Éxodo 8
8
Jehavira ju’ieta rupi
1Upéramo Ñanderuete (Jahve) he’i Moiséspe: Tereho faraon rendápe ha ere ichupe: Péicha he’i ore Ruete, eheja che retãyguakuéra oho tachemomba’eguasu hikuái.
2Ha nderehejaséi ramo oho, eikuaa porãke Che ahaviráta ne retãpy tuichakue javeve ju’ieta rupi.
3Ha pe ysyry oñemyenyhẽta ju’ietágui ha ojupipáta oike peve nde rógape, nde koty rekehápe jepe nde rupápe jepe, ne rembiguái ha ne retãyguakuéra rógape, nde ratakuápe ha pe pan oñembojehe’ahápe.
4Ha umi ju’i ojupipáta ndeári, ne retãygua ha mayma ne rembiguaikuéra ári.
5Ha Ñanderuete he’i Moiséspe, ere Aarónpe: Eipyso nde jyva nde yvyra po’i reheve ysyrykuéra, yakã ha umi karugua ári, ju’ikuéra omyasãi hag̃ua Egípto yvy ape tuichakuére.
6Upéramo Aaron oipyso ijyva Egípto ykuéra ári, ha osẽ ju’ieta ha oñu’ãmba Egípto retãpy tuichakue javeve.
7Ha umi paje apoha ojapo avei upéicha ha ombou ju’i Egípto retãme.
8Upéramo faraon ohenói Moises ha Aarónpe, ha he’i ichupekuéra: Peñembo’e pende Járape oipe’a hag̃ua ju’ieta che ha che retãyguakuéragui, ha ahejáta pene retãyguakuéra oho oikuave’ẽ hag̃ua pende Járape g̃uarã kuave’ẽmby.
9Ha Moises he’i faraónpe: Eréna chéve araka’épa añembo’éta nderehe, ne rembiguái ha nde rogayguakuéra rehe, umi ju’i opyta hag̃ua ysyrýpente.
10Ha ha’e he’i: Ko’ẽ ramo. Ha Moises he’i jevy: Ojejapóta nde ere háicha, reikuaa porã hag̃ua ndaiporiha ambue Jára, ore Ruetéichagua ko yvýpe.
11Ha ju’ikuéra ohopáta, nde rógagui, ne rembiguái ha ne retãyguakuéra rógagui ha opytapáta hikuái ysyrýpe.
12Upéramo Moises ha Aaron osẽ faraon rendágui. Ha Moises omba’ejerure asy Ñanderuetépe umi ju’i ojei hag̃ua faraon retãyguakuéragui.
13Ha Ñanderuete ojapo Moises ojerure háicha, ha omanomba umi ju’i oĩva guive hóga, ikokue ha iñunguéra rupi.
14Ha ombyaty hikuái ju’i atýra opa rupi inemba joáva.
15Ha faraon ohechávo opamaha ju’i, omohatã jevy katu ipy’apy ha naiñe’ẽrendúi ichupekuéra, Ñanderuete he’i hagueichaite.
Jehavira ñati’ũeta rupi
16Upéramo Ñanderuete he’i Moiséspe, ere Aarónpe: Eipyso nde yvyra’i ha einupã yvy timbóre, oiko hag̃ua ichugui ñati’ũ Egípto retã tuichakue javeve.
17Ha ha’ekuéra ojapo upéicha; ha Aaron oipyso ijyvyra’i oinupã hag̃ua pe yvy timbóre ha oiko ichugui ñati’ũ, ha ombohasypa Egiptoyguakuérape ha hymbakuérape; yvy timbógui oiko ñati’ũ Egípto retã tuichakue javeve.
18Ha umi Egípto pegua paje apoha oñeha’ãmba ojapo hag̃ua avei péva hembiapo rupi, ha ndaikatuvéima. Opa rupi oĩ ñati’ũ Egiptoyguakuéra ha hymbakuéra apytépe.
19Upémaramo umi paje apoha he’i faraónpe: Kóva ningo Yvága Jára kuã. Faraon py’apy katu oñemohatã ha naiñe’ẽrendúi ichupekuéra, Ñanderuete he’i haguéicha.
Jehavira mbutueta rupi
20Ñanderuete he’i Moiséspe: Epu’ã pyhareve ha tereho eñembo’y faraon renondépe, ha’e oho jave ysyry rembe’ýpe ha ere ichupe: Ñanderuete péicha he’i: Eheja che retãyguakuéra toho chemomba’eguasu hag̃ua.
21Ha nderehejái ramo che retãyguakuéra oho, Che amboúta mbutu ndeári, ne rembiguái, ne retãygua ha nde rogayguakuéra ári; Egiptoyguakuéra róga henyhẽmbáta mbutuetágui ha upéicha avei pe yvy oikoha rupi hikuái.
22Ha upe ára upévape Che amboykéta mbutu aty Gosen yvýgui, che retãyguakuéra oikohápe, ani hag̃ua oĩ upépe mbutu, ikatu hag̃uáicha reikuaa Ijára oikoha avei ko tetãpýpe.
23Ha Che ambojuavy Israelguakuéra Egiptoyguakuéragui. Ko’ẽ ramo oikóta ko milágro kóva.
24Ha Ñanderuete ojapo he’i haguéicha ha ou mbutu oporomyangekõi rasáva faraon ha hembiguaikuérape, Egípto retãpy tuichakue; ha pe tetã oñembyai mbutueta rupi.
25Upéramo faraon ohenói Moises ha Aarónpe, ha he’i ichupekuéra: Tapeho ha peikuave’ẽ pende Járape g̃uarã ko tetãpýpe.
26Ha Moises he’i jevy: Naiporãi rojapo ramo upéicha, Egiptoyguakuérape g̃uarã ore Jára kuave’ẽmby mba’evai etereirasa. Ema’ẽ porã roikuave’ẽ ramo Egiptoyguakuéra rovake, ore rombopochýta ichupekuéra ha ha’ekuéra omombóta itaita oreári.
27Mbohapy ára pukukue roguatáta desiérto rupi roikuave’ẽ hag̃ua ore Ruete, ore Járape g̃uarã, Ha’e oipota háicha.
28Ha faraon he’i: Che ahejáta peikuave’ẽ hag̃ua pende Járape g̃uarã desiértope, ndapehói ramo mombyryve; ha peñembo’e ramo cherehe.
29Moises katu he’i jevy: Ema’ẽ porã, asẽ rire ne rendágui amba’ejeruréta ore Ruetépe opaichagua mbutu ohopa hag̃ua ko’ẽ ramo faraóngui, hembiguái ha hetãyguakuéragui, anivétei katu orembotavy jevy ha anítei orejokove roikuave’ẽ hag̃ua ore Járape g̃uarã.
30Moises osẽ rire faraon rendágui oñembo’e Ñanderuetépe.
31Ha Ñanderuete ojapo Moises ojerure háicha ha ojeipa umi mbutu faraóngui, hembiguái ha hetãyguakuéragui, ha nahembýi peteĩnte jepe.
32Ha faraon katu omohatã jevy ipy’apy ha ndohejái Israelguakuérape oho mamove.
Currently Selected:
Éxodo 8: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
