Éxodo 3

1Moises oñangareko aja hembireko ru, Jétro, pe Madian pegua pa’i ovecha ha kavarakuéra rehe, ombohasa umía pe desiérto rupi ha og̃uahẽ Horeb, Ñanderuete cérro peve.

2Ha upépe Ñanderuete yvága rembiguái ojehechauka ichupe, tata rendýicha, jukeri rakãnguéra mbytépe; Moises oma’ẽ ha ohecha pe ñuatĩ máta hendyha tatápe, ndokáiri katu pe jukeri.

3Upéramo Moises he’i: Che aháta ahecha hag̃ua ko techaukapy ndetuichaitéva, mba’eicharupípa pe ñuatĩ máta ndokáiri.

4Ha Ñanderuete ohechávo ha’e ohoha ohecha hag̃ua, ohenói ichupe pe ñuatĩ mátagui ha he’i: Moises, Moises. Ha ha’e he’i: Ápe aĩ.

5Ha Ha’e he’i: Ani reñembojátei; eipe’a katu nde py rehegua ha eikuaa, pe yvy nde repyrũha rehe oñemboykéma chéve g̃uarã.

6Ha’e he’ive: Che ningo pende rukuéra, Abraham, Isaac ha Jacóbo Jára. Upémaramo Moises omo’ã hova, okyhyjeitereígui oma’ẽ hag̃ua Ñanderuete rehe.

7Upéi Ñanderuete he’i: Ahecha porã Israelguakuéra ojepy’apyetereiha oiko asýgui Egíptope, ha ahendu ipyahẽita imyangekõihára rupi; ha aikuaa ojepy’apy asyetereiha hikuái.

8Upévare aguejy’aína aipe’a hag̃ua ichupekuéra Egiptoyguakuéra poguýgui, agueraha hag̃ua ichupekuéra Egíptogui ambue tetã iporã ha ituichávape, yvy osyryhápe kamby ha eíra, umi Canaangua, Hetgua, Amorgua, Ferezgua, Hevgua ha Jebusguakuéra retãme.

9Umi Israel ñemoñare pyahẽ og̃uahẽ che rendápe, ha ahecha avei mba’éichapa Egiptoyguakuéra ojopy asy ichupekuéra.

10Upévarehe romondóta ko’ág̃a faraon rendápe, reipe’a hag̃ua che retã, Israel ñemoñarenguérape, Egípto poguýgui.

11Upéramo Moises he’i Ñanderuetépe: Máva piko che, aha hag̃ua faraon rendápe, aipe’a hag̃ua Israel ñemoñarenguérape Egípto retã poguýgui.

12Ha Ñanderuete he’i: Tereho, Che ningo aĩta nendive; ko techauka kóva rupi rehechakuaáta Che romondo hague: Renohẽ rire che retãme Egíptogui, peẽ chemomba’eguasúta ko cérro kóva ári.

13Moises he’i Ñanderuetépe: Péina ápe che ag̃uahẽvo Israel ñemoñarenguéra rendápe, ha ha’e ramo ichupekuéra: Pende rukuéra Jára chembou pene rendápe, katuete ha’ekuéra oporandúta chéve: Mba’éicha piko héra. Mba’épa upéramo ha’éta ichupekuéra.

14Ha Ñanderuete he’i Moiséspe: Che ningo HA’ÉVA (Jahve), ha he’i avei: Péicha eréta Israel ñemoñarenguérape: HA’ÉVA chembou pene rendápe.

15Ñanderuete he’i avei Moiséspe: Péicha eréta Israel ñemoñarenguérape: Jahve, pende Ruete, pende rukuéra Abraham, Isaac ha Jacóbo Jára chembou pene rendápe. Kóa hína che réra opaite ára peve g̃uarã; péicha peẽ cherenóita ára apyre’ỹ meve.

16Tereho embyaty Israel karai ancianokuérape ha ere ichupekuéra: Pende Ruete, Abraham, Isaac ha Jacóbo Jára, ojehechauka chéve ha he’iuka peẽme: Añetehápe aju poandúvo, ha ahecha mba’éichapa Egiptoyguakuéra pendejopy asypeína peikóvo ko’ápe,

17ha Ñanderuete he’ive: Che poguenohẽta Egíptoygua poguýgui ha pogueraháta Canaanguakuéra yvýpe, oikohápe Hetgua, Amorgua, Ferezgua, Hevgua ha Jebusguakuéra, peteĩ yvy osyryhápe kamby ha eíra.

18Ha’ekuéra iñe’ẽrendúta; ha nde rehóta Israel karai ancianokuéra ndive Egípto retã ruvicha rendápe, ha pejéta ichupe: Ore Ruete, Israelguakuéra Jára, oreandu; upévagui rohóta desiértope mbohapy ára pukukue, roikuave’ẽ hag̃ua ore Járape g̃uarã kuave’ẽmby rymba jehapýva.

19Che katu aikuaa porã Egípto retã ruvichaguasu ndohejamo’ãiha peho, ndaha’éi ramo mbaretépe.

20Upévagui ahupíta che po ahavira hag̃ua Egiptoyguakuérape opaite tembiapo techapyrã pohýi rupi, ha uperire ae ohejáta pesẽ peho hag̃ua.

21Ha che ame’ẽta Israelguakuérape ho’a porã hag̃ua Egiptoyguakuéra resa renondépe, ani hag̃ua peho po nandi reheve ág̃a pesẽ vove.

22Opaite kuñakuéra ojeruréta umi hóga ypy rupiguápe, ha imbohupakuérape jeguaka pláta ha oroguiguáva, ha aokuéra, ha pemoĩta pende ra’ykuéra ha pende rajykuéra rehe; ha peguerahapáta Egiptoygua mba’erepyetakuéra.

Currently Selected:

Éxodo 3: ÑÑP2015

Highlight

Copy