Éxodo 7
7
1Ñanderuete he’i Moiséspe: Ema’ẽ, che romoĩma ndéve faraon Jára ramo ha Aaron, nde ryke’y, toiko nde proféta ramo.
2Nde rembohasáta opaite mba’e Che ha’éva guive ndéve nde ryke’ýpe ha ha’e oñe’ẽta faraónpe, opoi hag̃ua Israel ñemoñarenguéragui.
3Che katu amohatãta faraon py’apy ha ajapóta heta techaukapy ha milagrokuéra Egípto retãme.
4Faraon napenerendumo’ãi; Che katu amoĩta che po Egiptoyguakuéra ári, ha tuicha jehavira rupi aguenohẽta Israel atykuéra, che retãyguakuéra, Israel ñemoñarenguéra Egípto retã poguýgui.
5Ha Egiptoyguakuéra oikuaáta Cheha Jahve, aipysóva che po Egípto retã ári, aguenohẽ aja Israel ñemoñarenguérape ijapyteguikuéra.
6Moises ha Aaron ojapopa Ñanderuete he’i haguéicha ichupekuéra.
7Moises oñe’ẽ ramoguare faraónpe oguereko 80áño ha Aaron 83áño.
Aaron yvyra’i
8Ñanderuete oñe’ẽ Moises ha Aarónpe, he’ívo:
9Faraon he’i ramo peẽme pehechauka tembiapo techaukarã reheguáva, eréta Aarónpe: Ejapyhy nde yvyra’i, ha eity faraon renondépe, oiko hag̃ua ichugui mbói.
10Moises ha Aaron ou faraon rendápe, ha ojapopa hikuái Ñanderuete he’i haguéicha ichupekuéra, ha Aaron oitývo ijyvyra’i faraon ha hembiguaikuéra renondépe, oiko ichugui mbói.
11Upéramo faraon ohenoiuka kuimba’e iñarandúva ha paje apohakuérape, ha umi Egiptoygua paje apohakuéra ojapo avei mbói.
12Peteĩteĩ oity avei ijyvyra’i, ha oiko ichuguikuéra mbói; Aaron mbói katu omokõmba paje apoha mboikuérape.
13Ha faraon py’a oñemohatã ha nohendúi ichupekuéra, Ñanderuete he’i hagueichaite.
Jehavira tuguyeta rupi
14Upéramo Ñanderuete he’i Moiséspe: Faraon oñembopy’ahatãma, ha ndopoiséi che retãyguakuéragui,
15upévare tereho ko’ẽrõ pyhareve faraon rendápe, ha’e oho ramo ysyrýpe; ha eñemoĩ henondépe ysyry rembe’ýpe ha ejapyhy nde pópe pe yvyra’i, oikova’ekue ichugui mbói.
16Ha ere ichupe: Jahve, Israelguakuéra Jára, chembou ne rendápe, he’iuka hag̃ua ndéve: Eheja che retãyguakuérape toho, chemomba’eguasu hag̃ua desiértope, ha péina ko’ág̃a peve nderejapói che ha’éva.
17Péicha he’iuka Ñanderuete: Ko’ã mba’e rupi reikuaáta Che ha’eha Jahve: Ema’ẽ porãke, ko yvyra’i che pópe arekóva, ainupãta pe y oĩva ysyrýpe, ha oikóta ichugui tuguy.
18Ha pirakuéra oĩva guive pe ysyrýpe omanombáta, ha inéta pe ysyry, ha Egiptoyguakuéra ojeguarúta hoy’u hag̃ua ko y kóvagui.
19Ha Ñanderuete he’i Moiséspe, ere Aarónpe: Ejapyhy nde yvyra’i ha eipyso nde jyva Egípto pegua y ári, hi’ysyry, hi’yryru ha mayma hi’y oñembyatyha ári, oiko hag̃ua ichugui tuguy, ha oĩ hag̃ua tuguy mayma Egípto retã rehe, taha’e tembiporu oje’uha yvyraguiguápe térã itaguiguápe.
20Ha Moises ha Aaron ojapopa Ñanderuete he’i haguéicha ichupekuéra; ha’e ohupi ijyvyra’i ha oinupãvo pe y oĩva ysyrýpe, faraon ha hembiguaikuéra renondépe, pe y oĩvagui ysyrýpe oiko tuguy.
21Upéicha avei pirakuéra oĩva guive ysyrýpe omanomba, ha pe ysyry oñembyai, umi Egiptoygua ndaikatuvéi hoy’u ichugui, ha Egípto retãpy tuichakue javeve oĩ tuguy.
22Ha umi Egípto paje apohakuéra ojapo avei upéicha ha faraon py’a oñemohatãve ohóvo ha nohendúi ichupekuéra, Ñanderuete he’i haguéicha.
23Ha faraon ojere ha oho hógape, ha nopenavéi ko’ã mba’ére.
24Ha mayma Egiptoygua ojo’o ykua pe ysyry rembe’y jerekue rehe hoy’u hag̃ua, ndaikatúigui hoy’u pe ysyry pegua ýgui.
25Upéicha ohasáma 7 ára, Ñanderuete ombyai rire pe ysyry.
Currently Selected:
Éxodo 7: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
