Génesis 22
22
Ñanderuete he’i Abrahámpe oikuave’ẽ hag̃ua Isaácpe
1Ko’ã mba’e rire, Ñanderuete oha’ã (oprova) Abrahámpe, ha he’i ichupe: Abraham. Ha ha’e ombohovái ichupe: Péina ápe aĩ.
2Ha he’i: Eraha ko’ág̃a nde ra’y, ha’eñomíva, Isaac, rehayhuetévape, ha tereho Moría yvýpe, ha upépe eikuave’ẽ ichupe chéve g̃uarã kuave’ẽmby ramo peteĩ cérro ári Che ha’etahápe ndéve.
3Ha Abraham opu’ã pyharevete, ha ombyape hymba búrro ha ogueraha hendive mokõi hembiguái ha ita’ýra Isaácpe; ha oikytĩ jepe’a pe kuave’ẽmbýpe g̃uarã, ha oho Ñanderuete he’i haguépe ichupe.
4Pe ára mbohapyhápe Abraham ojesaupi ha mombyry guive ohecha pe yvy Ñanderuete oiporavova’ekue kuave’ẽmby rendarã ramo ichupe.
5Upéramo Abraham he’i hembiguaikuérape: Peha’ãrõ ko’ápe ko búrro ndive, che ha pe mitã rohóta amoite romomba’eguasu hag̃ua Ñanderuetépe, ha upéi roju jevýta pene rendápe.
6Ha Abraham ohupi pe jepe’a pe kuave’ẽmbýpe g̃uarã ha omoĩ ita’ýra Isaac ati’ýre, ha’e ojapyhy tata ha kyse ipópe; ha oho hikuái oñondive.
7Upéramo Isaac oñe’ẽ itúva Abrahámpe, he’ívo: Nde, che ru, ha ha’e he’i ichupe: Mba’épa, che ra’y. Ha ha’e he’i: Kóina ápe tata ha jepe’a, ha mamo piko oime pe ovecha ra’yrusu reikuave’ẽséva.
8Ha itúva he’i ichupe: Che ra’y, Ñanderuete ohechaukáta pe ovecha ra’yrusu che aikuave’ẽtava. Ha oho hikuái oñondive.
9Ha og̃uahẽvo pe yvy Ñanderuete he’i haguépe ichupe, Abraham omopu’ã peteĩ kuave’ẽmby renda, ha omohendapa rire pe jepe’a ojapy ha ojokua ita’ýra Isaácpe, ha omoĩ pe kuave’ẽmby rendápe, pe jepe’a ári.
10Ha Abraham ipojái ikysére ha ohupi ipo ojuka hag̃ua ita’ýrape.
11Upévo Ñanderuete rembiguái (ángel) osapukái ichupe yvága guive, ha he’i: Abraham, Abraham. Ha ha’e he’i: Péina ápe aĩ.
12Ha pe yvága rembiguái he’i: Ani rehupítei nde po pe mitãre, ha aníke rejapótei hese mba’eve; aikuaáma rekyhyjeha Ñanderuetégui, nerembotovéigui (nerenegái) chehegui nde ra’y peteĩmi jepe.
13Upémaramo Abraham ojesaupi ha oma’ẽ, ha péina ápe ijatukupe gotýo oĩ peteĩ ovecha mácho opa’ãva hatĩgui peteĩ jukeri rakãre; ha oho Abraham ha ojapyhy pe ovecha mácho, ha oikuave’ẽ ita’ýra rekovia.
14Ha Abraham ombohéra pe yvy péva: “Ñanderuete ojehechauka”. Upéicha rupi oñembohéra pe cérro ru’ã ko ára kóva peve: “Ñanderuete ojehechauka.”
15Ha Ñanderuete rembiguái ohenói jevy Abrahámpe yvága guive,
16ha he’i: Chejehe añe’ẽme’ẽ, he’iuka Penderuete, rejapógui ko’ã mba’e ha nerembotovéigui chehegui, nde ra’y ha’eñomíva jepe,
17añetehápe rohovasáta ha amboheta hetavéta ne ñemoñarenguéra umi jasytata árare ojehechávaicha ha pe yvyku’i oĩva pe yguasu rembe’y peguáicha; ha ne ñemoñarenguéra ombopoguýta umi hesekuéra ija’e’ỹva retãnguéra.
18Nde ra’y rupi ovy’aiteva’erã opaite yvy ape arigua tetãnguéra, rejapo haguére che ñe’ẽ.
19Ha ou jevy Abraham hembiguaikuéra rendápe, ha opu’ã hikuái ha oho oñondive Beersébape; ha Abraham opyta Beersébape.
20Ko’ã mba’e rire, oñemomarandu Abrahámpe: Péina ápe, Mílca avei imemby reta Nacor, nde ryvýgui.
21Uz pe ijypykue, ha ityvýra Buz, Kemuel, kóva Aram ru, upéi.
22Quesed, Hazo, Pildas, Jidlaf ha Betuel.
23Ha ko Betuel, Rebéca ru. Ko’ãva hína umi 8 ta’ýra, Mílca imembyva’ekue Nacor, Abraham ryvýgui.
24Ha Nacor kuña, hérava Reúma, imemby avei Teba, Gaham, Tahas ha Maaca.
Currently Selected:
Génesis 22: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
