Génesis 34
34
Siquem orãirõ Dínape
1Osẽ Dína, Léa membykuña ha Jacóbo rajy, ohecha hag̃ua umi tetãygua rajykuérape.
2Ha ohecha ichupe Siquem, Hamor, pe Hevgua ra’y, ha upe tetã ruvicha ra’y ha orãirõ ichupe.
3Hi’ánga katu oñemokunu’ũ Dína, Jacóbo rajýre ha ou ohayhueterei pe kuñataĩme, ha oñe’ẽ porã pe kuñataĩ py’apýpe.
4Ha Siquem oñe’ẽ itúva Hamórpe, he’ívo: Toñeme’ẽ chéve ko kuñataĩ che rembirekorã ramo.
5Ha Jacóbo ohendúvo Siquem omongy’a hague itajýra Dínape, ndojapói mba’eve ita’yrakuéra ou peve ñúgui, oñangareko hágui hymbakuéra rehe.
6Ha Hamor, Siquem ru, oho Jacóbo rendápe oñe’ẽ hag̃ua hendive.
7Ha Jacóbo ra’ykuéra oikuaa vove pe ojehuva’ekue ou hikuái pochypópe ñúgui; ha umi kuimba’e ombyasy joa ojejapo haguére ko tembiapo ky’a vai Israel rehe, orãirõgui Jacóbo rajýpe ha ojejapógui mba’evai ojejapo’ỹva’erãva.
8Ha Hamor oñe’ẽ hendivekuéra, he’ívo: Che ra’y Siquem ohayhueterei nde rajýpe; ajerure peẽme peme’ẽ hag̃ua ichupe Dínape hembirekorã ramo.
9Ha jaiko porã oñondive peteĩ tetã ramo, peme’ẽvo oréve pende rajykuéra, ha ore rome’ẽvo peẽme ore rajykuéra.
10Upéicha ikatu pepyta ko tetã ryepýpe, peheka ha peiporavo pende rekoha rendag̃ua peipotahápe.
11Siquem he’i avei Jacóbo ha ita’yrakuérape: Tajohu py’aporã pende resa renondépe, ha peẽ pejeruréva guive ame’ẽta hese.
12Ohasa ramojepe pe menda repy ha pe jopói, che ame’ẽmbáta peẽ pejeruréva guive hese; peme’ẽnte chéve pe kuñataĩ che rembirekorã ramo.
13Jacóbo ra’ykuéra katu ombotavy Siquem ha itúva Hamórpe, omongy’a haguére heindy Dínape.
14Upévare he’i hikuái ichupe: Ndaikatúi rome’ẽ ore reindy kuimba’e oñekytĩ’o’ỹva’ekuépe (oñecircuncida’ỹva’ekuépe), mba’e ivaietégui péva ore apytépe.
15Ore pombojeroviáta: Peikóta ramo orekuéraicha avei, ha oñekytĩ’o ramo avei pende apytépe opaite kuimba’e remboakã pire’i.
16Upéicharamo rome’ẽta peẽme ore rajykuéra, ha ore romendáta pende rajykuéra rehe ha jaikóta peteĩ tetã ramo.
17Ha peẽ ndapejaposéi ramo péva rogueraháta ore reindy ha rohopáta.
18Ko’ã ñe’ẽ iporãitereívaicha Hamor ha ita’ýra Siquémpe.
19Ha pe karia’y noñemombeguéi ojapopa hag̃ua, ohayhuetereígui Jacóbo rajýpe; ha Siquémpe ojehayhuve itúva Hamor rógape.
20Hamor ha ita’ýra Siquem oúvo pe táva rokẽme, oñembyatyhápe itavayguakuéra he’i hikuái ichupekuéra:
21Ko’ã kuimba’e og̃uahẽva ko’ápe oiko hag̃ua py’aguapýpe ñande apytépe ha toiko hikuái oikosehápe; ituichaiterei voi ningo ñane retã, upévare ñamendáta itajyrakuéra rehe ha ñame’ẽ avei ñande rajykuérape ichupekuéra hembirekorã ramo avei.
22Jaiko hag̃ua peteĩ tetã ramo, ojerure katu hikuái opaite ñande kuimba’ekuéra ñaikytĩ’o hag̃ua ñande pire’i, ha’ekuéra ojapohaichaite jajapo ñande avei.
23Hembiapo repyrã imba’erepyetakuéra ha hymbakuéra ñane mba’erã meme; jaikónte peteĩ ñe’ẽme, ha oikóta hikuái ñande apytépe.
24Umi tavaygua inẽ’ẽrendu joaite Hamor ha Siquémpe ha oñekytĩ’o joaite hikuái, osẽva guive pe táva rokẽ rupi.
25Ha ojehu pe ára mbohapyhápe, hasyve jave hikuái, mokõi Jacóbo ra’y, Simeon ha Levi, Dína kyvykuéra, ojapyhy ikyse puku, ha oike hikuái pe távape, ha ojuka opaite kuimba’ekuérape, ha’ekuéra noha’ãrõigui mba’eve ivaíva.
26Ha kyse puku rãimbekuépe ojuka hikuái Hamor ha ita’ýra Siquémpe ha ogueraha Dínape Siquem rógagui, upéi oho hikuái.
27Ha Jacóbo ra’ykuéra oike pe távape, ha omondapa omongy’a haguére hikuái heindýpe.
28Ogueraha hikuái ijovecha, ivaka, iburrokuéra ha opaite mba’eporã oĩva guive itáva ha iñúme,
29ha oguerahapa imitã ha opaite ikuñakuéra hembiguairã ramo, ha omondapa hikuái avei opaite mba’e ojohúva guive hogapypekuéra.
30Upémaramo Jacóbo he’i Simeon ha Levípe: Peẽ chemyangekõi, peẽ chemoĩ vaígui ko’ã tetãygua, umi Canaangua ha umi Ferezgua apytépe; ñande ningo ñanembovyeterei, ha’ekuéra oñembyaty ramo oñorãirõ hag̃ua ñanendive ñandejukapaitéta.
31Ha’ekuéra katu he’i: Mba’érepa roheja reíta ichupekuéra ojapo rire ore reindýre kuña heko vaíva ramoguáicha.
Currently Selected:
Génesis 34: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
