Génesis 30
30
1Raquel ohechávo ndikatuiha imemby Jacóbope g̃uarã, ou ipy’arasy itykéra ndive, ha he’i Jacóbope: Chemomembýna, upeicha’ỹramo amanóta.
2Ha Jacóbo ipochy Raquel ndive, ha he’i: Che piko Ñanderuete. Ha’e voi ningo ndohejái ndéve nderyeguasu.
3Ha Raquel he’i: Péina ápe che rembiguái Bílha; eikóna hendive ha taimemby ko che rapypa’ũme, ha’érupi che aguerekóta che membyrã.
4Ha péicha ome’ẽ ichupe hembiguái Bílha ikuña ramo; ha Jacóbo oiko hendive.
5Ha Bílha hyeguasu ha ou imemby peteĩ mitãkuimba’e Jacóbope g̃uarã.
6Upéicha rupi Raquel he’i: Ñanderuete ome’ẽ chéve justícia ha ohendu avei che ñe’ẽ, ha ome’ẽ chéve peteĩ mitãkuimba’e. Upéicharupi ombohéra ichupe Dan.
7Upéi hyeguasu jevy Bílha, Raquel rembiguái, ha imemby mitãkuimba’e mokõiha Jacóbope g̃uarã.
8Ha Raquel he’i: Ñanderuete ñorãirõme, añorãirõ che ryke ndive, ha chepu’akáta hese. Ha ombohéra ichupe Neftali.
9Ha Léa ohechakuaávo naimembyveiha, ome’ẽ avei Jacóbope hembiguái Zilpa, ikuña ramo.
10Ha Zilpa, Léa rembiguái, imemby peteĩ mitãkuimba’e Jacóbope g̃uarã.
11Ha Léa he’i: Chepo’a ko’ág̃a, ha ombohéra ichupe Gad.
12Upéi, Léa rembiguái, Zilpa imemby jevy peteĩ mitãkuimba’e Jacóbope g̃uarã.
13Ha Léa he’i: Chepy’arory, umi kuña he’ítagui cherehe pe ovy’áva, ha ombohéra ichupe Aser.
14Ha Ruben oho ñúre, oñemono’õ jave trígo, upépe ojohu peteĩ yva hérava mandrágora, ha ogueru heta yva isy Léape g̃uarã; ha Raquel he’i Léape: Ajerure ndéve reme’ẽmo hag̃ua chéve avei umi yva ne memby mba’évagui.
15Ha Léa he’i: Ndahetáima piko reipe’a chehegui che ména, ha reguerahase avei che memby mandragora’yva. Ha Raquel he’i: Topytána ha’e nendive ko pyharépe ne memby mandragora’yva rehe.
16Ha ka’aru Jacóbo og̃uahẽvo ñúguio, Léa osẽ ojojohu hag̃ua hendive ha he’i: Eikóna chendive, añetehápe rojoguáma che memby mandragora’a rehe. Ha Jacóbo oke Léa ndive pe pyharépe.
17Ha Ñanderuete ohendu Léape; ha hyeguasu ha imemby Jacóbope g̃uarã ita’ýra 5-ha.
18Ha Léa he’i: Ñanderuete omba’emyengovia chéve, ame’ẽ haguére che rembiguái che ménape; upéicharupi ombohéra ichupe Isacar.
19Uperire Léa hyeguasu jevy ha imemby Jacóbope g̃uarã ita’ýra 6-ha.
20Ha Léa he’i: Ñanderuete ome’ẽ chéve jopói iporãitéva; ko’ág̃a opytáta che ména chendive, ame’ẽgui ichupe 6 ita’ýra; ha ombohéra ichupe Zabulon.
21Upéi imemby jevy, peteĩ mitãkuña, ha ombohéra ichupe Dína.
22Ha Ñanderuete imandu’a avei Raquel rehe ha ohendu ichupe ha oheja ha’e imemby hag̃ua.
23Ha’e hyeguasu ha imembývo peteĩ mitãkuimba’e he’i Ñanderuete oipe’aha chehegui pe ñemotĩ aguerekóva.
