Génesis 2
2
1Upéicha ojejapopa yvagakuéra ha ko yvy, ha opaite mba’e oĩva guive ipype.
2Ha og̃uahẽvo pe ára 7-ha Ñanderuete ojapopa rire hembiapo, Ha’e opytu’u pe ára 7-hápe opaite hembiapo ojapova’ekuégui.
3Ha Ñanderuete ohovasa pe ára 7-ha, omboyke ha omboarete pe ára pévape, opytu’úgui ipype opaite hembiapo ojapova’ekuégui.
Adan ha Éva oiko yvaty Edénpe
4Upéicha Ñanderuete pe Jaraitéva ojapo ypyva’ekue yvagakuéra ha yvy;
5ha ndaipóri gueteri yvyra ha ka’avo ñu megua; Ñanderuete ne’ĩra gueteri omongy yvy apére, ndaipórigui kuimba’e ha kuña oñangarekokuaáva temitỹnguéra rehe.
6Yvýgui opu’ã ytimbo, omohe’õva pe yvy ape.
7Upéramo Ñanderuete, pe Jaraitéva ojapo pe kuimba’e yvy timbógui ha oipeju itĩme Ipytu Porãitéva oporomoingovéva, upéicharupi oiko pe kuimba’égui peteĩ ánga oikovéva.
8Ha Ñanderuete, pe Jaraitéva oñotỹ peteĩ yvaty Edénpe, kuarahyresẽ gotýo; ha omoĩ ipype pe kuimba’e ojapova’ekuépe.
9Ha Ñanderuete omoheñói yvýgui opaichagua yvyra iporãva pe kuimba’e resa renondépe, hi’upyrã iporãva; omoheñói avei peteĩ yvyra oporomoingovéva yvaty mbytépe, ha ambue yvyra oikuaaukáva mba’e porã ha mba’e ivaíva.
10Ha Edéngui osẽ peteĩ ysyry omohe’õva pe yvaty, ha upégui oñemohakãmby irundy ysyrýpe.
11Pe ysyry peteĩha héra Pison; kóa ojerepa Havila yvýre, oĩháme óro.
12Ha upe tetã megua óro iporãite; upépe oĩ avei mba’e ryakuã porã (bedélio) ha pe ita vera hũ ha imorotĩva.
13Pe ysyry mokõiha héra Gijón, kóa ojerepa Cus yvýre.
14Ha pe ysyry mbohapyha héra Jidekel (Tígris), kóa osyry Asíriagui, kuarahyresẽ gotýo. Ha pe ysyry irundyha héra Éufrates.
15Ha Ñanderuete ogueraha Adánpe Eden pegua yvatýpe, omba’apo hag̃ua ipype ha oñangareko porã hag̃ua hese.
16Ha Ñanderuete, pe Jaraitéva he’i ichupe: Opaite yvyra yvatýpe oĩva guive ikatu re’u,
17pe yvyrágui oikuaaukáva mba’eporã ha mba’evai katu ndere’uiva’erã; pévagui re’uha ára, añetehápe remanova’erã.
18Ha Ñanderuete, pe Jaraitéva he’i: Naiporãi pe kuimba’e oiko ha’eño; ajapóta ichupe g̃uarã peteĩ iñirũrã, ipytyvõhararã ramo, opyta porãva’erãva ojuehe hikuái.
19Ñanderuete ojapo yvýgui opaichagua mymbakuéra ñu megua ha opaite guyra árare ovevéva, ha ogueru Adánpe ohecha hag̃ua mba’éichapa ha’e ombohérata peteĩteĩme; ha Adan ombohéra háicha umi mymba oikovéva, péicha hína herakuéra.
20Ha Adan ombohéra opaite mymbakuéra ha guyrakuéra árare ovevéva ha opaichagua ambue mymba ñu rupiguáva; ha Adánpe g̃uarã katu ndaipóri iñirũrã.
21Upéramo Ñanderuete, pe Jaraitéva ombohopehyieterei Adánpe, ha ha’e oke aja, oipe’a ichugui peteĩ iñarukã (icostílla) ha omboty jevy to’ópe iñarukã rendague.
22Ha iñarukãgui Ñanderuete ojapo peteĩ kuña, ha ogueru Adánpe.
23Aipórõ Adan he’i: Kóva ningo ojejapo che kangue ha che ro’ógui; kóva hérata kuimba’e irũ (kuña), oñerenohẽ haguére kuimba’égui.
24Upévare pe kuimba’e opoiva’erã itúva ha isýgui, oñemopeteĩ hag̃ua hembireko ndive, ha oikova’erã hikuái peteĩ to’óicha.
25Ha mokõivéva oiko opívo, Adan ha hembireko, ha notĩri ojuehegui.
Currently Selected:
Génesis 2: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
