Génesis 40
40
Jose omyesakã iñirũ ke peguare
1Ha ko’ã mba’e rire, pe Egípto retã ruvicha váso rerojaha ha pe pan apoha oja’yvere ijára, pe Egípto retã ruvicha ndive.
2Ha faraon ipochy umi mokõi mburuvicha ndive, pe váso rerojaha ruvicha ndive ha pepan apoha ruvicha ndive,
3ha omoingeuka ichupekuéra cárcelpe, pe cárcel ruvicha rógape, Jose oĩháme.
4Ha pe cárcel ruvicha omoĩ ichupekuéra Jose poguýpe, ha ha’e oñangareko hesekuéra; ha heta ára oĩ hikuái oñondive pe cárcelpe.
5Peteĩ pyharépe mokõivéva ohecha iképe umi mba’e ojepy’apýva ichupekuéra.
6Ha pyhareve Jose ou hendapekuéra, ha oma’ẽvo hesekuéra, ohecha mokõivéva hova ñembyasyha hikuái.
7Ha oporandu umi faraon rembiguaiguasúpe, oĩva pokuahápe hendive ijára rógape, he’ívo: Mba’érehe piko pende rova ñembyasyete ko árape.
8Ha he’i hikuái ichupe: Rohechákuri ore kepegua, ha ndaipóri avave oikuaaukáva mba’épa he’ise. Upéramo Jose he’i ichupekuéra: Ñanderuete ikatu oikuaauka mba’épa he’ise. Pemombe’u chéve ko’ág̃a.
9Upéramo pe váso rerojaha ruvicha omombe’u Josépe ike pegua, ha he’i ichupe: Che ahechákuri che képe peteĩ parral máta che renondépe,
10ha pe parral rakã rehe oĩ mbohapy hakã pyahu; umía ipotypa, ha hi’akuéra hi’ajupa.
11Ha faraon váso oĩ che pópe, ha ajapyhy umi parral’a ha añami faraon vásope ha ambohasa pe váso faraon pópe.
12Ha Jose he’i ichupe: Kóva he’ise: Umi mbohapy parral rakã pyahu he’ise mbohapy ára.
13Ha águi mbohapy arahápe faraon nemoakãrapu’ãta, ha nemoĩ jevýta ne rendaguépe, ha nde reme’ẽ jevýta pe váso faraon pópe, rejapo haguéicha ha reiko jevýta iváso rerojaha ramo.
14Nemandu’ákena cherehe, ojehu ramo ndéve ko’ã mba’eporã, ha ajerure ndéve cheporiahuvereko ha nemandu’a hag̃ua cherehe faraónpe, ha’e cheguenohẽ hag̃ua ko óga kóvagui.
15Che añemonda Israel retãgui; ha ápe ndajapói mba’eve ivaíva chemoĩ hag̃ua ko cárcelpe.
16Ha ohendúvo pe pan apoha ruvicha Jose oñe’ẽ porã hague, he’i avei ichupe: Che avei ahechákuri che képe mbohapy ajaka morotĩva che akã ári.
17Pe ajaka ijyvatevévape oĩ opaichagua pan faraónpe g̃uarã; umi guyra katu ho’u joa pe ajaka oĩva che akã árigui.
18Upéramo Jose ombohovái, ha he’i ichupe kóa he’ise: Umi mbohapy ajaka he’ise avei mbohapy ára.
19Águi mbohapy arahápe faraon neakã’óta, nemosãingóta yvyráre ndejuvy hag̃ua, ha guyrakuéra ho’úta nde ro’okue.
20Ha pe ára mbohapyhápe, faraon hi’aramboty jave, tetã ruvicha ojapo peteĩ karuguasu opaite hembiguaikuérape g̃uarã; ha omoakãrapu’ã pe váso rerojaha ruvichápe ha pe pan apoha ruvichápe umi hembiguaikuéra apytépe.
21Ha hendaguépe omoĩ jevy pe váso rerojaha ruvichápe ha ha’e ome’ẽ jevy pe váso faraon pópe.
22Ha pe pan apoha ruvichápe katu ojuvyuka, Jose he’i haguéicha ichupekuéra.
23Ha pe váso rerojaha ruvicha katu naimandu’ái Jose rehe, hesarái ichugui uvei.
Currently Selected:
Génesis 40: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