24Ha ombohéra ichupe Jose, he’ívo: Ñanderuete tome’ẽve chéve ambue mitãkuimba’e.
Ñanderuete omboheta Jacóbo rymbakuéra
25Ha Raquel imemby rire Jose, Jacóbo he’i Labánpe: Cherejána, taha jevy che retãme.
26Eme’ẽ chéve che rembirekokuéra ha che ra’ykuéra, hesekuéra amba’apova’ekue ndéve, ha chereja taha; nde reikuaa voi, amba’apo porã hague ndéve g̃uarã.
27Laban katu he’i ichupe: Tajohu py’aporã nendive, epytamivéna chendive, añandukuaa voi ningo Ñanderuete cherovasa hague ndérupi.
28Ha he’i: Eréna chéve mboýpa ohupity ne rembiapo repy ha che ame’ẽta ndéve.
29Ha Jacóbo he’i ichupe: Nde ningo reikuaa mba’éichapa amba’apo ndéve, ha mba’éichapa oiko ne rymbakuéra che poguýpe.
30Che ajúvo mbovy tymba reguereko ha ko’ág̃a katu hetáma, Ñanderuete nderovasa tuicha che aju guive; ha araka’épa amba’apóta che rogateépe g̃uarã.
31Ha Laban he’i: Mba’épa ame’ẽkuaa ndéve. Ha Jacóbo he’i ichupe: Ani reme’ẽ chéve mba’eve; kóicha rejapose ramo cherehe, añangareko jevýta nde ovechakuéra rehe.
32Ko árape ahasáta mayma ne rymba atyha rupi, ha aiporavóta umi ovecha ipara, ipititi ha hũva, ha umi kavara ipara ha ipititíva ne rymba apytégui; ko’ãvante topyta che rembiapo repyrã ramo.
33Oimeraẽ ára rejukuaa rema’ẽ hag̃ua che rymbakuéra rehe ha rehecháta che reko ipotĩha; rejohu ramo ovecha ipara’ỹva, ipititi’ỹva ha hũ’ỹva ha kavara ipara’ỹ ha ipititi’ỹva che rymba apytépe, nde erekuaa che amonda hague.
34Upéramo Laban he’i: Néi, toiko nde ere haichaite.
35Ha pe árape Laban omboykepa umi kavara ipara ha ipititíva, ha umi ovecha ipara, ipititi ha hũva ijovecha apytégui ha omoĩmba ita’yrakuéra poguýpe.
36Ha omomombyry mbohapy ára ambue ovecha atýgui; ha Jacóbo oñangareko Laban ovecha ha ikavarakuéra rehe.
37Upéi Jacóbo ojapyhy pe yvyra álamo rakã pyahu, yvyra avelláno ha castáño rakã pyahu, ha oipiro umi yvyra rakã opyta hag̃uáicha ipara.
38Ha’e omoĩ umi yvyra oipirova’ekue tymbakuéra renondépe, hoy’uhápe oñemoñemoña hag̃ua.
39Ha upéicha umi ovecha hyeguasu umi yvyra ojepirova’ekue renondépe imemby hag̃ua iparáva meme.
40Ha Jacóbo omboykepa umi ovecha ra’y, umi ipara ha hũva guive Laban rymba apytégui. Ha omoĩ hymba aty ambue yke gotýo, ha nomoĩri Laban rymbakuéra atýpe.
41Jacóbo omoĩnte umi yvyra rakã oipirova’ekue umi ovecha ha kavara imbaretevéva renondépe, umía haku javénte, hoy’uhápe, upéicha oñemoñemoña hag̃ua.
42Ha umi ovecha ikangyvéva renondépe nomoĩri umi yvyra rakã; péicha opyta Labánpe g̃uarã umi ovecha ikangyvéva, ha umi imbaretevéva opyta Jacóbope g̃uarã.
43Upéicha Jacóbo omboheta ohóvo ijovecha ha ikavara aty, icaméllo ha ibúrro aty, ha heta hembiguái kuimba’e ha kuña ohupity avei.
Currently Selected:
Génesis 30: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
