Éxodo 2
2
Moises onace
1Peteĩ kuimba’e Levi ñemoñarenguáva omenda peteĩ kuña Levigua rehe,
2ha’e hyeguasu ha imemby peteĩ mitãkuimba’e; ha ohechávo ha’e iporãha omokañy ichupe mbohapy jasy pukukue.
3Ha ndaikatuvéima ramo oguereko ichupe kañyháme, ojapo peteĩ ajaka (papírogui), ha omboty asfálto ha mba’e aysýpe, ha ipype omoĩ imemby kuimba’épe, ha omoĩ piritýpe oĩva ysyry Nílo rembe’ýpe.
4Ha mombyrymi opyta heindy, oñangareko hag̃ua hese.
5Ha faraon rajy oguejy ojahu hag̃ua pe Nílo ysyrýpe, ha umi kuñataĩ omoirũva ichupe oiko pe ysyry rembe’y rehe, upérõ ha’e ohecha piritýpe peteĩ ajaka’i, ha omondo hembiguáipe ogueru hag̃ua.
6Ha oipe’ávo imbotyha, ohecha peteĩ mitãkuimba’e hasẽvahína. Ha oiporiahuverekóvo ichupe he’i: Ko mitã peteĩ Israelgua ra’e.
7Upéramo heindy he’i faraon rajýpe: Reipotápa ahenói ndéve herekuarã, peteĩ kuña Israelgua omokambu hag̃ua ndéve ko mitã kóvape.
8Ha faraon rajy he’i ichupe: Tereho. Upéicha oho pe mitãkuña, ha ohenói isýpe,
9ha faraon rajy he’i ichupe: Egueraha emokambu chéve ko mitã ha che apagáta ndéve ne rembiapo rehe; ha pe kuñakarai ogueraha pe mitãkuimba’épe ha omongakuaa ichupe.
10Okakuaamive rire ogueru faraon rajýpe, ha ha’e oñemomembytee hese, ha ombohéra ichupe Moises, he’ígui: Ýgui aguenohẽ haguére ichupe.
Moises okañy Egíptogui
11Ojehu umi árape, Moises okakuaapáma ramo, oho ityke’ýra Israelguakuéra rendápe, ha ohecha hembiapo ipohyietereiha, ohecha avei peteĩ Egiptoygua oinupãva peteĩ Israelguápe.
12Upémaramo oma’ẽ ma’ẽ opárupi, ha ndohecháigui avavépe, ojuka pe Egiptoyguápe ha he’õngue omokañy yvyku’i guýpe.
13Ambue ko’ẽme osẽ jevy ha ohecha mokõi Israelguápe oñorãirõvahína; upéramo he’i pe oporonupãvape: Mba’érehepa reinupã nde rapichápe.
14Ha ha’e he’i ichupe: Máva piko nemoĩ ndéve mburuvicha ramo ha mbojovakehára ramo oreári. Chejukase piko avei, rejuka haguéicha pe Egiptoyguápe. Upérõ Moises okyhyje ha he’i: Añetehápe ojekuaapáma che rembiapokue.
15Faraon ohendúvo ko’ã mba’e oikova’ekue, katuete chejukáta. Moises katu okañy faraon rendágui, ha oho oiko hag̃ua Madian retãme ha oguapy jave peteĩ ykua ypýpe,
16ou 7 kuñataĩ, peteĩ pa’i Madian pegua rajykuéra, oguenohẽ hag̃ua y omyenyhẽ meve umi yryru, omboy’u hag̃ua itúva ovecha ha kavarakuéra.
17Ambue ovecha rerekua katu ou ha omosẽ ichupekuéra upégui; upérõ Moises opu’ã ha oipytyvõ ichupekuéra omboy’u hag̃ua hymbakuérape.
18Ha ou jevývo hikuái itúva Reuel rendápe, ha’e he’i ichupekuéra: Mba’éicha rupi piko peju pya’ete ko ára kóvape.
19Ha ha’ekuéra he’i ichupe: Peteĩ kuimba’e Egiptoygua orepytyvõ umi ovecha rerekua pógui, ha oguenohẽ avei oréve y, ha omboy’u ñane rymbakuéra.
20Upérõ ha’e he’i itajyrakuérape: Mamo piko oime upe kuimba’e. Mba’érehe piko pehejára’e upe kuimba’épe. Pehenói ichupe okaru hag̃ua ñanendive ko’ápe.
21Ha Moises oñemoĩ peteĩ ñe’ẽme pe kuimba’e ndive ha opyta hendive; ha ha’e ome’ẽ Moiséspe itajýra Sipórape hembirekorã ramo.
22Ha Sípora imemby peteĩ mitãkuimba’e; ha Moises ombohéra ichupe Gerson, he’ígui: Tetã ambueygua ramo aiko tetã mombyrýpe.
23Ha ohasa rire heta ára omano pe Egípto retã ruvichaguasu ha umi Israel ñemoñare heta pyahẽme oiko pe tembiguái reko poguýpe, ha osapukái tasẽme; ha ojupi Ñanderuete peve ipyahẽitakuéra.
24Ha Ñanderuete ohendu ijahe’o, ha imandu’a iñe’ẽngue rehe ome’ẽva’ekue Abraham, Isaac ha Jacóbope.
25Ha Ñanderuete oma’ẽ Israel ñemoñarenguérare, ha oipytyvõse ichupekuéra.
Currently Selected:
Éxodo 2: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
