Éxodo 5

Moises ha Aaron oike faraon rendápe

1Upéi Moises ha Aaron oike faraon rendápe ha he’i ichupe: Jahve, Israel Jára, péicha he’i: Eheja che retã Israel toho desiértope chemomba’eguasu hag̃ua.

2Ha faraon he’i: Máva piko pende Jára, ahendu hag̃ua iñe’ẽ ha aheja hag̃ua Israélpe oho. Che ndaikuaái pende Járape ha ndahejamo’ãi avei Israelguakuéra oho.

3Ha ha’ekuéra he’i: Ore Jára orejohu, upévare rohóta ko’ág̃a desiértope mbohapy ára pukukue, roikuave’ẽ hag̃ua tymbakuéra ore Járape, ani hag̃ua ou ore ári mba’asy iñasãiva térã kyse puku.

4Upéramo Egípto ruvichaguasu he’i Moises ha Aarónpe: Mba’upépa pembopoi pene retãyguakuérape hembiapógui. Tapeho jevy pene rembiapópe.

5He’i avei: Pene retãygua ningo hetaiterei che retãme ha peẽ katu pembopoi rei hembiapógui.

6Ha pe árape faraon oñe’ẽ itahachi ha mburuvichakuérape, he’ívo:

7Ko ára kóva guive napeme’ẽmo’ãvéi kapi’i Israelguakuérape ojapo hag̃ua ladríllo, jepivérõ guáicha; ha’ekuéra voi toho tombyaty avei pe kapi’i.

8Ha tove tojapo jepiguaichaite ladríllo ha ndapejapouka mbovyvemo’ãi ichupekuéra, iñate’ỹ hikuái, upévare omopu’ã iñe’ẽnguéra he’ívo: Jaha jaikuave’ẽ hag̃ua Ñanderuetépe g̃uarã.

9Taipohyive hi’arikuéra tembiguái rembiapo anítei oiko ohendu ñe’ẽ japu rei.

10Ha osẽvo umi tahachi ha mburuvicha oñe’ẽ Israelguakuérape, he’ívo: Péicha he’i faraon: Che name’ẽmo’ãvéima peẽme kapi’i.

11Tapeho peẽ pembyaty kapi’i mamo pejohuha rupi; ha pene rembiapo pejapóva jepiguaréicha nambovyveiva’erã.

12Upéramo Israelguakuéra iñasãi Egípto yvy tuichakue rehe kapi’i rekávo.

13Ha umi tahachi ojopy ichupekuéra, he’ívo: Pejapopáke pene rembiapo hi’araitépe, ku oñeme’ẽ ramoguáicha peẽme kapi’i.

14Ha umi faraon tahachi ombuepoti umi Israel ñemoñare ruvichápe, ha’ekuéra voi omoĩmava’ekue hapichakuéra ári, he’ívo: Mba’éguipa ndapejapóira’e heta ladríllo ko árape, kuehe guaréicha.

15Upémaramo umi Israel ñemoñare ruvicha ou faraon rendápe ha he’i ichupe: Mba’érehe piko péicha rejapo ne rembiguaikuéra rehe.

16Noñeme’ẽvéi kapi’i ne rembiguaikuérape, ko’ýte katu oje’e oréve: Pejapóke heta ladríllo pejapo hagueichaite. Ha ore ndorohupitýigui, umi mburuvicha orembuepoti ha ne retãyguakuéra ohasa asy.

17Ha faraon he’i: Peiko rei ha napemba’aposéigui, upévare peje: Jahána jaikuave’ẽ hag̃ua Ñanderuetépe g̃uarã.

18Tapeho ko’ág̃a ha pemba’apo, noñeme’ẽmo’ãvéi peẽme kapi’i, ha upeichavéramo pemoĩmbava’erã heta ladrillokuéra ko kueheguaréicha.

19Upévo umi Israel ruvicha’i ojehecha py’a tarovapópe oje’e haguére ichupekuéra: Mba’eveichavéramo ndapejapo mbovyveiva’erã ladríllo.

20Ha ojojohu hikuái Moises ha Aaron ndive osẽnguévo faraon ypýgui,

21ha he’i hikuái ichupekuéra: Ñanderuete toma’ẽ penderehe ha tapendehavira; peẽ oremoĩ vai haguére faraon ha hembiguaikuéra renondépe, ha peẽ voi pemoĩ kyse puku ipopekuéra orejukapa hag̃ua.

Ñanderuete ojokuái Moises ha Aarónpe

22Upéramo Moises ojere ha he’i Ñanderuetépe: Che Jára, mba’érehe piko remyangekõi ko’ã tetãyguápe ore rupive. Mba’upe piko chemboúra’e.

23Che ajuha ára guive faraon rendápe añe’ẽvo ichupe nde rérape, ha’e ojopyve ohóvo che retãyguakuérape; ha Nde nderesalvái ne retãyguakuérape ere haguéicha.

Currently Selected:

Éxodo 5: ÑÑP2015

Highlight

Copy