñanderuete ñanendive térãpa nahániri.
Ñorãirõguasu Amalecgua ndive
8Upéramo ou Amalec ojeity hag̃ua Israelguakuéra ári Refidímpe.
9Ha Moises he’i Josuépe: Eiporavo ñande apytégui kuimba’ekuéra, ha esẽ ejeity Amalecguakuéra ári; ko’ẽrõ che aiméta pe cérro ru’ãme, ha Ñanderuete yvyra’i oĩta che pópe.
10Ha Josue ojapopa Moises he’i haguéicha ichupe, oho ojeity hag̃ua Amalecguakuéra ári; Moises, Aaron ha Hur katu ojupi pe cérro ru’ãme.
11Ha Moises omopu’ã aja ipo oñembo’e hag̃ua, Israel ipu’aka; ha ha’e omboguejy jave ipo, Amalec ipu’aka.
12Ha Moises ikane’õ ohóvo ohupi arémagui ipokuéra, upévare Aaron ha Hur ojapyhy peteĩ ita Moises oguapy hag̃ua hi’ári ha ojoko hikuái Moises pokuéra yvate, Aaron peteĩ ykéguio ha Hur ambue ykéguio; péicha omombyta ipo peteĩ hendápe oike peve kuarahy.
13Upéicha Josue ombopoguy Amalec retãyguakuérape ikyse puku hãimbépe.
14Ha Ñanderuete he’i Moiséspe: Ehai ko’ã mba’e mandu’arã peteĩ kuatiañe’ẽme ha ere Josuépe omboguete hag̃ua Amalec réra ko yvy árigui.
15Ha Moises omopu’ã peteĩ kuave’ẽmby renda, ha ombohéra ko yvy kóva Ñanderuete che poyviveve.
16Ha he’i: Amalec omopu’ã haguére ipo Ñanderuete guapyháre, Ha’e voi oñemoĩta Amalec rehe, ha’ekuéra oikove aja.
Currently Selected:
Éxodo 17: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
