Génesis 32
32
Jacóbo oñembosako’i ojejohu hag̃ua Esau ndive
1Ha Jacóbo oipykúi hape rehe, ha osẽvo ojohu ichupe yvága rembiguaikuéra.
2Ha Jacóbo he’i ohecha vove ichupekuéra: Ko’ápe Ñanderuete rekoha, ha ombohéra ko yvy Mahanaim.
3Ha Jacóbo ojokuái hemimondo henonderãme ityke’ýra Esau rendápe, Seir retãme, Edom ñúme.
4Ha he’i ichupekuéra, péicha pejéta che jára Esaúpe: Péicha he’iuka ne rembiguái Jacóbo, Laban ndive oikova’ekue, ha hendive opyta ko’ág̃a peve:
5Aguereko heta vaka, búrro, ovecha, kavara ha tembiguái kuimba’e ha kuñáva; ajerure che járape, tajohu py’aporã nde resa renondépe.
6Ha hemimondo ou jevy Jacóbo rendápe, ha he’i: Rog̃uahẽ nde ryke’y Esau rendápe, ha ha’e ouhína 400 kuimba’e ndive.
7Ha Jacóbo okyhyjeite ha ojepy’apyete, upévare omboja’o mokõi atýpe hembiguaikuéra, ijovecha, ikavara, ivaka ha icamellokuéra.
8Ha he’i: Esau ojeity ramo peteĩ atýre, pe ambue okañykuaáne ichugui.
9Ha Jacóbo oñembo’e: Che ru Abraham ha Isaac Jára, che Ruete, Nde ereva’ekue chéve: Tereho jevy ne retãme ha nde rogayguakuéra apytépe, ha Che ajapóta nderehe mba’e iporãva;
10ndaijái chéve ahupity hag̃ua ne pytyvõ ha nde poriahuvereko; ko che yvyra jokoha oĩva che pópe rehevémante, ahasava’ekue ko Jordan, ha ko’ág̃a aju jevy mokõi che rymba atyguasu reheve,
11anína chereja ha’a che ryke’y Esau pópe, akyhyje ningo ichugui; anítei ou ha ojukapa ko’ã sy ha imembykuérape.
12Ha Nde voi ereva’ekue: Mba’eporã ajapóta nderehe, ne ñemoñare hetáta ku yvyku’i yguasu rembe’y peguáicha, hetaitereígui ndaikatumo’ãi ojepapapa.
13Upépe Jacóbo oke pe pyhare, ha ombosako’i imba’e apytégui umi jopói ityke’ýra Esaúpe g̃uarã:
14200 kavara kuña, 20 kavara mácho, 200 ovecha kuña, 20 ovecha mácho,
1530 caméllo imembyramóva imembykuéra reheve, 40 vaka, 10 tóro, 20 búrro kuña ha 10 búrro ra’yrusu.
16Ha omoĩ hembiguaikuéra poguýpe, peteĩteĩ aty ojoeheguáva, ha he’i hembiguaikuérape: Pehasa che renonderãme, ha pemopa’ũ pa’ũ tymba atykuéra ojuehegui.
17Ha he’i pe tenondeveguávape: Ndejohu ramo che ryke’y Esau, ha ha’e oporandu ramo ndéve: Ndépa, máva mba’e, ha mamo piko rehoreína, ha máva mba’erã piko ko’ã mymba regueraháva ne renonderãme.
18Upéicha ramo, eréta: Ko’ãva hína ne rembiguái Jacóbo mba’e, oguerahaukáva jopói ramo ijára Esaúpe; ha péina ha’e ou avei ore rapykuéri.
19Ha upéicha he’i avei mokõiháme, mbohapyhápe ha opavavépe ohóva hymba aty michĩva reheve ojejohu hag̃ua Esau ndive.
20Ha pejéta avei ichupe: Péina ne rembiguái Jacóbo ouhína ore rapykuéri. He’ígui ipy’apýpe: Amboguemivéta ipochy rendy ko’ã jopói rupi, ohóva che renonderãme, ha uperire ae ahecháta hova; ko’ã jopói rupi ha’e chemog̃uahẽ porãne.
21Upéicha omondo ijopoikuéra henonderãme; ha’e katu opyta pe pyhare ambue hembiguaikuéra ndive hekohápe.
Jacóbo oñorãirõ pe yvága rembiguái ndive Peniélpe
22Pe pyharépe Jacóbo opu’ã ogueraha hag̃ua hembireko mokõivévape, hembiguái kuña mokõivévape ha umi 11 ita’ýrape ha ohasa pe ysyry Jaboc mboypýri, pe páso oĩháme.
23Ombohasapa rire ichupekuéra ha opaite mba’e oguerekóva guive,
24Jacóbo opyta ha’eño tapykuépe ha ou peteĩ oñorãirõva hendive ko’ẽju peve.
25Ha ha’e oñandúvo ndaipuakaiha Jacóbo rehe, opoko humby rajygue rehe, ha oñorãirõ aja hendive osẽ hendágui Jacóbo retyma rajygue.
26Ha ha’e he’i Jacóbope: Epoína chehegui, ko’ẽtĩmako. Ha Jacóbo he’i ichupe: Ndapoimo’ãi ndehegui ndacherovasái ramo.
27Ha’e he’i ichupe: Mba’éicha piko nde réra. Ha ha’e he’i ichupe: Jacóbo.
28Ha upe yvága rembiguái he’i ichupe: Nandereramo’ãvéima Jacóbo, nderérata Israel, reñorãirõ haguére Ñanderuete ndive ha yvyariguakuéra ndive, ha ndepu’akágui hesekuéra.
29Upéramo Jacóbo oporandu ichupe, ha he’i: Emombe’umína ko’ág̃a chéve nde réra. Ha upe yvága rembiguái he’i ichupe: Mba’upe piko reporandu chéve che réra rehe, ha ohovasa ichupe upepete.
30Ha Jacóbo ombohéra pe yvy Peniel, he’gui: Ñanderuete ndive roma’ẽ ojováre ha namanói.
31Ha ohasapávo Peniel, osẽ kuarahy, ha Jacóbo opyta ikarẽ.
32Upévare Israel ñemoñarenguéra ko ára kóva peve ndo’uiva’erã tymba rumby rajygue ro’o (cuárto); Ñanderuete opoko haguére Jacóbo rumby rajygue rehe.
Currently Selected:
Génesis 32: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
