Génesis 20
20
Abraham ha Abimelec
1Ha Abraham oho upégui Négev yvýpe, opyta hag̃ua Cades ha Chur pa’ũme; ha oiko tetã ambueygua ramo Gerárpe.
2Ha Abraham he’i hembireko Sára rehe: Ha’e che reindy, upévare Abimelec, Gerar retã ruvicha, omondo hembiguáipe ogueru hag̃ua Sárape hembirekorã ramo hógape.
3Ha Ñanderuete ou Abimelec rendápe pe pyharépe ha’e oke aja, ha he’i ichupe iképe: Eikuaa porãke, remanotaha nde, regueru haguére peteĩ kuña omendávape ha iménava avei.
4Ha Abimelec ndopoko jepéi gueteri hese, ha he’i: Che Jára, rejukáta avei piko hekove potĩvape.
5Nde’íri piko chéve: Ha’e che reindyha; ha Sára avei he’íkuri: Che kyvynteha. Py’aporã ha po potĩme ajapókuri ko’ã mba’e.
6Ha Ñanderuete he’i ichupe iképe: Che aikuaa porã voi py’a potĩme rejapo hague ko’ã mba’e, upévare Che rojoko ani hag̃ua reja’yvere ha ndahejái repoko hese.
7Ha ko’ág̃a emondo jevy pe kuñakaraípe iména rendápe; ha’e ningo peteĩ proféta, ha’e oñembo’éta nderehe ha nde reikovéta. Ha neremondovéi ramo ichupe, eikuaa porãke, nde remanova’erãha, ha umi nde reheguáva avei.
8Upémaramo Abimelec opu’ã pyhareve ha ohenoimba hembiguaikuérape ha he’ipaite ko’ã mba’e ijapysakuérape; ha okyhyjepa hikuái.
9Upéi Abimelec ohenói Abrahámpe, ha he’i ichupe: Mba’éiko rejapo orerehe. Mba’épe piko che aja’yvere nendive, regueru hag̃ua che ha che retã ári ko mba’evaietéva. Upe rejapo’ỹva’erãva, nde rejapo cherehe.
10Abimelec he’i avei Abrahámpe: Mba’éiko oike ne akãme, rejapo hag̃ua ko’ã mba’e.
11Ha Abraham ombohovái: Ha’e chejupe: Che ningo ndaikuaái ko’ápepa oiméne umi okyhyjéva Ñanderuetéguikuri, ha chejukáne hikuái che rembireko rehehápe.
12Ha añetehápe ha’e che reindy avei, che ru rajy, ndaha’éinte che sy memby, ha amenda hese.
13Ha Ñanderuete cherenohẽ ramoguare che ru rógagui aiko hag̃ua tetã ambuépe che ha’ékuri ichupe: Ko mba’eporã nde rejapóta cherehe, ha mamo ñag̃uahẽha rupi eréta: Ha’e che kyvy.
14Upéramo Abimelec ojapyhy heta ovecha ha vaka, tembiguái kuimba’e ha kuñáva, ome’ẽ hag̃ua Abrahámpe, ha ome’ẽ jevy avei ichupe hembireko Sára.
15Ha he’i Abimelec: Eikuaa porãke, ko che yvy oĩ ne renondépe; eiko mamo iporãveháme ndéve.
16Ha Sárape he’i: Eikuaa porãke, ame’ẽma nde kyvýpe 1.000 pláta pehẽngue, péva topyta ndéve jopói ramo, opavave oikuaa hag̃ua ndojaiha mba’eve ivaíva nderehe ha nde reikoha heko potĩva ramo.
17Upémaramo Abraham oñembo’e Ñanderuetépe; ha Ñanderuete omonguera Abimelec ha hembirekópe, ha hembiguái kuñakuérape, imemby joaite hag̃ua.
18Ñanderuete ombotýgui umi Abimelec rogaygua memby ryrukuéra, Sára, Abraham rembireko rehehápe.
Currently Selected:
Génesis 20: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
