Éxodo 19
19
Israelguakuéra og̃uahẽ Sinaípe
1Mbohapy jasy ohasáma Israel ñemoñarenguéra osẽ rire Egíptogui ha pe araitépe og̃uahẽ hikuái Sinai desiértope.
2Osẽ hikuái Refidímgui ha og̃uahẽ Sinai desiértope ha opyta upépe pe cérro rovái.
3Ha Moises ojupi pe cérro Ñanderuete ohenóigui ichupe, ha he’i ichupe: Péicha eréta Jacóbo retãme ha reikuaaukáta Israel ñemoñarenguérape:
4Peẽ pehecháma ajapova’ekue Egiptoyguakuérare ha mba’éichapa pogueraha ñapykani (ojogua taguato guasuetépe) pepo ári ha mba’éichapa Che añangareko porã penderehe.
5Ko’ág̃a peẽ peneñe’ẽrendu ramo ha pepyta ramo che ñe’ẽme’ẽme peikóta che retãtee ramo ku mba’e repyetéicha mayma tetãnguéra apytépe.
6Ha peẽ peikóta chéve g̃uarã tetãguasu pa’i reheguáva, heko potĩva ha oñemboykéva chéve g̃uarã. Ko’ã ñe’ẽ eréta Israel ñemoñarenguérape.
7Upéramo Moises oguejy ha ohenói hetãygua karai ancianokuérape ha he’i opaite ko’ã ñe’ẽ Ñanderuete he’imava’ekue guive ichupe ha’ekuéra ojapo hag̃ua.
8Ha opaite hetãygua peteĩcha ombohovái, ha he’i hikuái: Opaite mba’e Ñanderuete he’imava’ekue guive rojapóta. Ha Moises omombe’u jevy Ñanderuetépe hetãyguakuéra ñe’ẽ.
9Upéramo Ñanderuete he’i Moiséspe: Ema’ẽ porã, che aju ne rendápe peteĩ arai anambusúpe, tetãyguakuéra ohendu hag̃ua che ñe’ẽ añe’ẽ jave nendive ha ndererovia hag̃ua opaite árape. Upéi Moises omombe’u Ñanderuetépe hetãyguakuéra ñe’ẽ.
10Ha Ñanderuete he’i Moiséspe: Tereho Israelguakuéra rendápe ha emboheko potĩ ichupekuéra ko árape ha avei ko’ẽrõ; ha tojohéi hikuái avei ijao,
11ha toñembosako’i pe ára mbohapyhápe g̃uarã, pe ára mbohapyhápe pende Ruete oguejýtagui mayma tetãygua resa renondépe Sinai cérro ári.
12Ha rehechaukáta ne retãyguakuérape mamo pevépa ohokuaa pe cérro rembe’y jere rehe, ha eréta: Peñangarekóke, anítei pejupi pe cérrope ha anítei peñemboja hembe’y rehe; oimeraẽ ojáva ko cérro kóva rehe katuete omanova’erã.
13Anítei avave opoko hese, ojejukava’erã itápe térã hu’ýpe opa umi oñemoag̃uietévape; taha’e tymba térã tapicha, ndoikoveimava’erã. Pe ovecha ratĩ ipu puku rire pejupikuaa cérro ári.
14Ha Moises oguejývo pe cérrogui, hetãyguakuéra rendápe, omboheko potĩ’uka ichupekuéra ha ojoheiuka ijao.
15Ha he’i hetãyguakuérape: Peñembosako’i porãke pe ára mbohapyhápe g̃uarã; ani peikótei pene rembireko ndive.
16Ha ojehu pe ára mbohapyhápe, ko’ẽ jave, oiko arasunu, aratiri ha arai iñanambusúva ojaho’ipáva pe cérro ru’ã, trompéta ipu hatãitereíva, omboryryipáva mayma tetãygua ijatývape.
17Ha Moises ogueraha hetãyguakuérape ojejohu hag̃ua Ñanderuete ndive; ha opyta hikuái cérro rembe’ýpe.
18Ha Sinai cérro otimbopa Ñanderuete oguejývo hi’ári tata apytépe; ha pe tatatĩ opu’ã ku tatakua ratatĩcha ha pe cérro oryryipa.
19Ha pe trompéta ipu hatãitereive ohóvo, Moises oñe’ẽ ha Ñanderuete ombohovái ichupe ñe’ẽ ára sunuichaguápe.
20Ha Ñanderuete oguejy Sinai cérro ru’ãme, ha ohenói Moiséspe pe cérro ru’ãme ha ha’e ojupi hendápe.
21Ha Ñanderuete he’i Moiséspe: Eguejy ha ere ne retãyguakuérape anítei ohasa pe cérro rembe’y cherechaségui, ỹrõ hetaiterei omanova’erã hikuái.
22Ha umi pa’i oñembojakuaáva che rendápe toñemboheko potĩ raẽ, ani hag̃ua Che añemoĩ hesekuéra.
23Moises he’i Ñanderuetépe: Tetãyguakuéra ndojupimo’ãi Sinai cérrope, Nde voi ereukágui oréve: Ani pehasa pe kora mboypýri oĩva cérro rembe’ýpe, oñemboykémagui ko yvy kóva Ñanderuetépe g̃uarã.
24Ha Ñanderuete he’i jevy ichupe: Tereho, eguejy ha reguerúta Aaron nendive; pa’ikuéra ha tetãyguakuéra katu anítei ohasa cérro rembe’y ojupi hag̃ua che rendápe, ani hag̃ua Che añemoĩ hesekuéra.
25Upémaramo Moises oguejy ha he’i ko’ã mba’e hetãyguakuérape.
Currently Selected:
Éxodo 19: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
