Génesis 38
38
Juda ha Tamar
1Ojehu umi árape, Juda ojei ityke’yrakuéra apytégui, ha oho peteĩ kuimba’e Adulamgua rendápe, hérava Hira.
2Upépe Juda ohecha peteĩ kuñataĩme, Sua héra, kuimba’e Canaangua rajy, ha omenda hese.
3Ha pe kuña hyeguasu ha imemby peteĩ mitãkuimba’e, ha ombohéra ichupe Er.
4Ha hyeguasu jevy ha imemby ambue mitãkuimba’e, ha ombohéra ichupe Onan.
5Ha hyeguasu jevy ha imemby jevy peteĩ mitãkuimba’e, ha ombohéra ichupe Sela. Ha oiko hikuái Kezíbpe imemby ramoguare.
6Upéi Juda omomenda ita’ýra ypykue Er peteĩ kuñáre, hérava Tamar.
7Ha Er, Juda ra’y ypykue, oiko vaietereígui Ñanderuete resa renondépe, Ñanderuete oheja ha’e omano.
8Upéramo Juda he’i Onánpe: Eiko nde ryke’y rembirekokue ndive ha emenda hese, ha emopu’ã nde ryke’ýpe g̃uarã iñemoñarenguerarã.
9Ha Onan oikuaávo iñemoñare ndaha’eitaha imba’erã, omomba okápe oiko jave ityke’ýra rembirekokue ndive, ani hag̃ua ombohyeguasu ichupe ha ani hag̃ua ombota’ýra ityke’ýrape g̃uarã.
10Ha pe ha’e ojapóva jepi naiporãi Ñanderuete resa renondépe, upévagui oheja ha’e omano avei.
11Ha Juda he’i ita’ýra rembirekokuépe: Epyta menave’ỹre (viúda) nde ru rógape, okakuaapa peve che ra’y Sela; he’ígui ipy’apýpe: Aníntemo omano avei ha’e ityke’yrakuéraicha. Ha Tamar oho opyta hag̃ua itúva rógape.
12Heta ára ohasa, ha omano Juda rembireko, Súa rajy. Ha Juda oñemoangapyhy rire ojupi Timnátpe ijovechakuéra apĩha rendápe, ha’e ha iñirũ Hira, pe Adulamgua ndive.
13Ha oñemomarandu Tamárpe, ha oje’e ichupe: Eikuaáke, ne menare ru ojupi Timnátpe oñapĩ hag̃ua ijovechakuéra.
14Upéramo Tamar oipe’a ijao menave’ỹ reheguáva, ha oñemo’ã peteĩ ahojápe, ha oguapy Enaímpe, Timnat rape ypýpe; ohechágui Sela okakuaambamaha, ha noñeme’ẽi ichupe hembirekorã ramo.
15Ha Juda ohecha ichupe, ha oimo’ã ha’eha peteĩ kuña heko vaíva, Tamar omo’ãgui hova.
16Juda oñemboyke hapégui oho hag̃ua hendápe, ha he’i ichupe: Cherejamína taiko nendive, ndoikuaáigui ha’e ita’ýra rembirekokueha; ha Tamar he’i ichupe: Mba’éiko reme’ẽta chéve reiko hag̃ua chendive.
17Ha ha’e he’i ichupe: Che aguerahaukáta ndéve che rymbakuéra apytégui peteĩ kavarara’y. Ha Tamar he’i ichupe: Eme’ẽ chéve peteĩ ne mba’erepy reguerahauka peve chéve pe kavarara’y.
18Upéramo Juda he’i: Mba’eichagua mba’erepýpa ame’ẽta ndéve. Ha Tamar he’i ichupe: Ne kuãirũ, nde ajurigua ha nde yvyrapo’i reguerekóva nde pópe. Ha ha’e ome’ẽmba ichupe, ha oiko hendive, ha Tamar hyeguasu ichugui.
19Upéi opu’ã ha oho, oipe’a ijahoja, ha omonde jevy ijao menave’ỹ ao reheguáva.
20Ha Juda oguerahauka peteĩ kavara ra’y hendápe iñirũ Adulamgua rupi, ogueru jevy hag̃ua imba’erepy upe kuña upévagui, ndojohuvéi katu ichupe.
21Ha oporandu kuimba’ekuéra upe rupiguávape, he’ívo: Mamo piko oime pe kuña heko vaíva Enaim rapépe oĩva’ekue. Ha he’i hikuái ichupe: Ko’ápe ndaipóri mba’eveichagua kuña heko vaíva.
22Upéramo ha’e ou jevy Juda rendápe, ha he’i: Ndajohúi ichupe; ha umi kuimba’e uperupiguáva he’i: Ndaipóri ko’ápe mba’eveichagua kuña heko vaíva.
23Ha Juda he’i: Topyta che mba’ekuéra ipópe ani hag̃ua avave oñembohory cherehe; péina ápe che aguerahaukáma peteĩ kavara ra’y, ha nde nderejohúi ichupe.
24Ha ojehu oiméne mbohapy jasyjere haguépe oñemomaranduka Judápe, he’ívo: Tamar, nde ra’y rembirekokue, oiko kuña heko vaíva ramo ha hyeguasúma avei. Ha Juda he’i: peguenohẽ ichupe (pe távagui) ha tojehapy ichupe.
25Ha oñeguenohẽvo Tamárpe, he’iuka imenare rúpe: Ko’ã mba’e járagui cheryeguasu. Ha he’iuka avei: Ema’ẽ porã, ko’ã mba’e rehe: Pe kuãirũ, pe ajurigua ha pe yvyrapo’i rehe.
26Ha Juda ohechakuaávo imba’eha, he’i: Ha’e heko potĩve chehegui, name’ẽi haguére ichupe che ra’y Sela imenarã ramo. Ha uperire araka’eve ndoikói hendive.
27Ha ojehu og̃uahẽvo pe ára imemby hag̃ua, péina ápe oguerekóra’e hetepýpe mokõi mitã.
28Ha imemby jave, peteĩ oguenohẽ ipo, ha upe kuñakarai oipytyvõva ichupe omomemby hag̃ua ojapyhy peteĩ inimbo pytã ha oñapytĩ ipyapýre ha he’i kóa raẽ osẽta.
29Ha omoinge jevy rire ipo, péina ápe ityke’ýra raẽ osẽ; ha pe kuñakarai he’i: Remondoro hag̃uánte pe tape reju, ha ombohéra ichupe Pares.
30Upéi, osẽ ityvýra, inimbo pytã ipyapýre, ha ombohéra ichupe Zára.
Currently Selected:
Génesis 38: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
